رأي ومقالات

ام بي سي والكمونية ..الرابط العجيب


كان ذلك في زمن مضى ..انا وصديقتي (سلمى سعيد)..التي تزوج اخوها باختي ..فأصبحت الصداقة قرابة وكدا ..كان عيد اضحى ..ذبحت عدة خراف ..في يوم واحد ..اجتمعنا (انا وسلمى) بعد طول غيبة ..وهاك يا ثرثرة وقصص ..يبدو اننا سببنا ازعاجا لمن حولنا ..فما كان من والدتي (رحمها الله) ووالدة سلمى (اطال الله عمرها) ..باصدار فرمان بابعادنا عن منطقة التجمع وامعانا في العقوبة (نظفن الكمونية) ..تحت شعار اللهم أشغل اعدائي بأنفسهم ..كانت كمونية مركبة ..كميات من المصارين والكروش والفشفاش ..انشغلنا فعلا ..وعندما اكملنا نظافتها ..وترتيبها ..كانت (صواني الفطور )طلعت ..لا احد يرغب في الكمونية أصلا ..وسيتم وضعها في الثلاجة لعدة من أيام اخر.

حكينا القصة دي ليييه؟؟ عشان نقول اننا كتبنا مبكرا ..ان قصة الحوار ..والمتحاورين ..ما هي الا (كمونية ) لشغل بعضهم بعيدا ..مما يتيح لاهل (الجلد والرأس ) ..عمل صينية الفطور بمزاج وبدون ازعاج ..والحمدلله الخطة نجحت ..والناس انشغلت فعلا ..وصارت هناك وظيفة أسمها (متحاور) ..وشخصيات الحوار ..والجماعة طالعين نازلين ..(رايحين السبورة وجايين من السبورة) …ومنصرفات ومصاريف..وتفرغ تام واعلانات في اجهزة الاعلام ….وطائرات تنزل وطائرات تغادر ..لا بل وصل الامر الى الاتفاق على قوانين ومقترحات ..ومخرجات حوار ..ومسيرة تسليم وعيييك ..

في تلك الأيام اذكر انني كتبت مقالا بعنوان (عيشها بس ما تعيش الدور) ..وهي جملة في اعلان على قناة ام بي سي ..يقولها شرطي المرور لشابين يحاولان تقمص ادوار الاكشن محاكاة للافلام الاجنبية ..يوقفهما الشرطي ويقول لهما بحزم (ام بي سي 2 ..عيشها ..بس ما تعيش الدور) ..قلناها لشخصيات الحوار (ما تعيشوش الدور) ..لكن طبعا كلام (القصير) ..

هاهي الايام تثبت ما ذهبنا اليه ..كل الدلائل كانت تشير الى ذلك ..فهذا الفيلم قد (دخلناهو) مرارا وتكرارا .. كذلك قيل للجميع ان (الكيكة صغيرة) ..لكن ربما عشم البعض ان يتبقى القليل من (الدقيق) لي لقيمات الصباح ..فكانت الصدمة قاتلة ..وشمت البعض في شخصيات الحوار (شماتة أبلة ظاظا) ..لكن حقو ننظر الى الجزء الملئ من الكوب ..برضو اتونسنا ..لولا الحوار ..كان الملل قتلنا ياجماعة ..عليكم الله ..مش كانت أيام لطيفة ..يا سلام ياخ ..كل مرة يجينا تصريح ..وايه مش عارف ايه ..حنفتقد ايام الحوار والله ..لذلك حفاظا علي العشرة ..والايام التي مضت …نقول لكل من انتظر جزءا من الكيكة (هارد لك) ..والجايات اكتر ..ونهديك اغنية النور الجيلاني (انا ليلي كل ما يجن ..بشتاق وليك بحن ..برجاك في التلفون ..انا حاضن التلفون ..راجيك في التلفون ..لو مرة جرسو يرررررن)

د. ناهد قرناص


‫2 تعليقات

  1. هههههههه
    جرسو يرننن يا تراجن و خليكي راجن
    الكيزان عندهم أطنان من الكمونية