زواج سوداناس

علاج جماعي


الفاتح جبرا

شارك الموضوع :

ظاهرة غريبة لاحظها المواطن (عوض) وهو يهم بالدخول إلى احدى الصيدليات لشراء دواء لعسر الهضم .. فقد لاحظ عدداً من المواطنين يقفون أمام الصيدلية وهم يحملون (روشتات) في أيديهم ويتحاورون فيما بينهم ، إتجه لإحدي تلك المجموعات :

– ياخونا عاوز أدوية لشنو؟
– والله يا جماعة أنا عندي عسر هضم شديد !
– أمشي أقيف هناك مع الجماعة ديلك .. ديل ناس الباطنية
– وإنتو ناس شنووو؟
– نحنا ناس (المخ والأعصاب)
– لا أنا بقصد إنتو قاعدين تعملو في شنوو هنا؟
– شوف يا أبن العم .. قالو الفقراء إتقاسمو النبقة ..
– والنبق ده بعالج شنوو؟
– يا خ نبق شنو .. أنا بقصد ليك نحنا بنتشارك الدواء
– كيف يعني؟
– أيووا أقول ليك … شفتا النسوان الهناك ديل .. عاوزين أدوية نساء وولاده .. والشايلات الشفع ديلك ديل الناس العايزة أدوية أطفال … والجماعة الماشين بالعكاكيز ديل بتاعين العظام .. وديلك بتاعين الضغط والسكري و …
– (مقاطعا) : والفكرة شنو يعني؟
– أيوااا أقول ليك …(يمد إليه الروشتة) شفتا هسه الدواء داء؟ داء دواء بتاع (صرعة) الزول مفروض ياخد منو كل يوم حبه ..
الكورس فيهو ستة حبات بي ألف وميتين جنيه .. يعني الحبة الواااحدة بي ميتين جنيه !! أها نجيبا من وين؟
– صعبة والله
– أها عشان صعبة دي قلنا نسهلا شوية لحدت ما الله يفرجا
– عملتو شنووو ؟
– أقول ليك .. نحنا هسه ناس المخ والأعصاب ذي 12 مواطن .. أها نقوم نعمل لينا (صندوق) يعني (ختة) .. كل زول يدفع عشرة ألف .. نقوم نشتري الدواء ونتقاسمو .. كل زول ينصيبو يكون (نص) حبه !
– نص الحبة دي بتعمل شنووو؟ ما قلتا المفروض (حبة في اليوم)
– نص الحبة دي بتخلي الزول عندو (نص صرعة) بدل صرعة كاملة .. يعني الكهرباء بتاعتو بتنخفض شوية .. !!
وبينما كان عوض يستمع إلى ما يقوله مريض المخ والأعصاب لفت نظره عدة أشخاص في مجموعة أخري يقفون صفاً وأمامهم يقف أحدهم أمام الصف (ذي الألفة) :
– يا جماعة أقيفوا صف تمام وكل زول يفتح خشمو .. فتحة واحده .. البقفل خشموا ده ما يجي يقول ليا عاوز (بخة تاني)
– (يفتح الجميع أفواههم بينما يقوم الشخص بالإمساك ببخاخ (الأزمة) …
– واحد أتنين تلاته .. (ثم يمرر يده ببخة سريعة واحدة أمام أفواه المرضي … ثم يختتمها ببخة لنفسه) !
– (أحدهم محتجاً) : إنتا بختك دي يا معلم أطول من بختنا !
– (آخر) : والله فعلاً ,, العندو القلم ما بكتب نفسو شقي
– (ثالث) : هو أي زول يمسكوهو حاجه في البلد دي يقوم يبلعا لي روحو
– يا جماعة ما تكوركو ساي والله (بختي) قدر بختكم بالضبط
– (أحدهم) : يا زول إنتا ما بتنفع رئيس للمجموعة دي .. ح تضيع لينا (مواردنا) ساااكت .. البخاخ ده ح ينتهي في بختين بس
– أنا ما عندي مشكلة .. ممكن أي زول فيكم يجي يمسك بدلي .. بس في الأول نعمل حوار !!
– (الجميع بصوت واحد) : حوار شنووو .. إنتا عاوز نفسنا ينقطع !!

كسرة :
• ح يجي يوم الطبيب يكتب للمريض مضاد حيوي (مصة) تلاته مرات في اليوم
• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+وووووووووووو)+ (وووووووووووو)+(وووووووووووو)+(وووووووووووو)+ (وووووووووووو)+(وووووووووووو) +و+و

• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+و+و+(و)+و+(و)+و+و+و

• كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنو (وووو)+(وووو) +و

ساخر سبيل – الفاتح جبرا

شارك الموضوع :

تعليقات الفيسبوك

تعليقات


1 التعليقات

      1. 1
        سودانى مغبووووون

        الله يجازى محنك ياجبره … قطعتى مصارينى من الضحك .. طبعا انا ماتخيل شكل البخه الطويله والججماعه فاتحين خشومهم بالصف .. يديك العافية … ومايحوجك لى بندولايه …

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *