زواج سوداناس

هو مالو؟



شارك الموضوع :

جارتي الحاجة (صفية) أمد الله في عمرها كانت ولا زالت ملهمتي لعدد من المقالات فقد درجت على تناول قهوتها الصباحية معي، حيث اعتدت أن أقوم بالمشي كل صباح إلى كشك الجرائد لشراء صحيفتين سياسيتين، ثم ما أن أعود وتسمع (كركبة) الباب حتى (تلبس توبا) وتدلف إلى داخل المنزل لتجلس على مكانها المعتاد، تتصفح الصحيفتين.. تنظر إلى (الصور) إذ أنها أمية (جيل ما قبل المدارس)، ثم ما أن أضع أمامها فنجان القهوة حتى تبدأ بالسؤال وهي تشير إلى الصور التي اختارتها:

• الصور الفيهما النسوان الواقفات مع الرجال ديل شنو؟
• سجمي سجمي العربية دي (القلبا) كده شنووو؟
• الزول الواقف مع الخواجة ده منووو …
• البت السمحة الشايلا المكرفون دي مالا؟
وهكذا هي دائمة التساؤل…
ما أن أخذت الحاجة صفية رشفة من قهوتها حتى وضعت الفنجان وأمسكت بالصفحة الأولى لإحدى الصحيفتين:
• الزول أبو نضارات وبدلة وكرافتة حمراء وواقف مع الرئيس ده منووو؟
• ده إسمو طه يا حاجة
• وشغال شنوو؟
• قولي ليا ما شغال شنووو؟
• كيفن؟
• في الحقيقة يا حاجة هو شغال كم شغلة.. هو فريق وسفير ووزير ومدير مكتب!
• أريتو حال سيف ولدي بعد الحالة دي
• يا حاجة سيف ولدك شنوو؟ سيف الإسلام القذافي ما (يجمع) الحاجات دي كوولها
• ما شاء الله ما شاء الله شوف الزي العسكري فيهو ده خايل كيف؟ قلتا ليا رتبتو شنووو؟
• فريق يا حاجة.. فريق

• أسد والله.. هسه يكون دخل ليهو كم وكمين معركة
• معركة شنوو يا حاجة والله الزول ده معركة انتخابات ما دخلا.. وأزيدك يا حاجة.. كلية عسكرية ذااتا ما دخلا..
• يعني فريق دي جاتو (هدية)؟
• بااااس عليكي نور يا حاجة
• وسفير دي برضو كمان قول ليا جاتو هدية؟
• والله يا حاجة أيه رأيك هدية؟ ووزارة الخارجية دي ما أخد ليهو كورس واحد فيها!
• أوعا يكون طه ده القاعد يشيل رسايل الدولة يوديها بره؟ ويومداك وريتني صورتو مع رئيس أمريكا الجديد؟
• باااس هو ذاااتو
• والله يا أستاذ أنا مما شفتو قلتا شكلو شكل سفير وبيعرف ليهو أقل حاجة تلاته لغات
• والله يا حاجة صدقتي في اللغات دي.. كمان بعرف أربع لغات العربية والدارجية وعربي جوبا والرندوك

• وهسسه طيب جابوهو في الجريدة لييه؟ هو مالو؟
• شالووهو ..
• شالوووهو يعني نقلوهو مترقياً؟
• مترقياً شنو يا حاجة؟ هو قدامو عتبة واااحدة بس و(السقف)؟
• (في استغراش): طيب شالوهو ودوهو وين؟
• والله يا حاجة هو من ناحية شالوهو فشالوهو.. لكن (ودوهووين) دي ما في زول عارفا..
• طيب هو مالو؟
• والله يا حاجة الشعب ده كووولو عاوز يعرف؟ ما إنتي براكي
• ده مش منصب عام؟ وطه ده موظف دولة؟
• أيوة كلامك صاح يا حاجة؟
• طيب كيفن يعني القصة دي (مغتغتة كده)؟ مش الشعب مفروض يعرف الحاصل؟
• الشعب ياتو اليعرف؟ إنتي من زمن الشعب اليعرف يا حاجة؟ البلد دي الزول ممكن يكون (خفير) وبعد سنتين يترقى (سفير) ما في زول يعرف عملا كيف؟ وبعدين ممكن يرجعوهو (خفير تاااني) وبرضو ما في زول يعرف ليه؟
• (وهي تفكر): يعني المعنى عمل ليهو حاجة؟
• والله شوفي: طالما شالوهو معناتو بيكون قبضوهو عامل حاجات!

• طيب مش هو موظف عام.. مش يحاكموهو وكان لقوهو عامل حاجة يشيلوهو؟
• يا حاجة محكمة شنووو؟ هو لمن عملوهو فريق وسفير ووزير ومدير يعني عماو ليهو (إنترفيو)؟ ما جابوهو ناطي ساااكت!!
• يعني شنووو؟
• يعني البلد دي (جنينة) سااااكت..
• والله أكان ده كلو بيحصل يا ها (الجنينة).. لكن قول ليا
• أقول ليك شنووو؟
• هو مالو؟

كسرة: (حاجة صفية) تطلب من برلمان (الصفقة) أن يضغط على (الحكومة) عشان توريها… هو مالو؟

كسرة ثابتة (جديدة لنج):
أخبار إجابة رئيس الجهاز القضائي بالخرطوم على (الاستئناف أبو يوم) شنو (و) !

كسرة ثابتة (قديمة): أخبار ملف خط هيثرو العند النائب العام شنو؟87 واو – (ليها سبع سنوات و3 شهور)؟

كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو؟ 46واو (ليها ثلاث سنوات وعشرة شهور)

ساخر سبيل – الفاتح جبرا
صحيفة الجريدة

شارك الموضوع :

تعليقات الفيسبوك

تعليقات


2 التعليقات

      1. 1
        عارف وفاهم

        (( كسرة: (حاجة صفية) تطلب من برلمان (الصفقة) أن يضغط على (الحكومة) عشان توريها… هو مالو؟))……..يللا يابرلمانا ورونا وأفيدونا أفادكم الله، جاوبوا حاجة صفية على سؤالها الهام.

        الرد
      2. 2
        زول ساي

        نحن غنم الله فى بلد الله وشايلين القفة وكل يوم مغصنا زايد ووجعنا زايد وضغطنا زايد وسكرنا زايد من ضحل فكره كبر مركزه من كبر جهله علا شانه من كثرت سرقته امن منصبه من كبر فكره زاد فقره من كثر علمه زاد احتقاره من عظمت امانته فقد احترامه.

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *