7 / 1 .. دي النتيجة ولّا دخل المباراة؟

< خلاص افرحوا ..اطلعوا من حالة (الاحباط) المحبوسين فيها دي.< اعملوا ليكم رحلة ..انتصرتوا على النسور 7 / 1.< رجعوا لقب (العالمي) تاني.< واتكلموا عن (المقصورة).< ونظموا ليكم مهرجان ..جيبوا فيه فريق الاهلي المصري.< ناس الاهلي المصري لو دفعوا ليهم قروش ..لو عاوزين تجيبوهم في مسرح قاعة الصداقة يقدموا ليكم عرض مسرحي ..ما عندهم مشكلة.< ما عندهم أي قضية.< ولاّ اقول ليكم ألعبوا مع بايرن ميونخ؟.< طلعوا الناس من الحالة دي ..المريخاب معنوياتهم كعبة شديد ..وحالتهم زي الزبادي منتهى الصلاحية.< بعمل (تسمم) طوالي.< خلاص افرحوا ..نططوا ...انتصرتوا على النسور ...(سبعة).< سبعة دي شنو؟.< شيلة ..ولاّ قولة خير ..ولّا فتح خشم.< سبعة دي نتيجة المباراة ..ولاّ دخل المباراة.< عاوز افهم.< ما مهم ..المهم عندنا تطلعوا من الحالة دي...ما عاوزين نشوفكم بالبؤس دا يوم 10 ابريل.< صلحوا معنوياتكم ..وتعالوا.< ان شاء الله تغشوا نفسكم.< كمان انتوا عندكم مشكلة...عندكم اعلام ..علب الساردين دي ممكن يعملها ليكم كاسات جوية.< حاولوا (فرفشوا) شوية.< جيبوا فرقة تيراب.< جيبوا ناس محمد موسى ...ومحمد صديق ..يعملوا ليكم عروض.< لازم تحاولوا تنسوا حكاية (المجموعات) دي.< لازم تطلعوا من الجو دا.< اعملوا ليكم حفلة عيد ميلاد للحضري.< أو لي اكرم الهادي سليم ...ما في مشكلة.< جيبوا محمد النصري ..يعمل ليكم حفلة في المعسكر.< اعملوا يوم مفتوح ..بمناسبة الانتصار على النسور.< طبعاً انتوا اكتر من (النسور) ما ح تلعبوا مع فريق.< طلعتوا من دور الـ (64)...واتفرغتوا لي موضوع النسور دا.< اقول ليكم حاجة.< اتصدروا الدوري الممتاز.< نحن هسع الشغل المحلي دا ما فاضيين ليه.< ولا عندنا ليه وقت.< بنخليكم تتصدروا ..إلى ان نتأهل ان شاء الله إلى المجموعات ..بعدين بنقبل عليكم.< عشان انتوا احبابنا.< عشان انتوا اصحابنا..ومحتاجين لي عملية رفع معنويات فورية ..ح نخليكم تتصدروا الممتاز.< وديدي الفاتح ذاتو ما بقصر معاكم.< بمنحكم ضربتين جزاء ...هبة كدا ..بمناسبة السيول والفيضانات والامطار.< اقصد بمناسبة الخروج من (التمهيدي).< طبعاً (التميهدي) اكعب من السيول والامطار والفيضانات.< اعملوا ليكم (نفرة).< أي زول يتبرع ليكم بي (ضربة جزاء).< الزول الكعب كدا ..والماسكها شديد ..بتبرع ليكم بي (ضربة ركنية).< اها قصرنا معاكم.< تتصوروا نحن كنا عارفين (النسور) ما بنستروا ..لكن برضو كنا عشمانين.< عشان ناس المريخ برضو ما بنستروا.< نحن عارفين ...(وحافظنها حفظ)..النسور ما عندو أي (نقطة).< ولا نقطة.< زي البقالة ...البتقول لي صاحبها عاوز طحنية ..يقول ليك طحنية ما في.< تقول ليه عاوز (فول).< يقول ليك فول مافي.< عاوز بسكويت.< يقول ليك بسكويت مافي.< عاوز (زيت).< يقول ليك زيت ما في.< عاوز (رغيف).< يقول ليك رغيف مافي.< تقول ليه طيب يا ود الناس انت فاتح ليه؟.< يقول ليك فاتح عشان اقول ليك ناس عباس عمتهم الفى الرياض اتوفت.< في اصحاب بقالات كدا.< حاجة ما عندهم ...شغلتهم كلها بس نقل الاخبار السيئة.< الواحد فيهم (كبريت) ما عندو.< هسع ناس النسور ..قريبين من حكاية (البقالة) دي.< ناس حتى الاسبوع السابع ..(نقطة) ما عاوزين يطلعوا بيها.< النسور السنة دي ما شفنا ليهم أي (نسر).< نسوركم دا انتوا (شهادة عربية).< الشهادة العربية مالها؟...كمان فيها كلام...تشخبطوا في عيونكم زي (السبورة) في اخر يوم دراسة.< أي طالب يجي يكتب فيها (ذكرى) ويمشي يتخارج.< نسوركم دا نسور (زينة).< عارفنهم.. (المعلومة) واصلانا ..وفايتانا بي غادي...ناس النسور السنة دي (تعبانين).< ياخدوا (سبعة) في اول لفة.< سبعة يا ناس النسور ..انتوا كنتوا شايتين في نفس الاتجاه الشايت فيه المريخ ولّا شنو؟.< لو دي كورتكم يا ناس النسور ..مفروض تنزلوا التانية من الاسبوع السادس.< القاعدين ليها شنو؟.< ناس الموردة يلعبوا في الاولى ..والنسور الذي لا يملك حتى الاسبوع السابع (نقطة) بيلعب في الممتاز.< النسور بي طريقتو دي ح يكتل ليكم الدوري الممتاز.< عشان الفريق الهابط ح يتحدد من الدورة الاولى.< ولو اتحدد الفريق الهابط من بدري ...(البيع) بيظهر ..والفتح ..والعلاقات ..وشيلني وبشيلك.< عشان كدا ناس النسور ديل لازم يلحقوا نفسهم.< ما عاوزنهم يعملوا ليهم رقم قياسي في عدم النقاط في اكبر عدد من المباريات.< ديل يكون شاحن موبايل ما عندهم.< قاعدين في (السهلة).< لكن مع ذلك ... تتخيلوا ومع تواضع مستواهم كنا عشمانين في (النسور) يعملوا ليهم حاجة قدام المريخ.< مع دا كلو.< العالمي دا قاعد ساكت.< قاعدين في (السهلة).< العالمي دا ...كمان افضل منو (النسور).< العالمي تاميها (تحكيم) ساكت.< غايتو لو قابلتونا بي حالتكم دي يوم 10 ابريل ..ح نشهيكم العافية.< ح نفرتكم طابق طابق.< طوبة ..طوبة.< مغنطيس ما يلمكم.< يا ريت لو يوم 10 ابريل دا بكره.< تتصوروا (بويا) إلى الان شابك في الحضري ...ما عاوز يتنازل.< بويا قال جيبوا لي (الحضري).< قلنا ليه نجيب ليك الحضري من وين؟...في الزحمة دي.< قال انا ما عارف ...بس جيبوا لي الحضري يوم 10 ابريل.< يا ود الناس الحضري دا ما في حاجة بتجمعك بيه.< انت بتلعب في الدوري السوداني ...وهو بيلعب في الدوري المصري.< غايتو إلّا ينظموا ليكم دورة مشتركة في (حلايب) ..عشان تلم في الحضري دا يا بويا.< طبعاً في ناس ح يقولوا ليك (حلايب) دي مفروض ما تجي في العمود.< ويقولوا ليك ..ويقولوا ليك.< دا عمود شنو؟.< عمود (مستشفى).< انت يا بويا بتنسى.< انت بتلعب في دوري ابطال افريقيا للاندية ...والحضري بيلعب بي سنو دي في (الكونفدرالية).< البلمكم شنو؟.< تتخيلوا النسور مع وضعيتو دي ...جاب ليه (هدف) في المريخ.< يعني ما قصروا...ولينا حق نعشم في فريق النسور يعملوا ليهم حاجة قدام المريخ.< وعشمنا هذا ليس نتيجة قوة لفريق النسور ..وانما ضعف فريق المريخ هو الخلانا نعشم في نقاط المباراة الثلاث.< عليكم الله ..هسع لو ما ساي ...النسور دا فريق يحتسبوا ضده ضربتين جزاء.< غايتو وديدي الفاتح عوّض ليك فيصل العجب للمريخ.< البعمل فيه وديدي الفاتح دا ..فيصل العجب ما كان بعملو للمريخ.< وديدي الفاتح لضربات الجزاء..تقول (ترزي).< قالوا ليك وديدي الفاتح لو ما شافها شينة كان كل خمس دقائق عاوز يحسب ليه ضربة جزاء للمريخ.< انت يا وديدي وقت بتعرف تحسب ضربات الجزاء ..في مباريات الهلال ليه بتعمل فيها (بتهوفن).< ما شايف أي حاجة.< انتوا الزول دا في دائرة الكورة حقت المريخ.< في روابط المشجعين.< شغال في الزعيم مع ناس بابكر سلك.< طيب ليه بعمل كدا.< البعمل فيه وديدي الفاتح دا ..طبيب المريخ ما بعملو.< طبيب شنو؟.< مدلك الفريق ما بعمل كدا.< معقولة زول في الدنيا يمنح ليه فريق لاعب ضد النسور ضربتي جزاء.< طيب لو كنتوا لاعبين ضد الرابطة كوستي كان عملتوا شنو؟.< المريخ اخر مباراة في الممتاز الماضي امام النيل الحصاحيصا منح (العالمي) للجلكسيات (ضربة جزاء).< النيل الذي لعب سنترليق الهبوط أو البقاء في الممتاز ..احتسبت ضده (ضربة جزاء) لصالح المريخ ...(عشان يشيل الممتاز).< والمريخ في البطولة التى طار منها من دور الـ (64)...منح ضربة جزاء في الخرطوم ..وضربة جزاء في كمبالا ..وطار لينا بعد ذلك.< امام النسور امس ..حكم المباراة ...في الشوط الاول وحده منح ليك المريخ ضربتي جزاء.< طيب انتوا ما تعملوا (اسكراتشات).< اعملوا ليكم تحويل رصيد لضربات الجزاء.< احسن عشان الموضوع يكون واضح ..وما فيه لف ودوران.< درباتكم شغالة من الدقيقة الخامسة.< ملحوظة : عليكم الله يا ناس المريخ شفتوا (الصدارة) ساقطة كيف؟.هوامش< قالوا ليك ناس بلة جابر زعلوا.< عارفين زعلوا في شنو؟.< لو قلت ليكم ما بتصدقوا.< ناس بلة جابر زعلوا ..قالوا ليه ناس الهلال عندهم (خندقاوي) يجيب ليهم (جلاكسيات)...ونحن ما عندنا.< قلنا ليهم ..والله انتوا يا ناس المريخ تلقوا (الخندقاوي) دا ..مع طيشاتكم دي إلّا تنزلوا التانية.< الاستاذ امير سيد احمد ..المريخي الراقي تكفل بتذاكر سفر الجنيد إلى القاهرة.< وهذا دائماً هو الوسط الرياضي.< رغم ما فيه من خلافات ..وصراعات ..إلّا انه في مثل هذه الاحوال يتواجدون تعاضدًا.< برشلونة والريال الاخيرة كانت من اجمل مباريات القمة الاسبانية في السنوات الاخيرة.< المباراة كانت غاية في الروعة ...والدهشة ...والمتعة.< شميلس شنو البجيب ليه (5) اقوان.< انتوا المباراة دي كانت في ميدان المولد الكبير.< على كدا..موسى الزومة كان يمكن ان يطلع هداف الدوري من هذه المباراة.< اذا كان حكم المباراة براهو ..احتسب ضربتي جزاء.< تقول حاكمها في (دلالة الجمعة).< انت يا وديدي الفاتح ..قاعد تلخبط بين الجدعة ..وضربة الجزاء.< اكيد ..عندو (حول) في الحتة دي.< الايامات دي قدر ما افتح التلفزيون القى ليك برشلونة لاعب.< وقدر ما افتح لي جريدة القى (الخندقاوي).< قلت المباراة القادمة يمكن تكون بين برشلونة والخندقاوي.< انتوا الخندقاوي دا موش قال ح ينظم مباراة للهلال مع برشلونة.< بعد العملوا (بايرن ميونخ) في المريخ ..برشلونة دا لو جابوه لينا في ابوروف هنا دا ما عاوزنوا.< نحن عاوزين شغل.< لا بنفع معانا (العالمي)...ولا مقصورة.< امس قلبت الطبق عشان اشوف مباراة النسور والمريخ.< الطبق قال لي (لقد نفد رصيدك).< يجب تغذية (الطبق).< قلت الحمدلله ..عشان تاني ما في زول يقول لينا ..حولوا الطبق 26 درجة نحو الشرق.< دا طبق ولاّ لوري؟.< هو طبق ام (درداقة) البحولوا فيه دا من مباراة لي مباراة.< .............< عاجل : اتوفيستر امس نام ..صحى لقى المباراة سبعة ..رجع نام تاني قال ليهم صحوني مع الزمن البدل الضائع.[/SIZE]وإن طال السفر - محمد عبد الماجد صحيفة قوون