كوش نيوز .. أخبار السودان بين يديك

لأول مرة .. وحصرياً في السودان ..! إنو تدفع فاتورة الموية في محل الكهربا


شارك الموضوع :

لأول مرة ..وحصرياً في السودان ..! انو تدفع فاتورة المويه في محل الكهربا !!( والمويه ذااااتها جمره خبيثه) ..الفكره غريبه ..وقدر ما حاولت افهم القصد شنو ما قدرت اصل لي فايده ..لكن جاني تصور لي الوضع حيكون كيف ! ..صف المويه زايد صف الكهربا ..!! (ده ما يوم القيامه عديييل).
اتخيلو لما تجي داخل البيت بعد يوم ممل وطويل و سخانه وغبار ! وانت في الطريق بتفكر ان…و متييين تصل البيت عشان تديها نومه كده وبعدين تشوف الحاصل.
تقوم لما تصل البيت تجري من باب الشارع طوالي على المكيف ..وطبعاً الكهربا قاطعه !! بعد ما تخلص السب والشتيمه وتستغفر الله ..(وتبدا الخطه ب )تقوم تفتح الشبابيك والابواب وتكتفي الهوا حق الله ده ..وتشيل بشكيرك و تمشي تديها دش كده عشان ترطب حبه ! .. معقول يعني يكون مافي مويه !!؟ طبعاً ..اكيد ..انت قايل نفسك في الجنه !!؟ و تتواصل الشتايم ..وتنتقل لي الخطه ج ..تشيل كرسي تقعد تحت ضل شجره وكان الله يحب المحسنين.
و تفضل على الحال ده لحدي ما الشهر انتهي !..وماشي تجيب الكهربا والمويه ، تحصيل حاصل وكده.. و كويس انو عملوهم في حته واحده عشان الواحد ما يتمشور في الفاضي كمان ..ولما تصل تلاقي الصفوف الطويله و لازم يكون في بتاع هدف عامل فيها بنظم الناس مع انو من غيرو احسن.
لو سمحت يا استاذ ، ده صف المويه ولا الكهربا !!؟
والله ما عارف ..انا واقف لي صاحبي مشى يشتري عيش وجاي
طيب ..يا شاب عليك الله ده صف شنو !؟
صف بنزين ! يعني حيكون صف شنو يعني !!؟
مالك زهجان هسي ..قصدي مويه ولا كهربا !!؟
ما تقول كده طيب !..ده كلو سوا. ..
مويه وكهربا مش !!؟
– ايوه يا عمنا ..وحتما كبير يكون عندهم تحويل رصيد كمان لو داير ..
وبعد مرمطه في الصف و شكلتين تلاته مع الزول الخاتي طوبه ووحده مع بتاع الهدف الدخل قريبو في اول الصف ! و زي ساعه كده راجين الموظف عشان قاعد يفطر …اخيراً وصلت الشباك ..(دي دايره كرامه والله )
– السلام عليكم ..
– وعليكم السلام ياخ ..حرك سريع الصف ده طويل ورانا حاجات تانيه غيركم
يازول ما تقول بسم الله مالك !؟ انا سلمت عليك اصلو ولا اديتك كف ! عامل موضوع وجوطه ساي ! بعدين عندك حاجات تانية ولا ماعندك انا دخلي شنو !؟ بعدين ده شغلك يعني و وبعدين.
– يا عمك ..! ما تدينا خطبه عليك الله ياخ ..جيب قروشك خلينا نخلص ..
– هاك ياخ ..اها خلصنا ..
– كهربا ولا مويه !!؟
– كهربا ومويه ..
– طيب ما كان تفرز القروش الوقت الواقف فيهو ده بدل النقه بتاعتك دي
– لا ..دي قروش الكهربا بس
– قول كده ..خليت المويه يعني ..!؟
– لا ..بس بعد ما تخلص دي اول .،
– اللهم طولك ياروح ..اها دي خلصت ،حرك جيب حق المويه !
– داير بي عشرين الف ..
– بي الجديد ولا القديم !!؟
– بي القديم ..عشرين جنيه يعني ..!
– طيب ما تقول كده من الاول ويهمس بي صوت واطي ..هسي دي شطيف ساي بتشطفك !!؟
– نعم !!!؟..قلت شنو !!!؟؟؟
– ولا حاجه ..هاك اتفكفك ..
– اتفكفك !!؟ ياخ انا جيتك في بيتكم ولا شاحدك ما بي حقي !!؟
– ياخ دقيقه حقك شنو !!؟ مشتري كهربا بي عشره جنيه !!؟ دي ولا حق الورق والحبر الطابعينو فيها !!؟ ومويه بي عشرين دي ولا تعمل ليك كبايتين شاي ساي !!؟امشي ياخ خلينا نشوف البعديك
يا بتاع الهدف تعال سوق الزول ده من هنا ، اشترى وواقف يضيع في زمنا.
وتتواصل المرمطه والاهانات كل مره تمشي تشتري ..وتتواصل القطوعات.
طيب الزول لو بطل يشتري مش احسن !؟ اذا كده كده مافي لا مويه لا كهربا ،..ولا نحنا بنحب البهدله !!؟ ح نسلم للوضع ده لمتين !؟؟
اللخبطه دي حدها وييييييييييييين !!؟
ما بعيد يعملو النفايات في المستشفيات ..ولا المدرسه في قسم الشرطه !! ولا سوق الخضار في المطار
ما لتخ سااااااي الشغلانه

الراي العام
الرازي سليمان

شارك الموضوع :

5 التعليقات

إنتقل إلى نموذج التعليقات

      1. 1

        احذروا من التماس كهربائي خطير!

        الرد
      2. 2

        [SIZE=4]عادي مافيها حاجة وكمان توفر زمن[/SIZE]

        الرد
      3. 3

        [SIZE=3]المشكلة يا شاطر على كل عداد كهرباء تدفع فاتورة موية يعني لو في بيت واحد في عدادين كهرباء تدفع فاتورتين موية ولو في عمارة طابقين وفيها اربعة شقق بدل ما كنت بتدفع فاتورة موية وحدة تاني ح تدفع على كل شقة فاتورة وياهو دا السودان ,, الناس تموت مامشكلة والمواطن يهاجر بعيد ما مشكلة تدفع ضرائب وخدمات ونفيات وعبور طريق ما مشكلة المشكلة المشكلة انك تلقى خدمات مقابل ما تدفع[/SIZE]

        الرد
      4. 4

        [الفكرة حلوة وانا شفت في الدول (المتقدمة ) مراكز الدفع واحدة كهرباء وموية وانترنت وتلفون والافضل من كدا دفعها بالبطاقة الممغنطة بس يسحب من رصيدك بعد ان تقوم بادخال الرقم الخاص بالفاتورة ويظهر الاسم والعنوان وهذا شئ جميل ومريح عشان لاتلاقي هدف ولا زغلول .
        لكن بالمقابل تعال شوف الخدمات والمتعة الجد( اذا ) ارادو قطع الموية او الكهرباء (لاعمال الصيانة ) موش لي عطل ولا خراب شوف البحصل الاعلان قبل اسبوع انو مثلا الموية سوف تقطع يوم كدا من الساعة كدا الي كدا ونعتذر لكم عن القطع نسبة لاعمال الصيانة للافضل ومتعكم الله بالصحة والعافية والملاحظة انو الموية او الكهرباء ترجع قبل ان ينتهي الوقت المحدد لانهم واضعين في حساباتهم زمن اضافي احتياطيا كي لا يحرجو نفسهم ويطلعو كذابين فياسبحان الله .]

        الرد
      5. 5

        هذه مصيبة السودان .. ان يكتب صحفي عائش في عالم اخر ، ولا يعرف ولا يريد ان يطوّر نفسه بما يحدث في العالم ..
        بالله عليك انت عائش وين الان اصبح في كل العالم ان تدفع مدفعات الكهرباء والماء والتلفون والانترنت والضرائب حتى في مان واحد ومن ماكينة الصراف , وعن طريق التلفون وانت في بيتك وعن طريق الانتنرنت من اي مكان في العالم .. ويا اخي بطل هبل وفضح لنفسك بالتخلف التقني ، وايه يعني احد مشى مشوار لشركة الكهرباء وقضى كل اموره ان شاء اللهيدفع فطور الولد في المدرسة ، الغرابة ايه .. يا اخي دا طلعت متخلف بشكل وكمان جايب امثال ومتنفخ ومتشطح يعني الولد اثار قضية .. يا اخي اكتب عن الموية المافية ، اكتب عن غلاء الكهرباء فقصة ندفع وما ندفع ووين محل ما ندفع دي قضية عشان تكتب فيها ..
        صحي صحفيين عقيمين ومتخلفين حضاريا وتقنيا ..
        وبعدينا اتحدى سوداني يقضي حاجة من اي مصلحة ولو مجان وما ينقنق مايها طبيعتنا .. وكل واحد عايز يعمل صحوبية مع الموظف وكانه بيرفه

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *

    This site uses Akismet to reduce spam. Learn how your comment data is processed.