ود اللازمة زمان حسب (عبقريتو) المحدودة كان فاكر (العبقرية) دي في (الشعيرية باللبن).

ولا بناقش في الموضوع دا ..ولا بقبل فيه (حوار).

حتى لو كان حوار هادي وفيه نثريات وحوافز وبدل سكن.

ود اللازمة كان بحب (الشعيرية باللبن) حبا جما…لذلك هو يعتبرها عملا (عبقريا) مثلها مثل (انا والردى) عند صلاح أحمد ابراهيم (وما هو عارف قدمو المفارق) عند الخليل.

شايفها كدا هو ..وانا بنقل ليكم الواقع بي امانة شديدة.

قبل (العبقرية) دي.

في هذه المساحة قبل ايام كتبت عن (الفلسفة) من منظور (كروي) خالص او منظور (وقتي) كدا.

فلسفة الزول البكون واقف تحت العمود قاعد يفكر.

نوع دا ..تفكيرو تفتكروا ح يطلع منو شنو؟.

فلسفة ..الخميس يوم قصير.

القال كدا منو؟.

الروس ديل بقطعوا من رأسهم.

ونحن نشيل ونصدق ..وتبقى عندنا الحاجات دي قناعات.

ليه؟.

ليه بتفلسفوا فينا كدا؟.

نحن ناقصين (فلسفة).

هسع ديل عليكم الله ما قاعدين يتفلسفوا فينا.

ديل منو ديل.

ديل البتفلسفوا ديل.

يعني إلّا اقولهم ليكم.

اقولهم ما بترضوا.

نسكت …تقعدوا تكوركوا.

دي ما عاوزة ليها (عبقرية).

والعبقرية ذاتها ما ضروري ليها (الصلعة).

ولا عاوزة ليها (زهجة) كدا ..وقلق ..ورأي في اي حاجة.

القال ليكم (العبقرية) كدا منو؟.

انتوا (الروس) ديل بقطعوا من رأسهم.

عندنا جارنا (متعب) شديد.

متعب اكتر من عربيتو.

جارنا دا ..كان كل يوم الصباح بقوّمنا من دغش بدري..وبقول لينا ادفروا معاي العربية عشان تدور.

نحن كل يوم الصباح (بنلز) في العربية دي.

البكون لابس ليه شورت ..والبكون شايل (فرشة الاسنان).. والبكون شايل ليه كباية شاي ..والبكون لسه ما كمل نومو ..كلهم بدفروا فى العربية.

الحلة كلها بتدفر…بي اعمامك بتاعين اللجنة الشعبية.

نحن فيما بينا ..قررنا نعمل لينا صندوق عشان نجمع لينا قروش ونغيّر للزول دا عربيتو.

بي صراحة فترنا من (الدفر) دا.

وصاحبنا ما عندو (نية) يغير العربية ..ولا في بالو..هو خسران حاجة.

على الاقل بي (دفرتنا) دي …بنقلل ليه صرف البنزين ..عشان عربيتو دي ما بتدور إلّا بعد ما نقطع نص المشوار.

يعني زولكم دا عربيتو بتدور بعد ما يقرب يصل مقر عملو.

ونحن نشوف لينا (ركشات) نرجع الحلة نتم نومنا.

الحاجة البتفرس ..الزول دا يرجع العصر ..ويكون عندو مناسبة المساء ..سايق الاولاد وماشي عليها.

نقوم المساء كلو ندفر.

الغريبة والحاجة البتغيظ الزول دا كاتب في ضهرية عربيتو (اغرب حاجة حسادك اجاويدك).

قلنا ليه : والله فعلا …كلامك جد.

حاسدنك في عربيتك ..البندفر ليك فيها دي.

اها انتوا هسع ما بتفتكروا الزول دا بي عريتو (المكربعة) دي عندو (عبقرية).

المكربعة يعني (كركعوبة).

كنا بنقول ليه : عليك الله عربيتك دي ما تغيّر ليها (زيت).

الزيت عاوزنو نحن …تغير ليها هي زيت في شنو؟.

ارجع ليكم لي عبقرية (الشعيرية باللبن).

ود اللازمة كان برجع البيت في اخر الليل ..يلقى الحاجة عملت ليه (الشعيرية باللبن)..وخلتها ليه فوق التلاجة من الكدايس.

يلقى ليك الشعيرية باللبن بقت (باردة).

حاجة كدا في منتهى العبقرية.

يضرب ليك الشعيرية باللبن ..ثم يقول ليه كلام بالروسي كدا ..على ما اظن انه نظرية جديدة في علوم الادهاش.

ود اللازمة بشعر ليك بي (عبقرية) كدا ..يشيل الريموت ويقعد يقلب في القنوات.

يقيف في قناة قناة ..ويعلق.

هسع دا برنامج ..(كلام فارغ ساكت).

الكلام دا سمعناه الف مرة.

الزول دا ما عندو موضوع.

الفيلم دا شفتو قبل كدا.

ما يخلي ليه (قناة).

اي قناة يقيف فيها (يرشها) ليك.

ثم يجدع (الريموت) بعيد ..وينوم وهو مزحوم بالعبقرية دي.

الزول دا كانت العبقرية عندو على هذا النحو.

في واحد بي مناسبة الشعيرية باللبن دا ..قال لي (الفطير باللبن) كيف؟.

قلت ليه الفطير باللبن عبقريتو محدودة…زي الزول البكون راكب ليه (عجلة) قام (سداري)..افتكر الحكاية دي فيها (عبقرية).

الموضوع دا عادي ما فيه اي (عبقرية) ..ما تقعدوا تتعبوا لي ساكت.

ما تتعبوا في الفاضي.

شوفوا (العبقرية) التانية دي.

جيب ليك (21) باك …فيهم (21) بلة جابر ..واديهم (21) كورة ..وقول ليهم عاوزكم تودوا الكور دي كلها (الكشافات).

ما فيهم (باك) واحد ح يشوت الكورة صاح نحو (الكشافات)..كلهم بيجلوا من الكشافات ويصرجو منها.

نفس الـ (21) باك ديل ..اديهم و (21) كورة ..وقول ليهم عاوزكم تشوتوا الكور دي في المرمى.

كلهم ح يودوا الكور دي للكشافات.

اها في (عبقرية) اكتر من كدا.

يعني لو عاوز ليك (عبقرية) ممكن تختصر الحكاية من البداية بالصورة دي.

اديكم (خيار) تاني.

الليلة لازم احدد ليكم موضوع (العبقرية) دي …مواضيع الفلسفة والعبقرية دي عاوزة نقاش كتير.

جيب ليك (14) زول اشتر.

14 واحد اشتر شتارة تامة.

الـ (14) نفر ديل ..شغل ليهم اغنية محمد ميرغني (عاطفة وحنان يا ناس)..وقول ليهم ارقصوا لي في الاغنية دي.

عارفين الجماعة ديل ح يحصل عليهم شنو؟.

كلهم ح يكسروا (ركب).

عشان الاغنية دي فيها كوبليه فيه (قلبة) موسيقية كدا …الجماعة ديل مع شتارتهم دي كلهم (بجلوا).

نفس الـ (14) اشتر ديل ..شغل ليهم (النشرة الجوية) ح يفتكروا الموضوع (قصيدة جديدة).

الشتارة كدا.

والعبقرية كدا.

انتوا فاكرنها شنو؟.

قالوا ليك (17) اشتر ..مشوا ليهم مطعم ..طلبوا ليهم فول.

جابوا ليهم (الفول).

نزلوا ليك في (الفول) دا زي (الوست).

نفضو ليك نفض شديد.

وقت جاءت ساعة الحساب ..كل واحد من (الشتر) ديل قال ليك والله انا الفول دا ما عجبني.

دي طبعا (عبقرية) التملص من الحساب.

بتاع المطعم عندو (صلعة) كبيرة (شعر) ليك بالململة..ما عجبتو الفكرة.

صاحب المطعم مشى عليهم ..قال ليهم انتوا يا جماعة اكلتو شنو؟.

قالوا ليه اكلنا فول ..يعني اقلنا فراخ ..انت ما شايف الخلق دي عاملة زي الناس الراجعة من المقابر.

بتاع المطعم قال ليهم : الحساب يا شباب.

الـ (17) اشتر قالوا ليه نحاسبك على شنو؟..هسع عليك لو عاوزين نحاسبك بعد ما شفنا (صلعتك) الكبيرة دي ..بندفع ليك قرش.

بتاع المطعم الكلام عن (صلعتو) ما عجبو…طلع ليه (عكاز).

الجماعة قالوا ليه نحن ح ندفع ..بس الرغيفة الشلناها منك اخر حاجة …ما اكلنها ..عاوزين نرجعها.

الشتر ديل طبعا حسب (شتارتهم)..اكلوا فول ..دفعوا قروش (فراخ).

ما شتر!!.

مشوا يغسلوا ايديهم ..غسلوا موبايلاتهم.

ما شتر!!.

عاوزين يطلعوا من المطعم…دخلوا تاني.

ما شتر!!.

مشوا عشان يركبوا مواصلات جبرة.

ركبوا مواصلات المنشية.

ما شتر!!.

في الحافلة الكمساري قال ليهم كم؟.

بدل ما يقولوا ليه (17) حولوا الواحد يمين السبعة قالوا ليه (71).

الكمساري طلع (اشتر) ذاتو..قال ليهم لكن الحافلة دي ما بتشيل (71) راكب ..شال تذاكر (25) ركاب ..ومشى قال لركاب بص الوالي البشيل (46) راكب ما تدفعوا ..حسابكم خالص.

ما اشتر!!.

جماعتك في المنشية اكتشفوا انهم ركبوا غلط.

في واحد منهم قال ليهم ما مشكلة … شلت نمرة الحافلة.

ما شتر!!.

غايتو الزول وقت يكون عاوز (يتعرقبن).

ملحوظة : برجع ليكم تاني لي موضوع (العبقرية).

هوامش

ناس المريخ قالوا ح يسافروا عطبرة بالقطر.

يعني ح تسافروا بي شنو؟.

ما عندكم خيار غير (القطر).

انتوا بتلعبوا في بطولة الاندية الافريقية.

طبيعي ..ناس بلعبوا في الدوري المحلي يسافروا بالقطر.

تاني يا ضفر ما في (طيارة).

قطر بس.

الحصاحيصا تمشوا ليها بـ (الباصات).

عطبرة بالقطر.

الفاشر بنشوف ليكم (طيارة) حربية توديكم.

ما عندكم خيارات اكتر من كدا.

انا عمري ما شفت لي حظ ..زي حظ الاهلي المصري.

ناس الاهلي جابوا ليه قون في الدقيقة 94 وصعدوا به لمرحلة المجموعات في البطولة الكونفدرالية.

رغم ان مستوى الاهلي ضعيف للغاية.

لكن مع ذلك تأهلوا.

تأهلوا بنصف القيمة.

محترف الدفاع الحسني الجديدي ..سجل لفريقه الهدف الثاني في الدقيقة 80 ..وخلع الفانلة وطرد بسبب ذلك لأنه كان عنده كرت اصفر.

هل هذه عقلية محترف؟.

هذا المحترف جعل فريقه يلعب بعشرة لاعبين ليخسر التأهل امام الاهلي المصري بعد ان كسب الفريق المغربي نتيجة المباراة 2 / 1.

لكنه خسر التأهل.

ما عاوزين محترفين بهذه العقلية.

اللاعب الافريقي يظل يلعب بعقلية لم تتطور ولا تعرف الاحتراف.

قالوا في (12) لاعب في المريخ اعتذروا من رحلة عطبرة.

الحكاية دي عرفها امير كمال.

اتخارج من بدري.

مالو ومال (القطر).

يا جماعة انتوا سمعتوا الخبر.

حضري شنو البلعب في الهلال.

لا عاوزين حضري ..ولا عاوزين شحاتة.

حضري مين؟.

نحن حركات الحضري دي لا بتنفع معانا ولا حاجة.

ولا بنكضب.

…..

عاجل : معقولة يا ناس الهلال كمان عاوزين تعملوا حوض سباحة للحضري.