كوش نيوز .. أخبار السودان بين يديك

سفاح الدروشاب


شارك الموضوع :

سفاح الدروشاب


طبعا ً الفار الملعون ده كان مكرهنا عيشتنا ليهو شهر ونص ,, وكان قبضتو ليكم فار أوع يستنكحكم بي نظرتو البريئة زي ماعمل معاي ,, ده ماخلى حاجة في البيت ما قرمها ,, العيشة المطرفة , الموزة البي الجنبة , الصابونة ــ حكمة الله ــ الفار التافه ده بيخلى صابونة الغسيل ويقرم لوكس السعودية الرسلها لي واحد من الشباب المشو مع…أمواج الخليج ــ كمان بيتشهى الوغد ,, ياخ ده أكل سماعة الموبايل , عليكم الله ده مافار حمار ,,

هسي دي فيها شنو يتاكل كلها بلاستيك وسلوك ,, بس تقولو شنو ؟ حسادة منو بس التقول فار شايقــ…
المهم ماعلينا ,, صحيت الليلة من الصباح لقيتو ليك في الشرك قمت جبت ليك الكرسي وقعدت قصادو وبقيت أنبزو ليك : يا تافه ياجزمة أنا تاكل سماعتي يادني يا عواليق أها إن شا الله تكون نفعتك ,, والله الليلة أطلعها منك سلكة سلكة يا وهم ,, بعد شوية الحاج جا يشوف ده منو البتكلم معاهو من صباح الرحمن وكمان بنبز فيهو ,, قام عاين لقاهو الفار ,, أنا لمن خجلت وقلت هسي الحاج ده يقول علي شنو ؟ آخر عمرو الود ينبز ليهو فار ,, فجأة كده لقيت ليك عمك زاااتو جر كرسيهو وقال لي الفار : ودددددددد الكلب , المعفن ده عدمني الورقة و القلم ,, هسي ديل شايلهم مالك؟ ,, داير تمتحن القيد الصحفي ؟ ,, بعد كده ارتحت نفسيا ً وقعدنا الاتنين نردح في الفار ده لامن فهم حاجة .
المرة جات قالت لي خلاص الفار ده أكتلو ولا طيرو من هنا ,, قمت قلت للفار أمانة ماوقع راجل
الفار ود اللزينة عاين لي في ود عيني جووووة ,, تتخيلو الفار ده حنني ,, آآي والله حنني ,, والله غلبني أكتلو لاكين ماعرفت أعمل ليهو شنو ( طبعا ً قلت ليها كتلتو عشان شكلي مايبقى جبان قدامها ــ الكويس إنها مابتخش الفيسبوك عشان تعرف المعلومة دي خخخخخخخخخ ) .
قلت أمشي أجدعو في حتة بعيدة من البيت لاكين اتذكرت قصة صاحبنا الكرهتو الكديسة وقال يتخارج منها قام دخلها في شوال ومشى جدعها ليك في الحلة الجنبهم لمن جا البيت لقاها ليك قاااعدة وعاينت ليهو من فوق لي تحت وقالت ليهو : نياااو وطلعت راس البيت ,, تاني يوم طفشها ليك في الحلة البعد حلتهم بي تلاتة حلال كده و برضو جا راجع البيت لقاها قاعدة وبقى يكورك لمرتو : عايني ليها كمان بتطلع لي في لسانها الحقيرة ,, قالت ليهو : ياراجل انت جنيت الكديسة أصلها بتنكرش كده ,, قال ليها : علي اليمين دي قاصداني وقبضها دخلها ليك في الشوال وقال كده مرق على الخلا الورا الثورة الحارة الخمسمية وتسعين ويخش بي شارع ويمرق بي شارع ويطلع بي جبل وينزل بي وادي وقام مرقها من الشوال وقال ليها : أها أرجعي بعد ده ,, بعد تلاتة ساعات كده قام ضرب للمرة وقال ليها : اسمعي، الكديسة دي جات؟ قالت ليهو : آآآي جات ,, قال ليها : خلاس كدي اديني ليها خليها توصف لي البيت بي وين عشان انا رحتا …


الكاتب : احمد الفحل

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.