حزين أنا لاني اليوم سأفارق السودان فراقا قد يطول نوعا ما لعلاج ابنتي ومن ثم الاستقرار في بلاد أخرى ولذلك قررت أنو اعمل لي حاجة تجعلني مطمئنا على بلدي ووطني واخلاق بني وطني فقلت اخرج واختبر الناس البقابلهم في سودانيتهم لسة موجودة ولا راحت…. فخرجت من منزل نسابتي في الفتيحاب قرب الافطار قبل ساعة ونصف تقريبا من الآن ثم ذهبت الى المحطة القديمة في أول الشقلة وقلت لي بتاع الهايس انا ماعندي خمسة جنيه للمواصلات ….
قال لي يا زول بي بدلتك دي وما عندك فضحك ثم قال لي اركب ساي يا زول حرم لو عايز نوصلك لي برش فطورك شكرتو وركبت ولمن وصلنا السوق العربي شكرتو واديتو حقو وقلت ليهو انا بختبرك بس انا قصدي ما عندي خمسة لكن عندي خمسين…وطبعا ما كذبت عليهو لانو انا قصدي انو جيبي ما فيهو خمسة جنيه فكة …..
شلت الباقي الاداني ليهو واشتريت بيهو رصيد علشان اقول للبعدو نفس الكلام…. وركبت الهايس البعدو وكررت نفس السيناريو ورد علي بي نفس الكرم ونفس الاريحية..وقال لي اركب يا ابن العم ساكت هي بقت علي الخمسة بتاعتك كتيرة وقليلة رايح يا حبيب…. وفعلا ركبت وفي الطريق دخل علينا الفطور فلقينا شباب زي الورد في صينية شارع المطار فطرونا في عرباتنا بهمة وروح جميلة ونزلت من الهايس في جنب مستشفى القلب علشان امشي مركز الثريا اها عزموني ليك بروش كتيرة في الشارع وانا بعتذر ليهم ووقفت في جنب مستشفى القلب ثانية واحدة بس جاني بتاع عربية بيكانتو ولعة ومكيفة ماشاء الله ربنا يزيدو وبدون ما أأشر ليهو قاللي اركب ووصلني لحدي تقاطع البلابل وقال لي وصلت ولا أوصلك قلت ليهو لا شكرا ليك انا وصلت واديتو دعوة كاربة بتاعة صائم مقطوع في الطريق
وهناك مشيت بي رجليني لحدي الثريا وسط عزومات البروش لحدي ما وصلت الشباب التحت المركز ناس مخبز سماح حلفو علي فجلست كملت فطوري معاهم…وانا في الافطار اتصل علي الصديق مدرب الثريا القدير أبوبكر حرزاوي قال سمعنا يا باشمهندس انك مسافر هسة قلت ليهو اي قال من محلك ما تتحرك باقي مشاويرك كلها علي لحدي السفر انا جاييك هسة …….
أنا غايتو من الرحلة دي طلعت بالآتي…… مهما يكونوا البحكمونا والناس الخلونا نفارق البلد دي سيئين ولكن يظل الشعب السوداني شعب معلم ويستحق أن يحيا بكرامة …
ارفع راسك فوق لانك سوداني….
رسالة أخيرة لمن يحكموننا :
أنتم لا تستحقون شعب كشعب السودان
الماستر كوتش
عمر أحمد قرافي
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
صدقت الناس لسه بخير
وصدقت مقولة الطيب صالح من اين اتي هؤلاء…
وصدق المثل البقول النار تخرا الرماد….إنت فهمتنى
اسأل الله العظيم رب العرش العظيم ان يشفي ابنتك
و يوفقك و يصلح حال البلد و يرد غربتك
و يا رب هون علي اهلنا في السودان
و انصرهم علي من ظلمهم
و بالسلامة ان شاءالله
الله اكبر
الخير باقٍ الي قيام الساعة و نفتخر باننا امة سيدنا محمد
صلوات الله عليه وسلامه ، و كشعب سوداني نعتز باتباعنا للفطرة السليمة و لروح الاخوة والتسامح ، نسأل الله عز و جل ان يلطف بنا .
تصور كيف يكون الحال لو ما كنت سوداني .. وأهل الحااااااارة ما أهلي؟
بالسلامة ونسأل الله الشفاء لإبنتك وأجر وعافية إن شاء الله…
اللهم أقسم لنا من خشيتك ما تحول به بيننا وبين معـصيتك .. ومن طاعـتك ما تبلّـغـُـنا به جنتَـك .. ومن اليقـين ما تُهـّون به عـلينا مصائبَ الدنيا .. ومتـّعـنا اللهم باسماعِـنا وأبصارِنا وقـواتـِنا أبداً ما أبقـيتنا .. واجعـلهُ الوارثَ منـّا .. واجعـل ثأرنا على من ظلمنا.. وانصُرنا على من عادانا .. ولا تجعـل مصيبـتَـنا في ديـننا .. ولا تجعـل الدنيا أكبرَ هـمِنا .. ولا مبلغَ علمِنا .. ولا اٍلى النار مصيرنا .. واجعـل الجنة هي دارنا .. ولا تُسلط عـلينا بذنوبـِنا من لايخافـُـك فينا ولا يرحمـنا .
اللـهم أصلح لنا ديـنـَنا الذي هـو عـصمةُ أمرِنا .. وأصلح لنا دنيانا التي فـيها معـاشُنا .. وأصلح لنا آخرتـَنا التي اٍليها معـادنـا .. واجعـل الحياة زيادةً لنا في كل خير .. واجعـل الموتَ راحةً لنا من كلِ شر.
الـلهم انا نسألـُـك فعـلَ الخيرات .. وتركَ المنكرات .. وحبَ المساكين.. وأن تغـفـر لنا وترحمنا وتتوب علينا .. واٍذا أردت بقـومٍ فـتنةً فـتوَفـنا غـير مفـتونين .. ونسألك حبَـك.. وحبَ مَن يُحـبـُـك.. وحب عـملٍ يقـربنا اٍلى حـبـِك .. يا رب العــالمـين .
اللهم اغـفـر لجميع موتى المسلمين .. الذين شهـِـدوا لك بالوحدانية ..ولنبيك بالرسالة .. وماتوا على ذلك .. اللهم اغـفر لهُم وارحمهُم وعافهم وأعـف عنهم .. واكرِم نـُزلَهم .. ووسِع مـُدخلهم .. واغـسلهم بالماء والثـلج والبـَرَد.. ونقـّهم كما ينقى الثوب الأبيض من الدنس وارحمنا اللهم برحمتك اذا صرنا الى ما صاروا اٍليه..
اللهم اغـفـِر لنا .. وارحمـنا .. وأعـتـق رقابنـا من النـار .
اللهم اغـفـِر لنا .. وارحمـنا .. وأعـتـق رقابنـا من النـار .
اللهم اغـفـِر لنا .. وارحمـنا .. وأعـتـق رقابنـا من النـار .
اللـهم تـقبـل منـا اٍنك أنت السميـع العـليم .. وتُب علينا اٍنك أنت التواب الرحيم .. وصلي اللهم على سيدنا محمد وعلى آله وصحبه وسلم.
والله الطيبة والكرم دي مضيعانا داخليا وخارجيا, والله بقينا ملطشه بسبب الحاجات دي اي زول داير يشتمنا ويستحقر فينا