· تسجيل (عمر بخيت) في المريخ بعد (14) سنة من تسجيله في الهلال زي الزول البضبح رابع يوم في العيد
· يمين المريخ الواحد بقى لو ما ذاكرتو قوية ..يلخبط فيه عديل كدا..يعني عادي تدخل مباراة للمريخ – للشوط التاني تكون بتشجع في (الهلال)
· انتوا عارفين هلال 2007 الوصل المجموعات – هو نفسو الوصل بالمريخ مجموعات 2015م
· اول مرة اشوف لي (سيستم) يرفض انهاء التعاقد…دي سيستم وإلّا غفير مدرسة – البعمل فيه سيستمكم دا
· دي (سيستمكم) مع الناس.
· عملتوها ظاهرة.
· ملوخيتكم ملحها كتير.
· لاعب نسجلوا قبل (14) سنة تسجلوه الآن.
· فضيحة السواد.
· عارفين دي زي شنو؟.
· زي الزول البضبح رابع يوم في العيد.
· دا فهم شنو دا؟.
· النكتة بتفهموها بعد (14) سنة.
· هيثم مصطفى سجلوه بعد (17) سنة في الهلال.
· عمر بعد (14) سنة.
· القصة (سستمت) عديل كدا.
· علاءالدين يوسف عامل (سيستم).
· تراوري عامل (سيستم).
· الباشا (سيستم).
· المعز محجوب عامل (سيستم).
· بكري المدينة عامل (سيستم).
· عمر بخيت ذاتو عمل (سيستم).
· يمين المريخ الواحد بقى لو ما ذاكرتو قوية ..يلخبط فيه عديل كدا.
· عليكم الـلـه انتوا ما بتضهبوا في (مريخكم) دا.
· تاني ما اسمع لي واحد فيكم يقول مريخنا يهز الارض.
· قولوا لاعبي الهلال السابقين يهزوا الارض.
· المريخ عندكم فيه شنو؟.
· يعني عادي تدخل مباراة للمريخ – للشوط التاني تكون بتشجع في (الهلال).
· ما ناقش اي حاجة.
· يا ناس المريخ بقى عندكم فريق – نحن قبل (15) سنة كنا بنقنع فيكم بيه.
· هسع فهمتونا بعد (15) سنة.
· الكلام وقع ليهم يا دوب.
· عملوا محو امية.
· محوا امير كمال ورمضان عجب.
· جابوا ناس المعز وبكري وعمر بخيت.
· اولاد الهلال في المريخ – بقوا اكتر من اولاد المريخ في المريخ.
· والـلـه مفروض تقسموا لينا في دخل مباريات المريخ.
· وتقسموا لينا في (تحويل الرصيد) ذاتو.
· نحن عندنا في المريخ – اكتر ما عندكم فيه.
· ويقولوا ليك ما تتكلم عن المريخ.
· هو المريخ وينو؟.
· نحن بنتكلم عن الهلال زمان.
· انتوا عارفين هلال 2007 الوصل المجموعات – هو نفسو الوصل بالمريخ مجموعات 2015م.
· حكايتكم حكاية.
· وبرّد يا.
· الشفيع ود السمنة جاهم جاري من السوق.
· قابض عراقيّه في خشمو …وطابق (شبشبو) في اباطو – يلهث متل (كلب الحر).
· سنونو التلتاشر جارية قدامو متل (بدال العجلة).
· قابلوه في بداية الشارع – قالوا ليه يا زول قول باسم الـلـه في شنو؟.
· الشفيع ود السمنة قال ليهم ..خلوني اخد نفسي.
· قعد في الواطة..ورفع ايدو في السما وقال ليهم : (السيستم قفل).
· (13) مرا – جن طالعات من جوة – طقن الكواريك في (الصقيعة).
· حاج الامين – طلع من صالونو قال ليهم قولوا باسم الـلـه – الدنيا ما فيها خير.
· اصلو حال الدينا كدا.
· لكن (السيستم) دا كان متحسس – وإلّا براهو كدا؟.
· والـلـه ما كان عندو اي شيء.
· السيستم سجل ليك ناس جوليام وجونيور زي الطلقة.
· محترف الاهلي الخرطوم ما قال فيه حاجة.
· ناس (الامير) في بحري عندهم محترف ..ما قال ليهم شيء.
· بس من جابوا ليه (الياسو) والساعة 12 جات – قال ليهم السما قريب.
· السيستم اتلفت غادي.
· يا جنا انت الموضوع دا عندو علاقة بالكبر.
· الياسو دا كبير في السن – قالوا ليك في (السيستم) ما نزل.
· السيستم رفضو.
· حلف بي التقطعو.
· زول يرفضو (السيستم) عاوزين تعملوا بيه شنو؟.
· لكن ناس مجدي شمس الدين ديل عندهم (سيستم)!!.
· سيستم زي (الكلب البوليسي).
· برفض البرفضو – وبقبل البقبلو.
· الياسو عرفناه.
· كوفي مالو؟.
· اول مرة اشوف لي (سيستم) يرفض انهاء التعاقد.
· دي سيستم وإلّا غفير مدرسة – البعمل فيه سيستمكم دا؟.
· قادر الـلـه.
· الموضوع قديم.
· اصلكم انتوا كدا.
· دا طبعكم – يعني ح تشتروه.
· جمال الوالي وقت كان بقدم (استقالته) – حكمة الـلـه (السيستم) كان منو وليه كدا برفضها.
· بحلف ما يقبلها.
· يتقطع ما بشيلها.
· سيستم (احساسو عالي)..وشعورو مرهفة.
· كيف (السيستم) ما برفض استقالة جمال الوالي ..اذا كان حال المريخ بقيف.
· عشان كدا جمال الوالي بقى يقدم استقالته بقلب (قوي).
· عارف (السيستم).
· مسيطر سيطرة تامة على (السيستم).
· السيستم في (الجيب).
· والجيب في السيستم.
· علم والـلـه.
· ونحن (المساكين) ما عارفين اي حاجة.
· جماعتكم (الدايشين) ديل – ما جايبين اي خبر.
· السيستم عندهم زي (القضاء والقدر) – ما بقدروا يقولوا فيه اي حاجة.
· وقت يقولوا ليهم (السيستم) قفل – الحديث انتهى.
· يشيلوا نعليهم في ايديهم ويتخارجوا.
· ونحن حسب عقلنا دا – كان فاكرين رفض الاستقالة من (الوزارة).
· قايلنها من (السلطة).
· السلطة مسستمة.
· المشكلة طلعت من (السيستم).
· ونحن نشيل ونعترض.
· نشيل ونقص.
· عندنا في الحلة الفوق – عمنا (حسن سيستم).
· زول صعب.
· ما بتفاهم.
· وقت يقول ليك حاجة – بطلع ليها فوق رأس البيت.
· بقيف ليها برة في الشارع.
· حسن سيستم دا – كان عندو (7) بنات.
· الاولى اتزوجت عادي – الوقت داك ما كان في (سيستم).
· التانية مرقت – الـلـه شافها من (السيستم).
· التالتة – النظام اتغير.
· التالتة اتقدموا ليها ناس من البلد.
· جوا في السخانة دي راكبين ليهم (لوري).
· وقت نزلوا – قطعنا فيها خمسة الواح تلج.
· عطش شديد.
· ودورنا ليك في (الشاي).
· الزول الما عندو قضية بالشاي قطع ليه (13) كباية شاي.
· في علاقة (دفينة) كدا بين الشاي والناس البتركب اللواري.
· في علاقة مريبة.
· المهم الجماعة ديل وقت صلوا صلاة المغرب – اعلنوا انهم في زيارة رسمية.
· وقالوا لي (حسن سيستم) نحن بنطلب يد بنتك (نجاة) لي ولدنا عثمان ابوروريس.
· حسن سيستم قال ليهم عثمان دا شغال شنو؟.
· قالوا ليه شغال في (مترة) ود الجاك.
· ما في زول بقلع البصل متلو.
· قال ليهم عثمان دا قرأ لي وين؟.
· قالوا ليه قرأ لي رابعة.
· كمّل رابعة ابتدائي وطلع.
· لكن القراية ما في زول بلحقو فيها ..بقرأ ليك الجرايد بي اعلاناتها.
· واي لافتة في الشارع تقابلو بقرأها ليك.
· الدكاترة الفى الشارع ديل ..كلهم بقرأ تخصصاتهم.
· حسن سيستم ..قال ليهم الزول دا عمل ليه بيت؟.
· قالوا ليه ما عندو بيت ..لكن خالتو قالت بتقسم ليه الحوش وقت يعرس.
· عندها حوش الحصان يجري فيه اربعة ايام.
· حسن سيستم ..قال ليهم عثمان دا عندو اخوات.
· قالوا ليه عندو (11) اخت – ابوه قبل ما يموت قال ليه لو ما عرسن ..ما تعرس.
· ان عرست يا عثمان ما عافي منك.
· حسن سيستم قال ليهم : وعرسن.
· قالوا ليه عرست الصغيرة – لكن طلقوها في سنتها ..جات راجعة بيت ابوها بي شافعها.
· حسن سيستم ..شال ليك البيانات دي ..دخل جوة وجاء راجع بعد ساعة ونص.
· انا ما عارف في الساعة ونص دي عمل شنو؟.
· لا اقول ليكم اتصل بي مجدي شمس الدين – لا اقول ليكم اتصل بي اسامة عطا المنان.
· حسن سيستم جاهم راجع بعد ساعة ونص ووقف في باب الصالون – وقال ليهم يا جماعة معليش : (السيستم قفل).
· الجماعة سمعوا ليك حكاية (السيستم) قفل – ختوا الشاي من ايديهم ..وركبوا اللوري حقهم وقبلوا على البلد.
· رجعوا في ليلهم داك.
· حسن سيستم عندو خمس بنات ..السيستم قفل عليهن.
· هسع زولكم قاعد حارس (الخطة الاسكانية الجديدة) يمكن يطلع ليه بي قطعة ارض وقت ما طلع ليه بي عريس.
· ………..
· ملحوظة : عندكم (سيستم) يا ناس المريخ متل (اللوتري) شغال بالحظ.
هوامش
· حكاية عمر بخيت – ح نكون معاكم فيها عبر (تلفزة مباشرة).
· تلفزة (24) ساعة.
· انتظرونا.
· لقينا لينا موضوع.
· جمال الوالي قال حافظنا على توليفة الفريق.
· يا زول قول حافظنا على توليفة الهلال القديمة.
· انتوا المريخ دا عندكم فيه شنو كمان؟.
· المجموعات دي وصلتوها بي بكري المدينة.
· يمين تلعبوا (21) سنة بي ناس رمضان عجب وامير كمال وعنكبة ما تصلوا.
· هسع قالوا يصلحوها بـ (عمر بخيت).
· الممتاز السنة قبل الماضية شالوه بـ (هيثم مصطفى).
· وقبلها بي كم سنة بـ (كلتشي).
· وقبلها بـ (هيثم طمبل).
· عندكم شنو في المريخ.
· ولا حاجة.
· بعد كدا نكتب بي عين قوية في المريخ.
· جمعية المريخ العمومية القادمة مفروض يدورها الامين البرير.
· الاخ الحبيب خالد احمد عبدالرحمن (الابيض المربع الاول شرق) – لك كل الود والتقدير ..بالتأكيد لا نقصد التقليل من مدينة الابيض الحبيبة علينا جميعا هي فوق الرأس…لك العتبى حتى ترضى – بس عنكبة دا ما عارف ح تستحملوه كيف؟.
· …………..
· عاجل : ممكن (المعلم) يبقى (طالب)؟.