ضربة واشنطن

> قونا في الترجي عاجبني شديد
> ماعشان بكري الفقري كان السبب فيهو
> ولا عشان بكري خلي اربعة مدافعين وراهو
> ولا عشان علولو اوقف قصة اهدار ضربات الجزاء من قبل اولادنا
> القون عاجبني جداً
> لانو في مرمى الترجي
> وقون في مرمى الترجي
> زي ضربة واشنطن
> زي وقعة برج التجاره في نيويورك
> حاجه كده ليها اثرها
> وما بتمر ساي
> يعني ضربة برج التجاره عالمياً
> ما كانت زي رباطين او قطاع طرق همبتوا ليهو زول
> فرق كبير
> عشان كده القون عاجبني جداً
> واحس بل اكاد اجزم بأن هذا الهدف هو اعلان تأهلنا للمجموعات
> الترجي يشوف كونفدرالتو وين
> بالمناسبه
> الترجي ده قبل كده
> عشان نغلبوا في البلد دي
> لعبناهو الساعه اتنين الضهر
> الشمس بره
> والبلد وقتها كانت متهمه بالسحائي
> برغم السحائي كان الاصرار علي اللعب الساعه اتنين
> شمس زي الشمس
> وبرضو ما غلبنا الترجي
> طلعت بي شمسها ديك درون
> وقبل كده
> بدل ندي الترجي ضربة قاضيه
> ادينا الحكم بونيه
> في كورة الترجي بين الشوطين
> يوم المسيكني جاب القون هنا
> والغريبه برضو جاب القون هناك
> والاغرب انو القونين بنفس الطريقه
> وما نزل موظف سفارتنا بين الشوطين يستجدي الترجي ايقاف الاقوان بعد السته
> يبقي لينا حق نفرح
> عشان غلبنا الترجي بدون شمس وبدون بونيه
> غلب عديل كده
> اجبر التوانسه علي التطفيش
> والعك
> لدرجة انو في ناس قالوا ده ما الترجي البنعرفوا
> وليهم حق لانو الترجي البعرفوهوا
> بغلب ستات وخمسات
> لكن ترجي ينضغط لمن يطفش
> ده ما بعرفوهوا
> ده بنعرفوا نحنا
> ايها الناس
> مشروع الدعم 2870 قرب يطلع سانغا ساي
> قرب يطلع ماسوره
> والسبب هو اهمال المجلس
> او قل ادروب للمشروع
> واسقاطه لاصحاب الفكره
> والمضي في الموضوع بفرديه متناهيه
> كيف بس
> ادفع اشتراك لمدة سنتين
> يطلع تبرع ويشيلوا مني كمان رسوم اكتر مما يتصوره العقل
> وكمان تجيك رساله
> لو داير تلغي الخدمه تعمل كده وكده
> تلغي شنو يا حبيب
> الاشتراك حسب الاتفاق لمدة سنتين
> من وين جابت الشركات الغاء الخدمه يا ادروب
> ايها الناس
> شخصياً لا اميل لفهم انو الموضوع مقصود
> ولكن ارجح كفة الاهمال وعدم الدرايه
> اين الترويج للمشروع يا ادروب؟
> اين الإعلام والإعلان عن الخدمه يا ادروب؟
> اين مريخاب الخارج من الشمروع؟
> اين انت يا ادروب؟
> ايها الناس
> الموضوع اذا ما اتلحق بطرشق
> وبلحق سانغا
> ايها الناس
> نفكر ونبتكر
> وغيرنا يقلد
> وما معقول المقلد يطلع شغل افضل من المفكر
> ولا شنو يا ادروب؟
> ايها الناس
> اكتب قبل مباراتنا ضد النسور
> ولكني اتوقعها مباراة جميله
> وشريفه
> وبدون اخطاء تحكيميه
> فالتحكيم عودنا على الاخطاء التي لا تظلم في مباريات بعينها
> المهم
> من الذي أثار موضوع الاستقالات في هذه المرحله؟
> اليست هي الاستقالات المقدمه منذ شهور للوزارة؟
> ان كانت الاجابة بنعم
> لماذا اثيرت الآن؟
> وما هو صالح المريخ والوزارة في اثارتها ونحن امامنا موقعة باب سويقه؟
> ولماذا تزامن ذلك مع قرار اللجنه باعادة مباراة أمل عطبره؟
> وهل تزامنا صدفة؟
> المريخ ده مريخ ايران ولا شنو يا ساده يا مسؤولين؟
> ده الكلام البجيب الكلام الما بتحبوهو
> وبالطريقه دي الحل واحد
> بس بتقدروا ترجوهوا؟
> ايها الناس
> للمريخ رب يحميهو
> وجمهور لوصبت المطر عليهو
> نقطه ما بتنزل الواطه
> جمهور يغطي عين الشمس
> وبعرف يحمي مريخو كيف
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> عاصفة الحزم انتهت قالوا لينا
> ولسه الحوثيين جوه المدينه
> وماسكين المناصب يا والينا
> هي حرب عندها اهداف يا والينا
> ولا كورة تنتهي اذا انتهى زمنها اياً كانت النتيجه.. ورينا
سلك كهربا
ننساك كيف وما فاهمين حاجه وحاة ربنا
والى لقاء.
سلك