محمد عبد الماجد
سيرجيو اعمّلوا ليه (حفلة شاي) ورجعوه
“””””””””””””””””””””
سيرجيو دا لو ولف ليكم ح يبقى ليكم زي يوسف محمد ـ تاني ما بتقدروا تتخلصوا منو
“””””””””””””””””””””
ما في برازيلي ذاتو في الوقت دا بخلي كاس العالم ..ويجي عشان يلعب في السودان
“””””””””””””””””””””
معلومات مؤكدة المريخ يفتح باب التفاوض مع نصرالدين النابي بديلا لاتوفيستر
“”””””””””””””””””””””””
مرات الزول بشترى ليه (اسكراتش) يكشط الرقم السري ..وينزل الرقم قدر ما يكرر العملية ما ينزل ليه رصيد.
الشبكة كعبة.
قدر ما تحاول الرصيد ما ينزل – تجيه رسالة على شاشة الموبايل مكتوب عليها (فشل في الشبكة).
سيرجيو دا يتخيل لي كدا زي (الرصيد) الما بنزل.
معصلج.
صاحبكم دا الى الان فشل في الوصول الى (الشبكة).
نوع الحالة دي سريع وعلى وجه السرعة تشيل (الكرت) وتمشي للمحل الذي اشتريت منه الرصيد …وتقول ليه رصيدك دا ما نزل.
لو اتأخرت بقعد يغالط فيك.
ومرات كمان في حاجة بتغيظ اكتر من الحتة دي ..(تفور ليك دمك).
تخليك تغلي زي (قدرة الفول) المقفولة.
مرات من الاستعجال ..بتقوم (تكشط) ليك رقم بالغلط ، يصبح بعدها الرقم غير واضح في (الكرت).
تقعد تجرب في الارقام كلها ..مرة تعملو (5).
ومرة تعملو (8).
ومرة تعملو (0).
الارقام بتشابه.
تجرب اي رقم …الرصيد ما ينزل ليك.
سيرحيو دا قريب من الحكاية دي ..فيه رقم ما واضح.
في الحالة دي احسن تتصرف ترجع المحل الذي اشتريت منه (الكرت)…تخلي يتصرف ليك ويشوف ليك طريقة.
سيرجيو اهدافه ما عاوزة تنزل ..وفي اعتقادي ان الهلال جابو باعتباره قناص وهدّاف في منطقة الصندوق.
يعني جايبنو على اعتباره زول بتاع اقوان.
طلع لا بتاع اقوان ..ولا بتاع اقوان.
ينطط لينا في التمارين ..زي (الحمل).
البشوفو في التمرين يقول القبة تحتها فكي.
نحن سيرجيو دا ما جايبنو (ناظر مدرسة).
ولا جايبنو (فحيص).
ولا جايبنو البلد دي عشان يفرز لينا مسابقة رمضان.
طالما فشل اللاعب حتى الان في التأقلم والدخول في الفورمة يبقى رجوعه الى اهلو افضل حل.
يعني حكاية نخليه عشان الناس ما تنتقد لجنة التسيير امر غير مقبول.
سيرجيو دا لو ولف ليكم ح يبقى ليكم زي يوسف محمد ـ تاني ما بتقدروا تتخلصو منو.
احسن تعالجو الامر الان بدل ما يقعد لينا اللاعب (6) شهور ونحن في حاجة لخانته.
خسارة (شقة) ساكت.
خاصة ان الهلال في هذا الوقت يحتاج الي لاعب يدخل الفورمة طوالي …نحن جايبنو للمجموعات ..ما جايبنو عشان يقص لينا (شريط) التأهل لدور الاربعة.
حركات سيريجو دي (خليفة) بعملها.
يعني ما عاوزة ليها (برازيلي).
بعدين ما في برازيلي ذاتو في الوقت دا بخلي كاس العالم ..ويجي عشان يلعب في السودان.
في برازيلي بعمل كدا.
سيرجيو واضح انه فشل في المهمة التى من اجلها تم التعاقد معه.
واتمنى انو ما في زول يقول لينا يا جماعة امنحوه فرصة ..وهو يحتاج الي وقت من اجل التأقلم والدخول في الفورمة.
وهذا امر نرد عليه ان الهلال تعاقد مع اللاعب من اجل ان يستفيد منه في المباريات التى يلعبها الهلال الان في المجموعات.
ما عندنا ليه (صبر).
وقد كنا ننتظر الاستفادة منه امام مازمبي لكن قيد اللاعب لم يكن قد اكتمل وقتها.
ثم انتظرناه امام الزمالك ولم يشارك اللاعب.
ونخشى ان نأتي لمباراة فيتا كلوب ويكون اللاعب خصما على الهلال طالما هو حتى وقتنا هذا عاجز من الدخول في الفورمة.
يبقى امر الصبر عليه غير محتمل ..خاصة ان اللاعب كبير في السن ..اي ان كل يوم يمر عليه في الهلال سوف يكون فيه اللاعب متراجع الى الوراء.
اي يوم خصم على اللاعب.
اعتراف المجلس بفشل هذه الصفقة افضل من السكوت عليها ..والتكتم.
صحف الامس اشارت الى ان المجلس قرر التخلص من اللاعب وشطبه وقد اخطر اللاعب بذلك.
اذا صح هذا الامر يبقى افضل لنا من ان يبقى اللاعب في كشوفات الفريق دون الاستفادة منه.
علما ان هذا الامر لا يعفي المجلس ولا الجهاز الفني من الحساب وهو يتعاقد مع لاعب لن يقدم اي شيء للهلال وبرقم خرافي.
فترة التسجيلات كانت قد قدمت هذا الموسم ..وبدأت قبل موعدها الرسمي من اجل الهلال وحتى يتسني للهلال اضافات لاعبين جدد يستفيد منهم الهلال افريقيا.
لكن كما هو واضح ان الهلال هو الفريق الوحيد الذي لم يستفد من هذا الاستثناء حتى انطلاق فترة التسجيلات في موعدها الرسمي امس.
يعني ما استفدنا اي حاجة من قرارات الجمعية العمومية لاتحاد الكورة وهي تقدم فترة التسجيلات.
الي الان لم يسجل الهلال محترف او لاعب وطني غير البرازيلي سيرجيو الذي اشارت اخبار الامس عن نية الهلال لانهاء التعاقد معه.
اي ان لاعب الذي جاء (فزع) بقى (وجع).
يا جماعة الله ديل يقولوا عليهم شنو؟.
يعملوا ليهم ايه؟.
ناس لجنة التسيير ديل ..الذين فشلوا فشل ذريع في اضافة لاعب لكشوفات الهلال يمكن الاعتماد عليه في مرحلة المجموعات.
قلنا وكررنا كثيرا ان الهلال في حاجة الى اضافات في الدفاع والوسط والهجوم.
بل ان الهلال يحتاج الي اضافات قوية ومؤثرة في الاطراف ان اراد الهلال ان يتقدم في البطولة الافريقية.
مع ذلك تبعد لجنة التسيير عن اضافة اي لاعب يمكن ان يشكل قوة للهلال.
اين عبدالله البشير ..الذي وعد ..وصرح …ولم نشعر له بوجود وكأنه في لجنة تسيير اتحاد الطائرة وليس الهلال؟.
اين صابر شريف الخندقاوي الذي تسمع بضجيجه قبل فترة التسجيلات حتى اذا انطلقت التسجيلات لا ترى له (طحينا)؟.
اين اشرف الكاردينال الذي اختفى من الساحة وما عاد له وجود حتى في شكل تصريح صحفي؟.
اين طه علي البشير وصلاح ادريس ..الذين تمثل وجودهما فقط في وجوه اعضاء لجنة التسيير دون ان يكون لذلك اثر على فريق الكورة؟.
واين لجنة تسيير الهلال ..وهي تفشل كل هذا الفشل في اضافة لاعب يمكن ان يشكل للهلال اضافة ويمكن ان يعتمد عليه في مرحلة المجموعات؟.
ان لجنة التسيير واقطاب الهلال ورجاله ..مسؤولون عن هذا الخفوت والانحسار والتلاشي.
لقد ارهقوا الهلال بالصراعات والخلافات ..دون ان يقدموا للهلال شيئا ينتفع به الهلال.
كل اقطاب الهلال ورجاله لهم صحف رياضية تتحدث عن الهلال وتهتم باخباره وتبيع باسمه …مع ذلك لا يقدمون للهلال شيئا.
كل دعوماتهم للهلال لا تتجاوز الحوافز ..والصور التى تنشر لهم عندما ينتصر الهلال ويتقدم.
اما عندما يكون الهلال في حاجة للمال وفي ساعات ضيق فهم لا وجود لهم.
يقفلوا تلفوناتهم او يعملوها (صامتة) في افضل الحالات تهربا من (الرد).
وجب علينا ان نقول ان الامين البرير عندما كان رئيسا لنادي الهلال تحمل المسؤولية تامة وحده ..بل تعرض لمعارضة هدامة لكنه مع ذلك اضاف لكشوفات الهلال لاعبين وزنهم الان ذهب في الهلال.
كفي ان نزار حامد جاء في عهد الامين البرير وكذلك المحترف سيدي بيه والذي قاتل من اجله الامين البرير قتالا طويلا حتى اصبح لاعبا رسميا للهلال.
وها هو سيدي بيه كل من يشاهد الهلال يشيد بيه ..ويثني عليه.
الان نحن نريد من هذه اللجنة التى تتكون من قرابة الـ (20) عضو ان تضيف لنا لاعبين كبار او حتى لاعب على مستوى بدلا من ان تأتي لنا بكمية من اللاعبين لا يمكن الاستفادة منهم.
لو ضم الهلال لاعب واحد في هذه التسجيلات في وزن نزار حامد او كلتشي ودخل تشكيلة الهلال لكان ذلك افضل ما يمكن ان تقدمه اللجنة للهلال.
لقد اوشكت فترة التسجيلات على الانتهاء ومازال المجلس يتخبط والصحف تجتهد من اجل نشر اسماء لاعبين يقال ان الهلال يفاوضهم.
ليت الهلال سجل (بدرالدين قلق) بدلا من ان يسجل لنا سيرجيو اللاعب الكبير في السن ..والذي كلف الهلال الكثير من الاموال دون ان يكون منه رجاء.
ربما يمنح سيرجيو فرصة امام فيتا كلوب كما طلب هو ..بعدها يمكن ان يتحدد مصيره.
لكننا نخشى على الهلال من هذه المباراة لأن مباراة الهلال امام فيتا كلوب لا تستحمل المراهنات…وطريق الاتجاه فيه واحد.
ملحوظة : نعمل شنو يا ناس ..نطير نحن وإلّا نتوفى؟.
هوامش
عشان اختصر ليكم الحكاية (سيرجيو) دا اعملوا ليه (حفلة شاي) …وودعوه.
وانسو الحكاية.
زمان نحن الزول لو كنا عاوزين نكلفتو بنعمل ليه (حفلة شاي).
هسع سيرجيو دا بقى على (الشاي).
لجنة التسيير عملت حفلة شاي لي نصرالدين النابي ..ما تعملها لسيرجيو.
بالمناسبة معلومات مؤكدة ..المريخ يفتح باب التفاوض مع نصرالدين النابي.
ايام ويصل نصرالدين النابي للخرطوم.
اسمعوا كلامي دا ..وشوفوا البحصل شنو؟.
جمال الوالي فتح خط ساخن مع النابي.
اقولها ليكم بي صراحة.
النابي مدربا للمريخ.
بس في شوية لولوة من النابي.
النابي ما عاوز المريخ.
النابي مفتون بالهلال.
لكن الاموال ممكن تغير قناعات الزول.
وممكن (النابي) يبقى مدرب للمريخ.
يعني تاني النابي ح يطير ليكم من دور الـ (64).
انا اول مرة اشوف لي ناس بطيروا قبل ما تصبح سمح.
مستعجلين شديد للطيران.
جنكم (طيران).
مباراة الهلال يوم الجمعة اقتربت …وناس بشة ونزار ومساوي الى الان بشكوا من الاصابة.
والمجازفة بهم ربما يكون على حاسب عافيتهم.
وبالتأكيد عطاءهم لن يكون بصورة كاملة.
لو منح مدرب الهلال الفرصة لوليد علاءالدين وسيدي بيه ومالك يكون افضل.
علما ان مباراة الجمعة مباراة جمهور.
طبعا ناس المريخ بعد الشافو من اعلام الهلال بعد الطيران من سيكافا بكونوا منتظرين مباراة الجمعة على احر من الجمر.
وما بعيد فيتا كلوب يجد دعم ومساندة في الخرطوم اكتر من التى يجدها في الكنغو.
لذلك يجب الحذر.
اعملوا حسابكم.
واربطوا الاحزمة..وارموا لي قدام.
………
عاجل : والله نحن نطير من (سيكافا) كاس العالم في (الراديو) ما نحضرو.
[/JUSTIFY]
وإن طال السفر – محمد عبد الماجد
صحيفة قوون
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
what are you doing do you think that you are journalist you have nothing you do not have any thing to write you are nothing nothong