قُالوا لا..!!
قُلنا لا
لا للعناد ..
ما إنتو لسه كمان جُداد..
الطريق يحتاج رفيق ..
الرحلة تحتاج ليها زاد..
ألزموا الصمت النبيل..
قالوا لا ..
لن نُذلَّ ولن نميل..
ولن نقيف موقف حياد..
أمريكا لميهوا الجداد..
النظام الدولي أصبح مُختلف..
اتفرتق السوفيت تزعّزع ..
تاني قط ما بيأتلِف..
أمريكا جات بنظام جديد
تأمُر وتنهي بلا نديد.
قُلنا لا
كيفن نخالف للدُول كيفن نحيد.؟
كيفن نفارق ننزوي ونقيف بعيد..؟
أهلنا قالوا زمان شديد..
ما تموت براك
موت الجماعة كأنو عيد..
قالوا لا
نحنّ أسياد ما لينا سيد..
كيفن نكون للغير عبيد..؟
نظامنا ذاتو نظام فريد..
والقصة بس كانت نشيد..
حا نشيِّد نحن بلادنا..
حا نفوق العالم أجمع..
حا نملأ سلال العالم
يأكُل من خيرنا ويشبع
حا نعمل بُكرة نسوي
زي حشّاش بي دقنو بيزرع
شوفوا الأن المشهد
وقفت مكنات المصنع
الأرض الكانت عامرة
صبحت بوراً بلقع
لا لحقنا الفات قُبالنا
لا عارفين كيفن نرجع
بلا أقنعة – زاهر بخيت الفكي
صحيفة الجريدة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة