مزمل ابو القاسم

شرف.. يجلد من طرف!!


أمس حرصت على حضور جلسة لمناقشة بحث الدكتوراه الذي أعده بالزميل الصديق بابكر مهدي الشريف في كلية الدراسات العليا بجامعة أم درمان الإسلامية.
لم يخيب صديقي الصفوة آمالي، وأفلح في الحصول على شهادة الدكتوراه في الإعلام بدرجة ممتاز، ليؤكد صدق نظرتي فيه، ويثبت عصاميته التي جعلته يقدم على اجتياز امتحان الشهادة السودانية أثناء عمله، ويتفوق على نفسه ليحصل على درجة الماجستير، ويعزز نبوغه وطموحه الوثاب بالحصول على درجة الدكتوراه في الإعلام، بتفوق يحسب له، ونرجو أن نتمثل سيرته ونلحق به قريباً، لأنه يستحق أن يكون قدوة.
عندما خرجت من الكلية التي تقع بجوار إستاد الهلال، قابلت عدداً من أنصار الأزرق، فشرعوا في مداعبتي، وطلبوا مني دخول (الجوهرة الزرقاء) كي آخذ (نقلة) أو كما قالوا!
النصيحة لي الله (كما يقول الحبيب حسن محجوب) المعبرة بقت سمحة!
كردنة ما قصر معاكم في المنشآت، بنى ليكم المقصورة، و(جلَّى الكورة)!
كردنة الكورة جلاها واقفة.
الدليل إنكم بقيتوا طوالي مضروبين!
في الودي مغلوبين، وفي الإفريقي مغربلين!!
ضحكت لمداعبتهم اللطيفة التي خلت من التجاوزات وحفلت بروح رياضية حلوة، وقلت لهم إنني سأعود لزيارة الجوهرة برفقة (دليل) أو (مفتش) بدرجة خبير، كي يدلني على مرافقها، ويطوف بي أرجاءها!
أنا ذاتي عندي رغبة قوية أدخل الجوهرة أم مظلات، وأتفقد (غرفة المخدرات)!!
أقوى المرشحين لتنفيذ مهمة تفتيش (خليل بعد التعديل) هو الواد ميدو اللعاب!
ولدكم وعارف خبركم، ومتعود علي غربلتكم، أقصد علي جوهرتكم!
لو رفض الغربال العودة لديار الهلال، وأبت نفسه أن تعيده إلى (الوراء) بسبب تجنيكم عليه، وادعائكم أنه مصاب إصابة لا يرجى شفاؤها، سأستبدله بالعقرب، وأهو كلو تفتيش في تفتيش!
برضو ولدكم.. ومتعود علي شقلبتكم!!
قلتوا ما بدقها، دقاكم!
وانتو مرة مغربلين ومرة مشقلبين!!
لاحظت أثناء اقترابي من الجوهرة وجود أكوام عالية من الخرسانة والتراب خارج الإستاد!
طبعاً انتو عارفين إنو التراب والخرسانة بحتاجوا (غربلة) قبل خلطهما مع الأسمنت!!
لو الهلال ما عندو (غربال)، نسلفكم الغربال!
غربلتوا ناعمة، وكراعو طاعمة!!
وهوايتو السواقة في الرملة الدقاقة!
المغالط يسأل أوتارا وحسين الجريف!!
واحد الغربال فحطو بيهو من نص الملعب، والتاني قلبو في الإعلانات!!
كنت أود أن أسأل هلالاب الجوهرة عن مسببات الشمطة التي حدثت بين بشة المحبوب وولدنا شيبوب!
قالوا شيبوب دقَّ بشة دق القطن، ومبارك اضطر يطردوا من التمرين!
ولدنا شرف، جبناهو ليكم هدي ورضي، الغنامية تاكل عشاهو، علمتوه المشاكل.
الغريبة بكور عندكم برضو كان بتاع مشاكل وبدق الزملاء!
في مدني طارد إيكانقا بالسكين، وكشحو بالشوربة جوة المعسكر!!
جانا بقى هادي ورزين، ونجم كبير يجيد التعامل مع الزملاء والإعلام، وينافس على صدارة هدافي الكاف!
شفت الفرق يا إبراهيم؟
مفروض تحققوا في مسببات المشاكل دي سريع، وتعرفوا لعيبتكم بطقطقوا بعض ليه؟
مع إنو السبب واضح وما محتاج تحقيق!
الفراغ مفسدة.. وعدم الشغلة بسوي أكتر من كدة!!
(وضع الطيران) بسبب حراق الروح، ويخلي الزول يشاكل ضلو، وشيبوب يطقطق بشة!
وغياب التزامات، بكتِّر الشمطات!
المشكلة لو زرناكم.. إبراهومة وشيبوب وجابسون ووليد علاء يقولوا لينا راجعين معاكم!
يحرجونا ونبقى في حاوٍ وتُر!
على سيرة ولدنا سابقاًَ جابسون، نسألكم: خبر ركبتو شنوووو؟
لو لسه معطوبة ممكن تشوفوا الجماعة بتاعين الخطف وسرقة الأعضاء ديل يوفروا ليكم ركبة لي سلمون!
ونحن بنوفر سوط العنج لي شيبوب!!
سوط مقطرن، يسو شوووو، نجيبو ليهو ونغني ليهو: (ضرب السوط بشح، وطوالي بشة يزح)!
لو عايزين المشاكل تنتهي، والدواس يقيف شوفوا ليكم بطولة ودية أشغلوا لعيبتكم بيها!
نظموا سيكاشا، أو عسكروا في نيفاشا!
لو ما علمتوا كدة أي زول يقرب من ولدنا شيبوب.. أكيد مضروب!
والدكشمان مستمر في الميدان!!
وكلو من الغربلة.
آخر الحقائق

العجيبة إني قريت خبر يتحدث عن (معاودة الهلال لنشاطه بعد رفع التجميد بمباراة ودية مع الزومة)!
إنتو علاقتكم شنو بالتجميد؟
الجمدكم منو عشان توقفوا المباريات المحلية؟
كورة مع الزومة، محتاجة إذن من سامورا؟
الحاضر يكلم الغائب، المغلوب يكلم المغربل: ملاقاة الفرق المحلية لا تحتاج رفع تجميد من الفيفا.
ألعبوا ساي فوق عديلكم، الحبة ما بتجيكم!!
التجميد يخص الفرق العندها مشاركات خارجية، لأنه دولي!
وإنتو يا حبة عيني أول مشاركة خارجية ليكم السنة الجاية.
طبعاً ده لو ما هلال التبلدي وأهلي شندي والخرطوم جابوكم الخامس في الدوري المحلي!!
المباريات الودية دي ممكن تستأذنوا ليها من فاطمة الصادق، ما محتاجة إذن من فاطمة سامورا!!
وما علينا إذا اختلطت عليكم الفطومات!!
التجميد يؤثر على قمة الكرة السودانية، ممثلة في الزعيم وهلال التبلدي.
أقوى فريقين في السودان.. المرشحان للهيمنة على البطولات المحلية لعشر سنوات قادمة.
ومتأثرين بيهو اتنين من الولاة، والي المريخ ووالي شمال كردفان.
كردنة ما لوش في التجميد، ولا عندو بيهو شغلة!!
طبعاً حبيبنا كردنة أطلق مبادرة لحل أزمة الاتحاد لأنه كان متوهم إنو الهلال حا يغلب المريخ ويتأهل!
أول ما حصلت الغربلة وحدثت البلبلة ركل المبادرة وأصدر بيان هاجم فيهو الاتحاد الشرعي.
طبعاً في ناس الأيام دي شايفهم ودعوا سيرة التجميد مع إنهم كتبوا (وين التجميد الجو عندنا مسخن شديد)!
الأكثر إثارة للسخرية إنو قناة الهلال نقلت مباراة المدعوم مع كوبر، وعملت ليها أستوديو تحليلي!
القناة دي مفروض يجمدوها طوالي!!
قناة الهلال فقدت الشفيع، وفقدت الفريق!!
الغريب ما إنها تعمل أستوديو تحليلي، الغريب حقاً أن تواصل البث!
الهلال كلو فاقد الإشارة، مفروض فطومة تشوف للقناة دي دبارة!
الشفيع لحق الفريق.. المدهش!
بوجود البطل شيبوب مفروض تخصصوا برنامج للملاكمة، وبرنامج للمصارعة الحرة!
وتخصصوا فقرة كاملة لي (شيبوب الجبار)!
أصل الحكاية أن المشكلة أصلاً حدثت مع وليد علاء الدين في التمرين، وبشة دخل حجاز!
شيبوب طقطق وليد والأجاويد!!
جابوهو عشان يدق الكفر، دق اللعيبة!!
قناة الحرة، وقناة المحجوز للمصارعة الحرة.
شيبوب دق بشة، ودق وليد، ودق جرس في الفيسبوك!!
شرف لم يحترم قيم ومهروسات وبلنجات الهلال!!
الهلالاب الأيام دي حالتهم حالة.. فريقهم مغربل ولعيبتهم مطقطقين!!
آخر خبر: ولدنا شرف.. يدق من طرف!!

مزمل ابو القاسم – الصدي