كوش نيوز .. أخبار السودان بين يديك

غارزيتو في المريخ فاضل ليكم (عراضات) استاد الهلال



شارك الموضوع :

غارزيتو في المريخ فاضل ليكم (عراضات) استاد الهلال

[JUSTIFY]
ما معقول القرار الذي يصدر في الهلال قبل (5) سنوات او قبل (10) سنوات يجوا ناس المريخ يطبقوه الآن
مجلس المريخ عامل ليه مجلس شورى ومجلس شرف على شنو؟..إذا كان بقلد في قرارات مجلس الهلال السابقة
كان يمكن أن يتعاقد المريخ مع غارزيتو من قبل موسمين ..لكن وجود هيثم مصطفى في المريخ جعل خطوة التعاقد مع غارزيتو تتأخر
ميكلوس برانكو ريكاردو كلهم تعاقدوا معهم بعد الهلال ولاحقوا حتى مصطفى يونس

ناس المريخ ليهم اسبوع بضربوا لنصر الدين النابي.
والنابي ما برد على رقم غريب.
والمريخاب بيضربوا…(جرس طويل).
المريخاب وقت قنعوا قالوا يجربوا تلفون (غازريتو).
مالو غارزيتو ما كعب ؟ (برضو كان بدرب الهلال).
تلفون غارزيتو دخل معاهم.
غازريتو رد ليك من (اول جرس).
مدرب خفيف.
ما قاعد ساكت ما عندو شغلة اي تلفون برد عليه.
عدم الشغلة بعلم الزول الرد على التلفون.
قالوا ليه يا كوتش عاوزنك في المريخ.
قال ليهم عاوزني لي شنو؟..انا كبرت في السن بقيت ما بشوف…السن برضو عندها احكام.
قالوا ليه ما مشكلة (تشوف) بنخت ليك (التشكيلة).
الناس البشوفو عملو شنو؟.
ناس برهان تية ومحسن سيد (نظرهم) حديد عملوا لينا شنو يعني؟.
نحن اصلا ما عاوزنك (تشوف).
جمال الوالي عندو تشكيلة جاهزة.
الخطة ذاتها بيضعها ليك جمال الوالي (ما عندك مشكلة).
بعدين ناس علي جعفر ديل احسن ذاتو ما تشوفهم.
تشوف ليهم شنو؟.
لو شفت كورتهم ما بتدربهم.
تمرق من البلد.
كمان علي جعفر جابوا معاه الريح علي كملوا (الناقصة).
ديل لو شفتهم برفعوا ليك ضغطك.
غارزيتو قال ليهم لكن انا بقيت ما بسمع.
مع عدم الشوف ما بسمع كمان.
الاضان بقت تقيلة.
والضهر.
قالوا ليه (سمعك) نحن عاوزين بيه شنو؟.
نحن جايبنك تظبط لينا (السايوند).
ما تسمع.
نحن سمعك ما عاوزنو.
قال ليهم لكن انا حركتي بقت صعبة.
قالوا ليه (حركتك) اصلو ما محتاجين ليها موش انت كنت بتدرب الهلال ، لو (اتكسرت) ما عندنا معاك قضية.
غارزيتو قال ليهم خلاص عاوز لي شهر اجهز (شهادتي) واجيكم في الخرطوم.
قالوا ليه نحن شهاداتك ما عاوزنها كفاية انك كنت بتدرب الهلال.
لو الهلال جابك من سوق ليبيا ما مشكلة.
شهاداتك عندنا انك كنت بتدرب الهلال ودي كفاية عندنا.
ما في شهادة اعظم من كدا.
المريخاب اصلو عندهم (عقدة) من الحتة دي.
اي مدرب مسك الهلال جاريين وراه.
الخفة كاتلاهم.
المدرب البيجيبوا الهلال نجح او ما نجح ناس المريخ عاوزنو.
ومثلما اضحى اي لاعب يشطب من الهلال او تنتهى مسيرته الرياضية مع الازرق (بعد عمر طويل) بلعب في المريخ ، اضحى اي مدرب سبق له تدريب الهلال مرغوب في المريخ.
منذ الالماني مكليوس والمريخاب اي مدرب يدرب الهلال بسعوا نحوه وجابوه المريخ.
الناس ديل عندهم (مجلس ادارة) ليه ؟ طالما البفكر ليهم والبخطط شغلهم مجلس ادارة نادي الهلال.
عاملين ليكم مجلس ادارة ليه؟.
رئيس نادي.
ونائب رئيس.
وامين خزينة.
ونائب امين خزنية.
واعضاء مجلس.
لي شنو؟.
والمضحك كمان عندهم مجلس شورى.
وعندهم كمان مجلس شرف.
الكلام دا ليه؟.
ما في اي داعي للبزار دا.
خسارة (كم) ساكت.
انتوا بتعيدوا في الاشياء التى عملها مجلس ادارة نادي الهلال زمان.
بتعملوا في الحاجات العملها الهلال قبل سنوات.
ما عاوزين تفكروا.
ما عاوزين تبتكروا.
ما عاوزين تجيبوا حاجة جديدة.
بتعيدوا في حاجاتنا.
حلينا قطاع الكورة.
حلوا قطاع الكورة.
جبنا مدرب وطني.
جابوا مدرب وطني.
عندنا مصطفى باغورا طلع (مصاب).
اكرا بتاعهم طلع (مصاب).
رجعنا للمدرسة الاجنبية.
رجعوا للمدرسة الاجنبية.
البنعمل فيه كلو…بعملوه.
زمان نحن بنقول ان جمال الوالي متأثر شديد بصلاح ادريس …لذلك هو يفعل كل ما يفعله صلاح ادريس.
جمال الوالي طلع معجب برضو بـ (الامين البرير) فقد احضر الوالي المدرب الذي احضره الامين البرير.
واضح ان اعجاب جمال الوالي بالهلال شديد.
الامر المدهش ان المريخ سبق له التعاقد مع (هيثم مصطفى) ..بعد الانتقادات التى وجهه اعلام المريخ على غارزيتو واعتبروا ان غارزيتو ما عندو رأس لذلك كان بحارب هيثم مصطفى.
بعد ان اكد المريخاب غلط غارزيتو ومحاربته لهيثم مصطفى عادوا احضروا غارزيتو ليدرب المريخ ليثبتوا بذلك ان الغلطان كان هيثم مصطفى.
ناس الهلال ديل مفروض يمقلبوا المريخ يجيبوا ليهم زول من (السوق) ويمسكوه الجهاز الفني للهلال ويكون ما عندو اي علاقة بالتدريب.
يمسكوه الهلال (45) يوم نحن بنستحملو.
بعد (45) يوم اقيلوه.
ناس المريخ بمشوا يجيبوه.
مقلبوهم.
جيبوا ليكم زول ما عندو علاقة بالتدريب.
جيبوا ليكم (جزار).
بقال.
سواق.
المريخاب بمشوا ويجوا ويعينوا ليهم (جزار) في الجهاز الفني.
او سواق او بقال.
جبنا ريكاردو.
انتظروا ريكاردو الى ان اكمل ثلاثة مواسم مع الهلال وجابوه مدير فني للمريخ.
قبل ريكاردو كانوا قد انتظروا (برانكو).
جابوا برانكو.
وحاولوا مع مصطفى يونس الذي اتفقوا معه لكن الدكتور كمال شداد منعهم.
مصطفى يونس ما خلوه.
عليكم اللـه نوع دا بتقولوا عنو شنو؟.
في عقد اكتر من كدا.
الناس ديل ما فاضل ليهم حاجة غير يغيروا اللون الاصفر والاحمر.
اللون الاصفر والاحمر على شنو؟.
انتوا بتخدعوا في ناسكم ساكت وبتعملوا في حاجات الهلال.
لو لبستوا ابيض وازرق بتكونوا اختصرتوا لينا الموضوع.
كان ريحتونا من الكتابات دي.
ممكن تبقوا هلال.
ابقوا هلال اي منطقة.
زيكم وزي هلال الفاشر.
هلال كادوقلي.
هلال الابيض.
البلد كلها (اهلة).
ابقوا هلال وانسوا حكاية المريخ دي.
بدل ما تضيعوا قروش البلد في لجان وتسجيلات ما في داعي ليها.
ما معقول القرار الذي يصدر في الهلال قبل (5) سنوات او قبل (10) سنوات يجوا ناس المريخ يطبقوه الآن.
غارزيتو عندما مدربا للهلال كان كبير في السن وكان المريخاب بعيبوا عليه تقدمه في السن.
بقولوا لينا جايب ليكم مدرب (عجوز).
ناس المريخ بعد ان بلغ غارزيتو السبعين جابوه عشان يدرب ناس بله جابر.
غارزيتو مع ناس بله جابر (15) يوم ما بستمر في المريخ.
عشان كدا احسن ابدأوا اتصالاتكم من الآن مع (ميشو).
ميشو بجيكم سريع.
برضو قاعد على الهبشة.
……
ملحوظة : الحرب ح تبدأ في المريخ.

هوامش

ما فاضل ليكم يا ناس المريخ حاجة غير انكم تجيبوا (عراضات) استاد الهلال.
يوم ح يفاوضوا (العراضات).
جمال الوالي بعد كدا بكون جاد في موضوع (عماد الطيب).
يا عماد خليك جاهز.
الجماعة ديل بكونوا عاوزين ليهم (امين عام).
يعني عملتوا اي حاجة فاضل ليكم الادارات.
لكن ادارة الهلال ما محتاجين ليها في حاجة عشان بتنفذوا في قرارات مجلس الهلال تلقائيا.
ح نستمتع بي صراعات كبيرة في الجهاز الفني للمريخ.
اول حاجة برهان تيه بعد كدا مفروض يمشي.
ما في داعي لبرهان تيه.
يعني برهان ح يشتغل مع غارزيتو كيف؟.
محسن سيد بكون عندو رأي.
استفيدوا من تجربة الهلال.
استفيدوا من ادارة الهلال.
مجلس الهلال عندما تعاقد مع غارزيتو جاب معاه ابوشامة وخالد بخيت.
والاتنين في عمر اولاده.
برهان ح يتعامل كيف مع غارزيتو.
كان يمكن ان يتعاقد المريخ مع غارزيتو من قبل موسمين ..لكن وجود هيثم مصطفى في المريخ جعل خطوة التعاقد مع غارزيتو تتأخر.
……
عاجل : ح ينتظروا باتريك البلجيكي ينهي عقدو مع الهلال ويجيبوه ليكم يا تراوري.

[/JUSTIFY]

وإن طال السفر – محمد عبد الماجد
صحيفة قوون

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.