زواج سوداناس

الكوميدان محمد تروس يشيد بمسلسل عشم: انتجوا دراما (نضيفة) تعبر عن مشاكل وملامح ثقافة المغتربين.. فيديو



شارك الموضوع :

ابناء المغتربين ينتفضوا علي الدراما السودانية ام عراريق و الرواكيب و شماسة و حرامية و تليب بيوت ، و ستات شاي ، و كاروهات ، وبتاعين الركشات ، و الحر ، و صريخ الممثلين ، المفتعل ، والاخراج الاشتر ،و وعووووك وورووررروك والحق يا حاج مُحٌمٌد الجني فلقوا اولاد حلة فووق) والنصوص و اللغة التالتة . انتجوا دراما (نضيفة) تعبر عن مشاكل و ملامح تخص ثقافتهم التي اتوجدوا فيها من غير اختيارهم في مدن البترول كما عبرت شخصية ام البنت في الحلقة الاولي ( نحن يابتي البرجعنا السودان شنو لاعندنا ارض لا بيت هناك)… حضرت حلقتين من مسلسل ( عشم) الذي يبث على يوتيوب فيهم تشويق و منتاج جيد واخراج والممثلين اكثر تلقائية وتفككوا من حصار مايعانية الممثل السوداني من الرقابة و الحجابات الشينة و دقون المشروع الحضاري و الانتاج يتسم ببزخ بازخ و مكياج كاح و حفلات وغني (واغاني واغاني ) .. اعتقد ان المسلسل يعبر كذلك عن شريحة او طبقة داخل السودان تعيش نفس المستوي الاقتصادي و مواجهة بنفس مشاكل هذا الجيل .. من حقهم وانا كدرامي من الثورة الحارة تلاتاشر ناس العدو رحمة الله علية و عمك خليفة و سيد الكاروا … ادعم واشجع هذا الجيل بالتوفيق ياشباب العشم.. و انا علي استعداد للتمثيل دور والد الولد الشاطر الفقير الذي يحب مكسر في ومضة او موزة ، و ترفض امه لان اسرتة تسكن في قشلاق البوليس وامه ست البنات بتبيع طواقي في سوق امدرمان .

.الدراما فن ، والدراما كفن اهميتها وقدرتها تعكس الواقع : الفقر ، والقبح والجمال و الاجرام و فوضي الكاروهات و فوضي بتعاعين الركشات و فوضي عدم انتظام الشارع السوداني بعدم الوقوف في الصف ، الشوراع المتسخة بالاوساخ بجمال ودا دور الفن . الفن يعكس الواقع و لكن لا ينقل الواقع (بضبانته) … من خلال عمل جمالي (دراما فيديو .. فلم مسرحية ، لوحة …… الموت والحرب و الدماء من ابشع الصور التي تستهجنها النفس البشرية و لكن نجح الفنانين في السينما العالمية بعرضها بجمال … اعتقد كتير من درامتنا تفقتر الي تجويد صنعة هذا الجمال.

بقلم
محمد تروس

شارك الموضوع :

تعليقات الفيسبوك

تعليقات


2 التعليقات

      1. 1
        سودانى جدا جدا

        يا تروس
        كلامك ده كلام ساى لا موضوعى لا منطقى
        يعنى الدراما تعمل شنو مثلا ؟
        تجيب ليك السروال بمبي ؟
        الدراما بتتقل الصورة والواقع
        ثم إنه المسلسل ضعيف والتمثيل فيهو ضعيف جدا والشخصيات مسخ بتكلمو بى طريقة مفتعلة
        وانت ذاتك تمثيلك ضعيف جدا قبل تهاجر ولو كنت تملك قدرات عالية ما كان سافرت
        ما تجمل المعروض بدون منطق فنى
        الدراما السودانية على علاتها برغم الكادرو وستات الشاى وخلافه إلا أنه فيها نفسنا وريحتتا وبتشبهنا على عكس هذه الصورة الشائهة عن سودان لا نعرفه

        الرد
      2. 2
        أبو متاب

        الحجابات الشينة ؟؟؟؟؟؟؟
        أنا ماحضرت المسلسل وهوباين من صور الممثلات المبتزلة والخليعة
        وبعدين كيف تقول الحجابات الشينة والله شينة نفسك إنت البتقول على الحجاب الأمر بيهو الشرع شين
        شكلك عجبتك الإنطلاقة وشكلك عجبتك الإنمطلاقة وشكل الممثلات وسفورهم وإبتزالهم

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *