كوش نيوز .. أخبار السودان بين يديك

ماذا سيحدث للسودان بعد 50 عاما؟!!



شارك الموضوع :

صديقي الزبير …رجل مثل عمري ..أكل علينا الدهر وشرب..يمتاز بعبقريته في التنويم المغناطيسي ونجلس مع بعض كثيرا نجرب ونستكشف بعض الاسرار….في آخر جلسة لنا …همست له قائلا..(يا الزبير يا أخي ما نخلي جلستنا الليلة دي رحلة خيالية عن طريق التنويم المغناطيسي نمشي للمستقبل ونشوف السودان دا حيحصل ليهو شنو بعد 50 سنة من الآن …نطوف ..انت تنوم بالبندول وأسالك وتكلمني)..
رد..(والله فكرة)…
وبدأنا ونام واستغرق نوما …وبعد مدة وبعد وضع يدي فوق يده…سألته (انت وين حسع؟)…
رد بعد تنهيدة طويلة …(انا ف السودان عام 2067)….
قلت له..(طيب كلمني عن حال السودان الحاصل شنو )…
بعد انتظار وعدة تنهيدات اجاب…( والله شايف الخرطوم بقت اغلبها كباري معلقة وجزيرة توتي فيها 3كباري تربط توتي ب بحري وامدرمان والخرطوم غير الكبري القديم وتوتي بقت كلها عمارات وفنادق ومنتجعات سياحية وشواطئ جميلة ..وشايف مطار الخرطوم بقى ف مكان بعيد بعيد جدا وطائرات بالعشرات والمئات كل دقيقة وثانية؛ والخطوط السودانية عندها حوالي 450 طيارة وشايف عمارات وابراج وفي برج اكبر من برج خليفة الفي الامارات وشوارع نظيفة وبواليس حركة كتيرين وعربات كتيرة جدا دون ازدحام لانو الشوارع بقت واسعة وشايف السودان عندو مكان ضخم جدا وجميل لمراقبة اقمارو الصناعية الستة الاطلقها… وبقت في اكتر من 300 جامعة والوظائف بالهبل لأنو ف شركات اجنبية كتيرة ف جميع المجالات وشايف السودان بقى اكبر مصدر للذهب ف العالم و اكبر مصدر للثروة الحيوانية وسلة غذاء العالم فعلا ..مصانع اغذية ما تديك الدرب …والناس بقت تغترب ف السودان ومغتربننا رجعو كلهم والمستشفيات كتيرة والعلاج مجاني والتعليم مجاني وامريكا بتدين مننا وبنجدول ديونها معانا لانو ظروفها صعبة الاقتصادية…والحكم بقا ملكي والملك رجل عادل جدا والجنوب رجع لينا تاني ..وشواطئ النيل كلها بقت مناطق سياحية واكتشفنا آثار جديدة واعترف العالم انو الفراعنة اصلهم نوبة ..والناس رواتبها كبيرة اقل راتب 15مليون ف الشهر وكل واحد عندو بيت كبير او فيلا ..والخرطوم بحري بقت العاصمة الجديدة رغم انو مدينة سنار كانت منافسة …وانت يا د.انور ما شايفك لانك بتكون انقرضت الوقت داك…) ..ضحكت وخبطت ع خد الزبير ليصحو من نومته واحضرت له كوبا من الماء ورششت ع وجهه ..وهمست مرة اخرى ف اذنه…( انت صحي كنت ف الخرطوم عام 2076 …طيب ناخد نومة تانية ونمشي للخرطوم عام 3017 بعد مية سنة..نشوف الحاصل شنو ..(ولنا عودة.).( للمعلومية .الجلسة حقيقية وقد تكون للمتعة فقط والتنويم صحيح ونتمنى ان ماذكره صديقي الزبير صحيحا ايضا وليس من تمنياته وخياله..) حيث لا يعلم الغيب الا الله…

بقلم
الفلكي
انور احمد عثمان

شارك الموضوع :

12 التعليقات

إنتقل إلى نموذج التعليقات

      1. 1
        صباحي

        واضح انو ما عندك موضوع

        الرد
      2. 2
        كديسة

        السودان بعد 50 سنة
        1- وزير الصحة ادخال شرائح جديدة فى مظلة التامين الصحى
        2- وزيز المعادن قانون تنظيم التعدين الاهلى اصبحت جاهزة
        3- وزير الزراعة نجاح العروة الشتوية ولا اعسار وسط المزارعين
        4- وزير الداخلية التفلتات الامنية اصبحت فى حدها الادنى والعمل يسير على قدم وساق لاستكمال السجل المدنى
        5- وزير المالية توسيع المظلة الضريبية وتضمين زيادة المرتبات فى الميزانية القادمة
        6- وزير التربية والتعليم تعديل السلم التعليمى ليصبح 4-2-4
        7- وزير الحكم الاتحادى العام الجارى هو الاخير للحركات المسلحة
        8-رئيس الاتحاد العام حفيد شداد الهلال والمريخ سبب تدهور الكرة السودانية
        9-الصادق المهدى بعد تهتدون وتشردون كان لا بد من تبرطعون
        ورياح شمالية الى شمالية غربية تنشط احيانا مثيرة للغبار والاتربة , وتشرق الشمس غدا فى نفس المواعيد

        الرد
      3. 3
        Atbara

        يا كديسه السياحه العلاجيه خبرها شنو

        الرد
      4. 4
        داوودي

        خير اللهم اجعلة خير .

        الرد
      5. 5
        Abdalla

        والله يا دكتور انت محتاج حصة حساب “ونمشي للخرطوم عام 3017 بعد مية سنة..نشوف الحاصل شنو ” شكلها المية بقت ألف في التنويم المغنطيسي

        الرد
        1. 5.1
          mukh mafi

          ههههههههه ياراجل فوت بس
          2117 جاها فوا طاير

          الرد
      6. 6
        ممكون و صابر

        تغائلوا بالخير تجدوه

        الرد
      7. 7
        سوداني وخليك سوداني

        إعداد الأجيال القادمة لتحمل المسؤولية ماذا
        اعدتم لهم ليتحملوا المسؤلية ليحملوا الراية من بعدكم.
        هل هناك استراتيجية ونظرة مستقبلية.
        هذا يعتمد علي الدولة والنظام المؤسساتي

        الرد
      8. 8
        ابو محمد

        المهم مافي بيره بارررررررردة عشان الحر برضو شديد

        الرد
      9. 9
        عبدالمنعم

        ما عندك موضوع يا دكتور
        ههههههههه سامحني
        برضو منوم إنقاذيا

        الرد
      10. 10
        كفو

        موضوعك فكرنى بنكتة ظريفة ، قيل أن هنالك مصرى وتونسى وسودانى سألو الجان ذات مرة اذ قال المصرى للجان متى ستحصل مصر على كأس العالم ، فقال له الجان بعد 100 سنة وبكى المصرى لأنه عندها سيكون ميتا وسأله التونسى متى ستحصل تونس على كأس العالم فقال له الجان بعد 75 سنة وبكى التونسى لأنه سيكون أيضا ميتا ثم جاء دور السودانى فسأله السودانى متى سيحصل السودان على كأس العالم وعندها بكى الجان وقال للسودانى سوف لن أحضر التتويج لأننى سأكون ميتا .

        الرد
      11. 11
        مصعب

        افتكرت انكم عاملين دراسه تقول لي تنويم مغناطيسي وخرافات كان تقول قعدت مع ست الودع ولا سألت سيدي الشيخ كمان

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *

    This site uses Akismet to reduce spam. Learn how your comment data is processed.