كوش نيوز .. أخبار السودان بين يديك

المريخابي الوحيد في المريخ أصبح (حكم المباراة)



شارك الموضوع :

المريخابي الوحيد في المريخ أصبح (حكم المباراة)

[JUSTIFY]
العدد الذي احصاه سلك في ما يقرب من القرن ممكن نحسبو ليه نحن في (12) سنة بس
الثريا بحجر واحد صادت تلاتة عصافير..رعت الهلال لكنها في نفس الوقت بقت راعية المريخ والاهلي شندي
المريخ والأهلي شندي شغالين بس (إعادة) لتسجيلات الهلال السابقة
أعظم رؤساء المريخ ابوالعائلة جاء للمريخ من الهلال بقى كابتن وبقى رئيس كمان

مرة مشينا لينا عرس…(ما كنا عندنا نفس) لكن قلنا ما ظريفة نمشي نشارك.
(اهو ناس تعرس وتنبسط).
لقينا ليك الدنيا مقلوبة.
في اي عرس بتلقى ليك شافع بجر في (الصيوان).
قدر ما تنهرو عشان يفك (الصيوان) ما بفكو.
ما فهمنا اي حاجة.
جابوا لينا (كراسي) قعدنا ما قلنا اي حاجة (قلنا ما نعلق).
ما نقول اي حاجة.
اي عرس نمشي ليه نقعد (نعلق) فيه.
التعليقات في العرس ما ظريفة.
ما حلوة.
نحن ساكتين كدا…قالوا لينا (العروس) دي اختارتها ام العريس.
ما قلنا حاجة.
نقول شنو عاد؟.
بعد شوية كدا قالوا لينا (الشيلة) جابنها اخوات العريس للعريس عشان ظروفو شوية صعبة.
عندو اختو برة رسلت ليه الشيلة.
ما قلنا حاجة.
عادي الحاجات دي بتحصل.
يعني شنو؟.
الفنان طلع المسرح قالوا لينا الفنان دا متبرعنبو اصحاب العريس في الحلة.
ما قلنا حاجة.
كنا عاوزين نقول : (واللـه ما قصرو كتر خيرهم).
لكن سكتنا.
جابوا لينا (العشا) حتة (فرخة) مع شوية عجور ورغيفة كبيرة.
قبل ما نفتح صحن العشا قالوا لينا العشا اتبرع بيه خال العروسة.
خال العروسة دا مالو (فرختو) صغيرة كدا؟.
ما يتبرع بي حاجة زي الناس وإلّا يجي العرس زيو وزي اي زول.
كنا عاوزين نقول التعليق دا..لكن سكتنا.
قلنا احسن ما نعلق.
احسن ما نقول حاجة.
الناس بقت ما بتستحمل ومن اي كلمة بزعلو.
العريس جاء داخل الصالة مع العروس.
قالوا لينا الصالة دي ذاتها اتبرعوا بيها زملاء العريس في الشغل.
سكتنا.
لكن مالها ضيقة كدا ومكيفاتها ضاربة.
وحالتها بالبلاء.
قربنا للعريس عشان نبارك ليه قالوا لينا (البدلة) دي بدلة اخوه الكبير.
قلنا ليهم ظاهر عليها فيها كبر شوية.
والجزمة برضو كبيرة.
تكون حقت اخوه برضو.
قالوا لينا كتلتوها كتل.
عاينا ليك في العريس سمح وقلنا ليه انت عرسك دا عندك فيه شنو؟.
ما اظن عندك فيه حاجة غير (الضريرة) الفي رأسك دي.
قبل ما نقول كلامنا دا في واحد طلع فوق المسرح وقال يا جماعة انا متبرع بي اسبوع من شهر العسل للعريس في القاهرة.
كمان.
العريس دا مالو عامل كدا زي (الصندوق الخيري)؟.
العريس طلع (قرش) ما دفعو في عرسو.
العروسة اختاروه ليه.
هسع يا ناس المريخ انتوا فرقكم شنو من العريس دا؟.
غارزيتو جبناه ليكم نحن.
ناسكم كلهم من الهلال.
جمال الوالي قال اختيار غارزيتو ما عندو علاقة بالهلال.
هو انتوا لو ما الهلال كان بتعرفو غارزيتو.
جمال الوالي في نفس الكلام القال فيه ان اختيار غارزيتو ما عندو علاقة بالهلال قال انهم اختاروا غارزيتو عشان سبق له العمل في السودان وهو متفهم للدوري السوداني وجرب العيش في السودان.
طيب يا جمال الوالي غارزيتو دا في السودان كان فاتح ليه محل غاز.
الجرب العيش في السودان وين؟.
في طابونة.
ما في الهلال البتقول ما عندو علاقة بي تدريب غارزيتو للمريخ.
طيب قول تدريب غارزيتو للمريخ ما عندو علاقة بتدريب غارزيتو للهلال.
ولدو برضو ما عندو علاقة.
انتوا يا جمال الوالي جايبنو بي ولدو وتقولوا ما عندو علاقة بالهلال.
عندو علاقة بالرابطة كوستي.
بابكر سلك امس الاول جاب ليه (77) زول قال ديل سبق لهم اللعب في الهلال بعد ان كانوا بلعبوا في المريخ.
يا سلك انت ما بتقول عادي الفريق الكبير يسجل من الفريق الصغير.
مالك غيرت نظريتك.
نفس هذا العدد – الهلال بكون سجلو من الزهرة ونفسه من التاج ونفسه من المهدية ، وشمبات والخرطوم الوطني.
حاجة عادية.
العدد الذي احصاه سلك في ما يقرب من القرن ممكن نحسبو ليه نحن في (12) سنة بس.
وكفى ان نقول ان اعظم رؤساء المريخ ابوالعائلة جاء للمريخ من الهلال بقى كابتن وبقى رئيس كمان للمريخ.
عظمة يا هلال.
جمال الوالي ذاتو لو كان بلعب كورة كان جاكم من (رديف) الهلال يا سلك.
الهلال الكبير ما بلعب فيه.
هسع (اللخبطة) البتعملوا لينا فيها دي شنو؟.
انتوا والاهلي شندي؟.
شغالين (اعادة) بس.
اتخيل نفسي كيف سوف اتابع مباراة المريخ واهلي شندي القادمة…دي عاوزة ليها (12) كباية جبنة.
عشان الزول ما يلخبط.
عشان الزول بس يكون مركز وحاضر في المباراة.
اقل (دقسة) بتطلع من المباراة.
المباراة سوف تكون عبارة عن (تقسيمة) هلالية خالصة.
المباراة زي كأنها (تمرين) للهلال.
الـ (22) لاعب في المباراة باجهزتهم الفنية كانوا بلعبوا في الهلال.
اجهزتهم الفنية ليه؟.
انتوا ماشيين بعيد ليه؟.
صلاح ادريس الراعي الرسمي للاهلي شندي كان رئيس نادي الهلال.
وجمال الوالي رئيس نادي المريخ كان (هلالابي) بشجع في الهلال من (المدرجات).
الهلال سرو باتع.
المعز محجوب في المريخ وعبدالرحمن الدعيع في الاهلي شندي.
يعني (الهلال) سوف يكون في مباراة المريخ والاهلي شندي من القون للقون.
من رأس الحربة لي رأس الحربة.
بي جاي نادر الطيب وكلتشي وبي غادي بكري المدينة وتراوري.
شفتوا الهلال دا انتشر كيف؟.
في واحد من الجماعة الفوق قال لي اصلو (الثريا) نظامها كدا.
قلت ليه خلاص عاوزين تعملوها في (الثريا).
قال (الثريا) اعلاناتها قوية.
يعني الاعلان في الهلال بكون اعلان في المريخ وفي الاهلي شندي في نفس الوقت.
عاوزة شرح زيادة.
يعني الثريا بحجر واحد صادت تلاتة عصافير.
الثريا راعية الهلال لكنها كأنها راعية المريخ والاهلي شندي.
باعتبار ما شطب.
انتوا إلا يقولوا ليكم الموضوع عديل كدا.
مفروض تفهمو الموضوع وهو طاير.
جمال الوالي (هلالابي).
ابوالعائلة اشهر شخصية ادارية في تاريخ المريخ (هلالابي).
الباشا (هلالابي).
بكري المدينة.
تراوري.
علاءالدين يوسف.
المعز محجوب.
المريخابي الوحيد في المريخ بقى (حكم المباراة).
مباراة المريخ والاهلي شندي القادمة ما ح يكون فيها مريخابي واحد غير (حكم المباراة).
عشان كدا مفروض يا سلك بعد كدا تختصروا الحكاية وتشجعوا (الحكم).
ما عندكم غير (الحكم).
الحكم ورجال الخطوط ديل بس (المريخاب) في المريخ.
الباقى كلو جاكم من (الهلال).
نحن ذاتو ما عارفين في مباراة المريخ واهلي شندي القادمة نقيف مع منو؟.
كلهم (اولادنا).
الحالة واحدة.
….
ملحوظة : انتوا صلاح ادريس مالو فك اعارة محمد صلاح للمهدية ومسك في اعارة جمعة جينارو.

هوامش

كل زول يركز في اعارتو.
واي واحد يخلي بالو من اعارتو.
صلاح ادريس راعي الاهلي شندي …وهو منافس للهلال.
لو عندو كلام في اعارة جمعة خلوه ينتظر مباراة الهلال والاهلي شندي ويمشي يشتكي.
ونحن جربنا شكوى صلاح ادريس في (اعارة) الباشا.
الفيلم دا شفناه قبل كدا.
اشتكوا بس.
بكري المدينة باقي ليه (21) يوم من تجميد نشاطو من قبل الفيفا.
تاني يا بكري تمارين ما في.
لو الفيفا خلتك غارزيتو ما بخليك.
الكاردينال (قناتو) طلعت زي (كروز).
قالوا شنو؟.
قالوا كروز ح ينضم لاعداد الهلال في دبي.
صدقناكم.
هو زول التسجيل ما جاهو يجيكم للاعداد.
نعمل بي اعدادو شنو؟.
دا فن جديد كمان.
طلال مدثر قدم مادة عن قناة الهلال جيدة وكشف فيها الحقائق كاملة.
احسن مما ننخدع ساكت.
اعلام الهلال ظل يقوم بهذا الدور (النقدي) الرائع ويكشف الحقائق للقراء والهلالاب بامانة.
الموضوع دا هسع لو كان طلع من صحيفة حمراء او قلم احمر كانوا ما قعدونا في البلد.
احسن برانا نشوف عيوبنا ..ونمشي لي قدام.
………..
عاجل : بص الهلال قالوا سواقو (اجنبي)…موتوا بي غيظكم.

[/JUSTIFY]

وإن طال السفر – محمد عبد الماجد
صحيفة قوون

شارك الموضوع :

3 التعليقات

      1. 1

        يا محمد
        جمال الوالى رئيس بالتجنيس
        لا كان مريخابى ولا حاجة واسه شغال فى المريخ بمبدا السوق اشترى وبيع
        وليس بالولاء
        الرئيس قال اقنعه بان يدير المريخ ويخدم البلد اكثر من السياسة
        وليه لانه زول هين زى ما قال الرئيس فى كوستى
        وكل الكمبارس ال من رحم الله هم نفعيين دخلاء على المريخ الحقيقى

        الرد
      2. 2

        جمال الوالى يا محمد فعلا لم يكن يعرف المريخ
        جاء المريخ بامر من عمر البشير كما ذكر الرئيس فى احتفال كوستى
        وقال ليه ممكن تخدم البلد بالرياضة اكتر من السياسة
        والاخطر عمر البشير قال اختار جمال الوالى لانه زول هين
        سلك وكلك كلهم منتفعين وليسوا ذو مبادى

        الرد
      3. 3

        كلامك صح يا محمد
        جمال الوالى رئيس بالتجنس
        عمر البشير قال فى كوستى انه اقنع جمال الوالى بادارة فريق كرة
        ويكون خدم البلد اكتر من السياسة وحقو قال ناس المريخ يدوه حافز على هذا المعروف
        والاهم قال عمل كده لانه جمال الواتلى زول هين

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *

    This site uses Akismet to reduce spam. Learn how your comment data is processed.