د/ عادل الصادق المكي

في ذكرى خروف الضحية


[JUSTIFY]
في ذكرى خروف الضحية

أدعج.. أكحل.. أفلج.. مرصوص الصوف فوق ضهرو كأنه طالع من كوافير بعد حمام زيت.. مبروم القرون بانتظام تحسبها كأسين ايسكريم.. نظراتو ناعسة.. لو ما كنت زول خبير بهايم تفتكر انو عيان.. سكوت نادرا ما يبعبع.. يمشي الهوينا يخلي البنات يغنن “الرايق النعسان الدلال غاريهو.. البي كاوي الناس خطوة خطوة مشيهوهو”. أسنانه فاقع بياضها.. لو شافوها ناس معجون سنغال 2.. يعملوها دعاية.. تربية بيت حاشاهو ما تربية خلا وهملة.. لو داير يكورك بكل ذوق وأدب (باااع) واحدة كل تلاتة ساعات.. بات معانا ليلة واحدة من الساعة حداشر بالليل تاني ما سمعنا ليهو حس.. احتراما لناس البيت النايمين.. رافع راسو فوق، معتز بنفسه.. تجي وسط الخرفان تلقاهن كلهن مدنقرات علا هو.. لونو اشقر في مواضع بيجي في أخرى.. يختلط اللون الأشقر مع البيجي بهدوء وانسياب محبب للعين.. يسر الناظرين لم يتجاوز عمره العام.. لكن لو شوفتو تديهو خمسة سنوات.. ضلوفو سوداء منتظمة في نهاية كرعيهو.. تحلف تقول معمولة من سراميك.. من نهاية الضُلف لحدي منتصف الساق يكتسي جلدة بلون اسود منقط بابيض.. من بعيد تقول لابس شرابات الحرس الملكي البريطاني.. الضلوف لامعة كانها مضروبة اورنيش.. عندما يجلس أرضا ويكوّع ويجتر الأكل ويلوك.. بطريقة تتمنى أصلو ما يقيف من اللواكة.. زي لواكة هيفاء وهبي للبان.. يلوك وهو ساهم النظرات مكسور الطرف.. له عينان مكحلة تفوق جمالا العيون التي غنى لها ابراهيم عوض “أب عيون كحيلة جميل الصفات”.. صغير الرأس مع استدارة.. الصوف مشقوق في نصف الراس إلى نصفين متساويين.. مع استطالة جميلة للاضنين.. عندما يحرك أضانو عشان يلقط النضم.. تحسبها شغالة هايدروليك.. وقاعدة فوق رمان بيلي.. ضنب مسدول كشعر جميلات الهنود.. يجعل فنان الدلوكة يردد “الضنب جاري بالواطا.. كيتن عليّ يمشي ويطا”.. صبيحة يوم العيد وعند الضبح اخترنا له احرف جزار.. طلبنا منه أن يلقي به أرضا براحة ويجر السكين مرة واحدة .. وسال الدم قدام خشم الباب.. الدم أحمر قاني غني بالكريات الحمراء الغنية بالحديد مما يدل على تغذيته السليمة.. وكان الدم ينزل من الوريد باندفاع شديد.. كانه بابور موية أربع بوصات.. مما يدل على خلوه من أمراض القلب والشراين.. قطع الجزار الرأس وسلخ الجلد.. الجلد الذي فكرنا جادين نعملو فروة وتلبسو المغنية الأمريكية أنجلينا جولي أصلو بيكسيها مع اللبس الشايفنو قاعدة تلبسو دا.. نهديهو ليها.. تبقى سُترة وصُلحة.. الفشفاش كان لونو وردي.. الكبد محتفظ بلونو الأصلي ناعم الملمس من غيركريمات.. الكرشة نظيفة وجميلة جمال بشكير مصنوع من قطن طويل التيلة.. في مصانع لانكستر.. المصارين طولها اتنين وعشرين متر وتلاتة وخمسين سنتمتر.. كبير اخوانو ما داخل في الحساب.. لم نشعر بالندم في المبلغ الذي دفعناهو ثمنا له.. .. .

و…… :-

ايه يكون في نظري زانو

غير خصالو واتزانو….

[/JUSTIFY] د. عادل الصادق مكي
الباب البجيب الريح- صحيفة اليوم التالي


تعليق واحد

  1. كلو كلام خارم بارم حتي المعلومة عن انجلينا جولي ما صحيحة انجلينا العارفنها هي ممثلة لكن غناية و بتغني دي ما سمعناها