كوش نيوز .. أخبار السودان بين يديك

قدم شكوى (للفيتا) يا كبسور!!



شارك الموضوع :

قدم شكوى (للفيتا) يا كبسور!!

[JUSTIFY]
* الجماعة زعلانين من فرحنا.. ومتضايقين من احتفالاتنا!

* حتى الفنانين الشاركوا في أفراحنا شتموهم!

* الرائع المبدع اللطيف الظريف جمال فرفور.. سموهو جمال طرطور، لمجرد أنه غنى في احتفالات الزعيم على شرف تكريم نائب رئيس الجمهورية لأبطال سيكافا!

* معقولة بس يا الرشيد؟ سيكافا القيافة تحول فرفور لطرطور؟

* أول أمس غنى لينا ترباس في احتفال جهاز الأمن بالأبطال!

* خايفكم بكرة تسموهو قفل أو مزلاج!

* غايتو كان باريتونا حا تشتموا فنانين البلد كلهم!

* نحن يا دوب ابتدينا!

* وعلي قول الحبيب كابو أول يوم الهيصة في المطار.

* تاني يوم الربة في الرد كاسل!

* تالت يوم الطربانة في جهاز الأمن!

* أمس الكتمة كانت في فندق كورال!

* بعد يومين الحفلة جوة القصر الجمهوري!

* ولعلمكم كمان: الأسبوع الجايي حا نبدأ مسلسل الرحلات!

* رحلة في جنينة السيد علي.. رحلة في جنينة السيد عبد الرحمن.. ورحلة في مزرعة السيد جمال الوالي!

* كل رحلة بي خمسة فنانين!

* يعني يا الرشيد كل رحلة مننا بي خمسة أعمدة منك!

* كان ما عاجبك خلي كبسور يقدم فينا شكوى لي للفيتا.. أقصد للفيفا!!

* فرحانين ياخي أيه نعمل؟

* نحن عاذرنكم في زعلكم.. لأنكم ما جربتوا فرحة البطولات الخارجية.. ولا ضقتوا طعم الكؤوس الجوية!

* المساكين.. محرومين!

* كان ضقتوها كان عذرتونا وجيتوا هنيتونا!

* طبعاً نحن في الرحلات ما بنشرب إلا مشروب محدد!

* من شلنا كأس سيكافا القيافة ودعنا شراب الموية!

* الدنيا سخانة والناس عطشانة.. الحل بس أيه؟

* الحل بس فيتا يا كبسور!

* نحن فوق عديلنا والبلد بتشيلنا!

* نقدل بي مهل.. من زمن الجهل!

* نحن الدنيا بلابلها وسمارها!

* من سنة 77 (كأس جوبا) وحتى 2014 (كأس سيكافا القيافة) برانا نجيب في الكاسات من برة!

* نحن نستورد الفرحة وغيرنا يصدر الأحزان!

* مافي فريق واحد ساعدنا بي جكة جوية وللا جاب ليهو كأس خارجي معانا!

* ما لينا حق نفرح ونبتهج؟

* ما لينا حق نطير بالريش الدقاقة؟

* ما لينا حق كل يوم نعمل طربانة؟

* نحن فرحانين بي حصادنا.. انتو زعلانين ليه؟

* مش من حقنا نطنبر ونصقر؟

* كأس سيكافا عندنا، كأس الدوري عندنا.. كأس السودان بطرفنا.. كأس الرديف حقنا.. المقصورة عندنا والكورة عندنا!

* جمعنا كاس مانديلا مع كاس كاغامي مع كل كؤوس البلد!

* البحمينا نفرح شنو؟

* وكان ما فرحنا نحن البفرح منو؟

* عندنا الراحة وحوض السباحة!

* وعندكم التعب والرصيد الكعب!

* انتو كشروا ونحن نضحك!

* انتوا بخسوا ونحن نحصد!

* من الدولة مكرمين ومنعمين.. والمليارات واقعة علينا هبطرش!

* الحاضر يكلم الغايب.. فطومة تحدث الرشيد: بعد أيام ماشين للرئيس في القصر!

* حا نغني داخل القصر الجمهوري: يا جمال دنيانا.. يا جمالها.. والريس معانا!

* بي حقنا.. وفوق عديلنا!

* نحن أسياد الفرح.. لأننا أحفاد سيدة فرح!

* عارفين فرحنا بتعبكم.. واحتفالاتنا بتعذبكم!

* بس فرحانين ياخي أيه نعمل؟

*خليكم عارفين.. نجن بنفرح لكن ما بنوم في العسل!

* نغني ونرقص ونستعد لإعادتكم إلى مركزكم المفضل!

* نغني في الصالات ونلملم الكنجالات، ونحصد النقاط!

* في الاحتفالات الربة.. وفي الميدان الدقة والطقة!

* بي محسن وتية.. الخلطة ذكية!

* ربطنا المقدر ستة كؤوس: سيكافا.. الممتاز.. كأس السودان.. الرديف.. الشباب.. ودوري الأبطال.

* جكتكم معانا طويلة.. أربطوا الأحزمة وكتروا البكاء والشكاوي!

* فرق يا كبسور!

آخر الحقائق

* أتتني رسالة لطيفة من الحبيب نهاد شاخور، كتب فيها ما يلي: الأخ مزمل.. المريخ في القمة، والوصية في الذمة.. قول للغالي جمال الوالي، نهاد شاخور قال ليك: صباح الفل يا حبيب الكل!

* أنت للنجمة السكن والضل.. وللزعيم الكل في الكل.. وريدتك في قلوب الصفوة مغروسة ومحسوسة، وإنجازاتك واضحة ملموسة، وانتصاراتك ما خافية مدسوسة.. هزمت الجيش البيهو رواندا محروسة.. وجاك

كاس سيكافا هدية مخصوصة.. تستاهل كنوز الدنيا وكؤوسها.. وحب الأمة الرفعت رؤوسها!

* بشراك يا حفيد الزعيم!

* مسيرة الإنجازات مستمرة.. والأفراح متواترة!

* سيرت جماهير ودنوباوي مسيرات فرح هادرة نحو منزل زعيم المريخاب الوجيه طلق اللسان سعد صديق المكاوي، الذي أكرم وفادة المريخاب بالحلوى والعصاير وآيسكريم شوادي، وودعته الصفوة وهي تهتف (مريخ سعد حل العُقد)!

* صدق مريخاب ود نوباوي.. الزعيم حل كل شفرات سيكافا.. وعقبال كأس الأبطال.

* فزورة سيكافا: المريخ هزم الجيش وتعادل معه في الوقت نفسه، علل!!

* هزم الجيش الرواندي ونال الكأس، وتعادل معه في عدد البطولات!

* الوصية بالمهلة يا أهلة.. جهزوا الحكام لإيقاف زحف الجيش الأحمر.. الضرب الجيش الرواندي!

* جهزوا الحكام قبل الغربال.. وما بحلكم!

* جبتوا الغربال.. ما جبتوا الغربال.. الزعيم صعب المنال.

* هتفت الصفوة (مشكور مشكور يا فرفور)، وكتب له الرشيد (طرطور)!

* فرق يا فطومة!

* قالوا منتظرين الشكوى!

* نحن الأيام دي غير الحفلات ما عندنا شغلة!

* كان كبسور كسب الشكوى.. بنعمل ليهو حفلة!

* وكان كسبتوا الشكوى أبقوا قابلوني!

* تمشوا لوزان.. تمشوا بورتسودان.. الفيتا في النصف النهائي وكبسور راكب التونسية!

* المصيبة إنو كبسور زعلان.. حتى المشجع الرقص في الرد كاسل قدم فيهو شكوى!

* قال أيه؟ رقص بي شعارنا ولازم الوالي يعتذر لينا!

* الوالي يعتذر لي كبسور ليه؟

* لو في اعتذار.. بنقدموا لي عصمت سيد الشعار!

* الأيام دي أي واحد تلقاهو ماشي في الشارع يغني بلا سبب تعرفوا صفوة مبتهج!

* وأي واحد تلقاهو وشو يلعن قفاهو.. تعرفو كبسور.. وخاطرو مكسور!

* آخر خبر: الشعار شعار عصمت.. وعصمت ولدنا!
[/JUSTIFY]

مزمل ابو القاسم – كبد الحقيقة
صحيفة الصدى

شارك الموضوع :

3 التعليقات

      1. 1

        الله يطول لينا عمرك يا ابزرد وادى الجماعة الصفراب على راسون

        الرد
      2. 2

        هى يا انتى اقوم حسى اكلم ليك الولد داك يديك علقة بالكرباج صاج صاج ..

        شفتى ياعمى الهندى كمان جابت ليها كسرة هيآآآآآآآآآآ سجمنا دا كاس ولى قزازة ..

        الرد
      3. 3

        والله انتو يا مزمل وكل السخفييين سبب بلوى هذا البلد ، وكلكم مصالحكم مشتركة وقاعدين تضحكو على هذا الشعب المسكين ، كما يفعل السياسيين . ربنا يخلصنا منكم اجمعين ، لانكم قاعدين تبيعو فى الوهم

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *

    This site uses Akismet to reduce spam. Learn how your comment data is processed.