رأي ومقالاتمدارات

انا اول المرحبين بالصينين في السودان


سمعت وقرأت عن الخبر الذى مفاده أن مليون صينى سوف يوطنون فى السودان ويملكون الأراضي الزراعية ولا أدرى سوف يمنحون الجنسية أم لا ؟ وان ذلك قد تم وفق صفقة بين الحكومة السودانية والصينية مقابل إعفاء ديون السودان والتى بلغت المليارات لدى الصين .
وقرأت الكثير من المقالات والمنشورات التى تتباكى على بيع تراب الوطن .. وأنا أقول والله انا اول المرحبين ولو زادوهم مليون تانى كمان يكون أفضل .. والمفروض نحن ندفع ليهم قروش كمان عشان يجونا ويشاركونا فى إصلاح هذا الحال المايل .. بالله عليكم نحن ومنذ الاستقلال عملنا شنو .. انتجنا شنو .. صنعنا شنو ؟ نحن ما عندنا غير الكلام وطولة اللسان !!!
واحد وستين سنة انتفاضة .. أحزاب .. انقلاب .. انتفاضة .. أحزاب .. انقلاب . وكمان حروب وصراعات دينية وقبلية وعرقية … لا عندنا تعليم ، لا عندنا صحة ، لا خدمة مدنية ، وعندنا عشرين نهر ونحن عطشانين وجعانين ؟
خلوهم يجوا يعلمونا الزراعة الحديثة .. خلوهم يجوا يصنعوا لينا الأدوية والامصال والمعدات الطبية .. خلوهم يجوا يعلمونا الوطنية ….
تذكرت زمان ونحن فى الأولية كانوا بدرسونا فى كتاب الكشكول طه القرشى مريض .. طه القرشى فى المستشفى .. وطبعا ده زولنا نحن وأعتقد إلى الآن ما زال مريضا ولم يتعافى ، بينما كانوا يدرسوننا عن اهتمام الطالب الصينى ونجابته واهتمامه وجده ومثابرته وحرصه على العلم والتعليم فكان يربط شعر رأسه بخيط يتدلى من أعلى متى ما ادركه النعاس شده الخيط وافاق للقراءة مره اخرى .. وجمع أحدهم جوهرات الخريف ليرى بها السطور لعدم وجود النور عشان يحل الواجب المدرسى .
انا ما عارف نحن خايفين من شنو .. أو الخايفين عليهو شنو ؟ نحن محتاجين لخبرات ولو الجماعة ديل سوف ينقلون لنا صورة مصغرة من الصين .. العلم والتطور والتكنولوجيا فى كل المجالات .. انا اول من يرحب بهم وحبابهم عشرة ، وهي يعنى القصة وقفت بس على المليون صينى ماهو البلد مليانه من مجاميعو …
وأنا أرى العكس إذا صح الخبر وتحققت الإرادة سيكونون الضمانة للاحتفاظ بما تبقى لنا من هذا الوطن .. يعنى ورانا دولة عظمى ولنا معها مصالح مشتركة …
يا حليلكم يا الصينيين .. زمان علمونا فى الدين ، اطلبوا العلم ولو بالصين ، انتوا جيتوا تطلبوا العيشة ولو بالسودان ، جيتونا فى محلنا حبابكم عشره بلا كشره ومرحب بى طقم الصين كلو .. والطلبة جوا ماشين يا بمبو .. لابسين فنايل الصين يا بمبو .
ودمتم بخير ..

احمد بطران


‫18 تعليقات

  1. ههههههه… مرة اضحك ومرة ابكى ومرة اتحمل اسايا..
    كتر خيرك ياود بطراان ماخليت لينا صفحة نرقد عليها.. وعلى قولك الراقدين ليها شنى؟!

  2. ود بطران اي مقال كان ينزل هنا من طرفك كنت بقراهو و مرات بعلق فيهو كمان
    لكن المقال ده يا زول ما عجبني خالص منك …
    هل تفتكر الصين حترسل ليكم مليون فرد فيهم العلماء و المهندسين و الأطباء … الخ
    اظنهم عايزين يفضو سجونهم من ساكنيها لأنهم عاله علي الدوله … الحكايه دي عملتها أوروبا عندما اكتشفوا أمريكا و استراليا و في عصرنا هذا عملها كاسترو مع أمريكا. .. نسبه الجريمه مرتفعه في ميامي نسبه لكثرة المهاجرين من كوبا ..معظمهم من سجون كوبا دخلو سجون ميامي تاني و قليل منهم من انعدل حاله

  3. لا أهلا ولا مرحبا بهم في السودان و احسن لينا بلدنا تكون متخلفه و فقيره مما تتعمر علي ايدي الأجانب فهؤلاء تنقصهم الوطنيه مهما قدمو للبلد من خبرات فلن يكون من أجل سواد عيون الوطن و إنما من أجل مصالحهم الشخصية فقط

  4. يا شيخنا
    هل تفتكر انو مشكلتنا انتجاج
    نحن مشكلتنا حكومه بتعطل الانتاج. ارجع لورا وشوف قبل التسعينات كان انتاجنا قدر شنو ؟ وكانوا ناس الريف اصلا ما بحبو المدن لانو عندهم اى شى. لكن بعد ما جات حكومتك دى. كرهت الناس بالضرايب الكتيره عشان كده هجروا الزراعه لعدم جدواها.

    وهل تفتكر انو الصينيين جايين عشانك سواد عيوننا. أسأل اى زول اشتغل معاهم. ح يوريك حجم رداءة شغلهم

  5. يا جماعة انتو قايلين الصين حا تجيب ليكم عباقرة ومهندسين ومخترعين.
    حا تجيب ليكم مساجين ومجرمين محكوم عليهم بالمؤبد وهم يكلفون الحكومة الصينية سجن واعاشة فقالت تفكهم في السودان. وانتو فرحانين بيهم

  6. مرحبا بهم فهم شعب عملي لا يعرف الكسل عسي ولعل نتعلم منهم سوا كانوا علماا او مساجين ان اول حضارة الان هي امريكا بنيت بايدي مساجين دول اوربا سابقا

  7. اقترح استجلاب عدد 2 مليون (مليون صيني اعزب و مليون صينية عزبا ).
    ليتم انتاج شعب جديد تحت مسمي الشعب السوصيني ؟؟؟

  8. كنا مسلمين ومسيحين وبعد ده معابد البوذين كيف وتجارة سوداء ودعارة عينك يا تاجر والبتكلم عندهم عصابات جاهزة شد حيلك يا ود بطران تاني اذان مافي ناس كتار بعبدوا لااصنام عندك طيب كان احسن الجنوب

  9. السيد بطران ربما يعتقد أن الصينيين سيأتون ليعمروا البلاد و يفيدوا الشعب السوداني, أرجع الى ملف البترول السوداني و الذي حتما” سيأتي اليوم الذي يحاسب فيه كل من أجرم في حق السودان, الصين كسبت ثلاثة أضعاف العوائد على البترول في التنقيب و الانتاج و الترحيل و البيع و المحصلة النهائية ان السودان أصبح مدينا” للصين بمليارات و الحل هو تسليم اراضي و خيرات السودان كسداد لديون ما كانت لو كان هناك من يهمه مصلحة شعبه .

    الموضوع أشبه بمن يكتب شيك بدون رصيد لتاجر يتعامل بالربا و يمهله مقابل زيادة الدين و المحصلة انه سيعيش و يموت معدما” و يورث ابنائه الفاقة .

  10. بطران بي شنو ؟؟ بغبأك ولا بي سطحيتك ؟ ولا بي انبطاحك ؟ ولا بي تنصلك من شعبك ؟ ولا بي وقوفك مع الباطل ؟؟؟؟

    ما شاء الله مليون عالم صيني جاين يستوطنو السودان بعد ان عجزت حكومتنا الموقرة عن السداد .. 13 مليار دولار دين الصين المستحق على السودان ..
    لو سألنا ال 13 مليار دي مشت وين ؟ مافي زول ح يجاوبك ؟

    الكيزان يابطران بعد انتهو من اي شي الاخضر واليابس وفصلو البلد وهجرو الشعب وباعو الدهب والنفط قالو بعد ده خلاص نديها الصين ..
    لو انت يابطران مابتشتغل وكسلان واتكالي وداير الصينين يشتغلو ليك ويبنو ليك ماتعمم على باقي الشعب المغلوب على امرة ..

    ياخي الكيزان ساعة غلبتهم للدرجة دي يتخارجو كفاهم لكن مايتحكمو بمصير الاجيال القادمة زي مافصلو الجنوب كان برضو بقدرو يخلوها زي ماهو لحدي مايجي جيل واعي يحل المشكلة . البلد ماحقت ابواتهم .

  11. نحن السودانيين بنقلل من قيمتنا و من قيمه بلدنا برانا … و نحن لازم نغير نظرتنا دي لنفسنا و لبلدنا و نقيم الأمور بطريقه منطقيه شويه
    الله سبحانه وتعالى أكرمنا و أنعم علينا بالإسلام و الحمد لله … شعب موحد يعبد الله و يسلك سنه رسوله الكريم و يتخلق بأخلاقه النبيلة و السمحه لا يمكن أن تقارنه بشعب لا عقيده له و يعبدون شخص اسمه بوذا .
    ما أبعد الهوة الأخلاقية و الدينيه بيننا و بينهم … نحن قدوتنا الرسول صلى الله عليه وسلم و هم قدوتهم ماو سي تونق
    نحن كتابنا القرآن الكريم و هم كتابهم حكم و أمثال لأشخاص و أفراد
    فكر في هذا الاختلاف جيدا لتعرف مدي ما نحن فيه من نعم الله فلماذا نبخس بأنفسنا لهذه الدرجه و نحن الأفضل. ..
    لماذا نحسر رؤسنا هكذا أما الصينيين و غيرهم و نتخيل بأنهم الأفضل
    و إذا نظرنا للجانب الدنيوي فبلادنا و الحمد والشكر لله غنيه جدا و السوداني لا يقل في الإبداع و الإنتاج و العمل عن أي مخلوق آخر. .. فقط نحتاج لوقفه مع أنفسنا و نحتاج لجرعات من الثقه في النفس و الاعتزاز بها و ان نكون قادرين علي رفع راسنا لاعلي و ان نعرف مقدار أنفسنا .
    و الله يا اخوه انا اتحدث من خلال تجربه عمرها 35 سنه غربه .تجربه في الجامعات في أوروبا. .. تجربه دراسات في أمريكا و تجربه الحياه العمليه معهم … الدنيا دي لمتني مع مختلف الأجناس و الملل لكن لم اري و لم اقابل في حياتي من هم أفضل من السوداني في شي سواء في الأخلاق أو المعرفه أو التحصيل العلمي و لا أخفي عنهم اعتزازي بديني و هويتي السودانيه و هذا ما يجعلنا متفردين و يجعلنا في المقدمه …فقط ثقوا بالله و بأنفسكم

  12. السلام عليكم ورحمة الله تعالى وبركاته ،،،
    اولا تحية إسلامية عربية افريقية من أحمد بطران ولى كل الحبان: ابوظافر ، atbara , ودالغرب ، زول موجوع ، الزين الرزيقى ، ود عجيب ، أبوأحمد ، السر عباس ، والحبيب هبانى ،
    والله على العكس أنا سعيد جدا بتعليقاتكم ومتقبل كل كلمة وردت فيها مدحا او قدحا .. لأننى أعلم أن ذلك لم يكن لولا حب الوطن والغيرة عليه وهذا هو سر سعادتى ..
    أيها الإخوة الأحباب فقط تذكروا اننى كاتب وعندما اكتب اصطحب معى بعض وجهات النظر حول ما اكتب وليست بالضرورة وجهة نظر صاحبها أو كاتبها .. واعلم أن هنالك من يختلف حول هذه الوجهات … ولكننى أدعوكم جميعا بكل الحب أن نتفق ونختلف إلا على حب هذا الوطن العظيم .. وان نحكم ضمائرنا قبل أن نكتب ونعلق وأن يكون نقدنا هادفا وبناء .. ولننظر للموضوع ونركز على المضمون لا على الكاتب أو صورة الكاتب .. وما أسهل أن نلقى الاتهامات ونبخس أشياء الآخرين .. ولكن هناك حساب وعقاب ينتظرنا وهنالك مثقال ذرة خيرا يره ومثقال ذرة شرا يره …
    إخوتى لكم التحية والتقدير واكم افتقدت تعليقات الأخ ساخرون والأخ ابولمبة أتمنى أن يكونا بخير …
    وختاما مهما يكن نحن أبناء وطن وهمنا الوطن نسأل الله لنا ولكم الصحة والعافيه وللوطن النماء والتقدم والازدهار … ودمتم بخير .

    1. يا جماعة اقولها بصراحة عملت مع المهندسين الصينيين لمدة سنتين في احد المشاريع هولاء الناس لافائدة منهم البتة ، عنصريون لابعد الحدود بخلاء في منح المعلومة ،لايتحدثون بغير لغتهم ومن يجيد الانجليزية منهم لا يمكن التفاهم معه لعدم رغبته في ذلك لم استفد منهم شيئا وكذلك زملائي المهندسين السودانيين.

  13. please concentrate in your speciality.
    i know you well and i worked with u for 3 years
    and i graduate from china
    u should know they will not give u any thing but they r going to supervise the exportation and produce nothing
    i mean the will make import and export companies and buy your produt cheaplly and and then export them and there r many sudanese who will help them destroy your economy

  14. أنا معاك يا كاتب المقال أصلا البلد خربانه وخلوالصينيين يجوا وقبلهم جوا عشائر تشاد والكنغوا وانغولا وسيراليون ونيجيريا والنيجر وبورندي واريتريا وإثيوبيا ومالي والصومال ومصر ومن مصر اقصد الأقباط والبلد نصف سكانها من أصول اجنبية عديل كده ماسودانيين ، نحن السودانيين ما نستاهل هذه الارض لأننا اغبياء والغباء لأننا بندعي بأننا طيبين لدرجة لا نعرف مصلحة بلدنا بلدنا مفتوحة منز الاستقلال لليوم كل من هب ودب يجي ويقولك أنا سوداني واختلطت الأمور ولَم نعد نعرف من التشادي ومن السوداني من الإريتري ومن السوداني من السوداني ومن الاثيوبي وغباءنا بكل سماحة وطيب خاطر فرضنا في اراضينا وأعطيناها للمصريين والاخري للحبش وبكره أيضا كسلا سوف تحتل من قبل اريتريا كلها صارت ارتريين اشتروا البوت والمحلات وانت السوداني في كسلا غريب والمضحك والمبكي في حشد جماهيري للقاء البشير الأخير في كسلا كان واحدا اريتري رافع العلم الإريتري ولا بوليس اعترضه ولا مواطن ولا مسؤول ولا الاعلام تناول هذااللاستفزاز وفِي حي امبده ١٤هناك حي اسمه نغولاء ذهبت اليه مافي سوداني واحد هناك هذا احتلال والاحتلال الاخر في حي الْديوم ،هؤلاء كلهم عالة علي البلد والبلد لا يستفيد منهم البلد بل هم الارهقوا حزينة البلد وبيعملوا ضغط علي الخدمات الشحيحة أصلا وكان أولي بها المواطن السوداني المنتمي أصلا للتراب والله لو دخل عدوا السودان كلهم بينسحبوا ويقولوا نحن ما سودانيين شفناهم في ملاعبنا سبحان الله سوداني من كلامه وشكله ولما تيّم بلده يتباري معنا ينسانا ويشجع تيّم بلده حدثت كثير في ملاعبنا حتي المعلقين عندنا احتاروا منوهين جاء الجمهور داء بلد هملة ما عندها وجيع ووزيرالداخلية يقول الأجانب في السودان اكبر مشكلة اكبر بلد في العالم لامه افريقيا والبشير يفتخر بذلك ويقول السودان افريقيا مصغره عشان كده مرحب بالصينيين علي الأقل ناس متعلمين والجاهل منهم أحسن من أفريقي متعلم ايواحد يتعلم منهم يحمل السلاح ويطالب بحقوق ويدمر البلد والاهل والعشيرة بس لان الشماليين ماسكين الحكم

  15. الانجليز عندما خرجوا تركوا كل الخير في هذه البلاد و المحافظة علي هذا الخير غلبتنا ، و الصينين لمن يجوا حتي لو حولوا البلد لي جنة برضو ح يكون مصيرها نفس المصير الاول
    نحن مشكلتنا مع الانتاج ؛ مشكلة الحرامية
    يا ريت لو الصينين الجايين نودي بدلهم كل الحرامية للصين كصفقة تبادلية

  16. هههههههها يا ود بطران
    مالو خلونا نطعم شعبنا ببذره صينيه كمان في مشروع الجزيره
    هو الامريكان عاوزين يطعموا بلدهم ببذره سودانيه علي قول عوض ابراهيم عوض وعليهو العوض ومنو العوض يا اهل العوض