زواج سوداناس

الزوجة الاولى.. الفرار يا راجل دايره اكسر لي بيهو طلح !



شارك الموضوع :

واحد مرتو مخوفاهو شديد .. مره قاهره بلحيل .. لما تقول الصديق .. اجدع أي حاجة فى ايدو ويجيها جارى جرى ..
اها قام مشى زار صاحبو فى حلة قريبة من حلتهم يعنى ما بعيدة وشكى ليهو حالو الما بسر مع حليمة ..
والناس كلهم متجمهرين قدام ديوان الحاج ود كرار .. قاموا قالوا ليهو شوف يا الصديق كان داير تأدب حليمة دى بس عندك حل واحد مافى غيرو ، المره بدقوها بى اختا .. المعنى يعنى تعرس يا الصديق … خليك راجلا كلس ، تلعب بيك المره افووو .. ها زول المره شنو البسووا ليها رأس وقعر .. النسوان كلهن ناقصات عقل ودين .. وقالوا المره كان فاس ما بتكسر الرأس …
المهم ادوهوا ليك شرز تقيييل عيار 220 وزيادة … وقام واحد قال : علي الطلاق المهر والكسوة منى انا … وقام التانى قال علي الطلاق الناقصة كلها انا بتمها … وشافوا ليهم بنية صغيرة وسميحة وبت حلال وعرسوها ليهو …
اها زولك بعد ما عرس السكرة طارت وفكت منو .. تمه تلات شهور ما رجع على اولادو .. هارش هرشة شديدة وقلبو مقطوع من حليمة … المهم الخبر وصل حليمة وعرفت الحاصل قامت رسلت ليهو .. يا زول العرس انت لا بديتو ولا تميتو تعال راجع على أولادك .. انا أكان قنعت منى ، أولادك ديل ربنا بسالك منهم .. يالله الصديق اتشجع وجا راجع ودخل البيت مع صلاة المغرب زي الحرامى .. وحليمة سلمت عليهو وجابت ليهو الموية والمصلاية وملت ليهو الابريق وقابلتو مقابلة ما كعبة .. لكن الصديق مزاول تااااب وقلبو زي دقاق النوبة يدق .. ما مصدق المقابلة دى وخايف المره الكريهة دى تغدر بيهو …
زولك اتوضا ودخل فى الصلاة .. وحليمة دخلت البيت ومرقت .. كركبة شديدة وحوت بى هناك ووقفت فوق الحيطة تنادى لى جارتا بى صوت خافت ؛ بدرية .. يا بدرية .. ناولينى الفرار … كان تسمع زولك ولسه هو بصلى فى الركعة الأولى : الفرار دايرة بيهو شنو ؟
بسم الله الرحمن الرحيم .. يا راجل دايره اكسر لي بيهو طلح !!! هههههههههه

أحمد بطران

شارك الموضوع :

تعليقات الفيسبوك

تعليقات


1 التعليقات

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *