كوش نيوز .. أخبار السودان بين يديك

في سنار انكسر مسمار



شارك الموضوع :

في سنار انكسر مسمار


> المهم
> والمهم جداً أن نكمل التسجيلات بفهم
> والفهم يعني أن نحدد «مفروض من بدري» نواقصنا واحتياجاتنا
> وحتى الأجانب الفي الصورة يجب ان تكون هناك خيارات واسعة منهم
> فمثلاً إذا كانت حاجتنا لطرف يمين
> يبقى مفروض نكون حددنا فنياً تلاتة منهم
> كي نفاضل بينهم
> ونختار افضلهم
> من ناحية الاداء والانضباط والتكلفة والاخلاق
> واذا فشل الاتفاق معه
> يكون البديل جاهز
> داير بس مفاوضة
> فطريقة الهلال في التسجيلات طريقة عقيمة
> زي الزول الداير يضبح جدادة
> يدخل القفص يقفلو وراهو
> والبقبضها يقبضها
> تطلع كبيرة
> تطلع صغيرة فروجة ساي
> تطلع ديك تتطلع جدادة
> يقبضها ويجي مارق بيها
> سعرانة
> عندها سمير
> ما بتبيض
> علاعيلا واقعات
> مهيمة مقردة
> المهم يشيلها ويضبحها وتفسد عليهو الطبخة
> التسجيلات يجب ان تكون نوعية وليست كمية
> فحشد اللاعبين لا يعني النجاح في التسجيلات
> تسجيلات في مستوى جمال سالم وايمن المصري مكسب
> لكن لقيط زي سيدي بيه وود الحلة وما شابه
> دي تبقى زي الزول البشتري هدوم العيد من اقرب طبلية
> يقول ليك اشتريت لي اربعة غيارات للعيد
> لكن لم يهتم بالجودة
> وجارو يشتري لبسة واحدة
> بعد شهرين الاربعة لبسات تتنسل وتبهت وتتمطمط وتتشخبط
> وبعد سنة تلقى اللبسة الماركة في جدتها
> دايرين لاعبين ماركة
> خالي مسامير
> عشان يبقى الكشف خالي مواسير
> فالخالي من المسامير خالي من المواسير
> المهم
> فطومة اختي
> او عجوبة الخربت سوبا
> بما انها الناطق الرسمي لجمهورية سوبا
> ما ورتنا بعد رحيل العقرب والغزال منو البقلب الهوبة في سوبا
> طبليتكم ام مسامير دي لو قلبت هوبا
> بتتشتت
> الا تلقطوها من الواطة دي مسمار ينطح مسمار
> وفي سنار انكسر مسمار
> دحين ديم المدينة ده موش في سنار !!!!!
> أيها الناس
> من حقنا ان نسجل اي لاعب من اي فريق
> طالما مستوى اللاعب ده ارتفع لمستوانا
> اي نادي في البلد دي يفرخ لينا وبس
> لاننا متفردين وسطهم جميعاً
> ومَن مِن اللاعبين لا يحلم بالمطار ؟؟؟؟
> اللاعبون ملوا الوقفة مع امجاد جمب جاد
> لذا ولذلك
> على كل لاعبي السودان ان يشتغلوا صاح
> ويطوروا انفسهم
> تمهيداً لضمهم لكشوفاتنا
> ولكل مجتهد نصيب
> يلا يا اطهر شد حيلك
> كان جيت الاول بشتري ليك عجلة
> محمد عبدالرحمن شكلو كده زي ما تقول مربت
> ما قدر اولاد الفصل
> حانشوف القصة دي
> ايها الناس
> إن تنصروا الله ينصركم
> اها
> نجي لي شمارات والي الخرتوم
> كان شفت يا والينا
> التسجيل قالوا يحتمل يمدوهوا لينا
> لي شنو يا والينا
> في زول بعرف اكتر من الحكومة يا والينا ؟؟؟
> خلاص سجلوا لينا واكتبوا لينا واشطبوا لينا
> بس حنوا علينا
> القروش في الانتخابات ما تكملوها علينا
> اصرفوها في شيتا يرجع لينا
> إن شاء الله في مقابر بي احترام تلمنا واهالينا

سلك كهربا
ننساك كيف ومافي داعي للبحصل ده كلو

والللللللللللللى لقاء
سلللللللللللللللللللك

في السلك – بابكر سلك
صحيفة الإنتباهة

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.