كوش نيوز .. أخبار السودان بين يديك

العندي ما بدي.. وحق الناس بقالِع في



شارك الموضوع :

[JUSTIFY]

العندي ما بدي.. وحق الناس بقالِع في

قلت إن جيل السبعينيات.. جيل الهمباتة.. إتربوا على مدح الهمباتة وقلعهم للناس والغنا والفخر والافتخار بيهم. كان برنامج الهمباتة في الإذاعة من أكثر البرامج استماعا وحضورا.. وأقيمت الندوات لمدح الهمباتة وشكرهم، لقد كانت حقبة تمجيد الهمباتة والهمبتة..

ظهر ترباس في نفس الفترة بمجموعة أغاني شغلت الساحة في تلك الفترة منها أغنية الدعوة إلى الفسالة غنية “العندي أنا ما بدي.. وبحر الشوق أنا بعدي” وهذه الغنية بداية لاختراق التكافل الاجتماعي وبداية للدسدسة والغتاتة.. فحوّرها المعجبون بالهمباتة إلى “العندي ما بدي.. وحق الناس بقالع في”.. حتى أنها كانت تكتب على ظهور الرواحل من باصات ولواري وعجلات وكاروهات.. وتتنقل خلال القرى والحلال.. مبشرة وناشرة لثقافة القلع.. فكبر ذلك الجيل (المستلب همباتياً) وأصبح قائدا للمجمتع.. فكانت الهمبتة المقننة.. تفصّل لها القوانين.. عشان لما تسأل يقولو ليك يا اخوي القانون بيقول كدي!!!..

فتسكت أنت احتراما للقانون.. وعينك في حقك ياكلوا فيهو.. لكن بالقانون!!!!.. وأحيانا حُمرة عين.. وتخاف إن سألت يطلعوا ليك نص قانوني يجيز لمن يأكلك أن يأكلك وكراعك فوق رقبتك.. ويمكن يدوك معاها عليقة.. لو اتفنجروا يقولوا ليك مراعاة لظروفك الصحية عفيناك من العلقة، بس تخلي قلة ادبك البتسوي فيها دي!!..

****

في إحدى الصحف لقيت خبر إنو الأستاذ كمال حامد.. اشتكى تلفزيون السودان “الهيئة العامة للتلفزيون القومي”.. قال داير منهم قروش.. المحكمة أصدرت حكما بالحجز على أرصدة الحساب البنكي للتلفزيون.. وإرسال شيك بمبلغ “660” جنيه للمحكمة.. على حسب ما ورد في الصحيفة.

عليكم الله تلفزيون ياكل في قروش الناس.. لو في زول ربنا قسم ليهو يتفرج ويلقاهو ينضم وينضم باقي لكم بيصدق النضم الفيهو؟.. وبعدين 660 جنيه ما عندهم.. يدوها الزول المشتكي دا.. ويسكتوهو أخير ليهم من شيل الحال بالبلد والبلدين.. دا لو كنتين كان صاحبو قفلو.. وشاف ليهو شغلة تانية.

قفلوهو أخير لكم.. قفلوهو هو وباقي القنوات الما عندها طعم دي.

وبعدين يا كمال حامد.. وحات الله بي عمتك دي أنا قايلك فنجري.. خلهم لي الله..

قلت لك عاين جاي، قبال خمس سنوات أنا كنت داير منهم قروش.. عملوا لي غسيل مخ، بقيت كلما أفتح التلفزيون ألقاهم يغنوا: “المال ما بيهمو إن كتر وإن راح” بقيت أنا أعرض وأنقز وأقول في الـ”هيع”.. في النهاية خليتن ليهم ومرقت منهم بغنية.

ويا ناس التلفزيون لو دايرين كمال يخلي قروشو.. شغلوها ليهو.. شغلوا ليهو: “المال ما بيهمو إن كتر وإن راح”!!!

***

في إحدى القنوات.. شفت لي ضيفة حننتي والله.. غبشا غبشة شديدة.. والمذيعة تتلاصف وتلمع..

عليكم الله ما عندكم عقاب دهينة مفضلة من المذيعة دي، كان تدوها الضيفة دي تتمسح بها.. وتقابل الناس؟..

زمااان لما الدنيا بي خيرا.. لو مرا مشت ضيفة لي ناس.. بعد يعشوها ويفرشوا ليها قبال ترقد.. يجيبوا ليها عليبة الكركار ويحلفوا عليها علا تتمسح!!!!.. إنتو يا كافي البلا علبة كركار ما عندكم؟.

[/JUSTIFY]
د. عادل الصادق مكي
الباب البجيب الريح- صحيفة اليوم التالي

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.