زواج سوداناس

40 نصيحة من «أستاذ الأخلاق» لطلاب الجامعة المستجدين: «إحنا مش في جامع وانتي مش جاية تدوري على عريس»



شارك الموضوع :

وضع الدكتور محمد كمال أستاذ الأخلاق بجامعة كفر الشيخ والمتحدث باسم النقابة المستقلة لأعضاء هيئة التدريس بالجامعات، قواعد الدراسة للطلاب المستجدين هذا العام، كما قدم العديد من النصائح لهم وهي كالتالي:

40. بلاش تعمل ناصح على الدكتور لأنك واحد من آلاف أو عشرات الآلاف اللي مروا علينا قبل كده.

39. الجامعة لا هي فرح ولا ماتش كورة، يعني المناظر اللي بنشوفها بتاعة المكياج مغرق وشك وواخده اتنين كيلو لاكيه ده في فرح شيماء صاحبتك مش في الكلية.

38. بلاش البناطيل الساقطة والمقطعة وبنطلون أختك البنت.

37. لو مش عايز تحضر محاضرات ماتحضرش، بس ماتزعلش لما النتيجة تطلع، وعامة في كل الأحوال هاتتخرج تشتغل مندوب مبيعات أو كول سنتر.

36. أنت جاي الجامعة عشان تذاكر وتنجح مش عشان تعلق «فتكات رمش العين» ولا عشان هي تصطاد عريس وشغل الأفلام العربي بتاع عبدالحليم ونادية لطفي ده، ومش جاي علشان تخبط في البنت والكتب اللي هي حضناها تقع من إيديها وتلموا الحاجة سوا، والنظرات والعيون والكلام ده مش بيحصل، لو عملتها غالبا هنسمع صوت القلم على وشك وإحنا في مكاتبنا.

35. اوعي تصدق الأفلام العربي اللي بيستخف دمه ونظام الباشا تلميذ ده، ممكن الدكتور يخليه يحزن كتير أوي.

34. عيل يطرقع صوابعه ويقولي «عايز أدخل الحمام يا مستر» هعصره أنزل منه طلبة كي جي1.

33. اسمها محاضرة مش حصة ولا درس.

32. بلاش تعمل ناصح على الدكتور.

31. الجرس يعني فيه حريقة مش فسحة، ده لو فيه جرس إنذار للحريق أصلا في كليتك.

30. اسمه دكتور ودكتورة مش مستر ومس أو أبلة وأستاذ.

29. سور الجامعة مش زي سور المدرسة، يعني مفيش نط من عليه، مش عايز تحضر المحاضرة ماتحضرش وخلصت.

28. اللى بيقعدوا في آخر بنج اوعوا تفتكروا إني مش شايفكم، والله شايفك خصوصا أنت يا اللي بتلعب شطرنج مغناطيس مع زميلك اللى جنبك، وانتي ياللي بتاكلي فول وطعمية.

27. بلاش دخول على الفيس بوك في المحاضرة لأن معظم الدكاترة عندهم فيس بوك، وشوية وتبعتوا لهم، وممكن يقبلوا الإضافة، وبصة واحدة في الفيس هيعرف إنكم كلكم عليه وأنتم في المحاضرة.

26. إحنا في جامعة مش في سينما، يعني الخناقات اللى بتحصل عشان الحجز عيب، وممكن تنطردوا كلكم من المدرج عشان تحجزوا مكان على باب المكتب وأنتم بتاخدوا الكارنيهات.

25. افتكر تاني إني قلت لك بلاش تعمل ناصح على الدكتور.

24. إحنا في جامعة مش جامع، يعني حسب جامعتك لو الصبيان في بنجات والبنات في بنجات التزم بالنظام، ولو قاعدين مختلط يبقي بردو ماتعلقش، مش عاجبك شوف مكان فاضي واقعد فيه.

23. لو قعدت جنب بنت دي أختك بلاش نظام الأتوبيسات إياه، عشان ممكن تقول كلمة تزعلك وتلاقي كل المدرج بيخدم معاك وهايبقى شكلك وحش جدا.

22. بلاش شغل التسبيل لزميلتك طول المحاضرة، ركز عشان ماتتسئلش سؤال وأنت سرحان ويبقى شكلك بايخ.

21. على الأقل حسسني إنك جاي تكتب أي كلمتين، يعني يبقى معاك أجندة وقلم تكتب بيهم، والأجندة لها فايدة تانية إنك هتقعد عليها بدل ما تقعد على الأرض وهدومك تتوسخ عند الكافيتريا أو في الجنينة.

20. خد بالك مفيش ملازم تنفع معايا، ولو قلت في الامتحان ماخدناش الموضوع ده هايتعمل عليك أحلى حفلة، وكل اللجنة هاتضحك عليك لما تكتشف إني دكتور المادة اللي أنت بتشتكي له إن دكتور المادة ماشرحش الموضوع وأنت مش عارفني أصلا.

19. كل في بيتكم وادخل الحمام في بيتكم، إحنا الدكاترة مش بنلاقي حمامات نضيفة، أنت كمان مش هتلاقي، ابقى قابلني.

18. ولد ولا بنت ييجوا يقولولي عايزين ناخد درس يا مستر، ولا حضرتك بتدي في سنتر إيه؟ ممكن أعلقهم في المروحة بتاعة المدرج، الدروس دي كانت أيام ثانوي، هنا الكتاب والمحاضرة والمكتبة تقرأ فيها مراجع يا بطل

17. نظام أنت أحسن دكتور في التاريخ، وأنت مفيش زيك وانت بابا وماما وأنور وجدي، مبناكلش منه، وبتقل في نظري جدا، ومر علينا من العينات دي كتير وهايتطبق عليك النظام زيك زي غيرك.

16. بلاش نظام الأجندة والكتابة من أول المحاضرة لآخرها، شغل الكاتب المصري ده بيخليك متعرفش تركز في اللى الدكتور بيشرحه.

15. بلاش نظام التسجيل، أنت مش جاي حفلة عمرو دياب ولا تامر حسني ولا أنت مخبر جاي تسجل للدكتور عشان تروح تسلم تقرير عنه.

14. اوعي تنام في المحاضرة، عايز تنام روح ومتحضرش المحاضرة أحسن عشان هضطر أقلق سيادتك وأصحيك لأن شخيرك جايب المبنى التاني.

13. العيال اللى بتشرب ممنوعات وبتعمل حاجات خليعة، والله لأرش عليكم مياه وعملتها قبل كدة، فمافيش حد يعمل كده، عيب انتم طلبة جامعة ومحترمين وكبار.

12. لو بنت وقاعدة في المدينة افتكري دايما أهلك وإنك جاية تتعلمي، أول ناس هتتكلم عنك بطريقة وحشة الشباب اللي هاتمشي معاهم ويرسموا عليكي دور الحب.

11. افتكر تاني، اوعي تعمل ناصح على الدكتور.

10. لو فيه أنشطة في كليتك شارك وعيش الجامعة، لأن الأيام دي مش هاتتكرر تاني، بس إياك تأثر على دراستك وإلا هاتتفضح لما تخلص وهم عاملين يافطة لتهنئتك بالحصول علي الليسانس بعد كفاح 10 سنين.

9. رضا شئون الطلبة من رضا أمك وأبوك، اوعى تتخانق معاهم مهما حصل لأنهم بردو هايطلعوا صح وأنت الغلطان وهايطلع عينك.

8. العيال بتوع سنة أولى بلاش شغل الثانوي بالتخبيط على باب المدرج وتطلع تجري، زميلك اللي كان واقف هيفضحك ويقول على اسمك أول ما هقول له هاسقطك.

7. البنات بلاش الكعب العالي خصوصا اللي في كعبه حديدة، وبلاش المشي بنظام «تيك-تاك» وتخلي المدرج كله يبص وتشتتي لي المحاضرة، هاتزعلي أوي لما يضحكوا عليكي.

6. بلاش طرقعة اللبان، شكلك بيببقى زبالة، وبلاش تصوير سيلفي «بوز المعزة» في الكلية، الناس بتضحك عليكي.

5. اللي بيدخلوا المدرج والمحاضرة شغالة، لو الدكتور سمح بالدخول ادخل من الباب الخلفي واقعد في أقرب مكان، مش لازم تقعد جنب صاحبك وتقوّم البنج كله.

4. بلاش شغل النط من فوق البنجات والكتابة عليها بالمسامير والقلوب «وأحمد ومنى حتى آخر العمر»، لأن أنت بتحفر في البنج ومنى بتذاكر، ولما تسقط مش هاتعبرك يا فاشل يا فاشل.

3. العيال اللي بييجوا من الكليات التانية وفاكرين آداب الكعب العالي والكلام القديم موت ده، وبنبقى مش عارفين نمشي منهم، هانرش مية ونكهربها.

2. بلاش القعدة على السلالم وتقفلوها وكل اللي طالع واللي نازل لازم يستأذن حضراتكم عيب.

1. الموبايلات الصيني اللي بتشغلوها على أغاني وكأنكم في فرح ومشغلين أوكا وأروتيجا وتشوش على المحاضرات، ابقى خليهم ينفعوك لما تتقفش.

المصري لايت

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *