• ×

01:22 مساءً , الثلاثاء 27 يناير 2015

قائمة

بسبب الرقيص : عريس يرمي يمين الطلاق علي عروسته في ليلة الزفاف  

زيادة حجم الخط مسح إنقاص حجم الخط
 في حادثة غريبة شهدتها احدي الولايات السودانية رمي عريس يمين الطلاق علي عروسته في يوم الزفاف .. وتعود التفاصيل الي انه وبعد إنتهاء مراسم العرس وفي يوم الصبحية أرادت العروس ان ترقص ولكن العريس كان رافضاً وقامت بعض النسوة باداء دور الأجاويد لجعل العروس ترقص ووافق العريس وما اعتلت العروس المنصة الا واعتلت الهاتافات والصفافير فالعروس كانت ترتدي ملابس شبه عارية وعندها غضب العريس وأمر العروس بالنزول ولكن والدتها رفضت إلا بعد إنتهاء الرقيص ،وبحسب صحيفة الدار حدث شد وجذب بين العريس وام العروس وبعدها رمي العريس يمين الطلاق علي زوجته وبعد تدخل الأجاويد قام بإرجاعها بشرط أن لا تتدخل والدتها في حياتهما ابداً.
 38  6  16.6K

التعليقات ( 38 )

الترتيب بـ
الأحدث
الأقدم
الملائم
  • #1
    12-29-2008 10:52 صباحًا مي :
    لي يعني بعمل العريس كدا ماالعرس مرة واحده في الحياة خلي العروس تفرح بي ليلتها بعدين هي بترقص قدام الرجل ماكلهم حريم ونسوان وبنات والعروس تعبت في تعليم الرقيص ودفع مال كتير عشان تتعلم يجي يقول ليها ما ترقصي والله زول معقد بعدين من اولها مشاكل مع النسية كدا الحياة حتكون كلها مشاكل ودي بتها برضو من اولها ماداير النسيبه تتدخل في حيتها اها لو حصلت مشكلة حتمشي وين ما حتمشي لي لي بيت ابوها وامها بعدين دا كوم ود كوم تاني هي العروس اكيد حتكون اتقفت مع العريس قي قصة الرقيص تاني يقول مارترقص
    بعدين احلا شئ في العرس ياهو رقيص العروس دا
    • #1 - 1
      12-29-2008 11:39 صباحًا tarig :
      يا مى الخبر قال اعتلت الهتافات والصافافير ، البصفرو دى نسوان بروضو؟
      العريس ليهو حق
    • #1 - 2
      12-29-2008 11:57 صباحًا الزعيم :
      إتقي الله دة ما كلام بتقال عشان خسرت قروش تضيع آخرته لو كانت آخر عروس انا مؤيد انو يخليها (اتقوا النار ولو بشق تمرة)
      وربنا يهدي
    • #1 - 3
      12-29-2008 12:04 مساءً ود أب سبح :
      أخاف أنك تكوني ما متعلمة يا أخت مي حتى تقولي هذا الكلام فلو كنتي غير متعلمة فهذه مصيبة وإن كنتي متعلمة فالمصيبة أعظم .. نعم لفرحة الزواج بش مش بهذا الأسلوب وهذا التعري وهذا الصفير ولا تنسي بأننا في الشرقيين سودانيين ولا نرضى ذلك أتمنى لكي التوفيق
  • #2
    12-29-2008 11:10 صباحًا ناصح :
    الاخت صاحبت التعليق (مي) كل عام وانتي والجميع بخير بمناسبة العام الهجري الجديد
    الفرحة مطلوبة في يوم الزواج ولاكن بصورة اكثر تعقل فلا يمكن ان تظهر العروس جسدها حتى ولو لا يوجد رجل واحد وذلك لعدة اسباب اهمها الحسد وثانيها التصوير بالجوال او اي شي لا يمكن رويته في هذه الايام ادعو لكي ولكل بنات بلدنا بالستر وربنا يكملهم كلهم بعقلهم
  • #3
    12-29-2008 11:12 صباحًا ابو محمد :
    الناس فى شنو والحسانية فى شنو ، خلونا نخلص من رقصة اوكامبو ،بعدين شوفو المواضيع دى --
  • #4
    12-29-2008 11:18 صباحًا wwww :
    مبرووووووووووووووووك شغلو نضيف بلا عرس بلا كلام فاضي ... وماتقولي لي ماكلهم بنات البنات ديل ماعندهم موبايلات بتصور اشان بكره القي صور مرتو في النت والموبايلات ...

    دا كلااااااااااااااااام صح
  • #5
    12-29-2008 11:20 صباحًا أسامة ساتي :
    يا مي بقول ليك لابسة ملابس شبه عارية فيما علا صفير الحضور يعني الدعوى كانت مفتوحة للرجال !!!! وبعدين أنصحك (بعدما تلقي ليك راجل) ما تعملي كذا لأنه عيب
  • #6
    12-29-2008 11:40 صباحًا bassem :
    الدين بقى عندك عقد يا صاحبة التعليق الاول؟ اصلا شئ جايبنا ورا غير كلام الحريم البلا طعم ده ما فى
  • #7
    12-29-2008 11:54 صباحًا ابو محمد :
    عافي منك والله

    وانت يامي تفرح علي حساب كشف جسدها؟؟؟

    دي الفلهمة بتاعتكم

    الله يهديك
  • #8
    12-29-2008 11:59 صباحًا الجاغريو :
    الله اعلم يا اخ ساتي تلقا ليها عريس بي حالتا دي..
    الناس بتتكلم في الستره ..
    الله المستعان..
  • #9
    12-29-2008 12:02 مساءً ياسر سعد :
    الله يكملك بي عقلك أختي مي

    نسأل الله لك الهداية
  • #10
    12-29-2008 12:17 مساءً عازف الرومانسية :
    السلام عليكم - انا برد على تعليق مي عايز اسئلك سؤال يا مي انتي بترضي في عرسك او عرس بنتك عندما تقومين بعرض رقيصك وفي ملابس شبه عارية امام كاميرات الجوالات المخبأ عند البنات والنساء المعزومات في المناسبة - وتنتشر في الجوالات وعالم النت هل ترضي بذالك ؟؟؟؟؟؟؟؟؟؟ يامي الزمن اتغير خالص زمان وقبل هذه الامكانيات الحديثة مافي جوالات وكاميرات تصور دون ان يعرف احد ورقيص العروس داخل البيت وفي وسط النساء وعريسها فقط دون توصيل هذا المشهد خارج البيت عادي مافيها حاجه - بس تعالي شوفي حسي ايه الحاصل والعريس ليه حق يغضب ويرفض وهو غير معقد زي ما قلتي انتي حسب فهمك الحكاية حفظ وستر الحال وماتنسي نحن سودانيين مش خواجات ----- حسبيها بالعقل وليس بالمظاهر - الله يهديكم يا بنات الزمن ديل
  • #11
    12-29-2008 12:19 مساءً mohamed nour :
    this is good decision
  • #12
    12-29-2008 01:23 مساءً مهيد :
    بالغتي يا ميو
    حسي البيعرسك منو بطريقتك دي يا ميو
  • #13
    12-29-2008 03:01 مساءً خالد :
    يا ناس صحيفة حكايات

    حكاية رمى يمين الطلاق دي شنو؟؟؟
    تعبير غريب المفروض يكون معناه \"حلف طلاق\"
    ولا رايكم شنو؟
  • #14
    12-29-2008 03:41 مساءً mohmed ahmed abushama :
    ليه مليون حق عريس الهنا دة هو من اصلوا وافق على الرقص ليه قيلها حا ترقص ليه لوحده ولا فاكرها حا ترقص بى عباية قبل كدة ما شاف ولا سمع كل الحكاية ما نظموها وخلوها ترقص امام الملأ (؟) (؟)
  • #15
    12-29-2008 04:47 مساءً ابو وائل :
    يا أهلنا ويا أخواننا ما تخافوا الله ده شنو البتسو فيهو ده ، انتو بتخافوا من كاميرات الموبايلات والفضيحة وما بتخافوا من الله العالم بكل شي .
    رقيص العروس هذا تقليد قديم بعيد عن الاخلاق السودانية الاصيلة والدين ، غايتو نحن في اهلنا ما عندنا مثل هذه الترهات والعادات السيئة ، وحتى انا لما اتزوجت لم اقم بهذه الطقوس جميعها لاننا نبغي بالزواج التقرب لله بالعفة وتكوين الاسرة ، لا نبغي الفساد والافساد وفعل المنكرات .
    على الجميع العمل حسب ما تملية نخوتنا ورجولنتا وسودانيتا واخلاقنا السمحة المستمدة من ديننا الحنيف .
  • #16
    12-29-2008 05:20 مساءً عمر بن الخطاب :
    يا اخوانا لو واحد صور العروس بكاميرة جوال(صور مكان التعري) ممكن تكون فضيحة ولو بعد 20 عاماً
    إِنَّ الَّذِينَ يُحِبُّونَ أَنْ تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ
  • #17
    12-29-2008 09:31 مساءً تحاميد :
    عادة الرقيص هذه من العادات الضاره والهدامه التى يجب محاربتها ومحاصرتها إجتماعياً وسلوكياً وحتى قانونياً لأنها لا تتماشى مع المعتقد ولاتشبه مجتمعنا المحافظ الذى ينظر للمراءة كدرة رقيقة لا سلعة تجارية سهلة التداول ، وهذه العادة من الظواهر الهدامة التى تندرج فى إطار عادات أفراح الزواج وإن كانت لا تغطى كل أرجاء المجتمع السودانى العريض فرغم محدوديتها إلا أنها خطرة ربما مستقبلاً ستساهم فى خراب الكثير من البيوت الجديدة خاصة والأن هنالك تكنلوجيا رقمية متوفره لدى العامة ممثله فى الهواتف الرقمية الحديثة وكمرات الفيديو التى تحمل فى الجيب كالهواتف المحمولة والتى يمكنها التصوير وبدقة وحتى الدبلجة الفورية للجسم الملتقط وكل ذلك دون أن يعلمه سوى حاملها ، هذا الشاب الذى نبارك له من القلب زواجه الميمون إنه شاب مدرك تماماً لروح العصر وربما أيضاً ذو إلتزام دينى وأخلاقى لذلك قدم مبادئه على مجاملة النسيبة الجاهله فله منا الإحترام والمباركه ونتمنى له حياة سعيدة فى مشواره الجديد ونسأل الله أن يهدى عروسه ويجعلها من الثابتات 0
  • #18
    12-29-2008 10:24 مساءً nabeel :
    والله يا اخوان موضوع رقيص العروس من العادات المتخلفه هل سمعتم انو الصحابيات كانو برقصو في عرسم دي الواحده ما كانت بتقدر ترفع عينا في عين راجلا من شدة الحياء .... لكن الزمن دا البت ما عندها اي حياء وبترد وبتناقش راجلا كمان (نسوان الزمن العجيب) وانتي يا اخت مي انا بس بدعو انو ربنا ينور بصيرتك عشان الجهل دا مصيبه والله
  • #19
    12-30-2008 02:38 صباحًا جولى :
    بنات ما فاهمات خالص بس نفسى اعرف البنت بتستفيد شنو وهى بترقص
  • #20
    12-30-2008 08:21 صباحًا ودالشايقي :
    ياخوانا انا مستغرب في الحاصل ده ...بس حلاص بقت علي رقيص العروس يعني متشوفو البنات المطلوقات في شوارع الحرطوم يجن جاريات باشارة واحدة ...شوفو المحدرات البقت في كل شارع شوفو البنات وشراب الشيشة بشراهة ..امشو مصر وماليزيا وشوفو فلل وعمارات اععضاء حكومتكم...تجي تقولي رقيص عروس
  • #21
    12-30-2008 09:23 صباحًا mukh mafi :
    والله البنات والشباب او الرجال الذين يؤيدون هذن العادة اقول عليهم متخلفين ومتخلفين بشهادة ايه يعني رقيص عروس وليه العروس ترقص للناس هو اتزوجها لتفسه ولا للناس ؟ بعدين انتوا الدين وين وديتوه خلاص نسيتوا الحلال والحرام . اذا واحدة رقصت بملابس تكاد ترى ملابسها الداخلية امام جمع من البنات واصحاب العريس ايه المانع بعدين تكون ماشة في البيت امام الجميع بقميص النوم الشفاف الذي يرى ما تحته .
    وهل تصدقون اني تزوجت ولم اقوم حتى بوضع الحناء ولم يسمع صوت زغاريد او غناء كما اني لم اعمل صبحية ولن يدخل الى مكان النساء غير ناس البيت والاقارب من العائلة ؟ فماذا نقصني .. لا شيء بل كنت احترم اشد الاحترام من النساء والرجال وكانت النساء يتعجبن من شخص فرض رغبته على الجميع واثبت قوة الشخصية للجميع .
    ومع هذا وذاك لم تتضايق زوجتي بل جاء ذلك وفق رغبتها وعدم تكشفها اما حتى النساء .
    يقولون ان هناك صحوة دينية طيب ماذا يعني هذا الذي تفعلونه يا اهل السودان
    اتقوا الله في محارمكم .. والله الراجل بفعلته دي اكتسب حاجات كثيرة منها عدم ترك اي فرصة للام تتدخل في حياتهم تخيلوا لو انها نجحت في في فرض رأيها وسطوتها هل ستترك هذا التصرف كلا فانها سوف تفعلها في كل الحالات الاخرى وتخرب بيتهم ..
    ثانيا والاهم عرفت الزوجة مدى غيرة زوجها عليها وعدم رغبته ان يرى منها ماهو محرم للغير ..
    لاكنه اخطأ في ان يضع الام والعروس بين خيارين قبل ان يرمي يمين طلاقه هذه ، اما الرقص او الفراق .. وهنا اقول للاخ الذي يتساءل عن رمي اليمين اقول هذا التعبير لا غبار عليه فحتى العلماء يقولون وقع الطلاق ورمى برأيه ورمى هنا معناها اظهرها وهي ليست بيمين لان اليمين هي اللف بالله فقط .
  • #22
    12-30-2008 10:01 صباحًا ابو منذر :
    ياسر سعد الجعلى ولا اسم على اسم وبعدين العريس كان يرجع بعد يومين تلاته
  • #23
    12-30-2008 07:50 مساءً ريما :
    كل زول حر في تصرفاتو .... والله يهدي الجميع
  • #24
    12-31-2008 01:39 مساءً أسامة ساتي :
    لأ يا أخت ريما للحرية حدود
    في حكاية أردت أن أشارك فيها الأخوان وآمل أن لا يكون فيها ما يخدش الحياء ... كان في عرس في حلتنا وطبعاً العروس رقصت وفنجطت وبعدين وقعت (يعني جابت قون) ولكن للأسف في وقعتها بانت ملابسها الداخلية واضحة وعرف جميع الحاضرون لونها وبعد الزواج بفترة طويلة كلما مرت العروس في الشاريع ترى الغمزات والهمزات واللمزات والضحكات بل وأحياناً العبارات من بتاعين الشمار وساكنو أركان الشوارع تطارد هذه البنت حتى زوجها لم يسلم مما سبب لهم تعب وقلق شديد حتى اختفوا من الحارة وما عادوا يحضرون إلا متخفين ...
    شفتي يا أخت ريما وأخت مي ليه السترة زينة !!!!!
    وسامحوني ولكم وافر الود والتحية
  • #25
    01-10-2009 09:27 مساءً land :
    رقيص عروس طبعا عادة سودانية و ليست دنيية
    طيب لماذا وافق العريس في الاول مروض يستحمل نتيجة تصروفاته
    و هو عارف الرقيص بكون كيف
    طيب يا جماعة ما شوفت فستان الزفاف بكون كيف كلو عريان
    العريس غلطان من اولها مشاكل يعني كل يوم حايكون في مشكلة و طبعا لا يمكن ان يمنع امها من الحضور الي بيت ابنتها
    ياعريس الهنا ارجي الراجيك مع النسيبة
  • #26
    01-15-2009 05:17 مساءً حمدنا الله العبادى :
    يا اخوانا كدى اسمعوا منى التجربة الشخصية دى

    حضرت عرس فى سنار وكان فيهو رقيص العروس وانا عمرى وقتها 17 سنة -مراهق-
    خلصت الحفلة بى جاى والى اقرب عشش
    طبعا تبت الى الله والحمد لله من يومها ماحضرت شئ زى كدى
    والله لازم ناس النظام العام يمنعوها ولا رايكم شنو
  • #27
    01-16-2009 09:30 صباحًا رقصت شبه عاريه :
    دقس والله لانو امها حتتدخل كلو مره والاجاويد قاعدين
  • #28
    01-16-2009 11:07 صباحًا محمد علي عز الدين :
    و الله يا جماعة خلينا نكون واضحين مع بعض و ما في داعي نلف و ندور كتير اصلا البنت البتقبل تقلع هدوما قدام الرجال و تظهر فخديها و ملابسها الداخلية دي ما بتنفع زوجة لأنها عندها الكشيف عادي و ما شي غريب و الموضوع ما عنده اي علاقة بأنه العريس معقد لأنه كلمة معقد دي هي كلمة بيستغلوها النسوان لإيجاد طريقة لتحليل الحرام و القيام بما يريدون القيام به و الما عاجبو كلامي ده يقلع و يمشي عريان عشان الطبع بيغلب على التطبع
  • #29
    01-18-2009 09:49 مساءً أبوخالد :
    الله يأذي الأجاويد الرجعوها
  • #30
    01-21-2009 12:05 مساءً Dalya :
    بلا رقيص عروس بلا كلام فارغ.
    عادات سودانية مافي ليها داعي تجيب الفقر و المصائب.
    اهل العروس يصرفو ملايين الملايين في فساتين الرقيص و في قسمة
    و النسوان قاعدات يتفرجو في جسم العروس و عريس الهنا واقف جمبها مبسوط.
    ربنا حيسألكم من كل قرش صرفتوه في الفارغة.
  • #31
    01-22-2009 05:27 صباحًا علي الادهم :
    العريس راجل وعند غيرة على عرضة.وكان من المفروض الا يتنازل اول مرة ويحلف قبل ماترقص.باخوانا رقيص العروس مسخرة وحرام أن ترقص أمام الرجال.أرجو ان نشهد نهاية لهذه العادة القبيحة والعريس الشايل القرمصيص خيخة
  • #32
    01-23-2009 07:56 صباحًا hassan :
    لبت المطرطشه دي ماكان تصبر شوية لغاية مايمشوا اوضتهم ولافندقم وبعداك ترقص
    بهدومها ولاعريانه وتقع وتقوم طول الليل مع راجلها حلالها - في مثل مصري شهير
    بيقول اكفي القدره علي فمها تطلع البنت لأمها
  • #33
    01-23-2009 02:14 مساءً حسن عبداللطيف محمود :


    هى عادة ... ولكنها قبيحة جدا ومشينة .... وان كان لا بد منها فليكن الامر والحضور للنساء فقط ....
  • #34
    01-31-2009 11:50 مساءً أنا سوداني أنا :
    قال الله تعالى( إِنَّ الَّذِينَ يُحِبُّونَ أَنْ تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ )).. صدق الله العظيم .
    اللهم حوالينا ولا علينا .
  • #35
    02-21-2009 12:25 مساءً ايمان :
    ربنا يهدي الجميع!!!
  • #36
    02-22-2009 02:40 مساءً MOSAB EZALDEN ALKANZY :
    الله اكبر والله دا كلام صاح رقيص العروس دا تجلف اكثر من انو مظهر تحضر والله والله العيون والسحر بين كل زوجين كان نتاج للكلام المابرضي ربنا وكمان انا متاكد انو الشباب كامو متفقين علي اي حاجه لاكين الاهل مرات بكونو عوارض
  • #37
    02-24-2009 09:12 مساءً ود الشمالية :
    مالكم ومال الاخت مي
    وبعدين تعالي هنا وقولي لي المدارس بتاعة تعليم الرقيص دي وين عشان نمشي نتعلم ومصاريفها كم وياتري بالتقسيط ولا خليها بالنية
  • #38
    03-18-2009 09:00 صباحًا توته :
    مش خلاها ترقص يبقي خلاص يتحمل نتائج الرقيص ده ...مش يعمل بطل وحامي في نص الرقيص ..............
    بعدين الواحد فيهم كانو شاف البت دي وعرف افكارها يوم العرس !!!! ما من زمان
    افكار البنات دي عاجباهم مالهم فجاة الموضوع بيوجعهم