د/ عادل الصادق المكي

العندي ما بدي.. وحق الناس بقالع في


مقولة متداولة ومتواترة قالوا عن سيدنا علي كرم الله وجه.. وهي لو كان الفقر رجل لقتلته. زعلان منو ما براهو كلنا زعلانين.. وأريتو كان بقى راجل ولاقانا في سهلة الله أكبر.. كان شبع موت.. علا هو في الشرق والرجالة في الغرب.. من أكتر الأشياء المزعجة والما مريحة الغنى بعد فقر.. زول يكون كان فقران وغنى.. دا ح يحاول بقدر الإمكان يحافظ على قريشاتو.. ويخاف يرجع لأيام الشلهتة والفقر.. تلقاهو بقى بخيل.. شكوك يشك في أي زول يحوم حولو.. يخاف الحسد.. والعين.. من أغرب وأبخل أثرياء العالم كانت مرا اسمها فكتوريا هنت.. ضاقت المر أيام طفولتها.. كانت بتاكل من الزبالة شماشية عديل.. في أواخر عمرها ربنا فتحها عليها وبقت غنيانة غنى شديد.. لكن كانت قحف وبخيلة.. الشهر إن جنّ وسوهو ستين يوم ما بتصرف فيهو أكتر من تلتمية دولار.. عشرة دولارات في اليوم فقط لا غير.. وإن اتجبرت وصرفت حداشر دولار كية عليها تخصمن من مصاريف باكر.. وقالوا من شدة بخلها وعشان ما تصرف موية كانت بتسقي ورود حديقتها من بولها.. “استثمار في ما يخرج من السبيلين”.. غايتو مرا زي دي الله لا قسم لك معيشة معاها!!!!!.. وممكن زي دي لو جاها حبس بول وناس المستشفى وفقوا وفكوها تجيب لها جردل.. وتقول لهم هنا دا بس.. وتشيلو وتمشي على زهورها.. وإن غلطت ممرضة ودفقتو تداعيها “دفقتيهو؟؟. يدفق عميرك يا يمه”..
عظيم برميجي.. راجل غنيان شديد صاحب أعظم شركات التكنولوجيا.. دا قالوا بخيل من الطراز الأول.. لدرجة أن يعد مناديل الورق الفي الحمام.. واستعمالها.. يعني مافي زول من أهلو يخمش ويخم منها.. لما يكون مسافر برا في مهمة عمل يرجع من المطار.. شايل شنيطو.. ويشوف أقرب ركشة ويركبها.. التكسي غالي عليهو.. ديل مثلين لأبخل أثرياء العالم.. وأي زول فينا لو اتلفت حولو ح يلقى ناس كتيرين بخيلين.. يلموها ويموتوا يخلوها للورثة.. والورثة يبرطعوا فيها.. جاياهم مجاني. وما ضاربهم فيها حجر دغش.. مارك زوكينبيرج.. سيد الفيس بوك مصنفنو من أبخل أثرياء العالم.. ومتلوم في نفسو وفي مرتو.. وهاريها بالسندوتشات.. ومرات قالوا في ضمتهم لو لقى السندوتش كبير شوية وشادي حيلو يقولها نتقاسمو “والفقرا اتقاسمو النبقة”.. ما بيستاهل!!!! وقالوا لما عرس سوا الحفلة في زقيق بي ورا في حوش بيتو.. والناس الجو شوية.. علا ما بعرفو عشاهم شنو؟ لكن قطع شك تكون سندوتشات!!!
بعد ما فتشت عن الناس الغنيانين ديل وماسكين.. لقيت أنهم بيشتركوا في الفقر والبشتنة والبهدلة في طفولتهم.. وتصرفاتهم دي خايفين يرجعوا للفقر تاني.. دا واحد من أهم الهواجس البتركب الزول الغنى بعد فقر.. ومن الحاجات برضو البتزهج الزول الغنيان الملل.. يلقى نفسو سوا أي حاجة نفسو فيها وبعد دا يبقى زول ونسة سااااكت. يسوق معاهو خمسة أربعة تنفار يباروهو ويونسوهو.. برضو الإحساس بأنو الناس بيكرهو عشان مقرش.. ومافي زول بيعمل ليهو حاجة عشانو شخصيا لكن عشان عندو القرش “القرش عند سيدو والناس تريدو”.. ودي تخليهو ما يثق في أي زول.. أي زول يقرب منو تلقاهو طوالي هبش جيبو!!!!!


تعليق واحد