أبرز العناوينمنوعات

جسم مجهول أضاء سماء السودان وأشعل فيسبوك


مساء الثلاثاء أدى سقوط جسم مضئ في السودان مابين مدينة كوستي ومدينة ربك بولاية النيل الأبيض وشوهد في مناطق ومدن وولايات أخرى والذي أحدث دوياً وضوء ساطع الى ضجة واسعة على صفحات التواصل.

وبحسب رصد محرر النيلين هذه بعض شهادات رواد التواصل على ماحدث.
محمد دفع الله أحمد
والله يا أخ سيف انا في كوستي وكنتا راقد في الحوش ووشي متجه الي الاعلى فجأة كده السماء كلو اضاء ضوء أبيض استمر لي مدة 7 ثواني او 10 واتلون بين الابيض والاخضر واتشتت احمر وبعده بي دقيقتين فقط سمعنا اصوات دوي استمرت كذلك 15 او 20 ثانيه طلعنا الشارع وكل البيوت الفي شارعنا طلعت تستفسر بس لحدي الآن مافي اي معلومه مؤكده للحاصل ده.

Mekashfi Dfallah
السانيه … المناقل
نعم جسم نزل كالنجم لما يرجم الشيطان بس بحجم اكبر واضاءه قويه واستمر لثواني اكتر نزل ع إتجاه 24 القرشي.

فهد عبدالقادر الفهداوي
انا من زرقة تمبول البطانة
والله نحن نتغالط قولنا دي نجمة خرت والساعة ديك نشاهد في مبارة المريخ
واحد مشجعي الهلال
قال معناها دا المريخ اتهزم
يعني سقوط النجمة

اللهم احفظ السودان واهل السودان من كل شر.

أزرق شعاري
نحن في جبل اولياء شفناهو بصورو اكبر واوضح.

Sharfalden Ben Shekho
يا دكتور والله انا في الجزيرة بعيد جدا عن كوستي وربك لكن شوفتا جسم مضيء للغاية لكن اختفى في السماء اذا في شيء وقع بكون باقي الحطام وظاهر انه جرم سماوي.

وكتب عالم الفلك السوداني الدكتور
Anwar Ahmed Osman
نرجو من اهالي كوستي وربك والجبلين وكنانة والمناقل و24 القرشي تطميننا على احوالهم بعد سقوط ورؤيتهم للجسم الغريب الهابط من السماء والذي نظنه نيزكا حتى الآن وتعريفنا باخبار النيزك ومكان سقوطه وعدم الاقتراب منه بتاتا بتاتا لانه ذو حرارة مميتة واشعاعات قد تكون قاتلة…لا تقترب.

مؤمن أبو العزائم
قايلها ألعاب نارية بي كل بساطة?
قاعد في منطقة امدرمان الثورة مع شباب وونسة وشفت لي جسم احمر نازل زي الشهب والنيازك..قلت احتمال العاب نارية لانو رمضان كلو العاب نارية ..بس حدسي وحاستي مابيخونوني كنت مقلق قعدت اتخيل هسي يكون ده صاروخ موجه ولا ضربونا ولا ده يكون جسم فضائي المهم عملت فيها كونان ..وقلت ماافتح الموضوع للشباب حيقولو لي ..انت خمير ولا شنو؟ ضربة شنو…عملت رايح?
جيت خاشي الفيس لقيت البلد مقلوبة نيزك نيزك نيزك شهاب شهاب شهاب ..
ناس شافوهو في كوستي وناس في سنار ..انتي من كوستي ولا من سنار؟?
المهم هسي ندمان على اني مافتحت الموضوع في وقتو ..?
الله يستر

الخرطوم/معتصم السر/النيلين


‫17 تعليقات

  1. والله انتو لو رسلو ليكم صاروخ مابتكون جايبين خبر ااها المره دي الاضااءه قويه ولا شنو

  2. هسة بكرة تكتشفوا انوا اسرائيل ضربتكم يا وهم .. يا ناس الدفاع بالنظر .. عالم عايش في العصر الحجري .. وهم

  3. فعلا كان ظاهر وافتكرناها العاب ناريه الكلام دا حتي ف الخرطوم واضح م كوستي بس

  4. الله احفظ السودان اذن القالتو وكالة ناسا للانباء صحيح الله استر واحفظ اهل السودان

  5. انتو عشان تقطعو الشك باليقين اسالو اللمبي
    بكون عندو الخبر اليقين!!!!
    هههههههه

  6. لقد شاهدت بالامس مرور الجسم الغريب المضئ بحجم سيارة مشتعلة تقريبإ مع اصدار صوت اشبه بالرعد بمنطقة امدرمان صالحه

    احداثيات الانطلاق
    من الشمال الي الجنوب
    بسرعة عالية جدآ

  7. إني أرى أنها لمناسبة لكافة اهلنا الطيبن ، ليذكروا الله ربهم ويستغفروه ويتوبوا إليه ، من يدري ربما كانت لفت نظر لكم عباد الله.

  8. اها دا أسع ملك للحكومة ولا ملك للبلقاهو
    لأنو ناس زي وكالة ناسا بدفعو ملايين الدولارات في النيازك الكبيرة . ودا حجمو بتاع مائة مليون دولار . أسع الأمريكان بكونوا إتحركوا من الصباح

  9. الحق عزّ وجلّ يقول في محكم تنزيله وهو أصدق القائلين :(وما نرسل بالآيات إلا تخويفا)صدق الله العظيم.

  10. تعريف الهَدّة : صَوت سقوطِ شيءٍ | صوت غليظ شديد تسمعه من سقوط ركن أَو حائط أَو ناحية جبل | صوت ما يقع من السماء له دَوِيٌّ في الأَرض وربما كانت منه الزَّلْزَلةُ .

    الصيحة هي صوت من السماء شديد لم يسمع الناس مثله ، توقظ النائم، وتفزع اليقظان، وتخرج الفتاة من خدرها ، وتصعق البعض ، وتصم أسماعها وتنثقب طبولها .

    الصيحة هي صوت من السماء يُسمع في كل أرجاء الأرض .

    سقوط نيازك كبيرة .

    سقوط نيزك كبير في المشرق يسبب بلاء كبير .

    انفجار البراكين .

    زلازل عنيفة تهدم البيوت إلى قبور .

    ان الرياح الصفراء المحملة بأتربة ذيل المذنب ستتوزع بكل الاتجاهات ليراها كل سكان الأرض قد جاءتهم من قبل القبلة ! نستنتج اذاً ان مركز اختراق ذيل المذنب المحمل بالاتربة والصخور لغلاف الارض سيكون فوق البيت الحرام وان موقع البيت الحرام على الكرة الارضية المستديرة سيكون أبرز جزء يواجه ذيل المذنب

  11. من بواقي مخلفات الاقمار الصناعية التي ماان تدخل الغلاق الجوي منطقة الجاذبية حتي تحتك مع طبقة الغلاف فتولد كهرباء نارية من فرط صوت الاصتدام تنفجر في الجوء وتنزل الي سطح الارض قطع متناثرة

  12. هذه هى الشهب الثواقب الراجمة للشياطين رأيتها من قبل في السودان لما كنت بالخرطوم لكنها لا تسقط على الأرض بتضرب الشياطين والجن الذين يصعدون للسماء ليسمعوا الأخبار . لقوله تعالى (( فمن يستمع الآن يجد شهابا رصدا )) للجن والشياطين أوقات يصعدون فيها للسماء ليسمعون الأخبار ويبلغوها السحرة لكن في أوقات صعودهم تنتظرهم الشهب الثواقب لتضربهم ، رأيتها أكثر من مرة وهى تضرب الشياطين .

  13. انااااا هــذا الجســـم الفضــائي ما شاهدته لكن
    شفت صــورو في الفيس والواتس
    لكن اول امبارح وانااا في الشماليه شفت
    نجم نازل من السما۽ في شكل. مروحه وهووو نا ل الي الارض استفسرت منه الصباح قالوو نزل في الخرطوم بحــري قايتو حاجه سبحان الله بس كثــرت النجوم في الســودان الله يستــر الله سبحانه وتعالي يعلم بهم …