كوش نيوز .. أخبار السودان بين يديك

غايتو.. تراها ونسة



شارك الموضوع :

[JUSTIFY]

غايتو.. تراها ونسة

برلمان الواتاسبة:

في أحد المواقع الالكترونية.. قرأت أن الدكتور الفاتح عز الدين رئيس المجلس الوطني.. نبه الأعضاء القاعدين يهبشو في موبايلاتهم أثناء الجلسات.. ما يهبشوهن.. وينتبهوا للجلسة ولأمور الشعب.. الخبر (نبه رئيس المجلس الوطني (البرلمان) د. الفاتح عز الدين النواب خلال جلستهم أمس بسبب انشغال بعضهم بالهواتف الذكية، مطالباً إياهم بالانتباه).. أقول للسيد رئيس المجلس.. خليهم براحتهم وما تكسر خاطرهم.. وعقباً عاين جاي.. الشعب ذاتو ما فاضي شغال يهبش في موبايلاتو.. ونحمد الله كلنا شعب على نواب مشغولين بالموبايلات.. وبعدين البلد قاااعدة وملحوقة.. دايرة تمشي وين؟.. ودي بلداً أريتا بالخراب..

ما دام الشعب والنواب

يصوطو في موبيلاتهم..

مشغولين بالواتساب..

و…

مرحبتين بلدنا حبابا

نامين نومة السرور..

شعبها.. ونوابا

ويلا.. هي حقتنا؟!.. يحكى أن اتنين مساطيل راكبين مركب في نص البحر.. المركب اتقدت والموية دخلتها.. واحد قال للتاني بجزع شديد (لا حولااااااااا.. ألحق المركب اتملت موية وح تغرق).. التاني عاين ليهو عين مفتحة وعين مغمضة وقال ليهو بكل برود واطمئنان (ما تغرق.. هي حقتنا؟).!! دحين البلد دي.. هي حقتنا!!؟ ما تغرق كان غرقانة..!!

قنبلة:

ورد في بعض الصحف السيارة والشمشارة أن أحدهم هدد مدير الإذاعة والتلفزيون بتفجير مباني الإذاعة والتلفزيون.. باتصال هاتفي وبعضها قال برسالة جا فيها (هام وعاجل جداً.. أتمنى أن تاخذوا هذا التحذير مأخذ الجد حفاظاً على ممتلكاتكم وأرواحكم وأرواح العاملين بالهيئات الثلاث الإذاعة، التلفزيون والبث، وننصحكم بمغادرة المكان فوراً وفي أقرب وقت ممكن وسيتم استهداف معاقل أبواق النظام خلال اليوم.. نكرر غادروا المكان سريعاً).. أتمنى يكون قبضوهو.. لكن أتمنى ما يقولو لينا مختل عقليا.. مع أني مقتنع إنو فعلا مختل عقليا… لو ما مختل عقليا حسي عليكم الله التلفزيون دا شن طعمو؟.. إن فجروهو واللا خلوهو كلو واحد.. إن فاااااتح أربعة وعشرين ساعة واللا مقفول كلو واحد.. الزول الوناس دا إن صبر عليهو برااااااهو بيموت.. هو ورفاقتو باقي القنوات الما عندهن طعم ديك..!!

سفير المرض:

حزنت جدا لما لقيت يافطة كبيرة فيها صورة للأستاذ كمال ترباس.. مكتوب عليها (حفل يحييه سفير النوايا الحسنة للسكري).. ترباس سفير مرض؟.. ترباس استقيل منها سفارتن طايرة سفارة المرض دي.. وسكري كمان؟.. عندي ليك فهم.. اتنازل من السفارة دي للقلع.. أصلو مرة في حوار تلفزيوني قال عندو سكري.. وإن بقو ناس السكري مغروضين في عِمة كبيرة القلع عندو..!!

تسجيل لتسجيل يفرق:

مشلق ويقرأ في يافطة قماش مقددة (مركز تسجيل الانتخابات) قال للولد القاعد في خشم الباب وهو ما زال مشلق:

(يا جنا التسجيل بكم؟)

(دا عشان اللنتخابات.. ما بقروش)

دنقر راسو وعاين ليهو وهو زعلاااان:

(عان ديل؟ بكري المدينة يسجل للمريخ باتنين مليار وانتو دايرني اسجل بي سااااااكت ؟.. والله اياهو)..

ثم فاااااااات بوشيهو..!!

[/JUSTIFY]
د. عادل الصادق مكي
الباب البجيب الريح- صحيفة اليوم التالي

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.