 |
|
05-18-2006, 12:34 AM
|
#1 |
|
عضو مُـميز
تاريخ التسجيل: Mar 2006
المشاركات: 3,547
|
(اغانى الطنبور)
حاتم حسن الدابى
جعفر السقيد معذره لو معاك منى الكلام حره معليش الخطاب كاتباهو مطره حرام والله مننا انت تتبره وخمسه سنين تفوت وتجى فيها فد مره وراك انا كم شقيت وعشت فى مره وبقيت مع الصغار الهوم للعيون قره بخاف الغرق الاصلو لا دره وقالو ادب الصغار والعقده من خدره حليلى انا الزمن ضى خاطرى مانفره وخمسه سنين غياب مابتحملن حره انا الحاضن العذاب وامالى محتضره وانت الفى النعيم ماخات حساب بكره مسكين التقول فى الاغتراب ستره وتتناسى القروش فى يوم تكون ضره حليل زمنك وكت عايشنا بالاجره ياريت لا عرفت ولا مرق بره الكاتمه فى جواى كتير متملكه الجوف والعصب ماكت دايره اقولو ليك لكن لسان الحال غلب مابنسى يوم ودعتنا وسافرت فى غرة رجب خليت وراك الدار حزين تتباكى والدمع انسكب اعذرنى والله العظيم لو ما الضروره انا ماكتب وانا خايفة من بعدك يكون الضاع هو ضعف المكتسب اليومو داك ناس البلد هنونى شايقية وعرب قالو لى مبروك خير وجاك يكتب سلامتو اللى اغترب قالو لى دووب نجم السعد طلاكى من بعد احتجب يادوب بالك استريح وتنسى العذابات والتعب فضلت احسب فى الشهور قاعدالى فى نيران لهب صابره وحريصه على الولاد لايبقو للريح فى المهب سديتا خانتك من مشيت قايمه بى واجبى كام واب والاسره يضنيها المسير تتهاوى لو مافيها رب والله مابنكر جميلك لينا برضو ثناك وجب موكب هداياك مانقطع كان ستره فى الزمن الصعب لابسين وماكلين والنعيم فى يوم ما نضب وعايشين عيشة المترفين طولنا والطبع اتخرب حامدنو كان قلت لكن والله لا التين والعنب اما الجناين شيله كاب وافر للفواكه والرطب البيت مفروش بالحرير ومليانه ايدى باالدهب لكن خساره على محل عاش سيدو خمسه سنين عذاب الشئ المهم ماقلت ليك ليه انت ماظنيت حسب كبرو الصغيرونين خلاص خايفالن الطبع الكعب وصلوها مرحلة الخطر والامن مازال مستتب وانا كت قادراهم زمان لكن بعد كبرو اتغلب حصلنى قبل الجد يفوت دوبنهن فوق العتب قبال نحصد الخير ندم ولابيجدى كان لمت او عتب خايفالن الطيش فى الدروس ومابرضى لو واحد رسب خوفى المتعبنى الكبير بعدين يمرقو بلا ادب وريتك الحاصل على لا فيه ثوره ولا غضب شان الحديث مايبقى نى والواحد يكتنف الجدب انا قلبى مازال لسه حى ونجمو الملاهج ماغرب باكر كلامى تردو لى لا ابقى بكره انا السبب |
|
|
|
05-18-2006, 12:35 AM
|
#2 |
|
عضو مُـميز
تاريخ التسجيل: Mar 2006
المشاركات: 3,547
|
بلادي أنـــــــــــا
-------------------------------------------------------------------------------- بلدي بلد ناسا مواريثم في أول شي ..كتاب الله وحصان مسروج، وسيف مسنون حداه درع كتاتيبم تسرج الليل مع الحيران وشيخا في الخلاوي ورع وكم نخلات تهبهب في جروفا الساق وبقرة حلوبة تتضرّع وليها ضرع بلدي أنا تشيل الناس ، كل الناس وساع بي حيلا وليلا يسع وتتدفق مياه النيل على الوديان بياض الفضة في وهج الهجير بيشع بلدي سهول ، بلدي حقول بلدي الجنة للعاشوها ولي البرّة بيها سمع بلدي بلد ناساً تكرم الضيف وحتى الطير يجيها جعان ومن أطراف تكيها شبع بلدي بلد الصفقة والطنبور وجاراتن تنق بالليل وبنوتن تحاكي الخيل يشابن زي جدي الريل بلدي أمان ، بلدي حنان وناسا حُنان يكفكفوا دمعة المفجوع ويبدّوا الغير على زاتم يقسموا اللقمة بيناتم ويدّوا الزاد حتن كان مصيرم جوع يحبّوا الجار يموتوا عشان حقوق الجار يضوقوا النار عشان فد دمعة وكيف الحال لو شافوها سايلة دموع! ديل أهلي .. واللــــــــــه ديل أهلي البقيف في الدار في نص الدار وأقول لي الدنيا. كل الدنيا ديل أهلي عرب ممزوجة بي دم الزنوج الحارّة ديل أهلي .. ديل قبيلتي لمّن أدور أفصل للبدور فصلي ديل فصلي أقول بعضي ألاقيهم تسرّبوا في مسارب الروح بقوا كولي ألاقي قلبي والإحساس وسافر في بحار شوقم زمــــان عقلي أنا محل قبّلت ألقاهم معاي ، معاي زي ضليّ أنا لو ما جيت من زي ديل كان وا أسافاي ، وا مأساتي وا زّلي تصوّر كيف يكون الحال لو ما كنت سودان... وأهل الحارّة ما أهلي تصوّر |
|
|
|
|
05-18-2006, 12:36 AM
|
#3 |
|
عضو مُـميز
تاريخ التسجيل: Mar 2006
المشاركات: 3,547
|
كلمات/ علاءالدين عبدالرحيم
غناء/ عبدالرحيم البركل عـــافــيـــة مــنــك وراضــيــة عنــك سـو رضايـا ومـــا بـيــخــــيـــــب الـرضــا والـدتــو يـا جــنـايـا أنت مـن يـا دوب صـغــيـــر مـن زمان دايماً مـعايا أنــت ديـمـه أمـامـي سـايـــر مـا بخـليـك بـي قـفايـا ما بتغيب من عيني لحــظـة ولا حصـل سبتك ورايا لا من الله يشيـل أمانتوا أنا بـبـقي خاصاك بالرعـاية ليَ يــرعــاك الـبـيـــرعـي لـيَ بـيــك يبـــرد حشايـا أصــلـك أنــت هـديــه مـنـو والله بـيـك أجزل عطايا جيـتــنـي واحـد مـالـي تــانى رحمـه في آخر صبايا قـبــل مــا أفــقــد قــدرتـي وقـبــل مـا تنـهـار قـوايـا جيـتـنـي ذي بــدر منـور وفجـأة طلـيــت فـي سمـايا انـت لــمـا خـلاص كـبـرتـا دار تسيبني أعيش برايا دار تـفـارقـني وتـسـافــر والـحــزن يصـبــح جـزايا كيف يـهـون لك تحـزن أمـك شـان تحـقـق ليـك غاية كان مسـافـر شـان عـلاجي بـلـقي في شـوفتـك دوايا وكان عشـان تـســقـيــنـا نهـلك نحـن بي حنـك روايا كان عشـان كــرعــيــنـا راحـل نحن بي بـعدك حفايا كان مهاجـر شــان تـعـرس خـيـر أبـوك مالي التكايا خـيـرو وافـر أبــوك يحـمـدوا مراحو مليـان بالسعايا وبالـقروش الجـيــب مـجكن ولسه برضو الجايا جايا بـرضـي مــنــك مـا بـقـصـر بـحـفــر أديـــك المعـايا كــان ده كـلــو كـمــان شُـويّ بـتلقي في دهبي الكفايا أصـلـي مـن ســويـتــو نــاذرا إبـقـي لــي أيـام قسـايا خـاتـــا للــزمــن البـعــانـد لـي سعــادتــك يــا عشـايا أنـت مـن شبـيـت صـغـيــر راسـي مـا بتحتاج وصايا مـا حـصـل خيـبـتــا ظـني ولا فشــل فيـك زين غنـايا لا تسـيـب أمــك تـهـاجــر يـمـه محـتـــاجــي الحـمايا لا تسـيـبـني وراك تـرحـل إنـت يـاك ضُـلـي وضرايا أنـت فـوق الـحـوبــة مـقـنــع إنـت للـمـكشـوف غطايا دايري مـنـك تـبــقـي جنـبي . جنبي في فـرحي وبلايا دايـري كـان قحـيـت اتـبـنـك ارفـع اقـســمـلـك غـتـايا أنت سـاعـة تـبـقي جنـبـي تـبـقـي ضُـلــي وتـوب قفايا ومـا بخــاف ظـلـم الـلــيــالي وأنـت يــاك عكاز عمايا دايـري أقـضـي عـمـيـري جنـبـك أصـلو قارب للنهايا خـايـفـي كـان ســافرتـا ترجع تلقي فـاضي البيت بلايا حـيـنــا مـا بتـنـفـع قـروشـك وما تجـيــب لك أم سـوايا مـاني عــارفـي سـبــب رحـيلك يـا وليدي شنو الحكاية إلا تبـقي بـــراك شــايـف فـي فــــراق الــوالــدة غـايـه ما بعاتبك وما بلومك لو رحلت بلـقي في الأمثال عذايا عـلـي حـجــر دايـمـاً قليـبـك وقليـبـي كـله عليـك جنـايا |
|
|
|
|
05-18-2006, 12:38 AM
|
#4 |
|
عضو مُـميز
تاريخ التسجيل: Mar 2006
المشاركات: 3,547
|
يا فرحة في بحر السراب
يا كلمة في أول جواب يا واحة في ليل الصعاب يا خيط شعاع وسط الضباب يا نجم من دنيانا غاب يا أغلى ما تحت التراب من خلفي قضبان العذاب ليك برسل الآهات خطاب يا يمة يا الأمل الرحل قبال يقول كلمة وداع يمة يا النور الخفت قبال يرسل خيط شعاع يمة يا دمعة فطيم خلوهو لي ليل الضياع يمة يا مركب نجاة غرقت قبل تفرد شراع يمة يا نجمات صباح مرن سراع مرن سراع يا يمة من بعدك أنا أصبحت للأحزان وطن دروشت في خلوة أساي سبحت بي خرز المحن كتحت صبري أنا للرياح غنيت للأحزان بكن دقيت باب الذكريات كان ألقا لي هناك سكن لا لقيت صورتك في الخيال لا شفت من بعدك زمن ودرت لي درب الرجوع كل المعالم إختفن فتشت في كل البلاد كان ألقا لي طيبتك مثيل دورت في كل البقاع شايل عذاب ليلاً طويل زادي الوحيد كان الصبر في الظلمة والزمن العليل زمناً يشيل حق الضعيف يديهو لي عابر سبيل زمناً يغير كل شئ حتى الزمان كان مستحيل يا يمة كيف يتبلّ شوق والشوق على كل يوم يزيد لا إنتي بنتي ولا هو راح لا غيرو الزمن المديد يمة من بعدك لا فرح طلانا لا ضمانا عيد غير خيط فرح يبدا ويروح كل ما أقول يا داك فرح ألقاهو مني بعيد بعيد لكني راجع ليك أنا بالرغم من كل المحال جاييك عشان أعرف خطاي من وين تستف للرحال جاييكي لو كان مستحيل جاييكي لو كان في الخيال لاقيني لو كان في الحُلم ما الدنيا من بعدك زوال عنواني خلف اللاوجود يا أُمي يا أبعد منال |
|
|
|
|
05-18-2006, 12:39 AM
|
#5 |
|
عضو مُـميز
تاريخ التسجيل: Mar 2006
المشاركات: 3,547
|
يوم بالسلامه تعود تلقاني ياني انا
راجياك لا تقلق لالا لا تقلق لو غبت تسعه سنه انا لا غيرتني ظروف انا لا ريدي صابو عنا انا لا قلبي شالو سواك انا لا منك استغني تلقاني منتظراك فوق نارو مستني انا غير لقياءك ما عندي تاني مني سالوني عنك يوم عن ريدنا العزال قالو لي غبت خلاص غبت وبعادك طال زول من رحل خلاك لا جيه لا مرسال وكتين نساك وفات خلاهو ليه في البال قالو لي انسي خلاص ذي ما هو برضو نساك صهين يكون مشغول بي واحده تاني سواك مابعيد ابتسمي للايام تلقي الزمن ضحاك وخطابك انتي صفوف والاف بتتمناك رديت حياتي بقت مقرونه بي انسان رابطنا فد شريان ساقينا ريد وحنان بيهو بنعيش احباب في روقه واطمينان ويصبح مصيرنا الموت يوم ينزف الشريان نوم واطمين وارتاح واسمع خلاصة القول انا لا مال بغيرني لا اغراء بينا يحول انا لا بيملا قلبي سواك لا تاني بعشق زول |
|
|
|
|
05-18-2006, 12:40 AM
|
#6 |
|
عضو مُـميز
تاريخ التسجيل: Mar 2006
المشاركات: 3,547
|
سافر / جعفر السقيد
عليك الله سافر عليك الله شيل الاماني معاك وشوف البيبكي عليك او حتى يترجك انا تعتب خلاص من جورك انت على تزعل بدون اسباب وتاني ترجع لي خليك معاي واضح لا يبقى قولك ني يا انت ابقي معاي يا انت ما ليك بي رغم الحصل والكان ياما صبرت عليك كان العشم جواي تصدق معاي عينيك لكن غرورك فاض كتل البراءة الفيك خلاك تقول مجبور انا بكرة برجع ليك اوعك تظن في يوم انا قلبي برضى الذل او يستكين هيمان ويرجاك عند الضل انت الفتحت الباب وقلت للخصام ادخل وانت الزرعت الشوك وقلعت شجر الفل انا في النهاية انسان مرهف رقيق حساس وداير اعيش في امان واصافي كل الناس لكن اذا جريت فوق الكرامة وداس مجبور اقول القول القالو بو فراس في شعروا قالو كلام مدهش جميل يسبي لا تملك الحسناء مهما تكون قلبي انا برضي زيو كمان اعلنت لي حربي وعايش قليبي يقول يا اخوانا ايه ذنبي والله ياالمريود خليتني فيك محتار مرات بشوفك نور مرات بحسك نار مرسالي وقتين جاك قابلتو باستهتار وما تنسى أي حديث دائما بدايتو شرار يا قلبي اصبر قلبي اصبر قلبي اصبر اصلو الظروف قاصداك معليش اذا جا الليل وخيم على دنياك عذرا اذا الاحلام اكبر من الادراك وعفوا اذا حبيت زول ما عرف معناك |
|
|
|
|
05-18-2006, 12:41 AM
|
#7 |
|
عضو مُـميز
تاريخ التسجيل: Mar 2006
المشاركات: 3,547
|
حتى الطيف رحل خلاني ما طيّب لي خاطر
أما النوم أبا وجافاني وأصبح داجّي ساهر قليل يا طيف أقيف وأرجاني وين فايتني عابر شن حارس وراك أنا تاني ياني معاك مسافر لا لا تقول لي كدي استناني أمشي وأجيك باكر يبقى أنا ما ألم فيك تاني مين عارف المصاير هاك اسمع رنين ألحاني وأبقى معاي سامر خفف لي قليل أحزاني ياما أنا عشت صابر شوف كيفن يسوي زماني ديمة علي جاير آه مر العذاب وراني سهمو في قلبي غاير شوف الليلة كيف بستاني دا الكان باشّي ناضر من حر السموم بيعاني طيرو يفر يهاجر جفّ يبس صبح صناني لافح حرو كافر عدمان الضليل سواني مجنون قالوا شاعر كل ما تمر تعدي ثواني منو اسراب تغادر رحلوا الفيهو صر وحداني نازل ومرة سادر أحوم أرجع أصد لبكاني مقطوع راسي حاير وين أحبابي وين خلاني آه يا الله قادر ما عارف العلي تراني فوق كرعي ساير وأسكت أسوي في أوزاني أشعار مالا آخر وإت ياطيف عليك أحزاني ليّ شوية كابر عشان خاطر قليبي عشاني لحظات بس تخاطر |
|
|
|
|
05-18-2006, 12:42 AM
|
#8 |
|
عضو مُـميز
تاريخ التسجيل: Mar 2006
المشاركات: 3,547
|
أنا رويان من قليبك يمة شوق وحنان وريد غرقان في عفوك والله من ما قم وليد
تفضل في القلب ذكراك مهما كت بعيد وكلما زاد عفوك علي اول هل من مزيد ماسافرت شان ارتاح اعيش هاني وسعيد ولا هم العرس يا يمة كان يت القصيد لاتقولي انه فات خلاك جافاك الوليد شاغلاه المدائن العايمة اسراتنو قيد ما بشغلني عنك حاشا لا مال لا ويد ولا بتمنعني شوفك يمة اغلال الحديد ما كان قصدي هجرك يمة لما رحل بعيد قصدي امسح دمو بالحسرة جاري على الخديد لا تلوميني كان قصّرت اتأخر بريد وما هو جفا السبب والله وما نسيان أكيد بين اتنين وليد يمة بالو صبح شريد بين يرضيك وبين يا والدة يرضي طموح عنيد رضاك يا يمة كل مناي وغاية ما أريد وتحقيق الهدف ما ببقى بالتمن الزهيد يومي قليبي في ذكراك يتكرّ ويعيد طيفك ما بيبارح لحظة حاميني الغميد الله براهو عالم يمة مشغولبك شديد مناي جمبك اعيش والله لو كان لي ايد لازم يمة انسيك الشجن واللوعة والفرح والوجيد لازم تنسي زمنا فات تعيشي زمن وليد لازم كل تعبك فيني اتعبو فيك وازيد لازم اشيلها همومك يمة والبسك الجديد دينك فيني ما بتحلّ لي يوم الوعيد شبابي فداك وكان ما كفى ليك عمري الوحيد ما بتلهيني عنك دنيا ما بيمسكني قيد ما غنت الفرح والراحة والهوى والرصيد ليك سلامي ما محدود من الأرقام يزيد عدد زرات تراب الكون جبال وسهول وبيد عدد ما أشرقت أنوار وطلّ صباح جديد عدد ما نسمة هبّت باردي داعبت الجريد كل مناي تلقي العافية والعمــــــــر المديــــــد تفرحي بي يوم الفال تباركيلي الجديد يوم داك بالفرح نتباكا نتقالد شديد وتبقى الدنيا بسمت لي جات ذي ما أريد جايك جاي لي عينيكي منها ما أحيد منها نستمد الراحة ومنك نستفيد |
|
|
|
|
05-18-2006, 12:45 AM
|
#9 |
|
عضو مُـميز
تاريخ التسجيل: Mar 2006
المشاركات: 3,547
|
حبى أنا ليك كان زادى
حبى أنا ليك كان زادى وكان جـوه الحنايـا دفيـن كتّ بضارى من الناس وخايفه عليهو مـن العيـن عليهو أنا كت بصوم وأفطر عليهو بكابـد الناريـن كت بحسب سنين الغربة لما تعـود تجينـى متيـن وكت برجاك فوق النار لمـا وكـت لقانـا يحيـن نونس فى براءة أطفال وفى الحب نروى ننهل زين وكلما يوم يزيد البينـا لمـا بقينـا قـاب قوسيـن اتارى أنا كت فيك مخدوعة وكم من زيى مخدوعين ما قايلاك بتلعب بى تعيش اللحظـة بـس والحيـن وما قايلاك حبيـب آلاف وقلبـك قبلـة للضاليـن وما قايلاك بتنسى حبيب صبر راجيك ستـة سنيـن وساهر كم ليالـى طـوال يتقلـب شمـال ويميـن كيفن هان عليك تنساهو زولاً كـان عليـك حنيـن كت دايراك بسمة عريضة فى وجه الزمان الشيـن وكت دايراك ساعة الحاجة تبقى لىّ دخرى خزين كت دايراك مقنع حوبة وكتيـن المضـارى يبيـن وكت دايراك فارس أحلام تشاركنـى ونتـم الديـن وكت دايراك أمل بسّام يزيل ألـم البعـاد والبيـن كت دايراك شريك الروح واخدمك حافية القدميـن وكت بحلم بك إنت معاى مجرتق بالعديـل والزيـن جنبك فى يمينك قاعدة نسمع فـى دقـر يـا عيـن تبشر زين مع الأصحـاب وتتشبـل مـن الوزيـن أنا الأبحرت راكبة الموجة أكيد مرسايا بين موجتين وداعاً يـا زمـن ظالـم وبالأفـرح علـىّ ضنيـن وداعـاً يـا قلـب قاسـى لا بيحـن ولا بيلـيـن وداعاً يا سراب خداع محال مابيـروى عطشانيـن وداعا يا كلام معسـول حـدو ومكمنـو الشفتيـن وداعاً يا سحابة صيف شايلى مطر ضليـلا رهيـن تبشر بى خريف جايينا ياما النّاس رجوهـو سنيـن كل زولاً يفكـر فيهـا مـا معروفـه تنـزل ويـن وألف سلام عليك ياقلبى المسالم وديمه طبعو حنيـن يتاورو الشوق ويلعب بيهو تنحر فى حشا السكيـن تعاودو الذكرى تنتر جوه حالـو يحنـن المسكيـن أخيراً منى ليك سلام وقبل ماتجف دمـوع العيـن وقبال منّـى ماتعـدى وقبـال الفـراق مـا يحيـن بخيت وسعيد عليك ان شاء الله يبقالك عمـار وبنيـن وقلبى أنا خلى فى أناتو بعدك يامـا راجـى أنيـن ولو كان يا قلب حبيت بعـدو بعـد قسمـت يميـن ما ينتمّ ليك مـراد لا تضـوق لا حلـو ولا زيـن وتفضل طول حياتك تبكى طول عمرك تعيشو حزين وعمرك ما تجيك سعـادة مـا تتهنـا قـول آميـن وتانى الحب عليك حرمان ووعد الحر أمانة وديـن |
|
|
|
|
05-18-2006, 12:46 AM
|
#10 |
|
عضو مُـميز
تاريخ التسجيل: Mar 2006
المشاركات: 3,547
|
حُبي الفقدتو بعد وَفا
عَكَّر لي جَوِي بعد صِفا وصِبحت سعادتي من المُحال جَمري القديم ما كان كَفى موقِد يَلهلِب وما انطفا جَات تاني هَبَتو ريح منال ريدنا الزمان مالو اختفى مالا المودة بِقَت جَفا ريدًا انت عارفو حُلو وحَلال البِت دي وين كت شايفا أو مَرَّة واحده مَصَادِفا ياصح تقولو سمعنا قال رُوحي المَشَحتَفة عارِفا مالا السِّيرة بِقَت تَخَوِفا شن دار يكون سببا غير الجمال مسكيني فاقِدي عَواطِفا عَشمِاني فيك تَوالفِا راجاك تَجُودلها بالوِصَال قلبي العليل كايس الشِّفا لو شِلتو في حُضنَك دِفَا كان بالسعادة عِميري طال قَدَمِي العليك سَاسَق حِفا هو بَراهو حَالتو يَوَصِفا يَغنِي البيشوفو عن السؤال غالبني حالتي أصنِّفا وِشِّي وقَفَايا بِقَن قَفَا وبقى جِسمي دايما في انتحال |
|
|
|
|
05-18-2006, 12:47 AM
|
#11 |
|
عضو مُـميز
تاريخ التسجيل: Mar 2006
المشاركات: 3,547
|
الاغنية عم الزين
إنو تعوم عكس التيار انت براك البدري إخترت ليه ياقلبي تنوح تتبكي وتندب حظك ليل ونهار لمن قمت ورحت البندر كنت تظن الحال اتصلح كنت بتحلم بي مستقبل فيه ابواب الخير تتفتح إلا لقيت الواقع أمر وزينا ناس تعبانة وتكدح وناسا عايشي معيشتا راقيي بي تلفونها بتخسر وتربح وناسا عايشي علي الماهية من يوم خمسة الجيب إتقمح وناسا عايشي علي خلق الله يمن شحدي ويمن تلفح غايتو الحالة معادلة صعبة كأنوا الناس عايشين في مسرح وانت براك البدري إخترت *** عندي سؤال بالجد حيرني ونشف ريقي وراه نشاف ليل ونهار شاغل تفكيري لما بقيت انا منو أخاف حال الزول القالو موظف وراتبو الشهري شوية آلاف لو عديت مصروفو الشهري أكيد تلقاه أضعاف أضعاف حلو معاي المسألة دية وساعدو معاي العم الزين زول محمول وعندو اطفال شان ماياكلو يجيب من وين يســرق .. ينهــب .. يشـــحد والله كمان يغرق في الدين عندو محمد واحمد وسارة وخمسة اطفال فوقن تومين لازم يقروا وياكلوا كويس لازما يلبسوا لبسا زين قولوا معاي يسوي شنو شان مايعيش هو يجيب وين عم الزين يعلمبوا الباري ديمة عليهو الجوف محروق كان في الماضي ركازة الحلة وياهو البربط للمطلوق هسع وين ياحليلو التايه ودر واصبح جنو كلام يصرف عربي مبالغ فيه وناس الحي سمو النضام مرات يضحك لامن تشفق ومرات يبكي بكا الايتام عنده عبارة تملي يقولا أوعك تحسبا بالارقام تتعب نفسك بي تضريبا واخر حاجة تجيك أوهام انت براك البدري اخترت بعد الشفتو براك ياقلبي أخيرلك ترجع منك وليك خلي وظيفة المكتب طايري لا لا قسم مالايقي عليك عود من تاني وازرع أرض مابتخضر إلا بيديك عــــزة نفسك فـــــــــــــي واطــــــاتـــك جـــم نخـــلاتك وبين والديـــــك |
|
|
|
|
05-18-2006, 12:48 AM
|
#12 |
|
عضو مُـميز
تاريخ التسجيل: Mar 2006
المشاركات: 3,547
|
الرسالة
وقفت بعد حلبت لبينة الشاي تكورك يا الحسن يا ام الحسن وينو الحسن لمن صفت رغوة شخيبات اللبن في حلتا المبني من طبق السكن واقفي في حوش البهايم ولسع تكورك يا الحسن جاها حسا من بعيد مارق من القاطوع ورا قال ليها خير يا الحاجي خير قالتلو خير تعال لي جاي دايراك تعنون لي جواب يا الراسي لي ولدي الخدير لا تبقي زي شافع السرير يقول لي زين آيمة زين وزين تبقي بعد شهير وان جاني يكتب فد سطير اقولو يا سجم السجم انا زي قرايتك ما قريت لكن عويناتي بيفرزن الوريقة البيضاء من لون القلم بعد المغيرب بي شوي جاها الحسن تعبان يسير دا العشى غنمو من الدرب سرقت ندي وشو الهجير سوتلو شايا بي لبن قرض معاهو حرف فطير قالتلو بسم الله قول واكتب وصيتي انا للخدير الزمن يا ولدي ماحقاهو السنين البعيش في الدنيا ما بعيش مرتين العمير فاضلي بس منو اليقين وانت طول في البنادر يا الحبيب لا متين تعال اوريك حق ابوك الجم حقيق حاج اللمين ان عرفتو بلا عمار يقولو ولدا عندو طين العلاج لا تنسي رسلو لي دحين العوينات آجناي شوفن ضنين سلامنا ليك مطرز للبنيات والبنين ولو الارض يا ولدي تنشال في الايدين انا كت برسلا ليكا في لوري الخزين |
|
|
|
|
05-18-2006, 12:49 AM
|
#13 |
|
عضو مُـميز
تاريخ التسجيل: Mar 2006
المشاركات: 3,547
|
يوم فى الغربه ماشى براى وشاقى الحى
لقيت وحـــــيده زى امى ترضع فى وليدا صبى ويعصر قوق ضريعا شديد يناتل فوقو يصرخ وي وجيتا قريب لقيتو ضريعا ضريع امى دارى غزييييير أظنه لبي وقفت شويه وأتاملت فيها كتير لقيت فى وشيها اغرب شئ عيون امى وكت ماتغوص جفون الليل تفتش لى وفى حدقاته تلاقانى أحفظ فيه اشعارى ويدندن بى قصيدة لى واشوف فى قمره وش امى واشوف دمعاتا فى شلاخا جاريات لى بقيت كان شفته بادى هلال تجرى الدمعه فى عيني واتذكر دموع امى يقالدونى ويشابن لى وتنقز دمعه من شلاخا ترقد لى فوق خدي مافى احن من أمى أجيها صغير ،، أجيها كبير تفلينى و تقردن لي تحجينى وتوسوس لى تكبر لى ياولدى واشوفك ضاوى متل الضئ تحججنى وتشيل كُبرى وأشوف اولادك يفرحوا بى أحجيهم والوليهم ينومو العافيه فوق إيدي يوم أسمع كلامك داك أحس بالعبره تخنقنى وتحسي جوابى فى عينيى وأقع فى حضُنك الدافئ واسلم ليك فوق راسك و أضمك انتى بى يدي واحقق ليك أمنيتك مهما تقسا تصعب لي واوديك مكه الفين مره لو الالف يبقى شوي وكان كُبرك أساهر الليل واشيلك يما بى يدي وتكبرى لى .. تحضرى عروسى واولادى ويفخروا بيك متل ما كنتى تفخرى بي ولو ما الدنيا قوقا شويه متل املا أكان القمرى يبقى حدي ويعيش الناس ضلام فى ضلام يفتشوا شمعه بس للضئ شمعه يتفنى متل امى عشان بس نورا يفضل حى أكان ما جيتا من بطنك اكان الدنيا حتى الاخره ضاقت بى عشانك انتى يا امى وعشان بأبوك متسمى وابوك العارفه مازول نئ عشانك انتى قلبى كبير وضيه كتير وماخد من شمعتك ضئ بنده الله انتى تعيشى يا امى وكل الباقى خليه على عشانك انتى يا يما وعشان ما انتى نور عينيى تشيخيى وتعيشى بيناتنا واشوفك قيمه ماشه علي قيمه بتقصد المحتاج وفضلة خيرك يبقى هو حي وخيرك يغشا ك الناس من الماشى بالعكاز لا عند البحبا حبيى وأشوفك فى عيون الناس عبيراً صافى جائي نقي احس نسامو فى جوفي تخش بى سهولة فى رئيتي شعرى القلته يما حزين وكلو مآسي مرت بي الا غناك يا أمى زفره ونبضه نبضه وزفره زفره ونبضه فى دمى وبسمه عريضه فى شفتيى |
|
|
|
|
05-18-2006, 12:50 AM
|
#14 |
|
عضو مُـميز
تاريخ التسجيل: Mar 2006
المشاركات: 3,547
|
بتمشي من غير ما توادعي لا تقولى مع السلامه
برضي ما قادر اعاتبك ولاّ ارمي عليك ملامة ليه تسافري بدون توادعى ينسي قلبك وين حنانو كيف عليك العشرة هانت ريدنا ليه لحظاتو هانو بين مخاوفى شوقى ضايع لما سفرك حان اوانو قلبي كان متمني شوفتك يا العليك تكلوا ورهانو فى السراب صدقت مخاوفى ظنى اصبح فى مكانو ما الزمان دايما معاند واصلوا ما مضمون أمانو عدي فوقى العيد وروح لا معايده لا إبتسامه من بعادك ونار فراقك قلبي عيديتو الندامه والخلوق طلت تبارك بي تهانيها وسلامه والعيون اجفانها لا قت لا استراحت فى منامه فى الغياب سيرتك معايا ياما ناجاك قلبي ياما كلما لاوحلى طيفك ابكي بي دمع الندامه يا مسافري على بلدنا شايلى روحى معاك هديه ليك وللناس الغلابة برضو شايف الروح شويه داير اوادعك كنتا واكتب فى سواد عينيك وصيه ابقي ميه على عيونك ريدنا ابقي عليهو ميه وقولى للوالدة الحبيبه انا جاي في عيد الضحيه كلميلى ابوى عنك عن بنا الريد والمحبه شيلى من بركات عيونك ادى اصحابى الاحبه امشي يوم جمعه الضرايح زورى فيهم قبه قبه قولى للوطن البريدو قلبي بالاحزان معبا غربتي الطالت شقتني وكل يوم زايدانى غربه لما ترجعى بالسلامه جيبي لى معاك نسيمه من بلدنا وجيبى لى من طنابرتا كم نغيمه فوق جمر راجيك تعودي تومه لى روحى اليتيمه تاني لى قبال تسافري وتبقي فى صيف عمرى غيمة وتبقي فى الابد المؤبد خالدة عشرتنا الحميمه ريدة تجمع بين قلوبنا عامره بالنيه السليمه |
|
|
|
|
05-18-2006, 12:52 AM
|
#15 |
|
عضو مُـميز
تاريخ التسجيل: Mar 2006
المشاركات: 3,547
|
الوداع
حاولتا جهدى أودعك لكن وين القاها كلمات الوداع أسجن دموع جوه العيون ياريتو لو طرفى استطاع كلماتى ماممكن تجود بحروفا لى زولا يعيش لحظة ضياع كيف تجود بحروفا عاد بعد اللى كان فى إيدو ضاع ياروحى حبيت أودعك هو الزول بوادع روحو كيف قاسى ووحاتك ما بدور أيام ربيعى اعيشا صيف والله ابقى زى مويتن تتوه لا قادرة ترسى ولا تقيف تهاتى لى عينيك دوام شان تحضنا وتبقالا قيف شايل هموم الفرقة جيت واقف امامك فى خشوع شفته الوجود قدامى اظلم وانطفت كل الشموع وبقيت أقول كلمات حزينه بى آهه من داخل الضلوع لكن قبل ما اقولا ليك ألقاها ضاعت فى الدموع تقولى من بعد الوداع انساكى لا لا ده مستحيل ذكراك بشيلا دموع فرح وفى خاطرى كل صباح وليل وساعة لقانا وامسياتنا وكل افراحنا القبيل شايل على درب الزمن ذكراها مهما يكون طويل |
|
|
|
|
05-18-2006, 12:53 AM
|
#16 |
|
عضو مُـميز
تاريخ التسجيل: Mar 2006
المشاركات: 3,547
|
المواجع
لما نبكى من المواجع قلنا نرتاح فى بكانا قولى كيف نرتاح ونحن نبكى من شدة هوانا الليلة رحلة الأشواق بعيدة والشواطئ بعيد مكانه حتى فى بر الأمانى السنين هدت قوانا كنا نحلم بمداين فيها نرتاح من شقانا قولى كيف نرتاح ونحن نبكي من شدة هوانا القدر طاوع قلوبنا وخلى بحر الريد حدانا ونحن ماصدقنا قمنا نشرب فوق روانا دى المشاعر فينا فاضت غرقت فرحة صبانا ما النعم مرات بتشقى والله بالريد إبتلانا مرة طلت دارنا غيمة ونحن ياما الريد غشانا شايلة فى الخاطر محنة جات تعيش الريد معانا جات تصب فى الريدة ريدة لو قليل يبرد جوانا كيف يا غيمة نرتاح ونحن غلبنا فى هوانا ما غريبة على البريدو يلقوا فى الريده المهانة ياما كتير أحبه غرقوا فى بحور الذل عشانا فى الحقيقة الريدة مره ضقنا مرها فى غنانا ماهو قيس بكى من هواهو مانحن برضوا الريد أذانا يا زمن لو تصفى نصفى فى البوادى يعم صفانا والعيون تصبح مرافئ فيها نرتاح من عنانا رحلة الهم بينا طالت ملت التسيار خطانا نعمل آيه ما نحن غلبنا فى هوانا |
|
|
|
|
05-18-2006, 12:54 AM
|
#17 |
|
عضو مُـميز
تاريخ التسجيل: Mar 2006
المشاركات: 3,547
|
اجمل اغاني الشايقيه --للاستاذ ميرغي النجار
-------------------------------------------------------------------------------- [ الاستاذ / اب شعب انساكي كيف ومنك سلام ما جاني لا جواب وصول رسلتي لي ولا جابلي زول منك كلام اقدر اقول مهتمه بي ولو حتى كل الكون يهون ما هان غرامك يوم علي رغم الفراق بالسنين لسع غرامك جمر حي والشوق وحاتك زاد وقد بدل ربيع ايامي صي داير اكون جنبك قريب دايرك تكوني قريبه لي داير معاك ارتاح خلاص من شوقي من شجناً علي انساكي كيف |
|
|
|
|
05-18-2006, 12:55 AM
|
#18 |
|
عضو مُـميز
تاريخ التسجيل: Mar 2006
المشاركات: 3,547
|
يادنيا
للشاعر خالد عبدالله بخيت يادنيا بي حظي الزريع بتحمـــــــــل القـــــــــــــدر المريع خايف من الاحزان اضيــع ما القي بي قربــــــــي الوجيع صوت القوافي البيك تنوح والسالفه في لحظة وضـــوع فارقتي والايدين تلوح رسبتـــــي في عيني الدمــــــــــوع وريني وين بعـــــــــــــــدك اروح بينا اقطع عشم الرجوع في قلبي ما بتبري الجروح من فتي فارقتي الهجـــــــــيع ليه دنيتــــــــك كانت ســـــــراب ممـــــدودا بي مد العذاب احزني لازمني اكتئاب وانا بي وراكي شــــــــــبابي شاب سدي المداخل وكل باب طــــــليني من دنـــــــــــيا الغياب بلقاكي في نفـــــــــــس الرباب واشعاري ليك عالم وسيع ساهرتا طول الليل معاك كم مره عــــــــــــديت النجـــــوم ما طافت الاحلام رؤاك لو اضمن احلمـــــــــبك بــــــــنوم ياقلبي يا ضايع كفاك شـــــن جبـــــــتا غير حسرا وهموم ابكيها لو ينفع بكاك الدمعه ما بتجــــــــــــدي الصــــــريع فارقــــــــــــــتي في عـــــز الغرام من قبل ما تثبت خطاي افردتا ليك درر الكلام خلــــــــــدتا وصفـــــــــك في غناي ماانتي ما بيـــــــن المسام في كل احســــــــــاسي ومعاي طفل الغرام البينــــــــــا نام اتلافتو الاقـــــــــــــدار رضيع سبتيني لحـــــــزني العميق للحسره لخـــــــاطري الجريح ياريتني لو اقدر افيق لو متـــــــــــا يمــــــــكن اســتريح يا دنيا طال بي الطريق وانا بين مسافــــــــــــاتك كـــسيح كيفن وصولي بلا رفيق والخطـــــــــــوه كيف بعدك تطـيع زود شجـــــــــوني علي العـــــلي طيف المهاجر مني فات يادنيا ما بايـــــــدي شئ غير الله يلهــــــمني الثبـــــــــات والباقي في جواي حي ياحليــــلو ودع سيـــــــــــدو مات ببكيهو عمــــــــــــري الباقي لي فوق الدموع لو بستطيـــع |
|
|
|
|
05-18-2006, 12:56 AM
|
#19 |
|
عضو مُـميز
تاريخ التسجيل: Mar 2006
المشاركات: 3,547
|
محمد النصري
يا حسرة قلبي الجريح ما بان في دربك شعاع كيفن بعد ريده وحنان آخر المطاف يبقي الضياع أديني من زمنك زمن قبال يحين وقت الوداع ** ** ** بين يوم وليله آيه الحصل وريني ما سبب النزاع احلامك الكانن معاي مالن بقن لوعه وصراع وايامك العشقن صفاي يا غالي ليه مرن سراع ** ** ** خليني لي همي وشقاي خلي اليكون قلبك شعاع مهما يكون ريدتك صدود لي حكمك الامر المطاع باكر يجود تاني الزمان يرحم يجيب سمح الطباع ** ** ** والواقع الما بيرضي زول خلي اليروح ما دام متاع أخديهو من عابر كلام وهاتي المفيد من وضياع القالك الريده انتهت في الريده ما عبرلوا باع ** ** ** والبيك بلا حن كيف يكون مادام احساس ساسو الخداع والباني ريدو علي النفاق دي الريده ما بتجنيلو صاع |
|
|
|
|
05-18-2006, 12:57 AM
|
#20 |
|
عضو مُـميز
تاريخ التسجيل: Mar 2006
المشاركات: 3,547
|
محمد النصري
معذوره لو قلبي اشتهاك ما إنت عارف *** فرقتك ما بيحملا القلب الهواك ده مناه يوم ما نفترق يا ريتو كان يفضل معاك لو بي مرادو يقوم يجيك تلقاه بين ايديك حداك *** متمني يلحق بيك سريع نتلاقي والاشواق هناك جاييك هارب من سنين جاييك واقع في حواك *** غلبو النواح يوم فرقتك بالدهشة خانس إتعبر ما بين نوازع الروح إليك هايم وبين حكم القدر *** ما اتزعزع الإيمان جواه ولكنو في الآخر بشر قايل عليك شدة وتزول ما قايلك إنت علي سفر *** ما كان هو فاهم يومو داك ايه ضحكت البرق اللصف ولا كان هو شايف للهموم الجايه واقفات ليهو صف *** ولا كان هو حاسس بالغرام الباني في الغيم اتنسف لقي نفسو فجأة بلا وجيع مفجوع ومفقوع بالأسف *** يا ريتو كان وقف الزمان قبال تروح صدّ ورجع ما كان غشانا الحزن يوم لا فرقه بيناتنا بتقع *** كان لا رثيتك لا بكيت لا قلبي فيك يوم إتفجع وما كان قدر ذكراك صبح يومها التزور مره ورجع ******* |
|
|
|
|
05-18-2006, 12:59 AM
|
#21 |
|
عضو مُـميز
تاريخ التسجيل: Mar 2006
المشاركات: 3,547
|
سوقني معاك يا حمام
سوقني معاك يا حمام ... ... سوقني محل ما الحبيبة قريبة تراعي الغرام غريبة الأشواق حبيبة يجيبا منام في منام ... ... سوقني محل ماالمحنة وأيادي تقطر سلام سماحة الحياة فوق أهلنا وبلادي تقرقر وئام ... ... غلابه وأمان مو الطيابة ضكارى بصارى وكرام حبابه الحبان في بابه وتدخلوا عليّ الحرام فقارى ولكن غنايا غنايا بهذا الغمام بهذا النيل كم تغايا وتيرابا نرميهو قام ... ... إرادة القمره البتقدر براها تضوي الضلام شعاع شمشاً ياما خدّر وإذا يبَّس لا يُلام ... ... فيابا خرابا الحرابة وخرابة فكر سوسي سام خرابة الكل نفسو تأبى عقابه .. تلِم عم سام ... ... ولِيد مخلوق للقراية خزين مدخور للجِسام تتمر نيتو التخاية إلاما مذهلل إلام درب من دم ماب يودي حرِب سُبّه .. حرب حرام تشيل وتشيل مابِ تدِّي عُقب آخرتا إنهزام ... ... بطانة الشيطان قديمِة وبعد دا منو العرشو دام إذا الإنسان ما ليهُ قيمِة علي إيش خلَّفُو سام وحام ... ... تعالوا الدم ما هو مويةِ ولا ها ترايي المسام أخويا وطراوة الخوة إبتسام ... ... تعالوا نحانن بعضنا نخل قلبو على التُمام نبضنا يشهل أرضنا وأرضنا تجِم العضام ... ... تعالوا بدل نبني ساتر نخيب ظن الصدام نطَّيب للعازه خاطر نقوم لأطفاله سام ... ... أخير كرّاكةً بتفتح حفير وتراقد الركام أم الدبابة البتكشح شخير الموت الزؤام ... ... تعال لي غابتك يا خيرا تعال لها يا أسده الهمام بدل دوشكة يغني طيره محل قنبلة عش نعام ... ... بلد صمَّي وشعب واحد عصية على الإنقسام أبيه وبكراها واعد صبية ومشهاده تام ... ... بساط أحمدي كم يشيلنا وتشهِّلنا على الدوام نَقِل ليلنا تقوِّي حيلنا ودليلنا تمام التمام ... ... نلقّم سقف المتاهة نجم هدّاي في الضلام ونطعِّم حرف النزاهة لإيئلافك يا حمام ... ... ديموقراطية وأمان سوا .. سوا عالين مقام مواريثنا المن زمان محصَّنة في أروع نظام ... ... بريدك يا زول بريدك بعشقك حتّى الهيام أريحيتك عد تزيدك مهابة وليك القيام ... ... عهدي معاك يا حمام حبِيْب الرُسل الكرام رسول الأمراء العظام عصامي على ما يرام ... ... ماب تهدِل في خنادق ولا ب تقدِل فوق حطام ولا ب تنزل في فنادق وسطنا مراعيك قُدام ... ... فيا ملدوغ من أديس معوَّق في كوكدام تعال عمِّر فينا ميس كفانا طشيش الكلام جناحيك جنوب شمال وأمش طوِّف يا حمام محِل غصن العزّة مال عليك وعليهُو السلام حكيم الطير يا مهبِّر شُراكة القَتَلة اللئام متين بإسم الحق تكبِّر وبالرحمة تصلِّي إمام ... ... فلاحة العالم تعمر محبّة مودة ووئام تشمِّر ساعد السلام ... ... سوقني زمن كُلُّو عافي نتاجو عِلم خيرو عام بري آيمة من المنافي وطن وافي على الدوام |
|
|
|
|
05-21-2006, 10:34 PM
|
#22 | |
|
عضو فعال
تاريخ التسجيل: Feb 2005
الإقامة: السودان
المشاركات: 434
|
اقتباس:
|
|
|
|
|
|
05-23-2006, 08:02 PM
|
#23 |
|
عضو مشارك
تاريخ التسجيل: May 2006
الإقامة: سوريا
المشاركات: 53
|
شكرا يازووووووووووووووووووووووق
|
|
|
|
|
05-25-2006, 05:22 PM
|
#26 |
|
عضو مشارك
تاريخ التسجيل: Nov 2005
المشاركات: 118
|
والله يا ست الجمال اناماني
باكي علي ضياع امالي فيك ولا حتي نادب حظي ساعه جابني ليــــــــــــــــــــــــــــــك ما خلاص قنع قـــــــــــــــلبي القبيل ميال عليـــــــــــــــــــك يقنتو يا ســـت الجــــــــــمال علمتو ما يشتاق يشيــــــــل الشـــــــــــــــــــوق يجيـــــــــك شكرا يارائع والله تسلم علي الدرر دي |
|
|
|
|
05-26-2006, 10:41 PM
|
#27 | |
|
عضو مُـميز
تاريخ التسجيل: Mar 2006
المشاركات: 3,547
|
اقتباس:
مشكور اخى ريح الشمال على المرور الجميل ومشكور على التنبيه وسوف نقوم بالتعديل |
|
|
|
|
|
05-26-2006, 10:42 PM
|
#28 | |
|
عضو مُـميز
تاريخ التسجيل: Mar 2006
المشاركات: 3,547
|
اقتباس:
مشكور اخى عبود
على المرور الجميل تسلم |
|
|
|
|
|
05-26-2006, 10:43 PM
|
#29 | |
|
عضو مُـميز
تاريخ التسجيل: Mar 2006
المشاركات: 3,547
|
اقتباس:
اخى منو تسلم ياحبيب على المرور الجميل |
|
|
|
|
|
05-26-2006, 10:46 PM
|
#30 | |
|
عضو مُـميز
تاريخ التسجيل: Mar 2006
المشاركات: 3,547
|
اقتباس:
الرايع جدا ودنورى
مشكور ياحبيب على المرور الروعه ومشكور على الكلمات الطيبه تسلم |
|
|
|
|
 |
| أدوات الموضوع | |
| انواع عرض الموضوع | |
|
|
العرض العادي
