Follow us Youtube Rss Twitter Facebook
قديم 03-05-2006, 10:35 AM   #1
الشكري
عضو مُـميز
 
تاريخ التسجيل: Mar 2006
الإقامة: السودان
المشاركات: 4,849
جمال الدوبيت وروعة المسدار

بسم الله الرحمن الرحيم
السلام عليكم يا ناس منتدى الشعر طبعا انتو ارق ناس لانو في مقولة زمان بتقول الشعر برهف الاحساس لانو الزول البتزوق الشعر بسرح في الخيال كان مع المحبوب وكان مع غيرو وانا راي الشخصي إنو اجمل الشعر هو الشعر الغزل أو بي لغة العولمة والله يكفينا شر العولمة هو الشعر الرومانسي .
لانو اتخيل لي مافي تنفيث للزول البحب وممكون ومضايق غير الشعر لحدي هنا ومافي علاقة بين الكلام البقول فيو وبين العنوان كدي النشوف العنوان
جمال الدوبيت وروعة المسدار
قبل كل حاجة داير اوريكم انو انا شكري وطبعاً قبيلة الشكرية لا تخفى عليكم لانها علم على راسها نار ومعليش لشوية الجهوية دي بس داير اتونس ما اكتر وعشان ادي فرصة للنقد الجميل .
نرجع للشكرية وهم طبعا اكتر قبيلة في السودان مشهورة بي نظم الدرر من الدوبيت ومن اشهر شعرائها الحاردلو الشاعر المشهور وللحناكيش الما بعرفو الحاردلو نقول ليهم الحاردلو ده غنو ليو ناس عقد الجلاد الشم خوخت بردن ليالي الحره ...... الخ
وكان بقيت ما بتعرفو الحاردلو تراكم قطع شك بتعرفو عقد الجلاد
امبارح كان في تلفزيون السودان حلقة طويلة عن الدوبيت وشعر البطانة في برنامج شوارد وكان بدير الحلقة بروفيسر احمد ابراهيم ابو سن ومستضيفين عدد من شعراء الشكرية على رأسهم ود الشوبلي وكانت حلقة جميل جدا جدا فيها دوبيت وفيها كلام عن التراث لدي الشكرية واهل البطانة وكان فيها عرضة الصقرية المشهورة
وانا من هنا بدعوكم للاهتمام بالدوبيت والغوص في اعماق المسادير والنم لانو ده اجمل لون من الوان التراث الشعري في السودان وبالذات حق الشكرية لانو واضح وجميل .
وانا المرة دي بكتفي بالنصيحة لكن في المرة الجاية بجيب ليكم دوبيت جميل في الغزل
وحسي بختم ليكم بي بيت دوبيت واحد قالو الشاعر الشكري حمد ود الحلال
وهو بخاطب محبوبتو عشان كلو واحد ممكن يستفيد منو ويرسلو لي حبيبتو لو عندو حبيبة والماعندو زي انا الله يدي حبيبة
أعضاي إبتلت يا الرايقة بي كسيرك ** سمحة وفاهمة ما اجتمعن قبل لي غيرك
عليكم الله شوفو بلاغة التعبير الشاعر بقول لي حبيبتو اعضائي كلها ربنا ابتلاها واتكسرت فيك لانك سمحة وفاهمة والسماحة والفهم مافي بت قبل كدة لمتن الاتنين وبي راندوق الزمن ده الشاعر بقول لي حبيبتو والله يا الرايقة انا اتكسرت فيك بكل حواسي عيوني وحناني وقلبي وكل حاجة فيني لانك سمحة وفاهمة والسماحة والفهم مافي بت بتقدر عليهم الاتنين غيرك لانو البت السمحة بتكون متكبرة لكن انتي سمحة ومتواضعة
بالله شوفو ده بيت واحد فما بالكم لمن اجيب ليكم قصيدة كاملة من الدوبيت انتو بس ارجوني
أححح يا وحة القلب المعاي قديمة ** أبت لا تنفعك شربة حكيم لا عزيمة
التوقيع
قــــــرد يــونسـك ولا غـــزال يـزازي بيـك
الشكري غير متصل   رد مع اقتباس
قديم 03-07-2006, 11:31 PM   #2
alGinny
عضو جيّد
 
الصورة الرمزية alGinny
 
تاريخ التسجيل: Mar 2005
المشاركات: 1,113
الشكري
الجهوي...ههههههههه
النمة والدوبيت لهما في السودان قدر من الإهتمام لا يمكن تناسيه بأي حال من الأحوال..
ربّما نصف من اعضاء هذا المنتدى...لا يعرفون ثلاثى ارباع مفرداتها.. لذلك نجدها قليلة على صفحاتنا..
ازرع فينا تلك الشتلة.. حتى يجمع هذا المنتدى من كل بستان .. زهرة

لك الود
التوقيع

مابين الرشفة والشفة..كلمات غادرت للضفة
alGinny غير متصل   رد مع اقتباس
قديم 03-08-2006, 02:47 PM   #3
أبو الريش
عضو فعال
 
تاريخ التسجيل: Jan 2006
المشاركات: 269
أححح يا وحة القلب المعاي قديمة ** أبت لا تنفعك شربة حكيم لا عزيمة[/QUOTE]
يا وحة القلب المعايا قديمة
أبت ما تنفعك شربة حكيم لا عزيمة
يا نفسي اللذيذ ما بتلقيلك ديمة
والمسافر بعيد ما بتنفعو التقديمة
اخي الشكري نشكر لك التطّرق الجيد لهذا النوع الجميل من الأدب والذي يتخلل ميسم كل الأشياء الجميلة التي من حولنا..
في إنتظار مساديرك ورباعياتك نلتهم عقارب الساعة ..
خالص الود
التوقيع
أبو الريش غير متصل   رد مع اقتباس
قديم 03-22-2006, 08:21 PM   #4
titomort
عضو جديد
 
تاريخ التسجيل: Feb 2006
المشاركات: 9
مرثية الفرجوني للحاج علي حميدة

. بسم الله الرحمن الرحيم
عزاء
_______
في وفاة المرحوم الحاج علي حميدالفكي طه

إلي الأخوان الحاج طه حميد و الحاج عمر حميد و جميع آل الفكي طه، وآل عبد الله سليمان، وآل علي حمودي. الي الزاكياب،والي قبيلة البطاحين عموماً أرسل هذا العزاء راجياً من الله أن يُنـْزِلْ الفقيد مع الصديقين والشهداء وأن يلهمهم الصبر
وأن يجزل لهم الأجر والثواب.

1 خـَيِّرْنـَا الْ بـِشُوُرْ يوْمُو الرَّحَلْ مَا شَارْنَا
خَلـَّي العينْ مِجَدْوِلَة والدِّمُوعْ مِتـْـقَـارْنـَة
مَصْحَفـْنـَا وْ هُدَانـَا الْ بيهُ رَحْمَة دَارْنـَا
من يوموالْ خـَتـَرحُسْنْ الصَّبُرْ ما زَارْنَـا

2 نـَبْكِي بـِكـَيَ المِطُوُرْ وَكْتيْنْ تـَسُوُقْ السّيْلْ
فـَاقْـدِيِنْ ذَاتـَـكْ الطـَّيبَة وْتـِلاوْة الليل
صَدَقُواالْ قـَالـُوا يومْ رَحَلُواالْ بِعَدْلُوا الميْلْ
إنـْكَسَرْ المِرِقْ وِاتـْشَـتـَّتْ الضَّانـْقيْلْ

3 فـَاقـْدِنـَّكْ كَتِيِرْ فـَقـْدَاً بَلا مَحَدُوُدْ
يا تـَالِي الكِتَـابْ وكْتْ الضَّلامْ مَمْدُوُدْ
كَمْ سَنـَّدْتَ واقِعاً بالضُّعُفْ مَهَدُوُدْ
ؤكَمْ حَليْتْ قَوَاسِي وْ دَرْبَهِنْ مَسْدُوُدْ







4 نـَفْسَكْ طَيْبَة والتـَّقـْوي المَكَمَّـلَة زَادَكْ
كَمْ أصْلَحْتَ كَمْ أفـْلَحْتَ بـ إرشَادَكْ
الصَّلاة والتـِّلاوَة الْ في الهِجُوُعْ واوْرَادَكْ
في قـَبْرَكْ مَعَاكْ بِتـْوَنـَّسَنْ في رْقـَادَكْ

5 نـَبْكِي بِكَيَ المِطُوُرْ فـَاقـْدِينْ وِجُوُدَكْ بيْنـَّا
يا ضَوْ الصَّبَاحْ الْ كَانْ بِنـَوِّرْ عيْنـَّا
كَبـِيرْنـَا الْ بـ حنـَانـُو بـْسِدْ مَحَلْ وَالديْنـَّا
نـَبْكِيِكْ بالدِّمُوُعْ مِتـْحَزِّنِـيِنْ يَا زينـَّا

6 نـَبْكِيِكْ بالدَّمُوُعْ يا فيْضْ بَحَرْنَا الصَّافِي
نـَبْكِيِكْ بالقِلـُوبْ ؤبِكَيَ القِلُوبْ مُوُ كَافِيِ
نـَبْكِيِكْ يا الْ بِتـَفزَعْ للمِضِيِقْ مِتـْـلافي
نـَبْكِيِكْ يا الْ بِتـَصْلِحْ كُلَّ يومْ ؤتـْعَافِي

7 نـَبْكِيِكْ البِكَا الْ ما بْجِيـِبْ غَضَبْ خَالِقـْنـَا
نـَبْكِيِكْ بالصَّبُر وَالوَجْعَة مَا تـْفـَارقـْنـَّا
نـَبْكْيِكْ يا الْ فـُرَاقـَكْ في القـِلـُوبْ حَارِقـْنـَا
يابـيـْتـْنـَا الْ بـِلِمْ ويِجْمَعْنـَا ما بـْفـَرِّقـْنـَا

8 نـَبْكِيِكْ يا الْ مِثـَالَكْ في الرِّجَالْ مَعَدُوُمْ
يا الْ بالتـَّـقـْوَيَ سَوَّيت الفـَضَالَة هْدُوُمْ
نـَبْكِيِكْ البِكَا الْ مَا بِكْرَهُو القـَيُّومْ
نـَبْكِيِكْ بالصَّبـُر لكِنْ حُزُنـَّا يْدُوُمْ







9 يانـِسـلْ الرِّجَالْ أهَلْ الدِّرُوُعْ وَالخيْلْ
يا تـَالِي الصَّحَايِفْ في هَزَايْعْ اللّيْلْ
فـِيِكْ نـِسْتـَغْفـِر اللَهْ وْبينـَا كَتـِرْ المـيـْلْ
يا المهَلْ الْ بـِبَلـِّجْ مِنْ ضِهُوُرْنا الشّيْلْ

10 يا الْ بِتـْصَادِفْ المِسْكِيِنْ بِتَكْشِفْ ضُرو
ليـْشْ في قـْلـُوبْنـَا سكَّنـْتْ الحُزُنْ بـ حَرُّو
يا ودْ الْ مُحًالْ فوقْ فـَارغـَة ما بـِنـْجَرُّوا
حـُزْنـَا صَادْنـَا بالطـُّوُلَة الزَّمـَانْ ما بفِرُّو

11 ما ودَّعْتـَنـَا وْسَافـَرْتَ غير مَا تـْشُوُرْنـَا
حُزْنـَاً صَادْنـَا مِنـَّكْ حَدُّو بـِبـْقـَي قـْبُوُرْنـَا
نِتـْلفـَّتْ نـَعَايِنْ وَيْنْ ضِيَانـَا وْنـُوُرْنـَا
نـَلقَ الحَالْ كَعَبْ وَالعَبـْرَة خَانـْقـَة صَبُوُرْنـَا

12 ما استـَنـّيْتْ (عُـمَرْ) بَارَكْتْ ليهُ الحَجْ
خَلـّيْتْ ليهُ حُزْنـَاً ذَاتـُو مَا بِنـْفـَجْ
في وَسْطْ الوُفُودْ الْ جَايـَة مِنْ كـُلْ فـَجْ
خـَبـَرَكْ جـَاهُـ فجَّ ضَمِـيـِرُو مـِيـَّة فـَجْ

13 الجَفـَا مَاهُـ طَبـْعَكْْ يَا حَسِيـِنْ الطَّبْعَة
ليْشْ سَوّيـْتـُو خَلـّيْتْ الدِّمـُوُعْ مِتـَّبْعـَة
حَدْ ما يْدَوَّرَنْ فوقـْنـَا اللَّيَالِي السـَّبْعَة
فـَاقـْدنـَّكْ كَتـِِيرْ يا الخيْرْ حَسِيِنْ الرُّبْعَة






14 الفـَقـْدْ الكَبـِيـِرْ فـَقـْدْ التـَّقِي وصَوَّامْ
سَجَّادْ اللَّيَالِي الْ في السَّحَرْ قـَوَّامْ
نـَفـْساً طَيـْبَة عَابـْدَة الوَاحِدْ الدَّوَّامْ
ؤقـَلـْبـَاً مِنْ عـِبـَادَة رَبُّو مُو نـَوَّام

15 حَزْنـَانـَاتْ قـِلُوبْنـَا وْحـُزْنـَهِنْ إيـِمَانْ
رَاضْيـَاتْ بالكِتـَابْ الْ أنـْزَلـُو الرَّحْمَنْ
يا حِزْبْ الرِّضَا الْ لـ دَارْنـَا كُنـْتَ أمَانْ
مَفـْقـُوُدْ بالكَتيـِرْ لـ مـُدَّة الأزْمَانْ

16 منـَادِيـِكْ نـَادَيَ يومْ جِمْعَة وْنـِهَارْ يومْ عِيـِد
نـَزَلـْتَ جْوَارْ كَـرِيمْ رَبـَّاً عَظَّيـِمْ ؤمَجِيـِد
بـِجَرِّحْ قـَلـْبِي كَوْنـَكْ تـَبْقَ مِنـِّي بَعيد
ويفـَرِّحْ قـَلبي كَونـَك في جِوَارُو سَعِيـِد

17 بَعَزِّيِ الكُمـَّل الطـَّيْبـِيـِنْ مِلـُوُكْ النـَّاسْ
عِيَالْ بَطْحَانْ قِلـُوبـْهُنْ عَامْرَةْ بالإخْلاصْ
بَعَزِّيِ الْ فِيِهُنْ الجُوُدْ وَالكَرَمْ والبـَاسْ
لِبَابْ عَدْنـَانْ سُلالـَة حَمـْزَة وَالعَبـَّاسْ

18 بَعَزِّيـِهُنْ عَزَا الحَزْنـَانْ ؤحـَامْدْ الرَّبْ
عَزَاالْ وَدْعيْنـُو طَافـْرَة الدَّمْعَة مِنـُّو تـَرَبْ
أقـُولْ لـ قـَلبْي أصْبُرْ أوْعَـي تِتـْخَرَّبْ
جَزَعْ مَا بْجِيـِبْ، جـِرَاحَكْ قـُولْ عـليْهِنْ كَبْ





19 العَزَا للمِلـُوكْ فـِرْسَانْ عَوَاتـِي الخيْلْ
مَرَاكْزْ الخيْرْ ؤأقـْمَارْ الهِجُوعْ وَ اللَّيل
صَنـَادِيدَاً بِصَادْمواالموْتْ وِيصُدُّواالخيْل
واجَاوِيِدَاً بـِفـُوقـُوا عَلي المِطُوُرْ والسّيْلْ

20 العَـزَا للبَطَاحِيـِنْ جـُمْلـَة دُوُنْ تـَحْدِيـِدْ
رَقـَدْ فـَارِسْنـَا طـَاهْرْ الكَفْ ؤطـَايلْ الإيـِدْ
رَقـَدْ الْ كُلـُّو يومْ كَانْ في الفَضَالَةْ بْزيـْد
رَحَلْ,ؤرَحِيـلـُو رَحَّلْ مِنْ قـِلـُوبْنـَا العِيـِدْ


21 بَعَزِّيـِكُنْ جَمِيـِعْ ؤبَعـَزِّي نـَفْسِي كَمَانْ
وَاقُوُلْ الموْتْ فـَرِضْ مُنـْزَلْ منْ الرَّحْمَنْ
طَوِيلْ عُمْرَكْ قـَصِيرْ، وآخْرْ النـِّهَايَة ضَمَانْ
دِريْبـَاً مَاشْ جِدُوُدْنـَا اتـَّاَبَعوْبُو زَمَانْ

22 بَعَزِّيِ الكَافـَّة أهَلْ الجُوُدْ ؤأهَلْ الخيْرْ
بَعَزِّي الكُمـَّلْ الْ لـ اللَهْ جَـدُّوا السيْـرْ
بَعَزِّي الْ في هَوَايْدْ اللّيْلْ قـِلـُوبُنْ طيْرْ
بعَزِّي الْ بـِصْلِحُوا الأمَّة وْبـِزِيلـُوا الضّيْرْ

23 بـَعَزِّي الْ خَافـُوا رَبْ النـَّاسْ إلـَهْ الكوْنْ
بَعَزِّي الْ في المَرَاتـْبْ العُلـْيَا مَاهُنْ دُوُنْ
بَعَزِّي الْ عِنـْدَهُنْ كُلَّ القـَوَاسِي تـْهُوُنْ
بَعَزِّي الْ بِسْنِدُواالمِسْكِيِنْ مَحَلْ مَا يْكُوُنْ
titomort غير متصل   رد مع اقتباس
قديم 03-22-2006, 08:43 PM   #5
أبو الريش
عضو فعال
 
تاريخ التسجيل: Jan 2006
المشاركات: 269
هذا المسدار لشاعر البطانة ود شوراني عندما زار مدينة شندي:

حوش البابور للجار والضيوف مفتوح
جات خاشا هو شتلة منقة لينة تموح
يشلع ساطع النور فوق جبينا يلوح
كل ما تبتسم الطيب من ثناها يفوح

"علي " قالي منزه طبعو مو مسنوح
كمان راقي وحلو ومن كل فارغة صفوح
شعر بي حالة القلب البوِحْ مجروح
إن جاملنا يشكر وان طلع مسموح

قت لي القالي شايفك من أمس ملفوح
سببي الزولو ما اتعش ورقد مسدح
وهبه جمالو غير حنة ودلال ومسوح
عفيف وطيباتو خلقة معاهو طبق الروح

البارح براي بشكي وبزيم وبنوح
واصلت السهر عجّز بلابل الدوح
السلب الحيا وخلي اللحم مسروح
نظرة خدودو للحزنان سرور وفروح

حتي لا يمل القارئ من كثرة القراءة نكتفى بهذا القدر ولنا عودة مع الدوبيت
ودمتم
التوقيع
أبو الريش غير متصل   رد مع اقتباس
قديم 01-15-2008, 10:59 AM   #6
المصباح
عضو فعال
 
تاريخ التسجيل: Oct 2007
المشاركات: 374
الشكري ... هلا ... هلا

ياريت لو اقدر أعبر عن الاحساس

أنم وأدوبي بأعطر الانفاس

يا أعز الناس

يلا .. يا الشكري ... دوبي ونم ... وإنداح

وخلى النفوس ترتاح

لك خالص الود والوفى ....
التوقيع
مع تقديري
المصباح غير متصل   رد مع اقتباس
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 03:19 AM.


Powered by vBulletin® Version 3.8.7
Copyright ©2000 - 2014, vBulletin Solutions, Inc. Trans by
Protected by CBACK.de CrackerTracker