Follow us Youtube Rss Twitter Facebook
قديم 04-24-2006, 06:42 PM   #1
علاء قرافي
عضو جيّد
 
تاريخ التسجيل: Jul 2005
الإقامة: ارض المليون ميل
المشاركات: 985
ركن ابداعات الطنبور

الاخوة الاعضاء السلام عليكم ورحمة الله تعالى وبركاته
هذا البوست سوف يكون مخصص للشعر الشايقى او اغني الطنبور .. قبل وقت ليس ببعيد كان يوجد بوست مشابهه لهذا ولاكن للأسف لم يستمر طويلاً ولكن ارجو من الاخوه الاعضاء كل من يملك قصيدة ان يكتبها لنا هنا ويسرد لنا حكايتها
سوف ابدأ بالاغنية المشهورة لسان الحال
للشاعر حاتم حسن الدابى

معذره لو معاك منى الكلام حره
معليش الخطاب كاتباهو مطره
حرام والله مننا انت تتبره
وخمسه سنين تفوت وتجى فيها فد مره
وراك انا كم شقيت وعشت فى مره
وبقيت مع الصغار الهوم للعيون قره
بخاف الغرق الاصلو لا دره
وقالو ادب الصغار والعقده من خدره
حليلى انا الزمن ضى خاطرى مانفره
وخمسه سنين غياب مابتحملن حره
انا الحاضن العذاب وامالى محتضره
وانت الفى النعيم ماخات حساب بكره
مسكين التقول فى الاغتراب ستره
وتتناسى القروش فى يوم تكون ضره
حليل زمنك وكت عايشنا بالاجره
ياريت لا عرفت ولا مرق بره
الكاتمه فى جواى كتير متملكه الجوف والعصب
ماكت دايره اقولو ليك لكن لسان الحال غلب
مابنسى يوم ودعتنا وسافرت فى غرة رجب
خليت وراك الدار حزين تتباكى والدمع انسكب
اعذرنى والله العظيم لو ما الضروره انا ماكتب
وانا خايفة من بعدك يكون الضاع هو ضعف المكتسب
اليومو داك ناس البلد هنونى شايقية وعرب
قالو لى مبروك خير وجاك يكتب سلامتو اللى اغترب
قالو لى دووب نجم السعد طلاكى من بعد احتجب
يادوب بالك استريح وتنسى العذابات والتعب
فضلت احسب فى الشهور قاعدالى فى نيران لهب
صابره وحريصه على الولاد لايبقو للريح فى المهب
سديتا خانتك من مشيت قايمه بى واجبى كام واب
والاسره يضنيها المسير تتهاوى لو مافيها رب
والله مابنكر جميلك لينا برضو ثناك وجب
موكب هداياك مانقطع كان ستره فى الزمن الصعب
لابسين وماكلين والنعيم كايلنا فى يوم ما نضب
وعايشين معيشة المترفين طولنا والطبع اتخرب
حامدنو كان قلت الاكل والله للتين والعنب
اما الجناين شيله كاب وافرى الفواكه والرطب
البيت مفروش بالحرير ومليانه ايدى باالدهب
لكن خساره على محل عاش سيدو خمسه سنين عذاب
الشئ المهم ماقلت ليك ليه انت ماظنيت حسب
كبرو الصغيرونين خلاص خايفالن الطبع الكعب
وصلوها مرحلة الخطر والامن مازال مستتب
وانا كت قادراهم زمان لكن بعد كبرو اتغلب
حصلنى قبل الجد يفوت دوبنهن فوق العتب
قبال نحصد الخير ندم ولابيجدى كان لمت او عتب
خايفالن الطيش فى الدروس ومابرضى لو واحد رسب
خوفى المتعبنى الكبير بعدين يمرقو بلا ادب
وريتك الحاصل على لا فيه ثوره ولا غضب
شان الحديث مايبقى نى والواحة يكتنفا الجدب
انا قلبى مازال لسه حى ونجمو الملهلج ماغرب
اخر كلامى تردو لى لا ابقى بكره انا السبب
علاء قرافي غير متصل   رد مع اقتباس
قديم 04-24-2006, 06:44 PM   #2
علاء قرافي
عضو جيّد
 
تاريخ التسجيل: Jul 2005
الإقامة: ارض المليون ميل
المشاركات: 985
رد لسان الحال
كلمات على عبد الماجد
غناء جعفر السقيد


انا ما كنت داير الاغتراب لكنى مجبور ابتعد
حسيتبو فى الغمز الحراب وفى أنة الصبر النفد
ارجع واقول انت السبب قولتيها لى يومى العقد
ما بترضى بى عيشتى الوسط دايراها فوق عيشة الرغد

وقاريهو فى عيون الصغار وطلباتهم الماليها حد
حسيتو فى عينك سؤال احترت ما لاقيلو رد
نظراتك الحاده النبال سيطان بتلهب فى الجسد
وانا كنت صابر زى بلال ردى ليها احد احد

الكاتمو فى جواى كتير من حرقتو الجوف اتهرد
ما كنت قاصد اقولو ليك لكن لسان الحال سرد
ما بنسي يوم ودعتكم وبى حسره غادرت البلد
ختيت على جرح الفؤاد فرق البنيات والولد

روحتى تفارق للصغار والوجعه فرقا فى المهد
سكن القليب اهات حسار حسيتو جواى وابتعد
كان انت شوقك لى بحر كيفن انا المكتول كمد
خليتلك الروح والجسد وسافرت بى باقى الجسد

عارفك حريصه على العيال فوقك بعد الله اعتمد
فى الحاره تسويلك رجال وللمايله والمحتاج سند
اتغشن القالن وراى هلت لى نجيمات السعد
ما اتغربن وضاقن معاى مر عيشة الهم والنكد

ولو عنى كررتى السؤال انا بينى بين الفرحه سد
شقيت غايتو على حال يعلمبو الفرد الصمد
عزابى فى قاطوع صغير فى ضيقو زى ود الاحد
وفى السوق صباحات الله خير حايم ازازى بلا غرد
الزىِِِِِِ بيهو الليل يطول يتقلى فوق جمرو الوتد

اتوقعى البجى يقولو ليك فى الغربه محمود اتفقد
البي دا ما بغبالو زول يحكيهو طرفى الما غمد
سنتين افتش فى كفيل لحالى فد زول ما نشد
فى التالته رب العزه قال حامدنو حلال العقد

مكتب ولا كان فى الخيال فى الفاره الدوار قعد
عربيه والراتب كبير ورابط لى خرزة من الحسد
بليت عروق المرير عزه ورفاهيه وسعد
لكنى يا حظى التعيس تميت لى شهرين واترفد
وقالو الوظيفة اتعممت ومحجوزة لى اهل البلد

شوفى الضرايب فوقى كم كان جيت افكر فى البلد
وزى الكلام دا يذيدنى هم ويرفع لى افراز الغدد
قوليها لا تزازى الحروف كان فى غيابى الشوق برد
البى دا كلو من الظروف والله ما لى فيها يد
الببقى فى نفس الحريف يخدنو من فك الاسد
بى ضحكة بى اطواق جحيم بى دمعه يتبلابا خد

انا شان رضاك ارحل بعيد لى غربه لى دمعه وسهد
وانا فيها ساهى البال شريد افكارى فيكم وفى البلد
سامحينى لا تابعى الظنون ما زلنا بيناتنا الوعد
والغربه من اجلك تهون وطعم العذاب يصبح شهد
جوابك الظاهر وداد وكتباهو بى دمع الحرد
بجيك ردى فى نفس الميعاد ونتلاقا طيارت الاحد
علاء قرافي غير متصل   رد مع اقتباس
قديم 04-25-2006, 10:36 AM   #3
علاء قرافي
عضو جيّد
 
تاريخ التسجيل: Jul 2005
الإقامة: ارض المليون ميل
المشاركات: 985


ما كــنــتـــا قـايــــــل فـــى غــرامــــك لـى شريك
لـكــن عــرفــــــــتـــــا وتـــــــانى مـــا برجع إليك
والله كـل مــا اتـذكــرك اتـذكـــر إنو معـاى شريك
زي ما قـلـيـبـى اشـتــهـــاك تـلـقاهو ايضا يشتهيك
قولى لى ذنـبـي آيــه مـا الـنــاس جميع مفتونه بيك
طماعه يا ست الجـمـال كـيـفـن تطيرى مع جريك
ماكل غرام بيظل غــرام ماكـل بـريــق سن إبتسام
ما كُل خـطــوة إلـى الأمـام أحـيـانـا بيتعسر مشيك
قولى لى كيف قلبك سـمـح يـخـدع قـليبى الإنشرح
ودرتى زول كايـس فـرح عيشتيهوا فى دنيا الترح
مـسـتــنـى كـان تـبـقـيلوا غيمه تظللى من حراً لفح
لكـن بـقـيـتـيـلـو الهـجـيـر فى وادى منو الغيم نزح
لو قيس سمع ماكان ندم كان يرثى لى حالى ويحن
كان يبكى زين دمعاتوا تهـطل فوق عيونا ويغسلن
ما بـيــرضـى كــان الــغــرام يصبح سلع ونتبادلن
رغم الحصل قلبى الأمين لا راضى لنفسو الخداع
لا راضـى لـى غـيــــروا الأنين
واحساسوا بيك يا ست الــجـمال
ما بيرضى غيروا يعيـش حزين
انا اصـلــى مــن ريـــــدك قنعتا
وآخــر وصــيـــه بـقــــولـه ليك
ابــقــى عــشـــرة عـلى البريدك
لا تـخـيــبـــى ابــداً ظنـــوا فيك
ابــقـــى زى لـيـــلـه وبـثــيــنـه الغرور لا يعتريك
قــالــوا للــريــد عـداوه مـن عـداوتـو بخاف عليك
علاء قرافي غير متصل   رد مع اقتباس
قديم 04-25-2006, 10:38 AM   #4
علاء قرافي
عضو جيّد
 
تاريخ التسجيل: Jul 2005
الإقامة: ارض المليون ميل
المشاركات: 985
دا ما القلب البجرسو شوق
***********************
دا ما القلب البجرسو شوق ** اذا ما اختار سميرو بعاد
ولا القلب التبكي حبيبه ** لو غابت عن الميعاد
قلب بالصح دا ما القلب البجرسو شوق
************
قلب من قام صحاري الواحد كان يشقهن بالنوق
محكوم بسياج العفه فد يوم ما سرح مطلوق
شيال للتقيل مانحا لو ساق العمر ارقوق
ندي ورياد كريم واجواد الا من الضعف معتوق
****************
دا قلبي نيل وكلو جمال ومابيحقد علي مخلوق
ومهما جرحو المحبوب وخلا حشاهو كلو شقوق
كتوم من قام يضاحك غيرو صابر والجرح مفتوق
عليه اب يضحكوا الشمات وتجري دموعو روق فوق روق
*******************
حكيم يعرف متين يرتاح وينسي شقاهو يصفي يروق
ومتين يعكر يكون فيضان ويبقي علي الزرع خازوق
فشكرا ياحبيب الروح عليه روادك المطبوق
انا ان حبيت بقدس زولي وان فارق بفوت بي زوق
*****************
الا بيبكي لما يشوف مابين الخلق في خلوق
ماخده طباعا من الغابه شايلي ضميرا ماشي السوق
وتاني بيبكي لما يشوف مابين الحقوق في حقوق
نزلت من سماها زلال وطارت من تحت لفوق
*****************
وداعا وما بقول بنساك وداعا القلب مخنوق
وداعا وفي الختام دنياك مناي وراي تسوي القوق
تمدلك السعاده ايدينا لفردوسا ليك تسوق
وسيبني اعيش قسمتي وراك باسم والكبد محروق
علاء قرافي غير متصل   رد مع اقتباس
قديم 04-25-2006, 10:40 AM   #5
علاء قرافي
عضو جيّد
 
تاريخ التسجيل: Jul 2005
الإقامة: ارض المليون ميل
المشاركات: 985


--------------------------------------------------------------------------------

الشاعر خليفة عمر, الشالك حسن
الشالك حسن سافرتي خليتينا نحنا برانا
فارقتي الجزيرة الخضراء ليه يا حلوة ما طارنا
يوم اللوري قام من بوني في ساعاتو خشا البنا
غنيت وما نفعني غناي يا رب هالزويل بطرانا
يا صالح الجبل تلحقني ترجع لديارا فلانا
ترجع والقا عاد الرايقة تتونس معا جيرانا
تومتي حروفا زي طنبوري كل سلكاية عاملة الحانا
من نارك لبس يا حلوة فصل لي قميص وغبانة
يا صالح حليلو انا زولي فات بي فوقنا تب ما غشانا
بنتلاقا يوم في حفلة لو كان الاله خلانا
ما تحمل شمس دي السمحة ديما من القمر تعبانا
وديما بهاتي ببكي عليك من اعماقي يا نديانا
زي قصبة جرفنا اللينة تتمايل تحاكي البانا
شوف يا خليفة كيفن خدرت وديانا
يوم حنا الحنين بجلالو بفستانا يقدل جانا
لابس توب وباريا فراشة يا وسط الخدار هيمانا
الخدرة وجمال النضرة ذادا حبيبنا من احسانا
خايض في مياه النيل تشرب والكفوف عطشانا
طير يغني فوق اشجارو تتمايلبو كيف اغصانا
عين المها جيداً غزالة من نضراتا سر عيانا
جرجر توب بارت جمبي جرجر لي قلوبنا كينا
من قالولي انت تجن صدق مافي جان غير جانا
علاء قرافي غير متصل   رد مع اقتباس
قديم 04-25-2006, 10:42 AM   #6
علاء قرافي
عضو جيّد
 
تاريخ التسجيل: Jul 2005
الإقامة: ارض المليون ميل
المشاركات: 985
الشاعر خليفة عمر, منابع الريد



منو الفاكر يلاقيك وتسالم ايدي اديك
اضمك بحنان فياض واسافر جوا عينيك
واشوف فيك يا منابع الريد جمال الدنيا ما فيك
افكر فيك يا دنياي يا املي البعيش ليك
ويا قمري المضوي سماي يا نغمي البغنيك
يا سعداً بنتمناك نسوم ارواحنا نفديك
ونشتاق للشمس تشرق عشان اسعد الاقيك
وقاسي وحاتك الايام سوادا يحاكي عينيك
جناين القاش وكت تقدل تشيل ازهار تحيك
طول يا حبيب بسال وين بلدك واراضيك
علاء قرافي غير متصل   رد مع اقتباس
قديم 04-25-2006, 10:44 AM   #7
علاء قرافي
عضو جيّد
 
تاريخ التسجيل: Jul 2005
الإقامة: ارض المليون ميل
المشاركات: 985
ما قلتي ما بتسقيني لا بتروي اليباب
انا ليك بردد قولى يا غيمة السحاب
من زمن راجيك مدافر الصعاب
القدر خلاني ابقي عادى المصاب
الليل القليب خليهو ممكون اصلو حاب
ضاق مرار الدنيا بألوان من عذاب
رشي تاني اسقيهو روضي بعد خراب
فى القرير تلقيهو عاد نعمه التراب
غايتو لى إن جيتى اهلا بيك حباب
إن رحلتى وفتى بدقش فى السراب
كل غناى الليك سمعوبوا الصحاب
قالوا ياخد حقو المظلوم يساب
لا تلوم غن جنا عاد كان قلبو خاب
فى ربيع الدنيا وجعات الغراب
البحب فى الدنيا فى الدار الخراب
ما بينفك من قبرو لا يوم الحساب
الليلة غيمك فوقنا كان ظاهر ضباب
والبرق بيغادى لى ينشاف رهاب
لو تسالمي الليلى يبقى زماني جاب
غيرى من رشاتو صاب ونسيمو هاب .
علاء قرافي غير متصل   رد مع اقتباس
قديم 04-25-2006, 10:46 AM   #8
علاء قرافي
عضو جيّد
 
تاريخ التسجيل: Jul 2005
الإقامة: ارض المليون ميل
المشاركات: 985
غناء محمدالنصري
احلام القلب الراد


الايــام مـــــالــن مـــــاهــن فـى الآلآم داقــــــــــالى اوتاد
الايــام كـاتـفــانى حـــزيـن وســوجـرن الاشــواق باصفاد
كـنـدكـن الأحـلام بـالـحـسـرة ويبسـن الوديان فى المسرى
ولو بتعـدل الخـطـوة والـعـتـرة مـا اتراوحت وجيتك صاد
مـا حـبـيـت عـيـنـك بـالـصـدفـة ومـا لاقـيــتـك دون ميعاد
اتـلاقــيـنا صـبـاح الدنيا وشلتك منيه واتجنستك فى الميلاد
اتـحـسـسـتـك حـب بـالـفـطـره وعـشـتـك فكره وشلتك زاد
ومـن شـقـيـت طريـق اشواقنا ولامن جيت من عندك صاد
ويـوم مـا جيت من عنـدك راجع كلى مواجع ونوح وسهاد
اتــوكــيــتــك حــزن دامــس بـيــن خـلجـات الـقـلـب الراد
واتـلــفـــتـه عـشــان الـقــاك فـرحـة زول بـي زولـوا العاد
وانا ماشى مبارى دريب الرجعه محطه محطه لقـيته رماد
حـــــتــــــــة كــــنـــا وحــــــتــــــة كـــان الــشــــوق وقاد
الاطـفـــال احــســـاس الــوحـــده الآمــال مـنـشـــره سواد
لا لاقــيـــت اطـــفـال بــيــغـــنـوا لا اتـنيـن قاعدين يتمنوا
وادى الـخـيـــر مــرابــوا جـــراد يـا احـــلام الـقـلب الراد
واتـذكـرتـا انـا لـيـالى الهجعه وخيال الشوق مشدوده شداد
غـيـبــتـك كـان اسـبـاب وسـفـر الـطـيـف فى العـتمه جهاد
يـامـا مـشـيـت فـوق دربـك اسـعى طول الليل شقيتلى بلاد
كـم كـبـيـت فـوق دربـك دمـعـه واسـتـنـيــت طيفك ما عاد
واه يــا زول اهــديـتـو حـيـاه اهـديـتـو عـيون ومروه وزاد
اه يــــا زول اهــديـتـو بـيـوت اديـتـو خيـوط شعرى الوقاد
لـو فـــــاضـل فــــيــــــــــك مــن ريــــــــــــــــــــدى رماد
اطــرحـــلى وشــــيـك انــا دايــر اجـــيــك لـيـه بـابـك ساد
لـــيـه الأحــــزان لـــيـه الآهــــــات والـــدمـــعـــة حــصاد
علاء قرافي غير متصل   رد مع اقتباس
قديم 04-25-2006, 10:49 AM   #9
علاء قرافي
عضو جيّد
 
تاريخ التسجيل: Jul 2005
الإقامة: ارض المليون ميل
المشاركات: 985
الحاج محمد سر الختم
غناء طارق العوض


وفاء ليه بتردي المويه انت حرام عليكي تشيــلي
ماكان حقو تملي الباقة شان هي عليكي فاضية تقيـلي
انت الزيك ما بخدمو ضمه الا بس الظـــروف عزيلي
والضيف ان جاء للشايقية رابع يوم وقعت طويلي
وما برضاكي تمرقي بره بعض الناس نفســـو رزيلي
راجنــك تمرقي يشوفو كـيف ايد الله فيكي جميــلي
قالوا المويه من ايديك دوو يشفي الرويحتو عليلي
لوبلقالي منها شربة في السنــة مرة تشفي غليلي
عودك حكمة السواهو زودو فوق ندايدو خصيلي
ضيعو وســوه لي خــوفي ينعقد اوعي تنسي تميـلي
وحيلك كلو في عينيك والايد ما خلق لهاحيـلي
ايديك تتعــبه الهبابه والعين متعيباله قبيــــلي
جاتني امس العشيب لبيه تشكــي من الزعل تشكيـلي
قالت انت شلتي جمالنا خليتي لنا حاجه قليــــــلي
ليه يدوكي بي ماعونو شان زي ماك دايرة تكيلي
وعارفك من زمان يا عيني اصلك نا بتعوسي عديلي
تكشفي حالي للدايرنو ما برضيك شئ غير بهديلي
الشئ قبل لساني يقولو حالا دمعة دمعة تسيلي
لو ما انت شن وراني عينا ناعسه والا كحيلي
علاء قرافي غير متصل   رد مع اقتباس
قديم 04-25-2006, 10:52 AM   #10
علاء قرافي
عضو جيّد
 
تاريخ التسجيل: Jul 2005
الإقامة: ارض المليون ميل
المشاركات: 985
حسونه والهدام

***

بدور أحكِيلْكُم القصَّه ..
وبداية القصَّه من أوَّل ..
إلى الآخِر ..
بدون ترويج ..
بدون اعلام ..
كان حسونه زولْ طيب
دوام سبَّاقْ لكلِّ الخير
وزول مِقْدامْ
وكان حسونه من طيبتو
يصدِّق كلّ ما يتقال
بدون تأخير ..
بدون إحجام ..
قالولو البحر ناداك
في شان موجو الطَّفحْ قدام
نزل بي سُرعه قيفْة النيلْ
وكلَّ الناسْ عيونها تميل
زي عارفين طِريفْ حاجه
وحاجه غريبه زيْ أحلام
قال والله ما برجَعْ
وما همَّاني أي كلامْ
ودي المحريَّه في حسونه
زولْ الفزعه ...
زول الحارَّه والإقدام
وقف بي صدق حِداهو النيلْ
كتير يتأمَّل القُدْره
وخلقْ الواحد العلَّام
وكان قَدرو القبيلْ محتوم
غِرِقْ حسونه شالو الموج
وكلَّ القصَّه في الهدام
ليه الناس تكون صاحيه
وتعمل فيها ضاربه منام
ليه الناس تقول نايمه
ويظهر إنو فيها قيام
ليه الناس تقول صادقه
وتنصب للإشاعه خيام
ليه الناس تدفن الحق
وتشهر في الحقيقه حسام
منو القال الصدق حيموت ؟؟
محال والله !!
يُولَد فينا زيْ أنسام
ويِجَّدَدْ صباح ومسا
ويُولَد تاني في كل عام
منو القال الشمس حتغيبْ
وما بتطلعْ ...
تبدِّد فكرةَ الأوهام
منو القال القمرْ خدَّاع
يضلِّم حين نكوسو شليلْ
ينوِّر شان نعيش في ضلام
بدور أنهيلْكُم القصَّه ...
ونهايةَ القصَّه زيْ أوَّل
حكاية زول غِرِقْ في النيل
وكلَّ القصَّه في الهدام
علاء قرافي غير متصل   رد مع اقتباس
قديم 04-25-2006, 10:54 AM   #11
علاء قرافي
عضو جيّد
 
تاريخ التسجيل: Jul 2005
الإقامة: ارض المليون ميل
المشاركات: 985
محمد النصري
يا شمات كفايه البي


يـا شـمـات كـفـايـه الـبـى جـنـى قــواسـى متلمات
ثــارن بـالـتـجــنـى عـلـى سـدن حـلـقـى بالعبرات
يـا خــلاى ويــنـــكــم لـى لـقـلـبـي الـنزف دمعات
يـامـا غـنـاء قـال احـى وفـرحـت بـغــنـاء الشمات
جـراحـك مـا بـتـطـيـب بـالكى وياما انطبقن كيات

مـتـيـن ظـلـم الأحـبـه يـروح تـشـهـد بـفـنـاء الايام
عـشـان زيـك كـتـير مجروح عشان البيك من آلام
طـول فـى الـعـذاب والـنـوح صـدن مـنـك الأحلام
مـاك قـادر تـقـول وتـبـوح دمـوعـك ياما فيها كلام
سـامـعــك فـى جـواى والروح تردد كل شئ اقسام

كـفـاك يـا قـلـبي ديـل شـمـات راجـنـك متين تشكى
دايـرنـك تـقـاسـى الــفـات اوعــــك تـــانى لا تبكي
اسـكـت واكـتـم الـعـبـرات فى جـواك قـول واحكى
امحى الماضى بالجايات بجيك غصن الفرح متكى
اوعـك تـانى تـنعى المـات وللشمات تكون ضحكى

جــود غـيــم الـمـحـنـه يـجــود مـا فـاد الـنواح الآه
اوعــك تــانـى لـيـهـو تـعــود اخـيـرلك كابد المنفى
كـفـايـة الـشـفـتـو فـى الـمـريـود فرج فيك خلق الله
خـلاص خـلـيـهـو للـمعبود هو ساير فى درب تواه
علاء قرافي غير متصل   رد مع اقتباس
قديم 04-25-2006, 10:56 AM   #12
علاء قرافي
عضو جيّد
 
تاريخ التسجيل: Jul 2005
الإقامة: ارض المليون ميل
المشاركات: 985
امونه بت الشيخ حمد ****

امونة بت الشيخ حمد
ابوها كان مزواج خلاص
ناسب جميع ناس البلد
ميلادها كان عرسا كبير
هيصة وضبايح مالها حد
يوم السماية اتيتمت
حكم القدر فى الام نفد
كانت شبيهة امها
فى القدلة والعوداللبد
وبقت امل كل الشباب
وجمالها فى بت ما اتوجد
فى مرة رفة قليبا يوم
حبت قريب الشيح حمد
واظن كمان حباها هو
سوى الضلوع لى حبو سد
كاتمين غرامن فى القلوب
ولع لهيبم ما برد
خايفين يصارحو يقولو
شومال بالدايرنو ست
خايفين عيون الناس
تشوفم والخبر يملأ البلد
والحب هناك عيبا كبير
لا بت تبوحبو ولا ولد
فى يوم ابوها ضحك كتير
برم شواربو بلا الاسد
ناداها امنة تعالى جاى
فوق البرش ربع قعد
قالتو هوى جاياك خلاص
قليبة فر وما رقد
حاج الخضر عارفاهو داك
قالتلو ايوة ابو سند ؟؟
جانى الصباح طالب ايديك
داير نسب شيخ البلد
وانا قتلو اهلا بيك تعال
يومين تلاتة تكون عقد
راجلا عظيم عندو القروش
عندوا الحرير راقد لبد
هو كمان كريم واخو رجال
ماعونو فى يوم ما برد
جرن الدموع من عينا شو
سكتت وابت تديلو رد
قام مرق خلاها فات لا سبة
لا كايس غرض
عند المغيرب تانى جاها
كدى لى محاسن الحاج سرد
داير يأثر فى قليبة
لو كان تقول تديهو رد
وقتا غلب واحتار خلاص ولع
فؤادو جمر وقد
فسر سكوت البت رضا
جهزولو لما الناس عقد
والمال مخمخم والحرير
تحت الرجول مدوهو مد
يوم الصفاح والناس تجوط
بالفرحــــة مقلوبة البلد
امونة تبكى بكا السواد
بدل الفرح جاها النكد
وبشيشى قامت للمروق
فى سرقة ما حس بيها حد
كان الحبيب راقد هناك
والصدمة قادة قليبو قد
وقفت قصادو بكت كتير
لامن دميع العين جمد
قام جاها بى شوقو الكتير
وقليبو داك انهد هد
قالتلو ما بى ايدى شى
ديل ناس ابوى وابو سند
اتلملمو وسووا الكلام
وانا لا رضيت لا جبتا رد
داك عندو مالا مو قليل
وابوى شاف المال سجد
ادانى للراجل العجوز
المن عروقو الدم شرد
قايلنى بسعد بالقروش
ولا المراح الفات ورد
لكن محـال اسعد بلاك
كان السماء ينهد هد
بديك قليبى وروحى ديل
وأعيش هناك صورة وجسد
اتراجعت رجعت تصد
لكن قليبة رجع رفض
مسكت دريبا مو قريب
كم بيهو صف بنوت ورد
قاصدة البحر دايره تموت
لا عيشة لاهم لا نكد
اترددت وقفت كتير
لامن قليبه خلاص صمد
شافت مسار النيل حزين
حتى النخيل حزنان خمد
وبشيشى فكفكت الحرير
لا زينة لا ربيط عقد
علاء قرافي غير متصل   رد مع اقتباس
قديم 04-25-2006, 10:58 AM   #13
علاء قرافي
عضو جيّد
 
تاريخ التسجيل: Jul 2005
الإقامة: ارض المليون ميل
المشاركات: 985
محمد النصرى
اعـتـدتا الجراح


****

اعـتــدتـا الـجـراح يـا غـالـيـه ما عاد البشوفوا جديد
ومـا بـشـعـر بـقـيـت بـالـطـعنه مهما كان مداها بعيد
واحـد عـنـدى كـان الامـى تـنـقـص ولا تـــانى تزيد
ولا اصـبـح مـلاقـي مــآسـى ولا يـطـل عـلـيـه العيد

مـاهـو غـريـب عـلـيـها اقدارى تقصد قلبي بالتحديد
ومـاهـو غـريـب عليـها الدنيا ابقي عدوها انا الوحيد
يـانى صريعها من شبيت فوق من مهد الطفولة وليد
لـمـا كـبـرتـا واتـرعـرعـتـا فى دنـيــا الغـرام والريد

مـن نـار الـعـذاب الـضـقـتـو لو ما كنتا زول صنديد
كان فى قبرى بدرى رقدتا فى جوف ود احدو شهيد
الإ هـواك مـالـيـنى عــزيــمـه اه يـــا بـلـبـلى الغريد
بـلـقـاك والـمـحـن حـبـكـانـى دايـمـاً لـى مــادى الليد

إلا الـلـيـل عـاد فـى الـغـربـة ينزف قلبى دم وصديد
والـمـوت قـبـل اجيك صدقنى ياهو مصير تانى اكيد
الـشـقـى فـيـهـا امـسى قرينى والقيد فى خطاى حديد
والـشـوق بـلـهـيـبـوا ونـاروا يلعب فى حشاى عربيد

فـى ركـن الـسـجـون اتباكى ارزح فى الظلام والقيد
وخــايـف فـيـهـا تـبـقـي اقدارى حاكمى عليّ بالتأبيد
لـو يـجـدي الـشـعـر ادمـنـتوا كم سطرتا فيهو قصيد
تــرجــمــتـا الـعـلـيّ اغــانى لـو قـول الـشـعـر بيفيد
علاء قرافي غير متصل   رد مع اقتباس
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 11:53 AM.


Powered by vBulletin® Version 3.8.7
Copyright ©2000 - 2014, vBulletin Solutions, Inc. Trans by
Protected by CBACK.de CrackerTracker