مقالات متنوعة

شنباوي في السجن!! «4»


شنباوي في السجن!! «4»
ودخل شنباوي إلى السجن فسأله المأمور وكان برتبة لواء: تهمتك شنو يا مسجون؟؟
فردَّ شنباوي ببرود: ما عندي تهمة!!
فقال المأمور بغضب: يعني جابوك نزهة هنا لعلمك دا من أخطر السجون وحتسمع عنِّي الكثير عشان كدا خليك مُنضبط ورُد على سؤالي !!
فردَّ شنباوي: ادينت من واحد خمسة ملايين عملت بيها عملية مرارة لزوجتي وكتبت ليهو شيكات بدون رصيد قام قدَّمها للنيابة وجابوني هنا!!
فقال المأمور: إذن أتوقَّع إنَّك تكون سجين هادىء ومنضبط، لأنَّك بعيد عن جرائم الشرف والمخدرات والقتل!!
فردَّ شنباوي ببرود: إن شاء اللَّه سيادتك كل شيء حيكون تمام.. أوعدك إنِّي أكون في حالي إلا إذا…
فسأله المأمور بحزم: إلا إذا شنو؟
فردَّ شنباوي ببرود: أبداً مافي حاجة!!
ودخل شنباوي إلى العنبر فوجد خمسة من المساجين تبدو على ملامحهم القسوة والفتونَة.. فنظروا إليه باستخفاف وقال أحدهم وكان يجلس في المنتصف وحوله المساجين فقال لشنباوي بقسوة: تعال يا ولد وقبِّل اليد دي واحلف بقسمنا إنَّك تخدمني طيلة أيام سجنك يا غبي!!
فردَّ شنباوي بغضب: غبي إنت والمعاك وإنت الحتخدمني طول فترة سجني يا متخلِّف والشبهك ما موجود إلا في الحمير!!
فغضب المسجون غضباً شديداً وقال بغضب: أنا أبو ساطور الكل بعمل لي حساب تجي إنت يا عود القصب وتتحدَّاني الليلة حأعمل منك كفتة!!
فضحك شنباوي وقال باستخفاف: ما تخلي معاها كباب بالمرة عشان القعدة تحلى!!
وهنا غضب أبو ساطور غضباً شديداً وأزاح الأربعة رجال ثم اندفع نحو شنباوي الذي انتظره حتى وصله ثم أمسك به من رأسه وأخذ يضربه على الحائط بشدة فنزف أبو ساطور بغزارة ولكن شنباوي أمسك به من قميصه وجذبه للخلف وضربه بقبضة يده اليمنى وبقية المساجين ينظرون إليه في خوف وهلع.. ووقع أبو ساطور على الأرض فأخذ أحد المساجين يصيح من فتحة الباب: يا جنابو يا جنابو.. أبو ساطور غرقان في دمو وحيموت.. الحقو بالإسعاف بسرعة!!
وحضر العسكري وفتح الباب وأُصيب بدهشة شديدة فقال بحيرة: معقول أبو ساطور مضروب بعلقة سخنة زي دي وبين الحياة والموت.. دا منو العمل كدا.. اتكلموا يا مساجين بسرعة.. اتكلموا!!
فنظر المساجين الأربعة إلى شنباوي بخوف شديد وقال أحدهم.. يا جنابو أبو ساطور جاهو صداع شديد وأخذ يضرب راسو في الحيطة من الألم.. دا كل الحصل!!
فنظر العسكري إلى شنباوي وقال له: تعال ورايا وطلب من زملائه نقل أبو ساطور للمستشفى ودخل إلى مكتب المأمور وحكى له ما حصل.. فنظر المأمور بحيرة إلى شنباوي وقال: سبحان اللَّه يضع سرو في أضعف خلقو!!
فقال شنباوي بصوت خافت: أضعف خلقو إنت لسَّه شفت حاجة يا جنابو اصبر علي شويَّة!!

يوميات ساخرة – الوطن
[email]samird4d@hotmail.com[/email]