منوعات

الفلكي أنور أحمد عثمان: أنا أبحث عن عروسة وربنا يهون


حكى عالم الفلك السوداني د أنور أحمد عثمان قصة طريفة حدثت معه يوم الأربعاء وكتب أنور بحسب متابعة محرر النيلين
الحاج محمد خضر عثمان …قابلته بالصدفة يوم الأربعاء لا أعرفه قبلا..غرب شركة MNT أوقفت سيارتي لإحتساء فنجان قهوة ووجدت عدة أمكنة فارغة بجانب هذا الرجل ولكني تعمدت الجلوس بقربه للتعرف عليه عسى أن يفتح الله به بابا من المعرفة).

وقال أنور (ألقيت عليه السلام ودعوته لإفطار سويا فأعتذر …ودعوته لفنجان قهوة فأعتذر ايضا بحجة أنه ف انتظار أقرباء…
وكالعادة بادرته بالسؤال …
من وين انت ياحاج؟
هو:_أنا من الشمالية المحس..
أنا:_أنا برضو من الشمالية دنقلاوي من أرقو ..
هو:_أهلا بيك ..مننا يعني ..
أنا:_أهو كلنا سودانيين في النهاية…).

وواصل انور يحكي الحوار الممتع الذي جمعه مع أحد الأشخاص كما بلي.

هو:_لكن يا أخوي إنت بتشرب القهوة دي كتير ليه كدة….دا ما كويس لي صحتك …يعني معقولة كباية كبيرة زي دي مليانة؟؟
أنا:_أعمل شنو يا حاج والله لو ماشربتها بيجيني صداع عنيف…وعدم تركيز..
هو:_ما تقول كدة ..عيب عليك ..قهوة تتحكم فيك ؟؟خلي عندك ارادة …واوعك بتكون بتدخن كمان؟
انا:_ما بحبو لكن مرات مرات ممكن اشرب لي سيجارة برنجي او بنسون..
هو:_والله عيب يا أخوي..السيجائر مؤذي..يا أخي خليهو برضو …خلي عندك ارادة..بالمناسبة انت متزوج؟؟
أنا:_كنت متزوج..
هو:_طيب قاعد براك كيف وإنت ف العمر دا …لازم تكون معاك واحدة وانت ف العمر دا محتاجة لرفيقة جنبك تكون قريبة ليك..
أولادك وين؟
انا:_كلهم اتزوجو وكل واحد ف بلد..
هو:_عاد دا كلام دا ..وقاعد براك حسع والله عيب كبير يا أخوي اتزوج ..عيب والله ..شوف ليك واحدة مطلقة ولا راجلها مات ولا ف عمر لغاية 39 او ا40 كدة وقضي معاها باقي عمرك…
أنا:_بفتش…
هو :_تفتش شنو ما هن راقدات وما لاقيات عرس..
أنا:_ربنا يهون…
هو:_ايوة ربنا يهون ..وداير اقول ليك حاجة لازم تتمشى كل يوم وتصلي بانتظام لانو دي حاجات بتفتح باب الرزق وبتجيب الصحة..(ودردشنا أكثر.)..
(قطع محادثتي القيمة مع الاخ محمد خضر قدوم اصحابه وشكرته وأعطيته رقمي كاملا بعد أن رجوته أن يتصل بي لأي خدمة هنا ف الخرطوم وأخدت اسمه كاملا وودعته بأحضان وفرحة..)
شكرا أخي محمد خضر لنصائحك وتشرفت بمعرفتك).

الخرطوم/معتصم السر/النيلين


‫4 تعليقات

  1. كنت متزوج اوكى فهمنا عاييييزييين نعرف ( الان انت أرمل ولا مطلق ) بعد داك المرة ساهلة .
    من كتاباتك دى الظاهر عليك عندك فراغ عاطفى .

  2. بصراحة يا دكتور أنور أنا قريت ليك كتير وحضرت ليك عدة لقاءات ويا ريت لو كنت جارك في السكن كان فرقت لينا شوية لأنك بتخلق برامج أنحنا في حوجه ليها في هذه السن. بعدين حكاية الزواج دي ما تتورط فيها وربنا يبارك في العندك.

  3. كلام جميل – لكن خلفية الصورة دي متعمدة ولا جات كده بظروفها ؟

    1. الغريبة أول حاجة لفتت نظري الخلفية لكن لا تستغرب البلد كلها كده ربما يكون هذا أنظف مكان فيها ..