كوش نيوز .. أخبار السودان بين يديك

حزب نتفكفك بكل حرية!!!



شارك الموضوع :

حزب نتفكفك بكل حرية!!!


* ويواصل الأهلة تبريراتهم التى لا تقنعهم هم فى المقام الأول.
* ولكن يس بتاع زفة الألوان مرات بقول الحق.
* أو غالباً.
* فكان كلامو منذ مباراة هلال كادقلى أنو الفريق كعب شديد.
* ولكن ناس روشه لسه فى تبريراتهم التى تضحك التبرير ذاتو.
* يقول روشا.
* سابقة محاكمة ناد على تصرف فردى هى ثمن باهظ ستدفعه الكرة السودانية.
* أنتهى كلام الرشيد.
* وهل تقصد بالتصرف الفردى تصرف المنفلت الذى أصاب رجل الراية
بحجر طاحونة؟؟؟
* طيب قبلها يا روشا الدعيع برضو أصيب بحجر والكاميرا جابتو.
* ده برضو تصرف فردى من الجانب الجنوبى.
* والأول تصرف فردى من الشرق.
* والتصرفين ما بلمهم روشا مع بعض.
* ولا تصرفات أخرى شاهدنا فيها القوارير تتطاير فى الملعب.
* وأظن أن روشا يريد ان يقول ان التصرف الذين يدين النادى هو تصرف
جماعى.
* يعنى الجماهير كلها تشيل حجر واحد وتجدعو فى راس الحكم.
* يا روشا.
* تصرف فاروق جبرة كان تصرفاً فردياً.
* أين كنت عندما عاقب الأتحاد العام جبرة والمريخ وجماهير المريخ؟؟؟
* أم كان تصرف جبرة تصرف جماعى.
* لأن الذى دفر رجل الراية كان فاروق جبرة.
* وفاروق وجبرة برضو ما جمع.
* مثنى.
* يبقى فاروق وطرف المريخ اليمين وجبرة.
* كده بقى جمع يمكن معه معاقبة النادى لأن التصرف ما فردى.
* أيها الناس.
* أفتى سيحة بأن سرعة بكرى اربكت حكم الراية.
* دى جديدة لنج.
* خلاص حكاية يخطئ ولا يظلم بقت قديمة؟؟
* طلعت تبريرات جديدة؟؟
* ويواصل سيحة.
* ولكن سيحة لما قال أنو بكرى أعتدى على سفارى ويستحق بطاقة صفراء.
* ما قال لينا وكان عندو بطاقة صفراء قبلها نالها لما شات الكورة بعد
الصافرة.
* وبكدة يستحق الطرد.
* الكلام ده كلو فات على سيحة.
* ولكن إذا سمح لى سيحه.
* قبل سنين.
* وفى مباراة الهلال ضد جزيرة الفيل بمدنى.
* والكورة ضربة جزاء.
* الحكم خالد عبدالرحمن.
* شات الكورة الماسورة ودقت الماسورة ورجعت للماسورة.
* جابها قون.
* وكان الهدف الوحيد فى المباراة والذى كفل الثلاث نقاط للهلال.
* وقتها وفى التحليل التحكيمى يا حكامنا الخبراء.
* قلتوا فى الحالة دى أنكم إستفتيتم الفيفا.
* معقولة!!!
* طيب الفيفا قالت ليكم شنو؟؟؟
* لسه ما أفتت؟؟؟
* تكون سرعة إستفتائكم قد أربكت ناس الفيفا؟؟؟
* موش كفانا مغصة الحكام فى الميدان.
* كمان دايرين تطفشونا من التلفزيون؟؟؟
* أها يا رضا.
* تانى برنامجك ده أتفرج فيهو براك.
* وإستفتى الفيفا.
* وزيد سرعة بكرى.
* من زمن لاراش وأنتم تحتسبون التسللات أهداف.
* برااااااااكم تفتوا وتستفتوا.
* عشان كده يظل الصفر صفراً وعمرو ما ببقى مانديلا صحيح.
* قول يا سيحة الهدفين التسلل الجابهم بكرى بعد الصافرة صحيحات.
* برضو الكورة درون.
* ولا عندكم يا رضا أتنين أتنين مادرون؟؟؟؟
* بتعملوها.
* يا سيحة.
* بالله يوم الجمعة وضح للناس الحايشاهدوا الحلقة موقع شلوت كوليبالى للاعب الأمل الواقع فى واطات الله دى بعد الصافرة من القانون.
* يا ربى يكون برضو شلوت كوليبالى أسرع من صافرة الحكم عشان كده أربك المصور وجاب الفضيحة يا سيحة؟؟؟
* وورينا شلوت هليفة لما جلى الكورة فى الشوط التانى وركب لاعب الأمل والحكم أحتسبها مخالفة على لاعب الأمل.
* فهل كانت رجل خليفة أسرع من كلوة لاعب الأمل لذلك وقعت الكلوة قدام الكراع؟؟؟
* أشرحو لينا.
* البرنامج بتاع رضا.
* والهلال هلال عصمت.
* ما هلال رضا.
* لكن أشرحوا لينا.
* وريتونا لكن.
* أيها الناس.
* صحى تقرير الحكم بتاع الفلقة بى حجر الطاحونة مطلوب أمام الفيفا؟؟؟؟
* غايتو لو مطلوب صحى.
* شوفوا البرير بخارجكم.
* قال تصرف فردى قال.
* التصرف الجماعى ده زى بتاع موقعة ذات المراتب يا مزمل ولا روشا
قصدو شنو؟؟؟
* أها
* نجى لى شمارات والى الخرتوم..
* أكان شفت يا والينا.
* فرحنا بالحريات للأحزاب.
* لكن يعنى لازم ندخل حزب عشان نشعر بى حرية؟؟؟
* لو كان لازم يا والينا.
* ما بتعتبروا لينا رفضنا الأنضمام للأحزاب دع فى حد زاته حزب؟
* يعنى لازم نتسجم ونترمد مع حزب يا والينا؟
* خلاص.
* إعتبرنا حزب يا والينا.
* وأى أسم سمينا.
* حزب نتفكفك بكل حرية يا والينا.
* سمينا.
* من اهداف حزبنا.
* أولاً يا والينا.
* نندد بالرسوم العالية لإصدار الجواز البفكفكنا وبودينا.
* ندين ونشجب ورق الجواز الكتير المخلى جوازاتنا تقيلة علينا.
* ورقة واحدة تدق عليها شوهد عند الخروج يا والينا.
* وتانى كان شوهدنا محل ما تدوروا ودينا.
* ورقة واحدة فى جوازاتنا يا والينا.
* ونوفر ورق الدولة للبعدينا.
* ثانياً يا والينا.
* ندين ونشجب الإرتفاع فى رسوم المغادرة.
* ونطالب بمجانية المغادرة.
* والطيارة طايرة بينا.
* الكابتن لنشيد أنا سودانى أنا يشغل لينا.
* ثالثاً يا والينا.
* نطالب وبشدة.
* شدة وتزول يا والينا.

سلك كهربا

* ننساك كيف وشافعنا قبال يتاتى بقول أديس أبابا قبال بابا وبقول أوكلاهوما قبال ماما.
والللللللللى لقاء
سللللللللللللللك

في السلك – بابكر سلك

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.