رأي ومقالاتمدارات

شاب سوداني: فرح الرئيس فرحا شديدا و ضحك ومد يده لي وقال مبروك.. لم اجد اي دعم من حكومة السودان او الرئيس الذي شغله الرقيص هداه الله


افلا تعقلون!
فرحت في الوجه وحزنت في الفؤاد
عند مشاركتي في معرض الاختراعات المصاحب لمنتدى الشباب السوداني في برج الفاتح حضر الرئيس لافتتاح الفعاليه وأثناء تفقده الاختراعات وقف عند اختراعاتي وسألني:
الميداليات دي شنو؟

طبعا لم يسالني انتا منو وكأنه يعرفني ولم يسالني اختراعاتك شنو ؟

بدأت أشير للميداليات الذهبيه و الفضيه وقلتا ليهو دي من الصين وكوريا الجنوبيه والنمسا وانا سوداني!
ففرح الرئيس فرحا شديدا و ضحك ومد يده لي وقال مبروك وأخذ يحركها بشده الى اعلى وأسفل و هتف الوفد المرافق وضحكت فرحا لفرح الرئيس بانجازاتي من جهدي الخاص ودعم الدول الحكومات التي تستضيفني ولم اجد اي دعم من حكومه السودان الجريحه او الرئيس الذي شغله الرقيص هداه الله واصلح باله
طبعا منذ ٢٠٠٦ لم احصل على ميداليه ذهبيه ولا فضيه ولا برونزيه ولا حديديه و لا ترابيه و لا فخاريه من السودان الشقيق!

حصلت على ذهبيتين من الصين وفضيتين من الصين ودرع المخترع القيادي في العالم من كوريا الجنوبيه وفضيه من كوريا الجنوبيه وذهبيه من ايران وذهبيه من لبنان
وشهادات تقدير اكثر من ٢١ من الصين وكوريا الجنوبيه والنمسا وايطاليا و و قطر والامارات ومصر،والبرتغال!
طبعا حصلت على ٣ شهادات تقدير فقط في السودان من رعايه الابداع العلمي و ووزاره الشباب كشهادات مشاركه !

عند ذهابي للمعرض اليوم التالي سألني صاحب التاكسي الحاصل هنا شنو و شفتا اعلانات الرئيس جا امبارح
فحكيت له القصه
وقلتا ليهو الرئيس قال لي مبروك وفرح كتير فقال سائق التكسي مفروض يتالم ويبكي اذا فهمها
ربنا يوفقك يا ولدي وانا فرحتا لي انجازاتك دي كتير و ربنا يجعلك ذخرا للوطن الماقدم ليك شي بس عزائك الوحيد انك بترفع اسم السودان عالميا بالتطوير والابتكار وبي امكانياتك المحدوده اللي ما قدروا الوزراء والحكام النهبو البلد يرفعوا اسم السودان بل بالعكس شوهوهو زيادة كفايه ياولدي المواطن السوداني بيفرح بي انجازاتك حسبي الله ونعم الوكيل ما تقيف وواصل كفاحك و انجازاتك

انتهى كلام صاحب التاكسي والذي اظنه تلقى تعليما متميزا وشغل مناصب معتبره في الدوله من طريقه حديثه لكنه اظن انه اختار ان يكون سائق تاكسي لاطعام اهله اللقمه الحلال

سائق تاكسي يقدر الابتكار ورئيس دوله يفرح بانجازات محمد ارصد العالميه خارج السودان!
وقس على ذلك!
وارتقب الساعه اذا أوكل الامر لغير صاحبه!
فرحت في الوجه وحزنت في الفؤاد

سبحانك اللهم وبحمدك اشهد الا اله الا انت أستغفرك وأتوب اليك

بقلم
محمد عثمان أرصد


‫50 تعليقات

  1. بعد ميدالياتك دي كلها وسفرياتك الكتيره دي
    مفلس وداير قروش!

  2. يعني عاوز الرئيس يعمل ليك شنو بعد ماجاك وهنأك وبارك ليك ! يدعمك تاني كيف !! يديك قروش في أيدك ولاشنو ! ومنو قبل كدا الرئيس اداو قروش في يدو !! بعدين زعلان انو ماسألك عن إختراعك شنو ياخي ماعندو وقت للشرح يكفي الجهه المنظمة عرفت وكرمتك بي ثلاث شهادات زي ماقلت . بعدين حقو احنا زاتنا نزعل انو الرئيس خصص ليك وقت وجاك لحد عندك وجذاه تقول عليه رقاص ! بدل الكلام الفاضي كان تقول لينا انت إختراعك ده شنو هو زاتو العامل لي روحك بيو قومة وقعدة . ياخي إتواضعو شويه يامتعلمين وبلاش النفخة الفاضيه والعجرفه والتكبر .. عشان تمشو لي قدام
    قال الرئيس ماسألني ! ياخي روح انت وإختراعك

    1. محمد هههههههههههههههههههههههههههههههههههههههههههههههههههههههههههههههههههههههههههههاي

    2. فى لربحة فى مقالك ما حلوة … والله كتر خير الرئيس الجاك …. يعنى ده جذاه … استغفر الله العظيم…..

  3. ما قلته بحق الرئيس يسلب كل ما زعمته من انجازات فما جاء منك عدم احترام محض فمادا كنت تتوقع؟ هل توقعتا استقبالك من طرف الرئيس بالمطار؟ مفروض تحمد ربك ان اولاك باهتمامه وقابلك شخصيا فهل دا معناها ان سقف توقعاتك ستدهب بك لعوالم افتراضيه لا قبل بها حتى عند الرئيس نفسه فا لم تستح فاصنع ما شئت

  4. الرئيس يا تافه ما برقص زنق ولا راب ده بعرض عرضة رجال ويكفيه فخرا إنو أرجل وأشجع رئس دولة فى العالم… وبعدين إنت قايل نفسك أول سودانى ينال ميداليات ولا شهادات تقديرية؟ أمشى شوف العلماء السودانين القدمو إكتشافات وإضافات بتدرس فى الجامعات ومراكز البحوث العالمية وما عملو لى نغسهم زيطة ولا زمبريطة…بعدين شخص ما بحترم رئيس بلدو ما جدير بالإحترام ولا يرتقى لمصاف العلماء ووقارهم..أمشى شيل إختراعاتك دى وشوف ليك بلد تانى خليهم يعملو ليك تمثال يا جربوع…

    1. ابو عبدالرحمن
      هههههههههههههههههههههههههههههههههههههههههههههههههههههههههههههههههههههههههههههاي

  5. الرقيص .. لي رقيص .. يفرق .. يا اهبل يا ما محترم !!.. وانت كان ما راسك فاضي ؟؟!!.. كان مفترض تكون السمة البارزة ل مشاركتك اختراعك !!؟؟.. وليس مدالياتك ؟؟!!.. ذي ما قالوا .. الجواب من عنوانو .. والرئيس .. واضح انو سالك من الشافو .. وانت بعد الهراء دي كلو ما وريتنا اخترعتا شنو ؟؟!!..

  6. هسه نحن كلامك الفارغ دا ما استفدنا منو حاجة .. اختراعك دا شنو يا النجيض ال وجعت راسنا بيهو ؟؟

  7. وليد قلة حياء … والله اي دولة تانية وبالذات دولة عربية بكلامك هذا للرئيس ماكنت تشوف الشمس في حياتك .. رقيص في عينك … دي عرضة كما في الخليج وغيره . وبعدين اختراع شنو بهذا التكبر والعرجفة … اول شيئ اتعلم الاحترام واتعلم كيف تتكلم مع واحد اكبر منك ، ولاتنسى انو الرئيس هو رمزك ان شئت ام ابيت .

  8. كلامو صح مقصرين معاو لكن برضو هو اخطاء في رقص الريس دي لكن الملاحظ معظم المعلقين تعليقهم ماشي في اتجاه واحد اظنهم منظمين من جهه واحدة

  9. يا اخي ناصح ديل نظمهم الاستفزاز والكلام الغير محترم
    مهما تكن درجة اختلافك مع شخص انتقص سياسته وقول وين الاخطاء لكن الكلام في الاصول واضح
    والاستفزاز و التجريح غير مقبول والسيد الرئيس معروف اختلفت او اتفقت معه رجل ود قبايل وبعرف الاصول
    هذه لا يختف عليها اثنان واذا كان بينتقد العرضة فهو ليس سوداني اشوف ليه بلد لو بيفتكر العرضة عيب وبسميها
    باستفزاز رقيص يا اخي دا غير متربي وغير محترم

  10. السلام عليكم ورحمة الله
    حسبنا الله ونعم الوكيل
    ليش الهجوم كنت أتوقع من الأخوة المحترمين الإشادة والفرح بالإنجازات ولكن ….
    احسن شىء تسلك طريق الطيور المهاجرة ..لأن إنجازاتك تريد من يقيمها يكفيك الرد من اخوانك وبني جلدتك ..النقد الهدام
    حتي لو أخطأ يفترض تقديم النصح .
    لا لهذه المهاجمة.
    لا لهذا الأسلوب الغير حضاري ولا يعالج الخطأ بالخطا

  11. بعض المعلقين لم يفهموا ما يقصده ارصد فهو قال ان الرئيس لم يهتم بالاختراعات ولم يسال عنها انما اهتم بالميداليات اى ان الرئيس ترك الجوهر وبحث عن المظهر ترك اللب وبحث عن القشور فكان يحلم ارصد ان يشيد الرئيس باختراعاته ويوجه بفتح الابواب امامها لتنميتها دعما للوطن والمواطن.

    1. نعم كلنا فهمنا ذلك يا زول ساى ولكن قله أدبه طغت على الموضوع .

    2. المشكلة هو نفسو ما إتكلم عن إنجازاتو… وعايز يظهر بكلامو عن الرئيس…مجرد واحد نكرة ورويبضة

  12. انت غلطان كان مفترض تعمل لك ساعة في شكل قنبله و تخلي الاعلام الخارجي يصورك و يعمل جوطه حتي بعد دك الرئيس يديك من وقته و يستقبلك في القصر بتاعه و كمان يتصور معاك لا ويقول نحنا بندعم الشباب ….. دير شنو من عسكري م بعرف غير البندقية و الكلاش و الاكل و السفر لسعوديه كل خميس ديره يفهم لك انت قدمته شنو لمجتمع من خدمه وهو عينو لبلاد العاام بتقدم و اولها اثوبيا ونحنا لسه بنفتتح في جسر سوبا !!!!!!

  13. مع احترامي الشديد للمعلقين لكن الوحيد الفهم مغزى كلام محمد ارصد هو زول ساي..
    ده واقع الأمر ي جماعه انتو ح تفضلو مغمضين عيونكم لمتين! الفشل الحواليكم ده عميانين منو؟! الزول ده ما متوقع قروش متوقع زول بس يسأله عن اختراعاته زول يشكر جهوده مش يسالو من الميداليات جبتهم من وين! زول يشد على يده ويعتذر له عن تخاذل الدولة ويمدح إصراره على العمل رغم التخاذل! ليه تكسرو مقاديف الناس كده؟! سبحان الله فيكم!!

    1. ياخى كل الناس فاهمه الموضوع ولكن قله أدبه جعلت الناس يتركوا القضيه الاساسيه .

  14. الاسد لا يرقص يا هذا هل تسمى العرضة السودانية رقيص كما الجهلاء واى انجاز عملتو سقط بعد سقوطك الاخلاقى والاساءاة للسودان بوصف عرضتنا بالرقيص تعال دار جعل خد ليك سوطين لا بل سوط واحد ولن تتحمل وبدين يا سودانية الفهم قسم يعنى الناس العلقت دى كلها ما بتفهم وهو لو اشار فقط لعدم سؤال الرئيس عن اختراعو كان وجد العذر لكنه اساء بكلمة شغلو الرقيص وتصريحو ان الرئيس والدولة لم يدعماه مجرد حضور الرئيس لتكريمه ومباركة انجازه تكريم وما اعتقد الرئيس قابلو ف حديقة الحيوان بل فى فندق لتكريمه مع اخرين

  15. “ويكفيه فخرا إنو أرجل وأشجع رئس دولة فى العالم” خلاص يا كيم ايل جونج جونيور .
    كان اشجع رئيس جا فاكي البيرق من نيجريا و جنوب افريقيا ليه اهو داك البحر الابيض المتوسط خلي يقطعوا عشان نشوف رجالتو دي حدها وين !!!!و اهي ديك حلايب محتلة وكل يوم المصريين قاعدين يسجنوا في ناسكم امشو ا حرروها . بلا كلام فاضي معاكم يا كيزان انتو وسخانين اجرو استحموا .

    1. وبرضو أشجع وأرجل رئيس دولة رغم أنفك وإنتو لو رجال كان غيرتوهو بالقوة .. لكن اليوم الحار ما بندار وضرب النار دايرلو رجال…لما تبقى راجل يعداك تعال إتكلم عن الرجال

  16. إن الله لا يحب كل مختال فخور.
    أنا أكتر شي أغاظني في المقال إنو فيهو فخر و ترفع و ذكر للميداليات و التكريم و مافي اي ذكر للمخترعات نفسها…
    الشي الآخر الغريب إنو المقال كاتبه المخترع نفسه…
    و أخيرا كونو الرئيس جاك بنفسه و صافحك دة تواضع كبير منو و سيبك من حتة يرقص او يعرض دي…

  17. مواطن سودانى اخترع مولد كهربائى ذاتى التشغيل اى لا يحتاج إلى وقود لتشغيله واخذ براءة الاختراع حفيت اقدامه امام البنوك لتمويل مشروعه كى يرى النور بتصنيع كميات تجارية منه ولكنه حصد الريح واستطاع ان يرسل مشروعه الى دولة قطر التى ارسلت له اقامة وتذاكر سفر فهاجر الى هناك. والقصة ما قصة كفاءة القصة قصة ادارة ورحم الله السودان وشعب السودان.

  18. بدلا عن كيف نصنع رقائق البطاطس علينا أن نفكر كيف نصنع رقائق الكمبيوتر شخص يتحدث عن اختراعات ويتحسر على عدم رعايتها من الدولة والبعض يتحسر على تسمية العرضة بالرقيص ويفتخر بالبطان الذى من واجب الدله أن تقف في وجهه لانه فى عصر الفايرس يمكن أن يدمر اقتصاد البلاد هذا التفكير السمج قد اقعد السودان وجعله متخلف عن ركب الحضارة بئس ديار ترعى التخلف وتحارب النهضة والتكنلوجيا وكل اناء بما فيه ينضح.

  19. بدلا عن كيف نصنع رقائق البطاطس علينا أن نفكر كيف نصنع رقائق الكمبيوتر شخص يتحدث عن اختراعات ويتحسر على عدم رعايتها من الدولة والبعض يتحسر على تسمية العرضة بالرقيص ويفتخر بالبطان الذى من واجب الدوله أن تقف في وجهه لانه فى عصر الفايرس يمكن أن يدمر اقتصاد البلاد هذا التفكير السمج قد اقعد السودان وجعله متخلف عن ركب الحضارة بئس ديار ترعى التخلف وتحارب النهضة والتكنلوجيا وكل اناء بما فيه ينضح.

  20. الرئيس عزاك و كرمك مافي داعي للاسائة اليه بهذا الشكل على الاقل ليس في هذه المناسبة
    الريس هفواته كثيرة و كان عليك انتظار احداها لتهاجمه
    ولكن انتقادك له بهذه الطريقة خصم عليك

  21. صدق صلاح الباشا ، وبقية المعلقين اظنهم منظمين ومكتوب لهم تعليق واحد ليقولوه او يدوروا حوله ، فهم جنود الانقاذ وماسحي جوخ الانقاذ ، وسدنتها
    هو رقيص ولا عرضه بالله في حالنا الان البيفرح اويخلي الانسان يضحك شنو يا اهي كل شيء من سيء الي اسوا ولسع عاوزين ترقصوا او تعرضوا

    1. زاد الله خيرك يا زايد الخير
      لكن مفروض تكمل ملاحظتك عن المعلقين ال هم جنود الانقاذ
      ستجدهم عدد لايستهان به
      اسال نفسك هل كلهم منتفعين (ناس مصالح)؟؟؟؟؟
      كلهم مغفلين؟؟؟؟؟؟؟؟
      كلهم جهلة وغير متعلمين؟؟؟؟؟؟؟؟؟؟؟؟
      امكن ما سودانيين؟؟؟؟؟؟؟؟؟؟؟
      كن صادقا مع نفسك يصدقك الناس
      ده لا يعني انه الحال يعجب ولكن حال غيرنا يسكت
      اين سوريا اين اليمن اين مصر اين حتي تونس
      والعاقل من اتعظ بغيره
      اللهم اصلح قادتنا وجنبهم بطانة السوووووؤ

  22. الناس استنكروا قلة الادب و عدم الموضوع و عدم ذكر حتى ما هو اختراعه ..و تقولوا عليهم طوالي منظمين ..اذن الشعب ده كلو انقاذ اذا ديل كلهم منظمين
    و للاخ زول ساي ..اي اختراع يدعي انتاج الطاقة من العدم عبارة عن دجل مكانه سلة القمامة لانه يتعارض مع مبدأ علمي عرفه الانسان منذ قرون ان الطاقة لا تفنى و لا تخلق من عدم

  23. خلي السياسة وواصل في سكتك مع تمنياتنا لكم بالتوفيق انشاء الله ح تعوض نفسك في المستقبل القريب انشاء الله

  24. يا اخونا صلاح الباشا اي انجازات يتكلم عنها
    ادخل على الويتيوب حا تجد الاف المشاريع بي نفس الفهم هو فقط طبقها على وجةه الواقع وعلي فكرة كلها اختراعات ماسورة
    كما ذكر اخونا احمد عبد الكريم المادة لا تفني ولا تخلق من عدم و التجارب المشار اليها صحيح تولد اضاءة ولكنها ضعيفة وسريعا يتوقف الجهاز يعن اقتصاديا غير مجدية والا الدنيا كان استغنت عن مولدات الديزل وكهربا السدود و النووي اصحاوا يا عالم

  25. والله نعم مخترع ومبدع لكن أخلاقك سيئة وأسلوبك قبيح وما عند إحترام راجع نفسك وحسن أخلاقك وأسلوبك وإحترامك تجد من يدعمك ويقف معك
    العالم كله يزخر بفطاحلة وعلماء ومبدعين ومخترعين سودانيون ويتولون مناصب عالية جدا” فى كل بقاع العالم حتى ناسا بها علماء سودانيون منهم إمرأة
    لملم مدالياتك ونياشينك وشهاداتك وشوف ليك مكان أخر وبلد رئيسه لا يرقص كما زعمت وأنت أكيد لست سوانى أصيل لأنك لا تفرق بين الرقيص والعرضة والجلد بالسوط

  26. اختراعات
    فيس بوك
    اي فون ….. شاشات العرض ….. اجهزة طبية …. ادوية …… اجهزة منزلية … صواريخ … أقمار صناعية …. وسائل بناء
    الخ … اصحابها يمكن ان نسميهم مخترعون لم يسعى اصحابها لشهادات تقدير أو بروبوقندا اعلامية … اختراعات عملية تطبيقية و منطقية رفعت اصحابها الى اعلى الدرجات العلمية و المادية فاصبحو نجوم بدون دعم معنوي او مادي من احد …
    اخاف ان يكون صاحب المقال صاحب اختراع صلصات شاورما جديدة ؟؟؟؟؟؟؟؟

  27. اسلوب قبيح و تكبر واضح …. لو اي سوداني قدم انجاز بعمل زيك ما عنو لغاية هسة ما عارقين انجازك شنو كان الرئيس يشوف ليهو بلد تاني احسن

  28. وطن ماعنده وجيع !!! جميع المعلقين اكيد مستفيدين من وجود السيد الرئيس في موقعه, ولو هم عندهم زرة من الضمير والعقل مفروض يايدوا كلام الراجل لانه لو قعد يطبل ويقول الرئيس وقف السودان على ارجله وبقينا امه مجتمعة وليست متفرقة كان حيحصل على دعم ؟؟؟! , 28 سنة والحال اسوء من ما كان في 1989 , والزعلكم كلمة الرقيص !! يعني كل شئ تاني جيد ؟؟! افلا تعقلون يا بشر ؟! ربنا يوفقك يا باشمهندس ومهما طال الظلام لابد يجيه نهار .

    1. اهو دا الكلام الحق ….. الله اديك العافية … و المطبلاتية ديل الله يسامحهم

  29. أولاً غيبة ولي الأمر من كبائر الذنوب ، ثانياً دعك من الرئيس حفظه الله وغفر له ، شد حيلك ويا ريت نسمع بيك من عظماء المخترعين ….. اللهم وفق عبدك عمر البشير وأحفظه ويسر له البطانة الصالحة .

  30. اولا احى ارصد على مجهوداته الكبيرة فى تقديمه لتلك المخترعات التى تعلى من شأنه وشأن بلاده وكذلك للعديد من أبناء السودان الذين رفعوا اسم السودان عاليا شامخا فى شتى المجالات وفى مختلف الامكنة ولكن ما ينقصنا هو احترامنا لبعضنا البعض ولمقامتنا حتى لو اختلفنا فى قضايانا. مشكلتنا الكبرى اننا ننظر الى المشكلات كل من وجهة نظره الخاصة ونعكسها للاخرين على انها هى الاصح وايضا نكره الشخص كليا ونحبه كليا مع انه لكل شخص جوانب سيئة وجوانب جملية, اللهم جملنا جميعا بخلق الدين واجعلنا به جميلين.
    ان لم نحب بعضنا البعض ونحترم بعضنا البعض اولا سوف لن تفيدنا الاختراعات ولا الابداعات اى كانت وايا كان من يقدمهاز

  31. اللهم وفق المخترع ارصد هيي له مخرجا من السودان الى بلاد الله المحترمة التي يحترم فيها العلم ويذل فيها الفساد والمفسدون بالله عليك دي بلد يرفع لها شأن لا تعرف مبتكريها وعلماءها امة داقسة …نائمة ما تعرف الا اكل العصيدة والنمنمة ووالجري وراء لوشي والقعلة قوموا الله يهديكم ويخلف للسودان خيرا منكم

  32. لو إختراعه كان فيه فايده الشركات المحليه والعالميه كانت جرت وراهو بدون ما يجعجع ويملانا بزاق ساي , مش ذي صاحبنا محمد عثمان أرصد كل ما تمد يدك للسلام يشوف لو فيهو غمته قريشات.

  33. ما هذه السطحيه ارى ان العاطفه غلبت العقل واصبحنا تحركنا قلوبنا بدلا عن عقولنا لماذا هذه الهجمه الشرسة على ارصد انه لم يطلب اكثر من حقه كمخترع نعم اننا لن نقبل الاساءة لرئيس السودان ولكننا تفاعلنا معه وتركتنا مشكلة ارصد الذى يبكى على السودان سودان لا يرعى المواهب والعلماء والمخترعين سودان يتزيل ركب الامم لذات الاسباب ولذات السطحيه التى نحن فيها

  34. كذا سؤال جال بخاطري
    1- هل اصبح الاساءة لرئيس الدولة ونعته بألفاظ يعف عنها اللسان بطولة وفهلوة وشطارة ؟
    2- هل هذا جزاء الرئيس الذي مجرد حضوره لك يعد تكريم ما بعده تكريم لكن يبدو انك لا تستحق ذلك التكريم اصلا بعد ان نعتّه بالرقاص
    3- ماذا كنت تتوقع ان يعطيك الرئيس حتى انقلب تكريمه لك الى تجريح لشخصه؟
    4- السؤال الاهم هو انك طالما ما كنت مبسوط من زيارة الرئيس فلماذا ظهرت في الصورة وانت تضحك ملئ نواجذك حتى بانت اخر اضراسك ؟ ام انك كنت تتوقع شيئاً لم تجده ؟
    5- رئيس جمهوريتنا اتفقنا ام اختلفنا معه لا يعطينا الحق في الاساءة له لانه ببساطة رمز الامة .. وان كنت اشك انك بتفهم الحاجات دي.
    6- العرضة التي يعرفها كل السودانيين لا يقال لها رقيص لان الرقص شيئ وعرضة الفراسة شيئ تاني .. لكن امثالك الذين تربوا بالخارج ورضعوا قلة الادب وهم صغار وعدم احترام مقامات الناس لا يفهمون ذلك
    روح بلا يخمك
    تاني روووح بلا يخمك