كوش نيوز .. أخبار السودان بين يديك

محاكمة هيثم وكرامة المريخ



شارك الموضوع :

محاكمة هيثم وكرامة المريخ


> تأجل الفصل في شكوى المريخ.
> لأن هيثم غائب في الركائب.
> سيدا سافر مع فريقو الجديد.
> وسمعنا أن المريخ ذاتو غاب.
> لا أعتقد أن المريخ قدم شكوى ضد هيثم.
> الهدف منها الغرامة المالية في المقام الأول.
> ولكن القصة تكمن في الحفاظ على كرامة المريخ.
> وعلى حقوق المريخ ومن ضمنها الحقوق الأدبية.
> هيثم حر كيف يتصرف.
> وبالتأكيد ينصرف إليه تصرفه ويتحمل تبعاته.
> لو تذكروا..
> زماااان أيام تسجيل هيثم في المريخ..
> كتب إنو الزوجة بتتأدب في حياتها مرتين..
> مرة في بيت أبوها..
> ومرة في بيت راجلها..
> وقلت إنو أدبها في بيت أبوها شفناهو..
> الدور الباقي على أدبها في بيت راجلها..
> وتأدب هيثم بأدب المريخ..
> لان ما وجده من احترام في المريخ..
> اجبره على التأدب ولو إلى حين.
> ثم بعد عام..
> جاراتها في بيت أبوها تاني دقسوها..
> ولكن الأمر هنا لا يمر مرور الكرام..
> مجرد الطلاق هواجة في الأوقات دي.
> طابلة بالطلاق من حقك..
> ولو عندك سبب القانون والشرع كفلو ليك طلب التطليق..
> لكن إن تفدي نفسها يجوز شرعاً..
> وإن نتمسك بالأمتعة المنزلية من حقنا..
> وأن نثأر لكرامتنا من حقنا..
> وأن نشترط عودتها لبيت أبوها بالتوب العليها برضو من حقنا..
> وألا نتأسف على خراب البيت لأن سته بلغت من العمر ما يقطع العشم برضو من حقنا..
> وأن نجيب ست ستها برضو من حقنا..
> لذا..
> على المجلس أن يتمسك وبقوة بحقوقنا الأدبية والمادية لدى هيثم مصطفى.
> فما فعله هيثم بالأهله سبعطاشر سنة..
> لم يثأر لهم شطبه من الكشوفات..
> ومنهم من يصلي خمسة أوقات..
> ليبتهل الى الله عز وجل ويعود هيثم للهلال..
> ولكن الرأي عندي..
> لو مشوا عمرة..
> الباب ده اتقفل خلاص بالنسبة للهلال..
> أيها الناس:
> ما يربط هيثم بالمريخ عقد وحقوق وواجبات..
> المقصر يتحمل نتيجة تقصيرو..
> وإهمال المجلس لهذا الموضوع هو إهدار لمعاني كثيرة يهمنا التمسك بها..
> ولنثبت لأنفسنا قبل الآخرين..
> إنو الأدب في بيتنا صعب شديد..
> نكرم من يستحق الإكرام..
> ونسعى لكرامتنا مهما كلف ذلك الآخرين من خسائر..
> طالما مسوا بتصرفاتهم تلك الكرامة الغالية لدينا..
> ايها الناس:
> على المجلس أن يقيف حيلو في هذا الموضوع ولا يجلس..
> يكون واقف ويتخذ موقفاً..
> موقف واضح جداً..
> الأمر ليس أمراً خاصاً بهم..
> الأمر أمر يخصنا ككيان..
> والكيان الذي فوضكم لإدارة شؤونه وحملكم الأمانة..
> يشدد عليكم في هذا الموضوع..
> أقصى العقوبات وأقساها..
> المهم.
> أمس كان اليوبيل الفضي لكأس مانديلا..
> تسعة إطناشر..
> شوف الفرق يا مزمل..
> ماذا تعني لنا تسعة إطناشر؟
> وماذا تعني لهم اتنين إطناشر؟
> فرق يا مزمل.
> فرق السماء من الصفر.
> المهم.
> كنت أتوقع احتفالية كبيرة ينظمها المجلس ابتهاجاً باليوبيل الفضي لمانديلا.
> احتفالاً بأنه إنجاز وصل ربع قرن من الزمان في عمره.
> ولم يتجرأ أحد على تحقيقه.
> وتكريماً لجيل مانديلا..
> أبطال يستحقون التكريم كل يوم.
> ولكن المفاجأة كانت..
> لا احتفال ولا يفرحون..
> ويفرحون دي بالذات بتخلي الجماعة يحزنون..
> وكنا دايرين نعلق لافتة كبيرة في نادينا..
> نكتب عليها نادي يفرحون..
> وشمال الزلط نخت لافتة عليها سهم موجه شمالاً..
> نكتب عليها إلي نادي يحزنون..
> ولسه ما فات شيء.
> الأستاذ جعفر سعيد الريح أعد مسرحية رائعة تدور حول مسيرة المريخ الجوية..
> وتأطر لمانديلا وتعطر سماء الإنجاز والتاريخ..
> كانت فقرة من فقرات المهرجان..
> وستكون بإذن الله كذلك..
> مجلسنا الهمام..
> يا كلفنا بالقيام بهذه الاحتفالية..
> يا اسمح لينا نقوم بيها برانا..
> دي حفلة ما بتتفوت..
> الجماعة لو لقوا فرصة زي دي..
> كان طلعوا الثريا ومضوا عقد الرعاية مع روحهم..
> ناسنا ديل من الحبة بسووا قبة..
> زي الزول الولدو في امتحان الشهادة بجيب أربعين في المية..
> وبعمل ليهو بارتي.
> أيها الناس:
> إن تنصروا الله ينصركم..
> أها..
> نجي لي شمارات والي الخرتوم.
> كان شفت يا والينا..
> بنتونس أنا ومحمد يوسف أبكر من جهة الكلاكلة البعدينا..
> قلت ليهو الولد لقى شغل يا اخينا..
> قال لي شغل وين لي زول ماعندو ضهراً فينا..
> قلت ليهو الضهر ده بقدر على الحجامة يوم تجينا..
> ولا بنسى القيامه الحا تقوم علينا..
> ولا بنسى يوم الحساب ولد يقولوا لينا.

سلك كهربا
ننساك كيف والحجامة بتمرق الدم الفاسد.. حتى الدم الفينا فسد يا والينا؟؟؟

والللللللللللللى لقاء
سلللللللللللللللللللك

في السلك – بابكر سلك
صحيفة الإنتباهة

شارك الموضوع :

1 التعليقات

      1. 1

        أصلا المريخ لو عنده كرامة ما كان سجله ولأنه يفتقدها قام بتسجيله وفعل بها هيثم ما فعل بالرغم من عدم وجودها علي الأقل فعل فيما يدعونه كرامة

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *

    This site uses Akismet to reduce spam. Learn how your comment data is processed.