كوش نيوز .. أخبار السودان بين يديك

ود الكلب يا الأستون.. يا.. شماشي يا مجنون



شارك الموضوع :

[JUSTIFY]

ود الكلب يا الأستون.. يا.. شماشي يا مجنون

رمش يقالد رمش.. رمشة هبشة.. وهبشة رصاصة.. تطلع من حدقاتها.. تشق الضلع كرررر.. قريب من سن البرك.. وتدخل القلب من حيطة البطين الأيمن.. تضرب في الركن اليمين ترجع.. تدق في الصمام تلقاهو في حالة انقباض.. ترجع تدق في أقصى الزاوية العلوية وترجع تدخل الأذين.. الأيمن.. تصوط الدم الفاير.. الفاير في الفارغة وفي المليانة.. تقد الحيطة بين الأذينين ومحل رهيفة تنقد.. تدردق في الأذين الأيسر وتطلع للبطين الأيسر.. وتمشي راسا عديل على الأورطة.. وتلقاهو في ورطة.. تشق دربا على الشريان التاجي.. وتقعد تزوزي.. تتمعمس وتتجلبط بالكلويسترول.. تحاور الدهون التلاتية.. الدهن الأولاني تزوغ منو.. الدهن التاني كان غائب.. الدهن التالت ما فاضي يلملم في أحماضو الصايعة.. ود الكلب يا الأستون يا شماشي يا مجنون.. تتلافاهو في خشُما.. وتطلع على الشريان الرئوي.. الأكسجين في فشاشي اتحلل.. بعد ما شربتَ شربات عامن أول في أوزون بعشرة جنيه وكانت آخر عشرة عندي حافضا وداسيها في جيب البنطلون الوراني.. من المغصة.. حلف الأوكسجين الشميتو من هوا ربنا تشتت جزئاتو.. ويلاقن بعضن تلاتة تلاتة.. بقيت أنا أوزون في أوزون.. وخرم الأوزون ما قدرو عليهو الخواجات.. ومؤتمر البيئة شعارو(كان غلبك سدها وسع قدها) ووسع قد الأوزون.. أربعين مليون زيي يشربو شربات في أوزون يعيدو التوازن البيئي.. تحتار رصاصة رمشك في دروب شعيراتي الدموية.. زول ناااااشف ويابس عدمان نقطة الموية.. الغريبة ديمة عطشان وأشرب ما أروى.. في الصقط وفي الحر.. درجة حرارتي في السما.. عقاب مراريا راكن في زاوية الكبدة.. بلازموديم يقدل جواي طالع نازل ما هاميهو حظر التجول الأعلنو الكوانين.. ولا حالة طوارئ القرض.. كريات الدم البيضا في حالة عصيان مدني.. لا بتودي لا بتجيب.. ما هاميها الجسم الوطن.. اريتو بالخراب.. مادام هي والجراثيم في هدنة.. طابور خامس منها ساكن أب دمام.. تدخل التايفويد الطابور الخامس يطلّع إشاعة ويقول دي قوات صديقة خلوها ووسعو ليها الدرب.. اتراجف من الحمى إشاعة دي همساسة ساكت أرقدو في رقادكم.. نزلة وأقحقح.. دي نزلة ساكت والنزلة مرض عافية أرقدو في رقادكم.. رصاصة رمشك سكنت الجوف وضهبت مني وما عارف ليها درب.. وأنا حي.. أجابد على فتة الفول.. أجيكي تاني وتعايني لي.. ومن رمشك تطلع رصاصة الرحمة.. وتلحقني أفئ..!

حاشية: (للحناكيش) أفئ.. ضكر مشى في درب أمات طه.. أما عدد أمات طه، فقد اختلف عليه ضباط الضرائب.. واحدين قالو اتنين وفي واحدين قالو تلاتة.. والحقيقة التاريخية أن طه ما عندو أم.. قايم بروس.!

أما للغُبُش أقول (أوزون) قهوة في صينية في الخرتوم.. كباية الشربات فيها أقل شي بي عشرة جنيه (سعر قبال تلاتة سنوات ساعتي الاتورطا وشربت فيها).. عشان ما تتورطو ساكت! أما الأوزون سيد اللسم فهو أوزون ربنا.. يتكون من تلاتة ذرات أكسجين.. وهو مجاني ما يغشوكم.!!

[/JUSTIFY]

الباب البجيب الريح- صحيفة اليوم التالي

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.