زواج سوداناس

غلطان المرحاض !



شارك الموضوع :

في كل مرة يخفق مسؤول لدينا في واجباته تجاه ما كلف به من مهام نطالبه بالاستقالة كونه لا يصلح لتولي ذاك المنصب العام وقد كانت آخر مطالباتنا لوزير التربية الاتحادي ووزيرته الولائية بعد أن فقدت البلاد معلمة جليلة في حادثة بشعة تنم عن تقصير شديد من قبل (الوزيرين) اللذان ربما اعتقدا بأن المسألة ما بتستاهل (شنو يعني معلمة تموت) وأيه يعني لما (مراحيض المدارس) في عهدهما تكون آيلة للانهيار؟
خلونا من وزراء (المشروع الحضاري الإسلامي) وتعالوا نشوف (الكفار) بيستقيلوا ليه:

• في سبتمبر 2008 قدم وزير الزراعة الياباني (سيشي أوتا) استقالته بسبب فضيحة غذائية تتعلق بأرز ملوث. وقال (أوتا) في مؤتمر صحفي عقده وقتها لذات الخصوص غن “فضيحة الأرز الملوث صارت مشكلة اجتماعية كبيرة ، وقررت أنني في حاجة إلى توضيح مسؤولية وزارتي”
. وقد قام رئيس وزراء البلاد (ياسو فوكودا) بقبول استقالته (يعني ما رفضا) كما في قصة (الترويج)! وقدم وزير الزراعة الياباني استقالته بعد أن قامت شركات يابانية بشراء أرز مستورد من فيتنام والصين وتايلاند مصاب بالفطريات وقد أصر وزير الزراعة الياباني على استقالته على الرغم من أنه لم ترد تقارير حول ظهور حالات إصابة بأمراض بسبب استهلاك الأرز الملوث (يعني ما في زول مات)!

• عندنا طبعاً عادي تستورد نخيل (فاسد)، تقاوي فاسدة.. أدوية فاسدة أي حاجة فاسدة و(تترقى) كمان (ده لو ما أدوك وسام الإنجاز)!
• في مارس 2011 أعلن وزير خارجية اليابان (سيجي مايهارا) استقالته بعد أن أقر بتلقيه هبة بقيمة (450) يورو من أجنبية تقيم منذ فترة طويلة في اليابان بما يخالف قوانين البلاد وعقد وزير الخارجية حينها مؤتمراً صحافياً قدم خلاله استقالته. وقال (مايهارا): “خلال الأيام القليلة الماضية فكرت ملياً وقررت الاستقالة من منصبي كوزير للخارجية” وتابع: “أقدم اعتذاري للشعب الياباني على هذه الاستقالة التي تأتي فقط بعد ستة أشهر، لأنني آثرت الابتعاد عن مواطن الشك مع أن تاريخي السياسي كان نظيفاً حتى الآن” !!
• شوفوا الراجل بيستقيل عشان 450 يورو مش ده زول مفتري؟ ده أنحنا عندنا أمين ديوان زكاة متبرع لقناة فضائية بخمسين ألف دولار ولا استقال ولا حاجة (لحدت ما شالوهو) ولمن سألوهو قال ح يحاسبو الله عليها يوم القيامة.. ولي هسه القروش ما معروفة وين؟ الوزير ده بيستقيل عشان 450 يورو (بس) مع إنو ما بعرفش حاجة اسمها (يوم القيامة)!!

• في أكتوبر 2011 استقال وزير الداخلية البريطاني (ديفيد بلانكيت) من منصب وزير الداخلية بعد العثور على رسالة بريد إليكتروني أثبتت أنه طلب تأشيرة دخول لمربية يود استقدامها وقد لقي الطلب عناية خاصة مع إنو كان كاتب في الطلب (لا أفضلية ولكن أسرع قليلاً)!
• يعني الخواجة ده استقال عشان طلب من ناس الهجرة (يسرعو ليهو شوية) في استقدام الخادمة!! بالله شوفو (الكافر ده)؟ بالله دي عملية يعملا ؟
• في أكتوبر 2011 استقال وزير الدفاع البريطاني (وليام فوكس) من منصبه على خلفية الكشف عن علاقته الوثيقة برجل أعمال له مصالح تتصل بشؤون الدفاع، وقد أقر فوكس في خطاب استقالته إلى رئيس الحكومة بالخطأ والخلط بين المصالح الشخصية والحكومية، وقال في خطاب الاستقالة “أنا آسف جداً لما حدث”.

• عندنا عادي ممكن تلاقي (الشركة) البتبني في مباني الوزارة قاعدة تبني للوزير في البيت بتاعو .. ومفيش مشكلة ولا أي (خلط) بين مصالح شخصية ومصالح حكومية.. دي حاجة هسه يستقيلو بيها لو ما ده خواجة مطرطش سااااكت ؟
• في فبراير 2012 قدم (فيليب هيلدبراند) رئيس المصرف الوطني السويسري، استقالته من منصبه على خلفية مزاعم تكّسب زوجته من صفقة تحويلات ضخمة قبل أسابيع، من تحديد المصرف المركزي السويسري سعر الفرنك. وصرح هيلدبراند، في مؤتمر صحفي في برن عقب إعلان استقالته قائل: وصلت إلى قناعة باستحالة تقديم دليل يبرئ ساحتي!

• عندنا المسؤول يسرقوا من بيتو (9) عملات مختلفة (قيمتها مليارات)، لا بستقيل وللا زول يقول ليهو (تلت التلاتة كم) ؟
• في فبراير من العام 2012 م تستقال وزير الطاقة والمناخ البريطانى (كريس هون) في أعقاب الإعلان أنه سيواجه اتهامات تتعلق بالتفافه حول غرامة لتجاوزه حدود السرعة القصوى، وذلك بوضع الغرامة على رخصة القيادة الخاصة بزوجته!
• أيه الفساد ده ؟ يخت الغرامة في رخصة قيادة مرتو؟ دي عملية يعملا لازم يستقيل عشان لو خلوهو يعمل في عمايلو دي ح يهدم المشروع الحضاري .. (البريطاني طبعن)!

كسرة:
أخبار لجنة تحقيق (التربية والتعليم) شنووو!! .. أكيد لقيتو إنو (غلطان المرحاض) !!

• كسرة ثابتة (قديمة): أخبار ملف خط هيثرو العند النائب العام شنو؟83 واو – (ليها ست سنوات و11 شهر)؟

• كسرة ثابتة (جديدة): أخبار تنفيذ توجيهات السيد الرئيس بخصوص ملف خط هيثرو شنو؟ 42 واو (ليها ثلاث سنوات وستة شهور)

ساخر سبيل – الفاتح جبرا
صحيفة الجريدة

شارك الموضوع :

تعليقات الفيسبوك

تعليقات


3 التعليقات

      1. 1
        شرف

        تحسبهم جميعا وقلوبهم شتى في النهاية هم كفار ومصيرهم جهنم

        الرد
      2. 2
        ابو الزينة

        الفات مات – والجرن خلهن واقرع الواقفات – يا جماعة نحن في حاجة لتغيير حقيقي في مناهج التربية لدينا – لا بد من غرس الفضائل ومكارم الاخلاق في النشء وفي السنين الاولي وسنجني ثمارها قريبا جدا – في تلك الدول يدرسون النشء مادة اسمها الاخلاق منذ بواكير العمر – علينا ان نزرع الفضيلة في ابنائنا – ولدينا المورد الصافي والوافي وهو كتاب ربنا وسنة نبينا عليه الصلاة والسلام – ابنائنا امانة في اعناقنا وسنسأل عنهم – الا هل بلغت فاللهم فاشهد.

        الرد
        1. 2.1
          ودالحاج

          أسمع تغرس الفضيلة ؟؟!! الكلام ده ماقالت شمائل النور غلط ههههههه

          جزاك الله خير يا ابو الزينة , وفعلا كلامك نحنا عندنا المورد الصافي الكتاب والسنة ونعمة الاسلام وعندنا القدوات لكن زي ماقالو في كلام بنسبوهو للشيخ كشك مرات , قالوا قال يا ناس لو في زول عندو تلاجة وعاوز يصلحها وجاب كتلوج مروحة بتتصلح ؟ ولو زول عندو مكيف وعاوز يصلحه وجاب كتلوج تلفزيون بنفع ؟ قال نحنا كتلوجنا القران والسنة واللخبطة والضغف الحاصل في الامة الاسلامية ده كله سببه إنه شغالين بكتلوجات تانية وعمرهم ما حايمشوا لقدام لو مارجعوا للكتلوج الاصلي الكتب والسنة .

          بعدين حتة تربية الابناء دي مهمة جدا ومهم انهم يعرفو الحرام والحلا من هم صغار , لما يغلط تقول ليه ماتعمل غلط عشان حرام مش عشان عيب فلو الاباء والامهات ركزو في الحتة دي بتكون النتايج سليمة ان شاء الله ولا حظ انه البتربى على انه الحاجة الغلط مايعملها لو عيب , دايما لو اختفى من انظار الناس الحاتلومو بعمل الغلط , طالما انه مافي انسان شايفه , اما البعرف الحلال والحرام ده حتى لو ما في زول حايلومه او شايفه براقب ربنا في كل حاجة وده التوفيق هنا

          نسأل الله يهدينا وجميع المسلمين ويردنا للحق ردا جميلا

          الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *