كوش نيوز .. أخبار السودان بين يديك

شبكه وشربكه



شارك الموضوع :

شبكه وشربكه


* أمس حرمتنى الظروف من السير مع المريخ.
* أمس سار وحيداً منى.
* ولكن سار شفوت معه ولم يتركوه وحيداً.
* تابعتها على شاشة النيلين.
* وأدركت معاناة الناس البتابعوا الكورة فى التلفزيون.
* نيلين.
* تقول صوروها بى موبايل.
* وفى الموبايل نوكيا الزماااااااااااااااان داك.
* الموديل البعد تلاتين عشرة.
* والله لو صوروها صورة أشعة كان طلعت أحلى من كده وأوضح!!
* كورة مغبشة.
* فعلاً نيلين أيام الفيضان والطمى مطين الحياة كلها.
* كم مرة الصورة تكون جايبة النص الما فيها الكورة!!
* ولما تطلع الكورة من النص الكانت فيهو.
* الكاميرا تجرى النص الكانت فيهو الكورة!!
* بس التقول الكاميرا بتلعب مع الكورة سك سك.
* تجيها بى جاى.
* تجرى بى هناك.
* وشدة ما الكورة مغبشة.
* الشات البلنت منو ما شفناهو.
* عادوها اربعين مرة.
* الشاتة ذاته من خلال شاشة النيلين ما عارف روحو شاتها.
* لذا كان المعلق يردد.
* راجى جاب البلنت.
* وأضاف عليها كمان معلومة.
* معلومة زول متابع.
* قال كدة راجى عنده هدفين فى الممتاز.
* وناس الأستديو التحليلى.
* لى بعد الكورة يعيدوا فيها.
* ويقولوا راجى جابها.
* أيها الناس.
* التصوير كان لازم يحترم المشاهدين.
* والشغل ما نضيف.
* وأضاءة أستاد الخرطوم جعلت بله راجى.
* وزادت طين النيلين بله.
* قليل من الأحترام للمشاهد يا ناس النيلين.
* وبالمناسبة.
* شريطكم الأخبارى أمس بعد كورة الهلالين كان قديم.
* وعن ان المريخ يجهز لى مباراة كمبالا.
* ووقتها خفت تجيبوا لينا كلام عن نميرى قال ونميرى قال.
* وعندكم أعادة يا ناس النيلين.
* والله صورة أعادتكم تحلف تقول صورة مقطعية.
* يا ناس.
* مالكم؟؟؟؟
* قليل من الأهتمام والتجويد يا نيلين أهتماماً بالمشاهدين.
* وقليل من الأهتمام بالرواد يا ناس أتحاد الخرطوم.
* وقليل من الأعتبار للجماهير يا ناس المريخ.
* فالشوط الأول ونحنا لابسين أصفر والسلاطين بالأحمر ومسيطرين على الكورة.
* كنا قايلين دى أعادة لى كورتنا ضد البايرن.
* الكورة كلها عند السلاطين.
* وأذا كان المريخ يفقد هيبته على أرضه.
* فعلى الأرض السلام.
* أخاف لو أستمر على هذا المنوال أن نطلق على أرض المريخ.
* الأرض المحتلة.
* معقولة طوالى نتجهجه فى أرضنا؟؟؟؟
* هو الزول يموت وين ولى شنو؟؟؟؟
* موش فى أرضو وشان عرضو؟!!
* أيها الناس.
* بالأمس كنا كعبين شديد.
* ويمكن مخزون اللياقة قد خان السلاطين.
* ولكنى لن أضيع كلماتى ساى.
* فكلماتى بتضيع ساى أذا وجهتها لى زول فى أيدو مافى شى.
* زول لا بحل لا بربط.
* لذا لن أوجه كلماتى لى مجلس المريخ.
* قلت أوجهها لى عبدالصمد.
* البحل وبربط .
* وللبلف بقرط .
* عبدالصمد.
* علييييييييييك الله جيب لينا مدلك.
* خلينا نتفكفك قبال تفكفك.
* علييييييييك الله يا عبدالصمد.
* العشم فيك كبير.
* وأنت الوحيد البتحل وبتربط وللبلف بتقرط.
* كدة كلماتى ما بتضيع.
* قلتها لى زولاً بحل وبيربط.
* أيها الناس.
* أبدعت قناة النيلين فى الحلقة التى أستضافت فيها فطومة أختى
النصرى.
* سيدا.
* النصرى لقبو سيدا.
* وكدة فى المريخ اتنين سيدا.
* سيدا المجنن الناس فى الكورة.
* وسيدا المجنن الناس فى طمبوره.
* عشان تعرفى يا فطومة أنو الأبداع دائماً مريخى.
* أيها الناس.
* لسه المستوى بطال جداً.
* لسه الحكاية ما واقعه لينا.
* أملنا الوحيد فيما يخرج به أجتماع المجلس يوم السبت.
* أملنا كبير فى المجلس.
* بنأمل تسود الشفافية ومصلحة المريخ والحكمة والعقل والتعقل.
* ونلتمس البعد عن الأنا والمكابرة والحردان.
* أيها الناس.
* غاندى وعلى جعفر خفاف.
* وما مفروض يلعبوا مدافعين جمب بعض.
* الحكاية بتبقى هشة.
* والمدافع ضعيف الألتحام يكون دائماً كثير المخالفات.
* فهدف العجب كان لضعف فى التغطية من غاندى.
* وضعف فى الألتحام من على.
* وضعف فى التغطية من غيرهما.
* وكان فيصل العجب نجماً للقاء.
* ولا تعليق.
* أيها الناس.
* تسعون فى المائة.
* أو قل مية وتسعة فى المائة من لاعبينا لسه تايهين.
* ولولا الحل الفردى لباسكال.
* كان الموضوع أتشعب شديد.
* وكان أتشعب بلحق أعشاب النيل.
* جنس شربكة وجنس شبكة.
* شربكة زى الشبكة.
* وشبكة زى الشربكة.
* والوسط كان علة وعالة.
* وأذا أستمرت هيك حالة.
* يبقى حليل الرجالة.
* وحليلهم رجالاً بلوكوا اللبانة اللبانة التلوكهم.
* أو كما قال صديقى الشاعر الحلمنتيشى محمدعلى عبدالمجيد.
* عبد الصمد.
* المدلك يا أخوى.
* ماتنسى.
* أنت ياكا العليك الرك.
* سؤال برئ جداً.
* حفظ حارس كادقلى القطعها لينا الموسم الفات فى راسنا ونال النجومية.
* مشى وين؟؟؟
* أمس ماشايفو.
* مشى فريق تانى ولا عيان
* أها.
* نجى لى شمارات والى الخرتوم.
* أكان شفت يا والينا.
* الباعوض ياكل فينا.
* والملاريا أبت تجينا.
* الباعوض البعضينا ده صينى يا والينا؟!!
* ولا الملاريا بقت ما بتظهر فينا.
* وبقينا يا والينا ما بنملا عينا.
* ولا الباعوض بقى مننا بشيل الملاريا بدل يدينا.
* والينا.
* افتينا.
* أو فتو لينا.

سلك كهربا

* ننساك كيف والملاريا أبت تجينا والباعوضة حزينة.
والى لقاء
سلك

في السلك – بابكر سلك

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.