كوش نيوز .. أخبار السودان بين يديك

زراعــــــــــــة وشي



شارك الموضوع :

[JUSTIFY]

زراعــــــــــــة وشي

ركّب ليهو وشي.. تركِّب ليهو وشي.. زول زعلان منو وما داير تقابلو كويس تقوم تركب ليهو وشي.. وغالبا ما يكون الوشي المركّب هو وش الككو.. وهو قمة الصرصير والحدريبة.. وشيهو بقى أقل من السمسمة.. خجل.. وما عرف يسوي شنو.. غسل وشيهو بي مرقة.. مارق لها وما ساعل في زول.. الناس اكلو وشيهو يعني شالو حالو..
وش الملاح.. دائما ما يكون من نصيب الزوج من الزوجة الوفية أم العيال.. الأبو يشيل الوشي والوليدات يشيلو الفاتحة بدون أدنى نقنقة.. وشي الملاح دائما في الملاح التبيخ.. أما السليقة واختها السخينة فما عندهن وشي..
السخينة= السليقة لحم.. أعتقد أن السخينة تحتاج إلى زراعة لحم وبالتالي زراعة وشي..
أول عملية زراعة وشي تمت لزول امريكي قعد سنين بدون وشي.. زول ما عندو وشي.. حايم سااااااااكت كدي. بدون هوية لا بطاقة ولا جواز، او ممكن يكون عندو ومكتوب تحت الصورة (زول ما عندو وشي) ولو كايسة ليهو الحكومة تعمل إعلان في الجرايد اوصافه كالاتي (ما عندو وشي).. العملية نجحت بعد ستة وتلاتين ساعة.. شارك فيها مئة نفر من دكتور لي مساعدين لممرضين ومحضرين عمليات. زرعو ليهو شلاليف وجفون.. ونخرة.. ولسان .. وحنك.. وسنون.. وبشر الاطباء الناس بأن الحاجات الزرعوها دي كلها شغالة كويس وخصوصا اللسان اتقدا نضم.. وانو لسان سيدو متبري منو.. المتبرع زول مات كتب في وصيتو إنو متبرع بي وشيهو لأي زول محتاج ليهو.. المتوفي كان بفتكر إنو مافي زول حيقول داير وشي ويكون وشيهو معاهو ومرق من اللوم.. لكن يقابل ربو بي ياتو وشي؟.. بعد عملتو دي.. يقيف ويقول لهم وشي زاااااتو ما عندي عشان اقابل بو ربي..
ممكن اتبرع بأي حاجة كبدة، ابدمام، قلب كلى لكن وشي اصلو ما بديهو زول.. افرض اتبرعت بيهو لي زول واتكل على انو دا ما وشيهو وعمل عملة كعبة أها أنا بعدين اودي وشي وين؟.. ولا بشيل لي وشي زول..
سمعنا بالمرحوم قدرك في الهدوم لكن المرحوم قدرك في الوشيات يطرشنا وان سمعنا ، سمعنا وسلمنا..
زول يركبو ليهو وشي زول تاني.. اها افرض انو سيد الوشي بتاع شبك ومشاكل.. والمركِّب زول مسيكين ساكت.. كل يوم دقة.. وممكن يدخل السجن في صمة وشيهو.. أو يكون سيد الوشي عندو شفع كتاااااااار ودا ما عرس لي حسي.. انشبكو فيهو الشفع وبقى في مصاريف.. ويكون سيد الوشي مدلِع ولدو الصغير وكل يوم المغرب يعمل فيها انو حمار والشافع يركب فوق ضهرو ويقعد يحوم بيهو في الحوش.. اها دا من الواطا تمغرب ويكون مصنقر ومتمحن في الوشي الشايلو دا، الشافع يطلع فوق العنقريب ويركب فوق ضهرو ويكورك (يابا الحُمار.. الحُمار).. ينهرو يقول لو يا ولد حمار شنو؟.. تنط الام وتقولو(أجي يا حمار شنو؟.. انت ما معودو علي كدي)..
معودو هو، ومعود جدو المخرِّف الراقد في الأوضة دييييييييك..

[/JUSTIFY]

الباب البجيب الريح- صحيفة اليوم التالي

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.