بابكر سلك
الله يعلي قدرك وتبقى البدلة قدرك
> كتب بزاويته الرائعة الى ان نلتقي بالامس
> كتب حديثاً رائعاً كعادته
> وفي الختام وقبل اذهبوا وانتم الطلقاء
> ارسل رسالة للبفهما كديدن الكتابة عنده
> حيث تناول في صدر عموده ما يشبه الصليب حسب تعبيره والواضح على شعار الهلال الجديد
> فربط صدر العمود بالرسالة في عجز العمود
> قال
> احد الخبثاء التقاني بالصدفة وقال جملة واحدة
> معقولة يا استاذ
> صليب وكاردينال !!!!!!
> واليوم انا اقول لاستاذي قسم
> انا ذاتي لاقاني خبيث
> اخبث من الخبيث القابلك يا قسم
> خباثتو ازيد شوية من خباثة زولك القابلك
> قال لي جملة واحدة
> لكن اطول شوية من الجملة القالها الخبيث القابلك
> طبعاً لازم تكون جملتو اطول شوية عشان خباثتو ازيد شوية
> قال ليا
> معقولة يا استاذ
> صليب وكاردينال وبابا ؟؟؟؟؟؟
> قمت زدتها ليهو شوية
> قلت ليهو
> والاسم هلال وحق عصمت الشعار
> تحية للرائع قسم
> المهم
> قلت الليلة وكت جابت ليها قراية لاخوتنا الاهلة
> نتم الناقصة
> مشيت علي محمد عبدالماجد«المنتقل لشندي»
> كتب محمد عبدالماجد
> يمكن ان يكون صلاح ادريس كاتب صحفي وملحن ورئيس نادي وشاعر لكن لا يمكن ان يكون الخصم والحكم في نفس الوقت
> ممكن يا حمادة يكون الخصم والحكم في نفس الوقت
> اسي في الممتاز ده
> لما الهلال يكون لاعب
> موش بكون بالنسبة للفريق التاني
> الهلال الخصم والحكم والاتحاد كمان ؟؟؟؟
> يبقى ليست بدعة ان يكون الاستاذ صلاح ادريس خصماً وحكماً في نفس المباراة
> اقصد في نفس الوقت
> ومشيت علي روشا
> حبيبي يا روشا
> روشا شدت ما واجعاهو قصة المدينة
> امس مالي جريدتو كلها بصور المدينة
> وقال ايه
> المدينة وصل ولابس بدلة الهلال
> ضحكتني
> الصورة المنشورة كلها والتي يرتدي فيها المدينة زي بعثة الهلال
> فيها حديدة بالشمال فوق
> اظنها اشارة الى ان الفريق ده علي الحديدة
> جوياً علي الحديدة
> استادياً علي الحديدة
> وصورة استقبال بكري بدلتو ما فيها حديدة لانو بقى ما علي الحديدة زي ما كان زمااااااان
> وما يلبسه اعضاء البعثة الهلالية في الصور التي نشرها روشا
> اصطلاحاً نسميه بدلة
> ولكنه في الحقيقة اقرب لي فنيلة السقط اوالسويتر
> البدلة زي اللابسها بكري في صورة استقبالنا ليهو بالمطار
> ما زي حقاتكم ديل
> بتاعات المرحوم كان قدرك
> النوع الفيهو حديدة ده
> النوع البتطلع فوق عليهو بي عشرة سنتمتر لياقة القميص ده
> النوع ده ما بسموهوا بدلة
> ياخ في صوركم جيب بشة بتاع البدلة فوق لي كمر البنطلون
> تقول لي بدلة
> ياخ مساحة القميص عند بوي اعرض من البدلة واكبر من المساحة البخليها وراهو في الميدان
> ياخ الشغيل البدلة بتبدأ بعد ينتهي جيب القميص
> بدلة فوق القميص تلبسها
> تبدأ من تحت القميص ؟؟؟
> تقول لي بدلة
> امشي يا اخوي شوف ليك اسم للهباب اللابسنوا ناسكم ده
> بعد تلقي الاسم تعال اطلب من بكري تسليم «الحاجة البتسموها بدلة دي»
> ياخ بدل الاقساط ام مية وخمسين
> تدفع تلتين وتستلم البدلة بس
> تسدد قسطين
> يدوك البنطلون
> وتقسط الباقي
> شكلها بدلة اكتر من حاجاتكم دي
> ياخ انا لما شفت الصور امس في الاسياد
> قلت يا ربي روشا ده الليلة مالي جريدتو دي جلود عتان الحاصل شنو ؟؟؟؟
> عاملين كرامة وضابحين تيوس قدر ده !!!!!
> روشا
> بكري لما تجيب ليهو قصة بدلة
> جيب ليهو غنيتنا البنغنيها ليهو
> اغنية غناها طلال السادسة
> وكأنه غناها لبكري المدينة
> تقول الاغنية
> الله يعلي قدرك ات يا المافي قدرك يا جناي دعايا ليك
> الله يعلي قدرك وتبقى البلدلة قدرك يا جناي دعايا ليك
> وفطومة اختي كتبت
> ترك الهلال خانة فارغة لبكري المدينة
> كدي نعرب الكلام ده اول
> ترك فعل ماضي
> الهلال شعار عصمت
> خانة دي ما بنقدر نقول فيها شي
> فارغة هي ما يأتي قبل مقدودة في المثل فارغة ومقدودة
> لبكري المدينة
> بكري اسم فاعل فارس الناس في جمع التكسير مجنن نون النسوة مفرق المثنى بالسرعة الزائدة في جريته
> فارغة شنو يا فطومة ؟؟
> قولوا يا اكتشفتوا العدد ناقص بعد قفل الباب
> يا عديتوها غلط
> تكونوا عديتوها زي ناس هبنقة
> كلو مرة تلقوها عشرة
> البعد ما بعد نفسو
> وغيرو يعد
> يقع في نفس الخطأ
> يعد العشرة الباقين وينسى نفسو
> وقعدوا يفتشوا في الحداشر
> قالوا راح
> عليك الله يا فطومة العدة ليكم منو ؟؟؟
> بس ما تقولي لي …..
> ما بصدق
> هبنقة عندكم لكن يا فطومة يا اختي
> ايها الناس
> امشوا الفيفا
> تلقوا هناك كامبوس هاليفا
> حاسبوهوا اول بالتعريفة
> وبعدين افتحوا موضوع بكري
> الخوف بكري يمشي معاكم الفيفا
> يتربسكم ويجي راجع
> ايها الناس
> إن تنصروا الله ينصركم
> اها
> نجي لي شمارات والي الخرتوم
> كان شفت يا والينا
> من اجمل الاشياء الليها قرينا
> ما كتبه خالد القاسم لينا
> قال يا والينا
> نحن لا نسخر من اوطاننا بل نسخر ممن جعلوا اوطاننا مسخرة الامم
> الراجل ده بجيب الكلام ده منين يا والينا ؟؟؟
سلك كهربا
ننساك كيف والراجل ده بجيب كلام زي الفل
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة