فيسبوكمدارات

للاسف يحدث في السودان.. سلوك غير حضاري لتعامل الشرطة مع المواطنين


امبارح اتعرضنا لموقف غريب جدا يمكن همبته من نوع خاص يقوم بها رجال قانون ومرتزقه من المحليه
بعد التراويح طلعنا انا وصاحبي القادم من السعوديه نبحث عن عربيه للايجار او لوحات خاصه لعربيتو الاورنيك دلونا علي واحد جنوب السوق المركزي (مكان الدلاله) وقفنا قدام المحل وقبل مانبدا كلامنا ظهر بوكس شرطه مليان بافراد لابسين ملكي ومسلحين بطبنجات في البدايه اتخيلتهم ساكين مجرم ولا ست شاي بدون نط واحد من البوكس وبدا يفك لوحات عربيتي اتفاجات طبعا يازول مالك قالي ماعندي كلام معاك امشي للضابط في البوكس. مشيت للضابط ياخ انا فرتكان العلاني صاحب العربيه الحاصل قالي ماعندي كلام معاك تجينا في الخيمه وفوووا مشوا. يخوانا خيمه والحاصل شنو وانا مندهش بعني الحركه اتعودناها من ناس المرور ديل شنو كمان
بتاع الليموزين بدا يشرح انو المحليه منعت وقوف العربات في المنطقة واي عربيه تقيف تتقلع لوحاتها ودي تعليمات المعتمد. وده اسلوب العساكر القايمين بتنفيذ الامر
المهم مشينا الخيمه وهي عباره عن كراسي جنب ستات شاي منتظرين البوكس الشال لوحاتنا ولمن وصلو خشينا عليهم اها ياجماعه الحاصل ومخالفتنا شنو قالو انت ماعارف ممنوع الوقوف هنا قلت ماعارف ماف لافته بتوضح ولا علامات مرور من البمتحنوننا فيها لمن نطلع الرخصه موجوده.. واحد يعتبر هو الضابط مع انو من اسلوبو لايستحق رتبه الوكيل عريف قالي دي جهلله بالقانون. قانون شنو ياخوانا القانون ده البخليك تعرف الممنوع من الماممنوع بدون توجيهات ولا علامات. زميلي حاول يتكلم ثبتوه قاليه انت محامي اطلع بره ونهرو واحد ما اظنو عسكري لانو لاحقا عرفت انو ف ناس دفاع شعبي ف الحمله ( الجهاد انتهي بقو يجاهدو ف الشعب) اسمو ( شلاقه) عليك الله ده اسم بني ادم.. المهم قلت لزميلي اسكت وبعداك ياخوانا نحن ف الشارع يعني يطلع بره وين ده ماقسم بوليس.. طيب ياخوانا الاجراءات المطلوبه شنو.. قالو تمشي المحليه ش الديم.. اوك ادونا مايفيد انكم استلمتو لوحتي. قالو مابنديك ياخونا كيف يعني اسي احتمال تنكرو وتضيعو اللوحات.. اللحظه ديك بديت اعمل تلفونات لي للمعارف من الشرطه والجيش والامن والمطافئ المهم اي جهه ممكن تحلنا من الفارغه ومنتظرين الحيحصل.اخيرا اتحرك موترجي باللوحات قالو ماشي للمحليه وقفنا لحدي ما البوكس بتاعهم اتحرك ومشينا للمحليه بعد انتظار ساعتين.. الحمد لله هناك جاني واحد من بتوع التلفونات العملتها وقابل الضابط المسئول وشرح ليه الحاصل.. جينا نفتش اللوحات الجابوها مالقينا لوحتي.. اها ده الخايفين منو ذاتو.. طيب ياخونا الحاصل قالو حيتحرك معاكم موترجي للموقع يسلمكم ليها.. في هذه الأثناء اتصل علي صاحب الليموزين انو لوحاتك استلمناها من السيد شلاقه تعال شيلها.. طيب ياخوانا لينا اربعه ساعات منتظرين ليه ده كلو
عرفت انو الموضوع فيه غرامه 5000 بتتدفع للمحليه وتستلم
حوش المحليه عباره عن مخزن بهايم عربات كاروهات والضباط لابسين عل الله وقاعدين ف نص الزباله والبدفع الغرامه بتخارج
الامر المحلي الصادر من المعتمد هو البحدد لغرامات
السؤال
اين دور شرطه المرور في حكايه العربات دي يعني حسب علمي المرور الجهه الوحيده المخول ليها اجراء سحب وحجز لوحات؟؟
اين المجلس التشريعي من الاوامر المحليه البتتعارض مع القانون وبتدي جهات غير نظاميه سلطات تستغل للهمبته وترويع المواطن
اصلا اذا البلد دي مافيها قانون يحفظ كرامه وحقوق البني ادم كل واحد يقلع حقو بي ضراعو ونتحول لي ملشيات وبعداك حيعملو لينا الف حساب
كسره

#شلاقه ده مرتشي بستغل القانون ويمارس الهمبته هو ومن معه
#الله غالب
#حقنا مابنخلي ???

بقلم
فاروق شرفي
Faroug Sharfi


‫15 تعليقات

  1. دي كارثة بمعني الكلمة…
    وروني بالله عليكم كيف لهذا الشخص ان يعكس صورة طيبة عن السودان لمن يرجع للغربة تاني..

  2. طالما الكبار حرامية وفاسديين حتتخيل شنو بعد ده
    اذا كان رب البيت طابلا فشيمت اهل البيت الرقص
    والله المستعان.

  3. طبعا طالما في زي المعتمد دا والله العظيم نحن ما نمشي لي قدام. يفك لوحات السياره ويأمر وينهي انه معتمد وليس اله واللا رسول ولا يتم تطبيق الما قانون دا والمقصود منه التضييق علي المواطنين وكما قال لا توجد لوحات ولا ارشادات بعدم الوقوف في همباته متلبدين بأمر الهمباتي الأسمو المعتمد الله ياخد حقنا منه الليله قبل بكره ان كان فاكر انه يطبق القانون بالغش والتدليس على المواطنين
    كان شاطر يركز علي اللصوص والحرامية البيسرقو البيوت والمحلات مش يسترجل على المواطنين
    لعمري لم ارى حكومة تضيق وتكره وتنفر مواطنيها الا كحكومة هذا المعتمد قاتله الله وكأنه يملك البلد عليه من الله ما يستحق عاجلا غير اجل وعلى كثبر من امثاله الطغاة

  4. دي فوضة وجهل مطبق ونحن من ساعد في تمكن اصحاب العقول الخاوية بالتمادي والسماح لهم بالتغول في دحر حقوقنا التي كفلها لنا القانون والشرع…مايخفي علي جميع المواطنين اصحاب المركبات بان فك اللوحات من العربة لايتم الا بواسطة القاضي..فليذهب من ادعي بان المعتمد هو من سن هذا التصرف للجحيم…بل فليذهب المعتمد بذات نفسه للجحيم ان كان هو وراء هذا الهراء..ويبدو انهم حينما لم يجدو ممانعة واعتراض من صاحب العربة وعدم معرفته بالقانون تسهل عليهم الأمر وكان الأجدي في هذه الحالة ان يطالبهم باثبات شخصيتهم ومعرفة اسمائهم ومن ثم التقدم ببلاغ ضدهم لدي وكيل النيابة

  5. فعلا انها كارثة وهذا ماوصلنا اليه من فساد ويتحمل مسؤلية ذلك القادة والحكومة من قمة الهرم الى اسفله وهم يتدثرون بعباءة الاسلام والاسلام منهم براء وبما انهم مسلمون احب ان اذكرهم اذا لم تحاسبوا فى الدنيا فان هناك حساب فى الاخرة حيث لاينفع مال ولا بنون

  6. عشان كدة انا هربنا من ارض الوطن
    لا تقيم ولا احترام ولا سلوك
    ولله دركم فى الغربة تفتقد للاهل والاصحاب
    ولكنك تجد الاهتمام والانضباط الشرطى

  7. والله يا جماعة أخوكم في امريكا …ووالله المامسلمين ديل احسن الف مليون مرة من المسلمين الهناك ديل علي الأقل في الدنيا
    ياخ ماممكن
    طلعتو صليب الأمة

  8. الرشوة في السودان بقت حاجة عادية . والتجاوزات في المال العام ماجريمة بقت مهارات فرديه . مسموح بكل حاجة في ظل حماية النظام

  9. دائما اي قانون يسن من اي جهة كانت لازم يراعى فيه التوعية الكافية واتخاذ جميع الوسائل التي تحقق هذه النتيجة والتاكد من ان كل الناس او معظمهم قد علم بالقانون بالاضافة لتركيب اللوحات التي تنبه الى هذا المنع في مثل هذه الحالة حتى يكون اي انسان على علم بالقانون . التعامل مع القوانين وسنها بهذه الطريقة يعكس ان الجهات التي تسنها همها الاول هو ايقاع اكبر عدد من المواطنين في هذا الشرك المنصوب وجمع اكبر عدد من المخالفات وبالتالي جمع اكبر قدر من الاموال من جيوب المواطنين والضحايا بالرغم مما يظهر على عملهم من انه من اجل النظام والقانون . فالعقلية التي تتصرف بهذه الطريقة سواء كانت محلية او شرطة او خلافهم هي عقلية متخلفة وتجهل ماهية المواطن واهميته للبلد من حيث انه هو العمود الذي تستند عليه البلد كلها . فرجل المحلية او الشرطة او اي جهة حكومية كانت او حتى رئاسة الجمهورية يجب ان تعي ان المواطن هو الذي يمول هذه البلاد من حر ماله ويصنع تطوره . فالرئيس الذي يجلس على مكتبه اشترى اثاثات مكتبه من حر مال الشعب السوداني واخذ راتبه من حر مال الشعب السوداني وما يجده من اموال تحت يده هي من حر مال الشعب السوداني وكذلك العسكري يجب ان يعلم ان الزي الذي يرتديه من اشتراه له من حر ماله هو الشعب السوداني ومن يعطيه راتبه هو الشعب السوداني ومن يستري له سلاحه الذي يحمله هو الشعب السوداني . وكذلك من في المحلية فكل اموال المحلية هي من حر مال الشعب السوداني ومن يدفع لهم مرتباتهم هو الشعب السوداني . فالحكومة لا تدفع شيئا انما هي فقط وكيل على الاموال التي يدفعها الشعب السوداني والذي هو عبارة عن مجموع هؤلاء المواطنين المجردين من حقوقهم .

    فالمشكلة عندنا هي في الاساس في العقلية المتخلفة عند المسؤولين الذين يديرون هذه البلاد بمختلف انواعهم والتي تجهل ماهية المواطن وقدرة ودوره داخل بلاده وتجهل قدر نفوسها امام المواطن وتجعل ممارسة الطغيان على المواطنين هو اساس عملها واداته الاولى . اما الدول الغربية والكافرة فهي قد علمت هذه المكانة لمواطنيها وشعرت باهميتهم في تسيير البلاد وتقدمها وتطورها لذلك اعطتهم كل حقوقهم وحرصت على حفظها وردع من يمسها بسوء .

    فالمطلوب عندنا هو اعادة صياغة عقول المسؤولين في بلادنا سواء كانوا عسكريين او مدنيين واصلاح تفكيرهم المعوج والذي دائما ما يعود على بلادنا بالنتائج السلبية والضارة والمدمرة ويمنع تقدمها لان من يصنع التقدم هو هذا المواطن الذي يبرعون في الكيد له ونصب الشراك في طريق حياته .

    فالمواطن يا سادتي هو صاحب الحق الاول في هذه البلاد وهو صاحب الفضل على مسؤوليها وليس العكس . ومن حقه ان يجد الاحترام الكافي والاعتناء بشؤونه واحترامها . فكل ما يتمتع به المسؤولون وما يجدونه تحت ايديهم من اموال هي من حر مال المواطن السوداني لذلك هو صاحب الحق الاول في البلاد . وكل من يقول او يعتقد غير ذلك هو ذو عقلية متخلفة ولا يفهم شيئا ولا يصلح في المشاركة في صناعة اي تقدم او تطور في البلاد انما تجده فقط عبارة عن معول هدم وعنصر تخريب بالرغم مما يظهر في اعماله من انها من اجل النظام والتطور والقانون !!!.

    فاخرجوا ايها المسؤولون من سجن عقلية قادة دول العالم الثالث المتخلفة هذه فهم سبب البلاء على شعوبهم وهم سبب تاخرهم وتخلفهم وفقرهم وجوعهم . فلن يتم صناعة تقدم الا اذا وجد القادة المستنيرين والمتحضرين والذين يستطيعون فهم الامور على حقيقتها ويستطيعون وضع كل شيء في مكانه الصحيح وحراسة حقوق الناس واتخاذ كافة التدابير التي تضمن ذلك على الارض .

    فحتى الان لا يوجد مثل هؤلاء القادة عندنا فحياتنا وشؤون بلادنا تديرها العقول المتخلفة .

  10. انا شخصيا اهنئ الكاتب على نشر مثل هذا الحدث واشجع نشر مثل هذه الصفحات السوداء في ممارسات اجهزة الدولة حتى نشارك جميعا في فضحها للضغط عليها من اجل معالجتها واصلاحها ومن اجل المساعدة في نهضة بلادنا . فكثير من القادة في الاجهزة العليا لا يعلمون او يتجاهلون ما يدور على الارض من ممارسات من قبل منتمين لاجهزة الدولة . لكنهم فقط تجدهم في كل مناسبة يتمشدقون في كلامهم بحرص الحكومة على حقوق الناس والنظام والقانون في البلاد وخدمة المواطنين .

    وتخيلوا حتى الان نفس اجهزة الدولة هذه التي تدعي حرصها على القانون تجدها هي نفسها تخالف القانون؟ . فحتى الان المحليات تحصل اموال من ستات الشاي بين 100 الى 200 جنيه وبدون ايصال الكتروني وبالرغم من منع الجهاز التشريعي تحصيل اي اموال من ستات الشاي . اليس هذا مخالفة صريحة وتحدي للقانون ؟؟؟.

    واقسام الشرطة تحصل مبلغ 57 جنية (ربما اختلف هذا المبلغ من قسم لاخر) من كل شخص يريد عمل بلاغ فقدان وبدون اي ايصال مالي لا الكتروني ولا وزقي !!!!. اليس هذا ايضا مخالفة صريحة وتحدي للقانون من هذا الجهاز الذي يفترض انه معني بتنفيذ القانون ؟؟؟!!!!!.

    وتقولي نظام وتقولي قانون ؟؟؟!!!!!!!!!!.

    فاقد الشئ لا يعطيه .