زاهر بخيت الفكي

يمكن ..!!


قادر ربي ..وهّاب المُلك والمال
يرفع من يشاء ..يذل لكل مُتعال
ينزع للمُلك إن شاء ..بغير جدال
بين ليلة وضُحاها ..تتبدّل الأحوال

عاجبك منصبك ..روحك كمان عاجباك
قايل بلدي هيلك ..خيراتا ليكا براك
تسرح فيها تمرح ..ناسينا نحنّ معاك
عِقرت حواء قايل جفّ الرحم بوراك

ضاقت علينا شديد ..لمن لِحسنا الكوع
حاصرنا الفقُر ..حسينا بيهو الجوع
ملينا الكلام ..الفاضي من موضوع
لا اشتغلت مصانع ..لا اتعمّر المشروع

تهديد بالعصِر ..ولله ما بخوفنا
بنخاف من إله ..سامع كمان شايفنا
من كُتر الكلام ..شبعنا نحنا قِرفنا
انقطع العشم ..الفيكم حقيقي عرفنا

اتهدت عُروش ..ما قلنا يوم تنهار
قلعوها الشباب ..لا (شعبي) لا (أنصار)
ما من جوع تهاوت ..لا عاقبوها حصار
بس الساسة كانوا واقفين وراهو جدار

راجين حوار الوثبة ..(يمكن) نلموا شتاتنا
يجمع بينا (يمكن) ..تقوى بيهو صلاتنا
(يمكن) يدور المصنع ..تنتج عُقُب واطاتنا
باكر نأسس دولة ..(يمكن) نفوت الفاتنا

بلا أقنعة – زاهر بخيت الفكي
صحيفة الجريدة