كلام عيال

[SIZE=5][JUSTIFY][CENTER][B] كلام عيال [/B][/CENTER]

رفضوا الصغار شاي الصباح

قالوا بس دايرين عصير

مخلوط مع سكر تقيل

واتفتحت فيني الجراح

* * * *

من وين اجيب هسه العصير؟!

والوضع جوه الجيب خطير

يادوب قدر حق الملاح

* * * *

السكر اتعزز وطار

والفاكهة شبت فيها نار

والغلا.. لا نام لا استراح

* * * *

وأولادنا في درس العلوم

ما درسوا أنواع السموم

ما جربوا الجوع والنواح

* * * *

معنى التضخم ما اتفهم

وما عرفوا سودانا انقسم

ما دام على الكتب اترسم

نفس الخريطة مع العلم

من دون تواقيع أو سلاح

* * * *

تاريخنا أصبح ذكريات

وأملنا في بترولنا مات

متلفحين توب الثبات

ومن كل شق.. تعصف رياح

* * * *

الرحمة فارقت القلوب

كترنا أنواع الذنوب

تاجرنا في كل العيوب

والجور صبح زينة ووشاح

* * * *

وعيالنا.. ما عارفين كتير

الخوف يكون نفس المصير

مستني أيامهم تسير

لكنهم.. كل المهم بس عندهم

يلقوا العصير.. دون أي أعذار.. أو أي تبرير

*تلويح:

خلق أبناؤنا لزمان غير زماننا….اللهم فاجعل أيامهم خيرا من أيامنا… آمين.

[/SIZE][/JUSTIFY]

إندياح – صحيفة اليوم التالي