منوعات

مطبات : عوض الجيد الكباشي..في ورطة أمام النجمة المصرية نورهان..!!


[JUSTIFY]لصاحب الكلتشات ومقدم البرامج بالإذاعة الرياضية عوض الجيد الكباشي مطبات ومطبات منها مطب خارج الحدود وضعه فيه الأستاذ مبارك البلال حيث يروي كباشي هذا المطب فيقول : في فترة سابقة كنت بكتب في صحيفة الدار الأستاذ مبارك قال لي تمشي القاهرة وتعمل حوار مع الممثلة نورهان وكانت وقتها في عز نجوميتها الناس كلهم يتكلموا عن نورهان النجمة المصرية فسافرت القاهرة واتصلت عليها قلت ليها (أنا عوض الجيد الكباشي صحفي سوداني بصحيفة الدار وعايز اعمل معاك حوار وكدا ..) قالت لي (جداً أنا حالياً شغالة تصوير في الزمالك ووصفت لي مطعم قريب من مكان التصوير قالت لي تعال في المطعم دا يتلقاني موجودة ) لمن وصلت لقيت معاها مجموعة من البنات وكلهن بتشابهن كلهن سمحات يعني كلهن نورهان . نورهان منو فيهن ؟ ماعرفتها خصوصاً أنا ما شفتها كتير في التلفزيون والزول في التلفزيون مختلف من الطبيعة والمعاها بيشبهنها ودا كلو بقيت قاعد وأعاين (يا ربي نورهان ياتو واحدة في البنات ديل) المهم فضلت علي الحالة دي .. لحدى ما هي حست بي وجات سألتني (أنت الصحفي السوداني)؟ قلت ليها :أيوه أنا.. مرحب بيك يا فنانة و… قالت لي: (ماعرفتنيش وألا إيه) قلت ليها (كيف ما عرفتك .. لا طبعا معقولة ما أعرفك يا فنانة و..) غايتو لو ما كان هي الجاتني كنت لي هسه بفكر نورهان وينا في النورهانات ديل…!!
وتاني مطب كان عوض الجيد الكباشي يستضيف الأستاذ صلاح إدريس عبر الإذاعة الرياضية في برنامج (الكرسي الساخن) وكان وقتها رئيس نادي الهلال وتناولت تلك الحلقة مواضيع ساخنة وأثناء الحوار قاطع عوض الجيد السيد الأرباب في عدد من الإجابات والحلقة كلها علي بعضها كانت نار وشرار كتبت عنها الصحف في اليوم التالي … بعد انتهاء الكرسي الساخن وهم طالعين من الإذاعة يحكي عوض الجيد : لقينا كمية من الجماهير واقفين في الشارع جنب الإذاعة وجايطين : وينو عوض الجيد دا ؟ والله الليلة بس الاطلع ! الأرباب قال ليهم : يا جماعة في شنو ؟ قالوا ليهو : ليه يا ريس يسخن معاك كدا وكمان بقاطعك يا ريس ؟ والله ما نخلي .. قايل روحو شنو .. يقاطعك علي كيفو ..!! وأنا واقف جنبو قال ليهم : انتو عوض الجيد دا بتعرفوهو ؟؟ قالوا ليهو : أنت ورينا لي يا ريس . نادي انزل هنا دا .. صلاح إدريس قال لي : اسمع الجماعة ديل مسخنين ومنفعلين جداً .. أنت انسحب أمشي بيتكم وخليني معاهم.. ومشيت براحة وخليتو معاهم بعد داك اتصل قال لي (ما طلعتك منها)..

صحيفة حكايات
[/JUSTIFY]