فيسبوكمدارات

المغتربين في السعودية: أركزوا للبجيبها الريح


ربما أكثر من سيتأثر بقرارات رسوم المرافقين والتابعين هم السودانين ..لأسباب كثيرة.. السودانيون يفتقرون لثقافة الأغتراب التى تتطلب وضع وخطة وبرنامج محدد لفترة زمنية محددة ثم يعود المغترب الى دياره…

السودانى بشكل عام ما أن تتطأ قدماه أرض الأغتراب الا وتغير كل شىء.. بعضهم (يركب مكنة كبيرة) مع ان (البودى) صغير…يشترى اغلى التلفونات …يركب احدث الموديلات …يشترى اغلى العفش…يؤجر افخم الشقق…ينسى فى لحظات حالة الفاقة والعجز الذى أتى منها والتى مطلوب منه تغييرها الى الافضل فى بلده…يصرف صرف من لا يفكر فى العودة…!
كثير من المواقف التى مرت على تؤكد هذا النمط المختل من التفكير…

قبل 7 سنوات تقريبا كنت أمتلك مرسيديس موديل 83 ..قديمة وبائسة لكن رافعة رجلى …قابلنى احدهم مرة فقال : ياخ ما تشترى ليك عربية زى الناس انت زول مقتدر…قلت له : والله انا بمد رجلى قدر قدرتى ..!
يعنى ليه مثلا تعيش فى وضع ما وضعك الحقيقى..؟ ليه تعيش حياة زائفة..وانت جاى من بلدك ضيف غريب فى اى لحظة ممكن ترجع بانهاء عقد بى مشكلة باى سبب..ليه ما تعمل حسابك لليوم دة..؟!

زوجات المغتربين ديل كوم تانى كمان …بوبار…وتغيير عفش مع كل ولادة….ومشينا مول شنو..؟ ودخلنا مجمع شنو…؟ وودينا الاولاد (سفورى لاند )…وجديع كدة اهل البلد ذاتهم ما بعملوه رغم رواتبهم العالية وديمومة وجودهم فى بلادهم الى ان يتوفاهم الله…!

كمان فى الاجازات (خمخمة) هدايا ..اكتر شعب بجى بى وزن زائد فى المطارات هم السودانيين..رغم انو ممكن لو حبيت تساعد الناس تدفع كاش للمحتاج…اما تشيل أطنان من الهدايا عشان الناس تقول فلان جاب وانت خليت وراك ديون متلتلة دة كلام ماصاح..!

ايضا بعض الناس ينزل اجازة وما ينزل مكنة (المرطب) يؤجر عربية …ولو عاوز يتزوج يبالغ فى الحفلات والصالات ويغالى فى المهر نظام الود مغترب وكدة..ودة كلو شو وقتى ينتهى بزوال العرض..ويبقى السؤال قائما…وين البيت الحاتعيش فيه مع أسرتك؟ وين مصدر الدخل الحا تعيش منه انت وعيالك فى المستقبل والا حا تظل مغترب كدة للأبد..؟ أسئلة لابد من مواجهتها…والاجابة عليها…لان الناس الحا تقول فلان عمل عرس ما حصل هى نفسها الناس الحا تقول فلان جاء وما عنده بيت….!

غياب التخطيط والتركيز على المعيشة فى الغربة وكانك احد أبناء البلد هى احدى كوارث المغتربين السودانيين..!
ليس من حق احد انتقاد قرارات زيادة الرسوم …فهذه ليست بلدنا من حقهم ان يسنوا ما يشاءون من قوانين ولا على المغترب الا الالتزام او المغادرة…اول ما جينا عقوداتنا مكتوب فيها بند ا(ذا تم شغل الوظيفة بمواطن سعودى يتم الاستغناء عنك وتمنح راتب شهرين او المدة المتبقية من العقد ايهما اقل….) ومنذ 10 سنوات نترقب تلك اللحظة التى ولا بد آتية…!

أعزائي المغتربين…اركزوا للبجيبها الريح….وغيروا نمط التفكير…وادركوا بأنكم هنا مؤقتا….عيشوا حياتكم بلا تقتير….وبلا بسط يد…اجمعوا الفيها القسمة وعودوا….فالوطن هناك….وان طال الزوغان..

بقلم
خالد حاتم عبد الله


‫23 تعليقات

  1. راجيانا جنس بشتنه وبهدله في السودان
    واول ناس بتحقد عليك هم اقرب الناس ليك

  2. نحن لسنا راكزين فقط بل عاجزين عن الحركة ونسأل الله العون

  3. العالم فاضية يا نقاي .. انا ما عارف الناس الشغالة شماتة ديل هل في مغترب سإلهم قال انصحونا نعمل شنو ؟ خلوا المغتربين في حالهم فهم ادرى بظروفهم و خياراتهم .. الشنط البتكسي الحلة كلها و الجوالات و المصاريف ما حد بيذكرها ليكم بس ينزلوا فيكم سلخ !! يعني كلو منكم !

  4. الكلام ده ذكرني قصة بيحكوها من زمان ..مغترب رجع نهائي مفلس ما عندو شي ..واحد قريبو سألو ليه جيت فلسان ِِقال ليهو انتظر دقيقة ..طلع ليهو كراس قال له انت يا فلان انا رسلت ليك كده مليون و جبت لي اولادك كذا جوال و رسلت لي اخوك شنطة العرس و دفعت ليك للعمرة ..الرجل يكت و اخد بعضو خجلان ..يوم قاعد في مجلس قام واحد فتح موضوع المغترب ..يا جماعة الزول ده غربتو دي كلها يجي منها مقشط….الرجل طوالي وقفهم ..يا جماعة هوي الزول ده عندو دفتر !!

  5. كاتب المقال يكون هناك مغترب بيصرف علية وعلي الاسىرة الممتدة ..لو المغترب مثله مثل باقي الجنسيات كان كل السودانيين رجعو من اول خمسة سنين نهائي لولا المغتربين لتشرد وجاع نصف اهل السودان …الان اصبح المغترب لا يعرف ثقافة الاغتراب بعد ان ربي وعلم وعالج واكثر من العطاء دون تردد …فعلا المغترب لا يعرف ثقافة الاغتراب …

  6. نقول للكاتب من الآخر كدة أنو لو كانت عندك دولة زي باقي الدول أو حكومة زي باقي الحكومات ، ماكان الحصل على المغترب أو عليك انت حصل ، لأن كل حصاد المغتربين بتكنسو حكومتك قبل ما يرجعوا المغتربين لبلدهم وبشتى السبل ، خليك ساكت أحسن وادعو لنا ولنفسك بصلاح الحال ، والله المستعان.

  7. احسنت يا ابو الطيب ،المغترب السوداني مثقف في كل شيئ ووضع المغتربين السودانيين استثنائي لأن أوضاع السودان صعبة والمغترب متحمل أعباء لا يعلمها إلا الله ، في وجهة نظري إذا كانت توجد مشكلة فهي مشكلة في الثقافة السودانية كلها لأن المغترب لا يمكن أن ينفصل عن أهله وأسرته الممتدة في السودان ، تحسن أوضاع المغترب السوداني مرتبطة ارتباط مباشر بتحسن الأوضاع داخل السودان وطالما أن الحياة غالية جدا ومعظم الناس عاجزين عن تسيير أمورهم سيبقى المغترب هو السند لهم ، انا اختلف مع كاتب المقال في عدة أمور ولكن سأركز على موضوع السيارات ، اولا” : امتلاك سيارة حديثة شيئ إيجابي لأن السيارة الجديدة لن تحتاج صيانة تذكر لمدة 4 أو 5 سنوات ماعدا الصيانة الدورية المعتادة وبالمقارنة بالسيارات القديمة ستكون تكلفة الصيانة أعلى وبصورة مستمرة وكذلك السيارة القديمة لن تتحمل الضغط اليومي .
    ثانيا” : السيارة الحديثة تعتبر أحد وسائل التوفير وكثير من الناس يبيعون سياراتهم بعد الانتهاء من سداد الأقساط ويستفيدوا من المبلغ في عمل اي مشروع مفيد يخصهم .
    وحتى لا أطيل أكثر من ذلك في الختام اقول مقارنة المغترب السوداني بالمغتربين الآخرين خطأ كبير لأننا مختلفين عن الآخرين في أمور كثيرة الجميع يعلمها ولا مجال لذكرها ونرجو من الله ان يصلح الحال

  8. ملاز الطيب ونعم الرد
    هذا واحد من اعداء الشعب يحطم في النفوس البسيطه التي فارقت اهلها ووطنها رغما عنها لتوفير لقمة عيش اولا
    ليه ما سالت نفسك الناس بغيرو جلدهم حال اغترابهم
    حول لي
    حول لي
    وعندي مشروع
    وعندي وعندي وعندي
    هل تعلم ايها المتزاكي بكتاباتك ان من يركب ماكينه اكبر من البودي حسب قولك انما هو مفكر عظيم حتما في يوم من الايام سيجد المامينه المناسبه وإن شاء الله سيغير البودي ليتلائم مع المكينه الجديدة
    انت تشمت فيهم وتشمت بهم
    نسال الله التقي والهداية ونساله ان يفك كرب المسلمين اينما كانو وييسر عليهم كل عسر
    لا انتقد شخصك لكن انتقد اسلوبك في الشماته
    ممكن عادي السوداني من الثري للثريا ومن الثريا للثري وهذا حال الدنيا يوم ليك ويوم عليك
    واعلم اخي الدنيا ليست دار راحة وسعادة دائمة

  9. التور ان وقع بتكتر سكاكينو ……… قروش المعتربين معظمها شالاتا الحكومة ضرائب مساهمة و وووووو …… والباقي صرف علي مساعدة الاهل

  10. كلام غير صخيح ، المغترب السودانى ليس كذلك والعربية ليس للفخافة والفشخرة بل لانها لايحتاج ان يذهب بها للورشة كل شهر كما تفعل انت ، اما الهدايا فهى لعائلته واهله المحتاجين ، اما التوفير فهم اكثر الناس يشترون الذهب والاراضى لاجل الايام السوداء ، اما الرفاهية والاستمتاع فهو فى حدود المعقول وقليل من التمتع ليس بخرام ولا تبذير ، بل نحن مرشدون جدا فيها لانذهب لمطاعم خمسة نجوم ولا نؤجر شقق كبيرة وغالية كلها فرفتين ومطبخ وحمام ونحن نذهب للاطفال للملاهى لاننا نعرف صعوبة سجنهم فى الشقق طول الاسبوع فقليل من الصرف لا يضر. انت انسان شخيح ومقتر كان الله فى عون زوجتك وابتاءك.

  11. ساظل انشر وانشر الى ان تعدلو اسم الكاتب الحقيقي لهذا المقال
    والا سوف ننشر صفحتكم بانها تزور وكتابتها كلها ليس حقيقية

  12. المقال انا صاحبه الامانة كويسة برضو راجع صفحتى على فيسبوكKhalid Hatim And alla

  13. يااخي الكريم نحنا جايين من الفقر والحوجة ودايرنا نعيش في الفقر عمرنا كله لييه .طيب حنستمتع متين بالحياة دايرنا بس نلم القروش ونقعد لالالا الفهم مااكدة ..نعيش نرسل للعيان ونرسل للداير يقرا و ان شاء الله امورنا تعدي .ومافي زول مات من عدم كسرة .

  14. انا اعرف واحد من المغتربين القدام جدا , عاش حياة التقشف فى المملكه هو واولاده بحجة يريد ان يبنى
    مستقبله فى السودان ولا يعلم ان المستقبل بيد الله وبنى بيت جميل جدا فى السودان وحرم عياله كل شىء فى بلد الغربه
    وعند ما رجع واراد ان يدخل بيته الجديد وقعت عليه عتبة الباب وتوفى لحظتها وبعد اسبوع توفت زوجته ايضا
    اللبيب بالاشارة يفهم

  15. (وفي السماء رزقكم وما توعدون) الكلام ده كلة فنجطة ساي وما في واحد متذكر إنو الله هو مقدر الأقدار و (ما تشاؤون إلا أن يشاء الله ) وتوكلوا على الله وكما في الحديث لو توكلتم على الله حق التوكل لرزقتم كما يرزق الطير …. الحديث.

  16. رساله اوجهها لكاتب المقال بالله كم مره في الشهر ضرب ليك ولد عمك ولا ولد خالك ولا قريب ليك عاوز مصاريف ولو ما عاوز مصاريف يكون داير حق العلاج ولو ماعاوز حق العلاج يكون عاوز يدقع مصاريف الجامعه بدل ما تنتقد المغتربين انتقد حكومتك ماذا قدمت لابناء الشعب السوداني وعلاوه على ذلك انتا في بلد الاغتراب بتدفع للحكومه ضرائب

  17. يا كاتب المقال انت هووي الشعب السوداني طبيعتو انو بعاين لغيرو في السراء والضراء يعني لو اغترب ما بينسى اسرتو او اقاربو بيرسل ليهم من خيرات الاغتراب على قدر المستطاع فشايف نفسو محمول من كل الجهات والبلد ما بتساعد انو يرجع ليها فبالتالي مابيقدر يرجع السودان لانو بيخاف من الوضع اللي نحن عارفينو ماا زي باقي الشعوب نفسي نفسي , والحاجة التانية طالما الزول عايش في الغربة وعندو المقدرة لييه يحرم نفسو من طيبات الغربة والعيش الكريم فيها واقوم انتظر اللحظة اللي انا اجي فيها السودان كما تتصور انت !!!!! ولكن النظرة لهذا الامر من المفترض ان تكون على قدر من المساواة بين الغربة والسودان , والله علام الغيوب ولا ندري هل سنعود ام لا .

  18. الإخوة الكرام سوف نعود إلى السودان وسوف يرزقنا الله من فضله أينما كنا سيصلنا الرزق المقسوم من رب العالمين الرحمن الرحيم الكريم الواحد القهار والحمد لله الذي جعل الأرزاق بيده وحده والســــلام عليكم ورحمة الله وبركاتة

  19. يصرف صرف من لا يفكر فى العودة>> دا هو التفسير الوحيد <<< نحن طلعنا واتغربنا ما علشان حالنا لكن علشان حال البلد الكل يوم ماشة بالنازل… وبعدين المغتربين اكتر ناس بدخل عملة صعبة للبلد.. يعنى نحن لمن يجوا يحسبوا اقتصاد السودان بعدونا مع البترول والدهب