كوش نيوز .. أخبار السودان بين يديك

من طرف الحِلة



شارك الموضوع :

[JUSTIFY]جاسوسية

قالت لي ولد بنتها (6 سنوات) وهي تنفض في يدها: ( يا شافع مباريني مالك؟.. إن دخلت الأوضة تدخل وراي.. وإن قعدت في الهول تحقص جنبي.. وإن مشيت المتبخ.. ألقاك تحت كرعي.. وإن دايرة أنضم مع أمك فاتح خشمك تعاين لي؟.. داير شنو؟؟)..

قال لها وهو يهدد بالسبابة: (حبوبة.. هوووووووووووووووي.. فتحي عينك.. أبوي قال لي أحرسها ما تحرش أمك).!!

خبــــر

الخبر: ( الرجل الأمريكي يرى أن النساء السمراوات أكثر جاذبية).!!

ما وراء الخبر:

كانت قاعدة قالت ليهو وهي تهز في كرعيها المدلدلات من طرف السرير وهي فرحانة وتضحك فاتحة خشمها حدو أضنيها: ( غايتو العاجبني في الخواجات ديل.. النصيحة دي أصلهم ما بيدسوها.. وحات الله)..

ثم خبر آخر قبل تتم كلامها وفي نفس البرنامج: (دراسة أمريكية تشير إلى أن تعدد الزوجات يقي من أمراض البروستاتا “التهاب – تضخم – سرطان)..

ما وراء الخبر:

سمعو الخبر مع بعض.. جرا نفس طوييييييل وبارتياح شديد.. وقعد يعاين لها.. عاينت ليهو.. جرت طرحتا من راسا وقعدت تحك في نص راسا بأطراف أصابع يدها الشمال الأربعة.. وقالت ليهو:( مخيييييييييير.. غايتو يا أخوي!!!.. إنت أقعد صدق لي الكفار ديل واسمع نضمهم لمن توووووووووش يوم القيامة تلقى نفسك في نص النار).!!

بلعها ليها

قالت تونّس في جارتها بعد أن جغمت من فنجان القهوة: ( آي.. إنتي عارفة يا صفاء.. أصلو العرس والولادة بي يبشتنن المرا.. وحاااات الله ما تشوفيني كدي.. أنا دي قبال العرس كنت سمحة سماحة عينة.. علا العرس والولادة بشتنني.. الخُتّاب ديل كانو من ولاد الحلة.. دا يدخل ودا يمرق.. دا يدخل ودا يمرق.. مهندسين ومديرين ودكاترة.. بس القسمة رمتني في النصيبة دا.. النعيم ود خالتي دا).!!

صادف أن جا من برا وسمع الونسة والنضم.. من مخبأ.. لا تراه.. الضيفة مشت.. جاها ( أم نفلين.. أم نفلين.. تعالي هنا.. دكاترة شنو الكانو دايرنك؟.. حلتكم كلها ما فيها تمرجي خليكي من دكتور.. الحسن ود ضيف الله وشغال فراش في استبالية أب عشر.. قالت خُتّاب؟ دا يمرق ودا يدخل.. علي الطلاق يا أم نفلين لو ما كنت أنا سكران يوم العقد.. لي حسي ما كنتي عرستي.. (عاينت ليهو وقالت تكضمو.. أهـا.. سجمك.. نان إنت السكر حسي خليتو؟).. رفع راسو عاين ليها وهو مربع ايديهو في سدرو: (نان إنتي الشنا خليتيها؟).!!!

منافق أفندي

مشى زار الترطيبة في المستشفى لقاهو راقد يتقنت: (أهـ أهـ أهـ).. بكى منافق أفندي وقعد يعصر للترطيبة في كرعيهو.. وقال وهو يقشقش في دموعو: ( وحااااااات الله أهـــ.. اللتك دي في قلبي من جوااااااااا.. سلامتك سلامتك)..

رجع البيت.. أخوهو عندو ملاريا.. ويقنت برضو.. صنقر منافق أفندي في نص العنقريب ونهر أخوهو قال ليهو: ( شنو أهـ أهـ؟.. زي النسوان.. ما تبقى راجل وتسكت وتخلينا نخت راسنا وننوم.. الناس دي ججججت عندها مراريا وحايمة بيها..) أخوهو زهج وزاد القنتة.. (أهـ أهـ..أهـ..أهـ..و..وووووووووووب علي كمان).!!
[/JUSTIFY]

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.