مدخل:-
أصبحنا نعتمد في حياتنا وامورنا كلها.. على الواسطة أو الولاء.. أو أي حاجة تانية تقود الي شغل منصب أو شغلة لي زول هو ما أهل لها.. علا اللهم قرابتو.. أو ولاءه.. أو سماحتو لـ(البنات). حتى الغناء دا.. الفنانة السمحة تمشي.. الشينة ترجع على تُكُلها ودوكتها وعواستها.. في قنواتنا الفضائية.. يجيبو مقدم برنامج أو مقدمة برنامج.. تتعلم فينا التقديم.. زي الحلاق البيتعلم الزيانة في روسين اليتامى.. ونحن شعب يتيم.. عاين لاقرب زول جنبك.. اليتم ظاهر في وشيهو يحننك.. لو عاينت للمراية تحننك روحك.. تتفن في الواطا وتخت ايديك فوق نص راسك وتقعد تجعر وتنعي نفسك “أنا باقية علي دي.. اكنها؟”.. ثم تنسى نفسك وتقوم.. وتقع الشارع وتحوم مع الحايمين.. انت واسرتك.. كل في واد يهيمون.. الأبو جاري ورا المعايش وايدو ما تلحق خشمو.. الام كل يوم الصباح متمحنة تسوي الاكل شنو؟.. الوليدات كل واحد غازي ليهو سماعات موبايل في اضنيهو.. ومطنش الدنيا ما يحس بيها إلا في أوقات الوجبات الغذائية.. قوم افطر يمشي ياكل وينقنق يمرق السامعات ويقول لي امو”يمة.. الليلة فطروكم دا، زهجان كدي مالو؟” ويرجع يتبطح لحدي ساعة الغدا.. البنيات.. يتجارن ويتبارن في ملاحقة الموضة..
في خشم الباب:-
عشية يوم صرف الماهية .. دخل البيت قريب المغرب.. قابلتو بنيتو.. وهي تنطط فرحة جذلة بقدوم الوالد.. البنية تعاين لي جيوب البنطلوب.. تلمس جيب.. فيهو كيس سعوط.. وكانت تحسبه قروش.. تصاب بالاحباط.. ترفع راسها فترى جيب القميص منتفخ.. تقول ليهو “اها .. اوعى تقول لي كمان الفي جيب القميص دا سعوط برضو؟ انت يا ابوي جنك سعوط.. انت ح يمتحنوك فيهو..؟”.. يقول لها الوالد وهو داخل “دي الماهية.. الماهية”.. تفرح الصغيرة.. وتشعبط في يد ابوها وهم داخلين.. وتقول ليهو “يا با.. أنا بعدين عندي معاك كلام سر”..
في الأوضة:-.
ما زالت الصبية.. متلحة أبوها ذو الماهية.. قالت له ذات العشرة سنوات وهي تعصر ليهو في كرعيهو:-
(اقول ليك الكلام السر يا ابوي؟)
قال ليها”قولي”!!
(أها.. أولك بالتبادي .. دايرة لي خمسين جنيه عشان أقد نخرتي.. فردة واحدة.. واللا اقول ليك تمهن مية عشان أقد الفردتين.. الاضنين عفيتك منهن اصلهن مقددات.. ومتين جنيه عشان اسوي لي تاتو.. في جضمي وتحت شلفوتي بالظبطي).
رفع راسو وهو منبطح في وضعية الضب ونهرها “يا بت تتاتي سكرانة”
فكت الكرعين ومشت وقفت في خشم الباب في وضعية كان راجل الحقني وقالت ليهو:-
(ودايرة لي حداشر مليون.. عشان اعمل تقويم لي سنوني.. شايفة البنوت ججججت.. مركبات فيوزات في خشومن.. علا انا دي.. ونوال اختي.. مسكينات أي موضة تمشي وتجي ونحن ما نضوقا.. كلو منك انت دا.. عامل كريعاتك الزي الزردية ديل يا قول امي)!!
مخرج:-
(القيامة دي اتاخرت مالا؟
جحا.. و.. بنتو
