كوش نيوز .. أخبار السودان بين يديك

إلا الشرطة يا والينا



شارك الموضوع :

إلا الشرطة يا والينا


> كون المريخ قطاعاته الجديدة
> ولمعت اسماء في حياتنا
> لها الاحترام والتجلة
> اسماء سطرت لنفسها مساحات من الحب في الوجدان المريخي
> عودة عبدالصمد وابو جريشة مكسب
> واحد شفت بلف
> والتاني شفت كورة
> وسمعنا ان المريخ سمى مدربه غارزيتو
> ما عارف
> سماهو غارزيتو على غارزيتو بتاع الهلال داك
> ولا سماهو غارزيتو على غارزيتو بتاع مازيمبي الغلب الهلال خمسة؟؟؟
> بعض الناس لم تعجبهم التسمية
> فتمنوا لو ان المريخ سمى المدرب «باص»
> لكن البسمي باص بكون ورقو كعب
> ولو ما ضامن المراقه بتسيك
> والمريخ ورقو سمح
> وكلو سناير
> يبقى مافي داعي لتسمية «باص»
> ورقنا ده لو لقى زول حريف بسيك الامة
> زول بعرف يقص كويس
> ويدردق الدامة الواقفة براها
> يفتح بي صغير
> الشايب عند زميلو
> والآس هيلو
> يقع الكرت المع الدامة
> ينجلد بالشايب
> وابو زمل يفتح نفس البوهية بي صغير
> وتقع الدامة
> وتقع الندامة
> طاااااااااخ بالآس
> والله ما رضيناها ليك يا فطومة يا اختي
> دامة الهلال الوحيدة في كرت
> المهم
> طالما غارزيتو نال مع مازيمبي كأس افريقيا للابطال
> وطالما غارزيتو فشل في ذلك مع الهلال
> يبقى العيب ما في غارزيتو العيب في تيم الكاردينال
> المهم
> تمنياتنا للجان الجديدة والقطاعات بالتوفيق
> ونمد الايدي نشد على ايديهم معاونين لهم
> تحت امرهم طالما كان امرهم خدمة الزعيم
> وبالتوفيق لموسم جديد ينتهي بنا الى المطار
> اصلو البلد دي مكسبها انك تمشي المطار
> يا تقابل المريخ بي جوية جديدة جلبها الابطال
> يا يكون المريخ شتت «لاقدر الله» وانت في صالة المغادرة ما صالة الانتظار
> ايها الناس
> قالوا بص الهلال وصل العرضة شمال
> وشفنا الصور في الصحف وجاتنا بالواتس وفي كم جوال
> لاحظنا انو في الصورة كلها بص الهلال
> مصور بي وشو وبي الجمبة مافي اي مجال
> صورة الفيش وصورة اللوتري
> بتكون بالجمبة
> صورة بص الهلال بالبوز
> يبقى لا حايطلع فيش
> ولا حايمشي من اساسو عشان يقيف في التفتيش
> ولا حايجيهو لوتري
> غايتو يا روشا
> لو البص برضو طلع ماسورة
> استعمال بره واخد بوهية
> واحتمال البوهية ذاتا تكون استيكر
> تبقوا ملوك المواسير
> البص ده ما غريب علي
> بشبه لي بصات زمان جابوها
> بصات طوااااااااال
> مكتوب عليها جميل خوقير
> قطعوا ليها الصواني كلها
> وسعوا ليها جميع شوارع الولاية
> مدوا ليها المحطات
> دفنوا ليها الخيران
> وبعد ده كلو
> فردة فردتين
> وتلقاها قطعوها صاج
> ايها الناس
> إن تنصروا الله ينصركم
> اها
> نجي لي شمارات والي الخرتوم
> كان شفت يا والينا
> حكاية مقتل شرطيا لينا
> اكيد بتأثر فينا
> اكيد بتحرك كل الشعر الفي ريسينا
> فالجريمة تتطور حولينا
> ثم تتطور ادوات المكافحة يا والينا
> تحديد سلطات الشرطة والتشديد عليها
> بخلي الجريمة تتطور والشرطة واقفة تتفرج علينا
> وده البخلي المجرم يطيح فينا
> ونهاراً جهاراً يلاوينا
> وتبقى الشرطة بس معمولة لينا
> نقول بغم في الاستاد يقطعوا لينا
> والغريبة لو قلناها بغم في الشارع يا والينا
> بتغابوا العرفة فينا
> الشرطة كان تبعتوها الشرطة الضحك ابدا ما بشرطنا يا والينا

سلك كهربا
ننساك كيف وفي السينما الخائن لو كتل البطل الفيلم بخسر يا والينا

والللللللللللللى لقاء
سلللللللللللللللللللك

في السلك – بابكر سلك
صحيفة الإنتباهة

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.