كوش نيوز .. أخبار السودان بين يديك

الما عرس سودانية.. الرماد كالو



شارك الموضوع :

[JUSTIFY]

الما عرس سودانية.. الرماد كالو

وجدت في جخانين النت حديث للفنانة العراقية شذى حسون.. تشكّر في النسوان العراقيات.. وساقت كلام لنزار قباني.. وهو كان متزوج العراقية (بلقيس).. والتي ماتت في حادث تفجير السفارة العراقية في لبنان في1981 وكتب فيها قصيدته الشهيرة بلقيس:-

بلقيسُ..

أيتها الصديقةُ.. والرفيقةُ

والرقيقةُ مثلَ زَهْرةِ أُقْحُوَانْ

ضاقتْ بنا بيروتُ.. ضاقَ البحرُ

ضاقَ بنا المكانْ..

بلقيسُ: ما أنتِ التي تَتَكَرَّرِينَ

فما لبلقيسَ اثْنَتَانْ..

.. نزار كان بحب زوجته بلقيس حب شديد.. لدرجة أنه اختصر كل نساء العراق فيها.بل اختصر كل نساء العالم.. وقال بلقيس ما في منها اتنين ولا بتتكرر تاني.. وقال “مات اعزب من لم يتزوج عراقية”.. أها شذى حسون عشان تشكر نفسها وبنات جنسها.. اتكلت علي نضم نزار وقالت كدي.. وبقى نضم نزار جواز مرور لبيت الزوجية لكل عراقية.. مهما كانت.. فجاءت شذى رافعة لافتة وهي تنادي وتسوق لنفسها وبنات بلدها”علينا جاي.. الما عرس عراقية الرماد كالو”!!! اقول لشذى حسون (خسئتي) بل مات اعزب من لم يتزوج سودانية.. والواطا دي في خشمو.. والحي حقو يندم ويسف التراب.. لو كان نزار متزوج سودانية كان كتب فيها قصيدة تساوي كل ما كتبو من قصايد.. يمسخن عليهو نسوان الدنيا جت.. ويحلف تاني ما يكتب في أنثى.. علا هو عديم حظ يسو ليهو شنو؟.. والعرس قسمة ونصيب وقسمتو مرقتو من جنة الزواج من سودانية.. قالو إن المقولة “مات أعزب من لم يتزوج عراقية” هي للأمام الشافعي وهي أصلا “مات أعزب من لم يتزوج مصرية”.. اقتبسها نزار وحورها احتفاءً بزوجته بلقيس الراوي (زوجته الثانية).. أصبحت العبارة متاحة ومباحة وكل واحد يقولها حسب بلدو.. وكل زول عاجبو الصاريهو.. ونحن الرجال السودانيين عاجبنا الصارنو.. عاجبنا وساري بالنا.. لدرجة إنو الواحد فينا لما يشوف زول متزوج واحدة غير سودانية يقيف مستعجب ويسأل “شي يحير!!.. . الناس ديل معرسين النسوان ديل كيفن؟”.. وكفانا ما وصف به الشاعر السوداني ود الرضي الزوجة السودانية في قصيدته “ست البيت”.. كل ما قاله ود الرضي في القصيدة دي ينطبق علي كل زوجة سودانية:-

ربنا بالجَّمَالْ كَافَاهَا

لَمَّنْ قَالْ قَوَامَه كَفَاهَا

المَسْرُورَة مِى تَفَّاهَه

يَا حَلاَةْ الكَلاَمْ فِى فَاهَا

.. ويكفينا فخرا ان “ام” كل راجل فينا سودانية وهي زوجة لراجل ما ساهل وربت راجل ما ساهل.. وربت بت وزوجة ما ساهلة.. والناس البي يشكو من النسوان السودانيات ديل بطرانين.. كدي اليختو الرحمن في قلوبهم ويعاينو باللوال لامهاتهم.. ان بقن كعبات معناها اي مرا سودانية كعبة وان بقن عديلات باقي النسوان عديلات.. ان قعدت اشكر في الزوجة السودانية يا شذى حسون للسنة الجاية ما بخلص.. والما عرس سودانية ما عرس.. ويستحقن يعرسو منهن.. والقادر وايدو لاحقة.. مايعرس واحدة بس.. يعرس مثنى وثلاث ورباع!!

قالت المتابعة: “أجي يا اخواني؟! الراجل دا ما ماشي كويييييس.. اللخبطة الجابها في نهاية المقال دي شنو؟”!!

[/JUSTIFY]
د. عادل الصادق مكي
الباب البجيب الريح- صحيفة اليوم التالي

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.